Read Nyishi 1 SAMUYEL 3 Bible Online

1 SAMUYEL 3 - Nyishi bible

1 SAMUYEL 3

¹Sija Ili uraho yaapa Samuyel At Swg bonam nyidunam. Hoo At Swg gomcwrv hoq moodho viyig tapa maanum; hoqho lwxiam nyiqry kaamanum.

²‍Hoq moodho Ili, axa ko-gab mwwg vnyiqkv kaadar kumanum, hoqgab mwwg atwg dookho mwv karl doonum.

³‍Pwnbog lempv guiyum maatanum, hoo Samuyel At Swg dvrwq namlog Pwnbog pvvb uddum mam apko ho gel karnum.

⁴‍Ho At Sw Samuyelnvn goqnum, hoo mwv benum, “Ngo si doodwn!”

⁵‍hoo Ili dookub xaranv benum, “No goqgam gab, ngo si haaiyin.” Hvbmabde mwv benum, “Ngo nam goqma; lokta karta ku.” Ho mwv wknv hoo karnum.

⁶‍Hoo At Sw lokta, “Samuyel!” hvl goqnum hoo Samuyel gorabnv hoo Ili dookub haanum hoo benum, “No goqgam gab, no si haaiyin.” Hvbmabde mwv benum, “Ngoqg ko, ngo nam goqma; Lokta karta ku.”

⁷‍Samuyel At Swn cengma taanum, hoo At Swg gomcwram mwam bekin maatanum.

⁸‍Hoo At Sw Samuyelnvn luum dvb goqnum. Hoo mwv gorabnv hoo Ili dookub haanum hoo benum, “No goqgam gab, no si haaiyin.” Ho yaapa ak ham At Sw goqdu do hvl Ili cengknum.

⁹‍Hoqgab Ili Samuyelnvn benum, “Wgdvl karta, hoo mwv nam goqbaloqkam, no hvl beta, ‘At Sw gooto, noqg nyerangv tado.’” Hoqgab Samuyel wknv mwwg kark ho karnum.

¹⁰‍Hoo At Sw hoqho haalayil hoo daqnum, otuqho goqnam hvb, “Samuyel! Samuyel!” hvbkalam goqnum. Hoo Samuyel benum, “Gooto, noqg nyerangv tado.”

¹¹‍Ho At Sw Samuyelnvn benum, “Kaato, ngo Israel ho hog loq ak nyitayin ho ham nyuru ruunyi baqn bo nyiicwr-cwrxiv tapa yin hvi-gwri tayin.

¹²‍Hoq aalam ngo Ili nvla mwwg nombu gab agam gooknam ham berab hoqgv bitwr-benya namgub bep kunam mam, ngo ceekol niqtuq nyilin tayin.

¹³‍Hoo ngo bibwq gviyin ngo mwwg nombungam nwrba gob laqm-baqm tayin, hoggab mwv mwwg ko tuup tulug Pwnboam benyi-beyal nyimurnam mam mwv cengnum, hoo mwv bulam mvtur maanum.

¹⁴‍Hoqgab ngo Ilig nombungam dingr pakun, mwwg nombu hoqg nyimurnam mam pwrv la aky jinamv nwrba gob mvxaq lak ram.”

¹⁵‍Samuyel ar namgub karl doonum; ho mwv At Swg nam viyap pam ciqkonum. Hoo Samuyel mwwg nyiqry kaanam mam Ilinvn betam dvb bosnum.

¹⁶‍Hvbmabde Ili Samuyelnvn goql hoo benum, “Ngoqg ko, Samuyel.” Hoo mwv benum, “Ngo si doodwn.”

¹⁷‍Hoo Ili benum, “Hoggv mwv nam benum? Hoqham ngam kvs maabv. Pwnbov nam vcjaqb laqm-baqm tayin mwv nam betam nam hog mwlwngam no ngam betam maab kvs baloqkam.”

¹⁸‍Hoqgab Samuyel hog akkam kvs maab mwam hog mwlwngam betamnum. Hoo mwv benum, “Hoqhv At Sw mwv. Hoggv mwwgab aldvn ham mwam nyim to.”

¹⁹‍Hoo Samuyel swwrab kunum, hoo At Sw mwwg lvgab doobanum hoo mwwg gomcwr goonam mwlwngv kvxaqmab nyinum.

²⁰‍Hoo Dan hoqgv Beerseba namgub Israel nyi mwlwngv Samuyelnvn At Sw nyiqry kaal bem dvb xuqpa ku hvl cengknum.

²¹‍Hoo Silo ho At Sw lokta kaakinum, hoggab At Sw Samuyelnvn Silo ho At Swg gomcwr lvgab kaakinum.