Read Nyishi 1 SAMUYEL 5 Bible Online

1 SAMUYEL 5 - Nyishi bible

1 SAMUYEL 5

¹Hwdlo Palistan nyi tulungv Pwnbog pvvb uddum mam naareq layil hoo ham bulv Ebenejar hoqgv Asdod baqanum.

²‍Ho Palistan nyi tulungv Pwnbog pvvb uddum mam naalayil hoo ham Dagonwg nam uraho baqanum hoo ham Dagonwg bviywrho pvvl apnum.

³‍Hoo hwdlo Asdodwg nyiilungv ar rogwn so arkomc gorab layil kaanamv, Dagonv bobum sumsum tvl tabto kunv At Swg pvvb uddum deelaho bumptvl doonum. Hoqgab bulv Dagonnvn naarab layil hoo mwam mwwg dookho ap pvvkurnum.

⁴‍Hvbmabde hwdlo bulv ar rogwn so arkomc gorab kaanamv, Dagonv bobum sumsum tvl tabto kunv At Swg pvvb uddum deelaho bumptvl doonum, hoo Dagonwg dumpo ngvla mwwg alaqkv deela ho yoqcul yoqp tvl doonum. Dagonwg meam arongv doonum.

⁵‍Hoggab Dagonwg nyub tulu ngvkam hoo Dagonwg nam uraho haanbo mwlwngv Asdodwg Dagon deela ho soolo godab nyiv dwql wma dvn.

⁶‍At Swg alaqkv Asdod nyiilungam vcjaqb ceekonum, hoo mwv Asdodam la hoqg dwrbu-dwryangam bulam un-tarwb nyirab mvnv hoqho vc loodab bos dvb hentwr hemnum.

⁷‍Hoo hwdlo Asdodwg nyi tulungv soq hog mwlw nyiknam sam kaatwl bulv benum, “Israelwg Pwnbon xumk pirr sam ngulug lvgab doom mvmabv, hoggab mwwg alaqkv ngulam vc loodab ceeko do hoo ngulug pwnbo Dagonnvn kam ceeko do.”

⁸‍Hoqgab bulv Palistan nyi tulug lvpw at tulungam pui kanam tvl bulv lvkin gob hookumnv hoo benum, “Israelwg Pwnbon xumk pirr sam ngulv hoggub mviyin duku?” Bulv birwqnum, “Israelwg Pwnbog xumk pirram Gat diingarho baqptuj.” Hoqgab bulv Israelwg Pwnbon xumk pirram hoqho baqpnum.

⁹‍Hvbmabde bulv hoqho bvqlwq yikho, At Swg alaqkv bopam mam ceekol vc loodab bos dvb nyinum, hoo anyo ge akam ge mwv bopam nyi tulungam hentwr hemnum, ho bulug pengko ho un-tarwb nyirab mvnum.

¹⁰‍Hoqgab bulv Pwnbog pvvb uddum mam Ekronwb kanamnum. Hvbmabde Pwnbog pvvb uddum mam Ekron ho bvqc kalam, Ekronwg nyiilungv sogoql xabnum, “Bulv Israelwg Pwnbon xumk pirram ngulam la ngulug nyiilungam mengm dvb baqa paku.”

¹¹‍Bulv Palistan nyi tulug lvpw at tulungam pui kanam tvl bulv lvkin gob hookumnv hoo benum, “Israelwg Pwnbon xumk pirram hoq nyookub wkur mvj tuku, hoo ngulam la ngulug nyiilungam meng kuma dvb.” Hoggab bopam bumpw ho vc loodab bos dvb nyiknum. Pwnbog alaqkv henla kuma dvb ceekonum.

¹²‍Un-tar gvnam hoqgv sima bo nyi tulu ngvla bopam hoqg xabnamv ao lvpwb caanum.