Read Nyishi 1 SAMUYEL 27 Bible Online

1 SAMUYEL 27 - Nyishi bible

1 SAMUYEL 27

¹Ho Debid mwwg hang ho benum, “Aal loog ngo Soulwg alaqho sitayi. Hoqgab ngo Palistan gvdab kenam si hog mwlwngam al yaatayi. Ho Soul ngam Israelwg gvda door tuluho meegaq kuram, hoo ngo mwwg alaq hoqgv keleq tayin.”

²‍Hoqgab Debid la mwwg lvgab dooba bo nyi lwwxv gorab layil Maok gv ko tuup Akis, Gat gv lvpw at dookub wnum.

³‍Hoo Debid mwv la mwwg nyi tulungv, mwwg imiq dvpar nyi mwlwngv, hoo Debid mwwg nywxw vnyiv kam, Jejreel hoqgv Ahinoam, hoo Karmelwg Abigail, Nabalwg xwwmiv, Akis lvgab Gat ho doobanum.

⁴‍Hoo hwdlo Soulnvn Debid Gatwb ken kuba hvl betam yukun, mwv mwam meegaq kumanum.

⁵‍Ho Debid Akisnvn benum, “Noqg vnyiqkv ngam mwwswl kvvlwq paloqkam, ngam noqg gvda pamda golo jitbv ho ngo hoqho dootayin. Hoggub noqg nyerangv noqg xinam bopam so noqg lvgab dooba tayin?”

⁶‍Hoqgab hoq aalho Akis mwam Jiklag gvdangam jinum. Hoqgab soolo namgub Jiklag gvdangv Judag lvpw atgab doodwn.

⁷‍Hoo Debid Palistan gvdaho doonam aalv vnyw nywg la pool bvrpynum.

⁸‍Debid la mwwg nyi tulungv Gesur nyi tulungam, Girji nyi tulungam, hoo Amalek nyi tulungam nyob pacanum, hoggab bulv hoqg gvda tuluho kol gv doodu bo nyiib nyinum. Mwv Ijipt gvdag Sur namgub nyob pacanum.

⁹‍Hoo Debid gvdag nyiam nyega ge ho nyem ge akkam turm maanum, hvbmabde sviyangam, hvvbam, svdam tulungam, svjin tulungam, hoo vjam tulungam naalayil, hoo Akis dookho hookur kunum.

¹⁰“Soolo no hogloq ho nyob papen hvl?” Akis tox yukam, Debid betam dvn, “Judag Negeb ho,” ho “Negeb gv Jerameel nyi tulungam,” ho “Negeb gv Kenait nyi tulungam nyob papen.”

¹¹‍Hoo Gat ho pui baqa bo akkam doom mvmab dvb Debid nyega ge hoo nyem ge mwlwngam mingtwrnum, ho mwwgamv, “Bulv ngulam betam tayi, ‘Debid sulak so mwlw sam nyinbov.’” Ho Palistan gvdaho mwv dooyikho soq si mwwg nyicwngv hvl betayi.

¹²‍Hoo Akis Debidnvn mwwjwnv, mwwgamv, “Mwv mwwg Israel nyiilungam vc loodab oyum paku; hoqgab mwv ngoqg nyerab lwxiam dooi kude.”