Read Nyishi 1 SAMUYEL 30 Bible Online

1 SAMUYEL 30 - Nyishi bible

1 SAMUYEL 30

¹Hwdlo Debid la mwwg nyi tulungv aal loum deen ho Jiklag ho hvvc kunum, Amalek nyi tulungv Negeb la Jiklag gvdangam ceekol nyob pvlwqnum. Bulv Jiklagngam nyob paiyanv hoo ham wm rwlwq tvl gupaq mvnum

²‍hoo nyem tulungam hoo hoqho doonbo mwlwngam anyo ge hoo koi ge mwlwngam nootunum. Bulv nyi akkam mengmanum, hvbmabde bulam boolayil hoo bulug lamtab wnum.

³‍Hoo hwdlo Debid la mwwg nyi tulungv bopam ho hvvc yukho, bulv kaaknamv wm rwpaq tukul dooknum, hoo bulug nywxwngam hoo ko tuupam hoo nyem ko tulungam nyumwb booknum.

⁴‍Ho Debid la mwwg lvgab dooba nyiilungv vcjaqb sogoq kunv hoo bulv ator akkam dooma daqdwb nyix-riil xabnum.

⁵‍Debidg nywxw vnyi, Jejreelwg Ahinoam nvla Karmelwg Nabalwg xwwmy Abigailnvn nyumwb booknum.

⁶‍Hoo Debid vcjaqb hentwrnum, hoggab nyiilungv mwam wlw hurx dvb agam goonum, hoggab nyiilu mwlw nyiicwr-cwrxiv mwwg ko tuup gab la nyem ko gab vcjaqb mwwdwqnum. Debid mwv atv mwwg Pwnbog At Sw ho atoram kaapanum.

⁷‍Hoo Debid Ahimelek ko tuup, nyub Abiyatarnvn benum, “Nyub lolupam ngam bwa tvb.” Hoqgab Abiyatar nyub lolupam Debidnvn bwa jinum.

⁸‍Hoo Debid At Swn toxnum, “Soq nyemaq acam kokwb ngo ruqmin gviyin dvi yv? Ngo bulam ruqtin kind yv?” Mwv birwqnum, “Ruqmin gvto, no hoggub nyijaqkam bulam ruqtin tayin hoo jvqtw jaqb bulam pvpy tayin.”

⁹‍Hoqgab Debid la mwwg lvgab lwwx go nyiingv wrabnum, hoo bulv Besor kucw ho hvvcnum, hoqho nyi tuugin dooxiqnum.

¹⁰‍Hvbmabde Debid la mwwg lvgab nyi lwwpy go ruqmin gvnum. Besor kucwngam rabnyi kumab swnyiq-svnyiaq bov lwwnyi go dookur kunum.

¹¹‍Bulv Ijipt nyi ak nyoro lvpa ho kaapanum hoo mwam Debid dookub boa jinum. Hoo bulv mwam wtw jinum hoo mwv dvnum. Bulv mwam issam twwm dvb jinum,

¹²‍hoo bulv mwam taoq aaxy hoqgv wtw cwwnam ak jinum hoo roo losinam piumnyi go jinum. Hoo hwdlo mwv hoq tulu ham dvi kam, mwv lokta saqrab kunum, hoggab mwv aal loum gola ai yubum go hog dvma twwmanum.

¹³‍Hoo Debid mwam benum, “No hiyvg hoqgv? Hoo no hogloqkv? Mwv benum, “Ngo Ijipt yaapa akv, Amalek nyi akwg nyerangv, hoo ngoqg nyiit atv ngam apaqnum hoggab ngo aal loum otuqho vcnum.

¹⁴‍Ngulv Keretwg Negeb ho nyob panum hoo Juda gvdag Kalebg Negeb nyob panum, hoo ngulv Jiklag bopam mam wm rwlwqnum.”

¹⁵‍Hoo Debid mwam benum, “No ngam hoqg nyemaq acam dookub ig yin yv?” Hoo mwv benum, “No ngam mengram hvl ngoqg nyiit at alaqho jilwq kuram hvl Pwnbo eminb no dingr to, hoo ngo nam soq nyemaq acam dookub igtayin.”

¹⁶‍Hoo hwdlo mwv mwam boolayil ig yukho, kaato, bulv rooto malo ko gvdaho cwrsaq-bvraqb dvl-twwl hoo noso soominl doodunam, hoggab bulv naleqgo Palistan gvda hoqgv la Juda gvda hoqgv nyob pal naareq kunum.

¹⁷‍Hoo Debid aal loogwn ho ar jij-mam kalam nyob parabnv ariyum namgub bulam nyob panum, hoo svjin lvgab yaapa lwwpy go keco kunboam apaq tvl nyi akkam kelin mvmab mengknum.

¹⁸‍Amalek nyi tulug naaknam hog mwlwngam Debid nookur kunum, hoo mwwg nywxw vnyiam rub ywwlin kunum.

¹⁹‍Anyo ge ho koi ge, ko tuup ge ho nyem ko ge, nyob pal naareqnam hog mwlwngam akkam niim mvmab nookurnum. Debid hog mwlwngam boqkur kunum.

²⁰‍Debid sibin-svv tuun-mee mwlwngam naareq kunum, hoo nyiilungv tuun-mee tulungam mwwg otuqb ruql wgnum, hoo benum, “Soq tulu si Debidg nyob paareq kunamv.”

²¹‍Ho Debidnvn wmin gvla kumab nyi lwwnyi gon la swnyiq-svnyiaq bo nyi tulug dooiya ko Besor kucw ho haaknum. Hoo bulv Debidnvn lingrwqnum hoo nyiilungv mwam kvvrwqnum. Hoo hwdlo Debid nyiilu ogum ho hvvnwq yukun bulv mwam salam jirwqnum.

²²‍Ho nyic-nyia bvla dooxa bo nyi tulungv hiyv Debid lvgab wba bov benum, “Hiyv ngulug lvgab wmin gvma bo, nyiicwr-cwrxiv mwwg nywxwngam la ko tulungam arongam naagdvl hoo wleq mvto, hoggab bulv ngulug lvgab wmin gvma, ngulug nyob pal naareq kunam dupum-dvrab soqgv bulam ngulv hog akkam jiram.”

²³‍Hvbmabde Debid benum, “Ngoqg vbw-bor tulu, hoggv At Sw ngulam jipa kun, nulv soq sam hvb nyimabv. Mwv ngulam hoocum paku hoo ngulam ceekol nyob panbo nyemaq acam mam ngulug alaq lo jilwq pakun.

²⁴‍Hiyv kam soq bvrwq sam nulam taram? Hoggab nyob patab in bov la ho hiyv naara-paaxangam kaal doog yaan bov homyin gob naaiyin do. Bulv aiyin lvkin dvb naaiyin do.

²⁵‍Hoo mwv hoqham pvvb akwb mvnum hoo hoq pvvb hv hoq aal jaq hoqgv soq aal namgub Israel ho nyil doodwn.

²⁶‍Hwdlo Debid Jiklag ho haaikun, mwwg ajin tulungam, ho Judag nyiixa tulungam naareqnam tuugin mwv kanam tvl begamv, “Soq si nulgab At Swg ceebio tulu hoqgv pareq kunam akiv.”

²⁷‍Hoqham Betel ho doon boam, Negebg Ramot ho doon boam, Jattir ho doon boam,

²⁸‍Aroyer ho doon boam, Sipmot ho doon boam, Estmeoa ho doon boam,

²⁹‍Rakal ho doon boam, Jerameel nyi tulug bopam tulu ho doon boam Kenait nyi tulug bopam tulu ho doon boam,

³⁰‍Horma ho doon boam, Bor-asan ho doon boam, Atak ho doon boam,

³¹‍Hebron ho doon boam, hoggab hogloq ho Debid la mwwg nyi tulungv gaql yvk nyook mwlwngam jinum.