Read Nyishi 1 SAMUYEL 6 Bible Online

1 SAMUYEL 6 - Nyishi bible

1 SAMUYEL 6

¹At Swg pvvb uddum mam Palistan nyi tulug gvdaho pool kvn doonum.

²‍Hoo Palistan nyi tulungv nyubam la nyoky nyub tulungam goqal hoo benum, “At Swg pvvb uddum sam ngulv hoggub mviyin duku? Ngulam betam tvb soq sam ngulv hoggub nyil hoqg otuq dookub kanam taikun.”

³‍Bulv benum, “Israelwg Pwnbon xumk pirr sam nulv kanam baloqkam asarb kanam maabv, hvbmabde sam nyimurnam aky lvgab jikur to. Ho nulam mwp jitayin, hoo hoggab mwwg alaqkv nulug hoqgv aadob wleq maanum nulv ham cengtayin.”

⁴‍Hoo bulv benum, “Mwam hognvk nyimur akiv ngulv jitwl wkur mvtayin?” Bulv birwqnum, “Ang go hun lvgab un-taram mwiyw-mvc tvl hoo ang go hun lvgab kubungam mwiyw-mvc tvl, Palistanwg lvpw atv hog hwdgo doodwn hwd kalam go mvto, hoggab nulug aoho hoola nulug bir at tulug aoho swlin-mominamv nyiknum hvbkalam mvdwb nyitayin.

⁵‍Hoqgab nulv hoggub nyijaqkam nulug un-taram la nulug gvdangam mucu-mviya bo kubu tulug guss sam mvto, hoo Israelwg Pwnboam yuum dvb jito. Ho lokam mwwg alaqkv nulam la nulug pwnbo tulungam la nulug gvdangam mwv swrso dvb mvkam yin pv.

⁶‍Ijipt nyi tulu ngvla Parongv bulug hang kamtwrnam hvb nulv hoggub nulug hangam kamtwr dvn? Bulam mwv vc loodab hentwr dvb nyixo kokw so bulv nyiilungam kanam maan mvi yv, hoo bulv wleq kumanam yv?

⁷‍Ho sija nitbo svv gaari lo mwx-mvaqto hoo nywywngam luuk tuka maanam gwwi twwdunam svv hvvn loq dornyi go naato, hoo gaari ham svv dornyi ho rublwq jito, hvbmabde hoqg svv koam nammwb bookur gvdwl apto.

⁸‍Hoo At Swg pvvb uddum mam naato hoo ham svv gaari aoho apto hoo mwam nyimur gab hun lvgab mwiyw-mvc tvl aky jinam hun gussam hoqg xumk pirr bviywrho vlwqtvl nulv wkur mvto. Ho ham kanam to hoo ham atwg mwwkwb wwm to

⁹‍hoo kaaya to. Hoqhv hoq atwg gvda, Bet-semes, lamtab caak baloqkam, hoqhv mwv nyi hiyv ngulam soq koijaqb hentwr sam hemnum, hvbnyima baloqkam, hoqhv mwwg alaq kuma nyi ngulam mengn bov hvl ngulv cengtayin; ngulam soq nyinam si mood akin ho nyinum.”

¹⁰‍Nyi tulungv hoqgv nyinum, hoo gwwi twwdunam svv dornyi go naalayil hoo bulam svv gaari ho rublwq jinum hoo bulug koam namho tuml apnum.

¹¹‍Hoo bulv At Swg pvvb uddum mam svv gaari ho joolwqnum hoo uddum bviywrho bulug un-taram la kubungam hun lvgab guss mvnam mam vlwqnum.

¹²‍Hoo svvngv Bet-semes daiyab wtw-kwlwl bulv liijo-liijonv wnum. Bulv laqc-lvqbwq wkar-war maanum, hoo Palistanwg lvpw atv bulug kokwb wmin gvnv Bet-semes door namgub wnum.

¹³‍Hoq moodho Bet-semes nyiilungv lywpa ho wtw am vly noodul doonum. Hoo hwdlo bulv kootul xumk pirram baql hoodu bo svv gaaringam kaapa yin, bulv hwnyir-hvmarl ham kaanum.

¹⁴‍Svv gaaringv Bet-semeswg Josua rongo uraho hvvc layil hoqho doqnunum. Hoqho wlw pwtbo pwg doonum. Hoo bulv svv gaari svvdangam wswb pvmwqnum hoo svv dornyiam At Swn boyuqnam aky gob jinum.

¹⁵‍Hoo Lebi nyi tulungv At Swg pvvb uddum mam joopoqnum hoo hoq bviywrho doonbo uddum mamkam joopoqnum, hoqho hun guss atag doonum, hoo hoq tulu ham wlw pwtbo aoho joopnum. Hoo Bet-semes nyi tulungv boyuqnam akiam la pwr jidynam mam At Swg aalho pwr jinum.

¹⁶‍Hoo Palistanwg lvpw at ang ngv ham kaape kul bulv hoq aalho Ekronwb wkur kunum.

¹⁷‍Hoq hun lvgab un-tar guss tulungam Palistan nyi tulug At Swn nyimur namgab aky jilwqnamv: Asdod gab ak, Gaja gab ak, Askelon gab ak, Gat gab ak, Ekron gab ak,

¹⁸‍hoo Palistanwg lvpw at ang gonwg gurum nwqtumnam bopam tulungam la nwqtum maanam nampam mam xika nv hun lvgab kubu gussam mvtwl jilwqnum. Wlw pwtbo bviywrho At Swg pvvb uddum mam joopoql joop kov soolo namgub Bet-semeswg Josuag rongo ho hvvky gob doodwn.

¹⁹‍Hoo Bet-semes nyiingv At Swg pvvb uddum mam kaagam gab bulug nyi tuugin mwv jwwtabnum. Mwv nyi cam kvn go mengnum, hoo nyiilungv nyix-riinum hoggab At Sw nyiilungam vc loodab jwwl mengnum.

²⁰‍Ho Bet-semes nyi tulungv benum, “Hiyv At Swg agaho daqnyi tayin, soq dvrwqbo Pwnbog aga so? Hoo ngulug soqgv aado mvdwb mwam hiyvg dookub kanam kub yu?”

²¹‍Hoqgab bulv Kiriat-jearim ho doonbo tulungam nyi kanaml pui bilwqnv begamv, “Palistan nyi tulungv At Swg pvvb uddum mam jikur paku. Igdvl naalayil ham nulug dookub baqca to.”