Read Nyishi 1 SAMUYEL 8 Bible Online

1 SAMUYEL 8 - Nyishi bible

1 SAMUYEL 8

¹Hwdlo Samuyel nyekam yukun, mwwg ko tuup tulungam mwv Israelam nyegam pal swwg mvdwb mvnum.

²‍Mwwg tuup vbw hoqg eminv Joyel, hoo vnyi deen hoqg eminv Abija; bulv Beerseba ho nyegam tulu gob doonum.

³‍Hvbsujaqkam mwwg ko tuup tuluhv mwwg lamtangam wmanum hvbmabde bulv swwd-geedwb nyikubnum. Bulv kam naatwl hoo jvqtwngam nyik-nyianum.

⁴‍Ho Israelwg nyiixa mwlwngv lvkin gob hookumnv Samuyelg dook Rama ho haanum

⁵‍hoo mwam benum, “Kaato, no nyekam duku hoo noqg ko tuup tulungv noqg lamtab wkma. Hoqgab sija asaq nyob tulug nyinam hvb ngul gab lvpw at loq ak xuqtbv ngulam nyegam pal doog mvdwb.”

⁶‍Hvbmabde hwdlo “Lvpw at loq ak ngulam nyegam pal doog mvdwb jitbv” hvl bulv beiyi kam hoqham Samuyel tvlwq maanum. Hoo Samuyel At Swn swgwnum.

⁷‍Hoo At Sw Samuyelnvn benum, “Nam nyiilungv hog mwlw benam mam no bulam tvjto, hoggab bulv nam haqpaq ma, hvbmabde bulug aoho ngoqg lvpw at gob swwl doognam mam bulv ngam haqpaq paku.

⁸‍Ngo bulam Ijipt hoqgv boolin yuk aal hoqgv jaq soolo namgub bulug hog nyinam-mvnam mwlwngv ngam haqpaq poqdu do hoo asaq pwnbo tulungam xumdu do, hoqhvb bulv nam kam nyidul doodwn.

⁹‍Ho sija, bulug benam tato; hvbmabde no bulam piwr jwr-jwr dvb beo-belam to hoo bulam pvvb bwwl doogbo lvpw atv bulam hoggub nyitayin ham bulam kaakin to.”

¹⁰‍Hoqgab mwwg hoqgv lvpw atgab konya bo nyiilungam At Swg gomcwr mwlwngam Samuyel bulam betamnum.

¹¹‍Mwv benum, “Nulug aoho pvvb bwwl doogbo lvpw atv soq sib nyitayin: mwv nulug ko tuup tulungam naatayin hoo bulam mwwg ceriot gab hoo mwwg svpuram xarg mvdvb hoo mwwg ceriot otuqb xarm dvb xuqlin tayin.

¹²‍Hoo mwwgab lwwyw sipai saab gob hoo camng sipai saab gob xuqlin tayin, hoo tuugin mwwg rongongam mvm dvb hoo mwwg vliam naam dvb, hoo nyob panan nwwxo-svtam mvm dvb hoo mwwg ceriotwg dupum-dvrab pam mvm dvb xuqlin tayin.

¹³‍Mwv noqg nyem ko tulungam kuty sungam bo mvm dvb hoo vcin mvm dvb hoo wtw mvm dvb naatayin.

¹⁴‍Mwv nulug diibuq bo rongongam hoo albo roo boolungam la olib svvn boolungam naatayin hoo hoq tulu ham mwwg nyerangam jitayin.

¹⁵‍Mwv nulug hoqgv am giiyw go hoo nulug roo boolu hoqgv hvbkalam naatayin hoo ham mwwg saabam la mwwg nyera tulungam jitayin.

¹⁶‍Mwv nulug nyera-paqn tulungam naatayin hoo nulug yaapa paalinam hoo nulug svdam tulungam naatayin, hoo bulam mwwg bonam nyim dvb jitayin.

¹⁷‍Mwv nulug sibin-svv jibwqnam mam naatayin, hoo nulv mwwg nyera raasur gob nyitayin.

¹⁸‍Hoo hiyam nulug at gab nulv daalin kunam ham, hoq aalam nulug lvpw atam nulv sogoql xabtayin, hvbmabde hoq aalam At Sw nulam hog birwq kuram.”

¹⁹‍Hvbmabde nyiilungv Samuyelg benam mam haqpaqnum. Hoo bulv benum, “Ma, hvbsujaqkam ngulug aoso lvpw at loq ak doom to,

²⁰‍ho ngulv kam asaq nyob tulu hvb nyikam yin pv, hoo ngulug lvpw atv ngulam nyegam pal swwg yin pv hoo ngulug otuqb wl hoo ngulam nyob pag yin pv.”

²¹‍Hoo hwdlo nyiilu mwlwg gomcwram tapel, mwv hoq tulu ham At Swg nyuru lo betin-betinl betamnum.

²²‍Hoo At Sw Samuyelnvn benum, “Bulug goonam mam tato hoo lvpw at loq ak mwjto.” Samuyel Israel nyi mwlwngam benum, “Nyiicwr-cwrxiv mwwg bopamb wnku.”