Read Nyishi 1 SAMUYEL 28 Bible Online

1 SAMUYEL 28 - Nyishi bible

1 SAMUYEL 28

¹Hoq moodho Palistan nyi tulungv, Israelam ceekol nyob padwb bulug sipai tulungam goqkumnum. Hoo Akis Debidnvn benum, “Mwwgab to no la noqg nyi tulungv ngoqg lvgab sipaib wmin gvtayin”

²‍Debid Akisnvn benum, “Aljaqpa, no cengyi nvpv hoggv noqg nyerangv nyila dvn.” Hoo Akis Debidnvn benum, “Aljaqpa, ngoqg swwgam rvky bo gob nam ngo mvtayin.”

³‍Hoq moodho Samuyel siknum, hoo Israel mwlwngv mwwg gab nyix-riinum hoo mwwg atwg bopam Rama ho mwam liiknum. Hoo Soul nyoky nyubam la sootu nyub tulungam gvda hoqgv ruqpaqnum.

⁴‍Palistan nyi tulungv hookumnum hoo Sunem ho svmcw mvnum. Hoo Soul Israel mwlwngam goqkumnum, hoo bulv Gilboa ho svmcw mvl doonum.

⁵‍Hwdlo Soul Palistan nyi tulug sipaiyam kaapa tvl mwv bosnum, hoo mwwg hangv vcjaqb tvmdwrnum.

⁶‍Hoo hwdlo Soul At Swn toxyin, At Sw mwam yuma hookam, ho Urim hookam, ho nyiqry benbo tulu lvgab bvrwqkam birwq maanum.

⁷‍Ho Soul mwwg nyera tulungam benum, “Nyem nyoky nyub loq ak ngoqgab meelin to, ho ngo mwnwg dookub wgdvl mwnwn tox kvka tayin.” Hoo mwwg nyera tulungv mwam benum, “Kaato, En-dor ho nyem nyoky nyub ak doodo.”

⁸‍Hoqgab Soul mwv atv asaq nyiib nyilayil hoo asaq vjam kootwl hoo wnum, mwv la mwwg lvgab nyi vnyi go wmin gvnum. Hoo bulv aiho nyem dookho haanum. Hoo mwv benum, “Ngoqgab nyoky hiqka tvb hoo ngo hiyvg oram eminam goqtayin no ngoqgab ham goqca tvb.”

⁹‍Nyem mwam benum, “Jvqtw jaqb no cengdo Soul hoggv nyipa kun, ho hoggub mwv nyoky nyubam la sootu nyub tulungam gvda hoqgv ruqpaqnum. Hog gab no ngam sig dakap ho haam tadwn?”

¹⁰‍Hvbmabde Soul At Swg eminho dingnum, “At Sw swwl doody deedib, soq pagoq gab noqg aoho laqm baqnam mam haamram.”

¹¹‍Ho nyem akv benum, “Hiyvg oram mam ngo noqgab goqca yin do?” Mwv benum, “Samuyelnvn ngoqgab goqca tvb.”

¹²‍Hwdlo nyem akv Samuyelnvn kaapa yin, mwn vcjaqb sogoql xabnum. Hoo nyem akv Soulnvn benum, “Hog gab no ngam sur yaagub nyipa kun? No Soul suknyi.”

¹³‍Lvpw atv mwnwn benum, “No bos maabv. Hoggv no kaat ba?” Hoo nyem akv Soulnvn benum, “Swcw ura hoqgv pwnbo ak lengdunam mam ngo kaapa do.”

¹⁴‍Mwv mwnwn benum, “Mwwg apongv hoggub nyido?” Hoo mwn benum, “Nyekam bo nyi ak lingdu do, hoo mwam kamt vj lvgab hwwbum paku.” Hoo Soul cengnum hoqhv Samuyel hvl, hoo mwv mwwg nyuqm mam ked deela ho pvxwl hoo mwam modul xumnum.

¹⁵‍Ho Samuyel Soulnvn benum, “Hog gab no ngam so haam dvb goqcal nyikwq-swq dvn?” Soul birwqnum, “Ngo vc loodab mwwdwq do, hoggab Palistan nyi tulungv ngam ceekol beo-belam bidul doodo, hoo Pwnbov ngoqg hoqgv aado nukba hoo ngam agam nyiqry benbo tulug lvgab la yuma lvgab hog birwql betam kuma. Hoqgab hoggv ngo nyitayin ham ngam betam kodwb, ngo nam goqca pakun.”

¹⁶‍Hoo Samuyel benum, “Hog gab no ngam toxdvn, hoggab At Sw noqg hoqgv wleq paku hoo noqg ceebio gob nyipa ku?

¹⁷‍Ngam mwv agam goonam hvb At Sw nam nyipa ku, hoggab At Sw lvpw-hatiam noqg alaq hoqgv tvqnyi gob mvl hoo ham noqg door-doopw Debidnvn jipa ku.

¹⁸‍Hoggab no At Swg gomcwr yalam tvjw maanum hoo Amalek nyi tulungam ceekol twryum mvdwb benam mam nyimanum, hoqgab soq aal so soq sib At Sw ngoqgab nyim pakun.

¹⁹‍Hoq lvg-lvgab, At Sw Israelam la nam Palistan nyi tulug alaqho jilwq tayin, hoo aaram mam no la noqg ko tuupv ngoqg lvgab dooba to. At Sw Israelwg sipai tulungam kam Palistan nyi tulug alaqho jilwqtayin.”

²⁰‍Ho Samuyel hoqhvb gomcwr googam gab Soul bos kunv kedho sortwql karnum. Hoo aal-aiywb mwv hog dvma ko-gab, mwv ator dook maanum.

²¹‍Hoo nyem akv Soulwg dookub haanum, hoo mwwg vc loodab bosnam mam mwn kaapa yin, mwn mwam benum, “Kaato, noqg paqnv noqg benam mam loorwq tvba. Ngoqg swwgam ngo atv ngoqg alaqho bwwtwl hoo no hoggv ngam benum ham loorwql nyitkun.

²²‍Hoqgab sija, noqg paqnam no kam loorwqto. Ngo wtw dvs loq noqgab mwx-mvaq tayin; hoo dvto, ho no ator tai hwdlo noqg lamtab ngo wikun.”

²³‍Mwv loorwq maanum hoo benum, “Ngo dvram.” Hvbmabde mwwg nyera tulungv nyem lvgab lvkin gob mwam dvm dvb xaateqnum, hoo mwv bulug goonam mam tanum. Ho mwv ked hoqgv gorabnum hoo kartam aoho doonum.

²⁴‍Nyemv mwnwg namho jwwtw bo svv hvvdo dorg daqgnum, hoo mwn nyebia jaqb ham patab mvnum, hoo mwn wtwngam naalayil hoo ham nunyiaqnv mununum hoo opap kiilwq maab wtw ngamkam kabnum,

²⁵‍hoo mwn ham Soul la mwwg nyera tulug agaho joop jinum, hoo bulv dvnum. Ho bulv gorab kunv hoo hoq aiho wleq kunum.