Read Nyishi 1 SAMUYEL 4 Bible Online

1 SAMUYEL 4 - Nyishi bible

1 SAMUYEL 4

¹Hoo Samuyelg gomcwrv Israel mwlw ho haaknum. Sija Israelv Palistan nyi tulungam ceekol nyob patab wnum. Bulv Ebenejar ho svmcw mvl doonum, hoo Palistan nyi tulungv Apek ho svmcw mvl doonum.

²‍Palistan nyi tulungv Israelam ceeko taab daayob soolinum, hoo hwdlo nyobv parab yukun, Israelam Palistan nyi tulungv paiya kunum, hoq nyob pakho nyiingv lwwyw vpy gob mengnum.

³‍Hoo hwdlo sipai acamv svmcw ho haaikun, Israelwg nyi nyiixa tulungv benum, “Hoggub soolo Palistan nyi tulug agaho At Sw ngulam mviya pakun? Kuj ngulv At Swg pvvb uddum mam Silo hoqgv so baqa tuj, ho hoqham ngulug pengko so baqa tuj hoo ngulug ceebio tulu huqlw hoqgv ngulam ywwlin mvdwb.”

⁴‍Hoqgab nyiilungam kanam tvl Silo hoqgv nyiit At Swg pvvb uddum mam baqa mvnum, hoqhv cerubimwg pwqlw aoho doonum. Hoo Ilig ko tuup vnyi Hopni la Pinehas bunyiv Pwnbog pvvb uddum dookho doonum.

⁵‍At Swg pvvb uddumv svmcw ho hvvc kalam, Israel mwlwngv vcjaqb sogoql goqr ronam, ho swcwngv hwqdinum.

⁶‍Hoo hwdlo Palistan nyi tulungv sogoqnam yalam tapa yin, bulv benum, “Hog yu Hibru tulug svmcw alo vcjaqb sogoql goqr rogdvn?” Hoo hwdlo bulv At Swg pvvb uddum mam svmcw lo baqa pak hvl cengyi kam,

⁷‍Palistan nyi tulungv bosnum, hoggab bulv benum, “Pwnbo ak svmcw lo haapa ku.” Hoo bulv benum, “Ngulv mwwdwqdo! Hoggab otuqho soq sib nyika maanum.

⁸‍Ngulv mwwdwqdo! Hiyv yu soq atorbo pwnbog tulug huqlw soqgv ngulam ywwlin tayin? Soq pwnbo tulu si Ijipt nyi tulungam deedy luuxib swlin-momin lvgab diixa-raraho haalayil mingtwrnum.

⁹‍Haakam to, hoo nyega gvp tulu hvb nyito, Palistan nyi tulunga, hvbmaba loqkam nulv Hibru tulug raasur gob nyitayi bulv nulam nyiky kunam hvb; nyega gvp tulu hvb nyob pato.”

¹⁰‍Hoqgab Palistan nyi tulungv nyob panum, hoo Israelam paiyanum, hoo nyiicwr-cwrxiv mwwg atwg nammwb bulv kenum. Hoo hoqho vc loodab nyiingam mengnum, hoggab lvpia wnbo Israelwg sipaiyam lwwyw cammum go mengnum.

¹¹‍Hoo Pwnbog pvvb uddum mam naareq kunum, hoo Ilig ko tuup vnyi, Hopni la Pinehas bunyiv siknum.

¹²‍Benjamin nyob hoqgv nyi ak mwwg vjv puceq-puiyeq tvl hoo mwwg dumpo ho kac-tanyiaq tvl nyob pak hoqgv Silo ho xaranum.

¹³‍Hwdlo mwv haai yikho, Ili lamta bviywrho dootwl mwv kaaya yaal doonum, hoggab Pwnbog pvvb uddum gab mwwg hangv tvmdwrnum. Hoo hwdlo nyi ak hv bopam ho hvvcil hoo puiyam betam yukun, bopam hoqg doonbo mwlwngv xabnum.

¹⁴‍Hwdlo mwlwngv cic-rwrwb xabnam mam Ili tapa yin, mwv benum, “Hoggv yu soq hur-marab dug dvn si?” Ho nyi ak hv nyebia jaqb Ili dookub haabnv puiyam betamnum.

¹⁵‍Hoq moodho Ili vnyw cam kiya leq piin gob axa kunum hoo mwwg vnyiqkv nyiqm ko-gab mwv kaapa kumanum.

¹⁶‍Hoo nyi ak hv Ilinvn benum, “Ngo nyob pak hoqgv haanbo akv; nyob pak hoqgv ngo soolo kelin yukun.” Hoo mwv benum, “Ngo ko, hoggub nyidu de?”

¹⁷‍Puiyam baqnbo akv birwql hoo benum, “Israelv Palistan nyi tulug aga hoqgv keleq paku, hoo nyiilug pengko lo vc looda mviya gvnkun. Noqg ko tuup Hopni la Pinehas, vnyiv kam sin kun, hoo Pwnbog pvvb uddum mam naareq gvnkun.”

¹⁸‍Hwdlo Pwnbog pvvb uddum mam bepa twqda kalam, Ili mwwg dootam langk toggoq yaab mwv tabtol geqlnum, hoo mwwg lwwpongam tvbxwq kunv hoo mwv siknum, hoggab nyi ak hv nyekam gvi hoo vgw ko-gab hvb nyiknum. Mwv Israelam vnyw campy go nyegam pal doognum.

¹⁹‍Hoq moodho mwwg nyeexw Pinehaswg nywxwngv ko gvl ko bwwsv twqb nyinum. Hoo hwdlo mwn Pwnbog pvvb uddum mam naareqnam mam la mwnwg at dorv la mwnwg nyolv sinam mam tapa yin, hoo mwn gubxw kunv hoo ko bwwnum, hoggab haqmapaq galo mwnwg aoho cincv cia kunum.

²⁰‍Hoo mwn sisv twqb nyid moodho mwnwn kaaya bo nyem tuluhv mwnwn benum, “Bos maabv, hoggab no nyega ko ak dwrbuqpa ku.” Hvbmabde mwn hog birwq maanum ho paarab kamanum.

²¹‍Hoo mwn koam Ikabod hvl eminum, hoo begamv, “Yuunamv Israel hoqgv wleq paku!” hoggab Pwnbog pvvb uddum mam naareq paku hoo mwnwg at dorv la mwnwg nyolv sigam gab.

²²‍Hoo mwn benum, “Yuunamv Israel hoqgv wleq paku, hoggab Pwnbog pvvb uddum mam naareq paku.”