Read Nyishi 1 SAMUYEL 9 Bible Online

1 SAMUYEL 9 - Nyishi bible

1 SAMUYEL 9

¹Benjamin nyob hoqgv Apiag ko tuup Bekorat, Bekoratwg ko tuup Jeror, Jeror gv ko tuup Abiel, Abiel gv ko tuup Kis hvl eminam Benjamin nyob hoqgv doonum, nyi ak hv nyetnum.

²‍Hoo mwv Soul hvl eminam nyega ko ak doonum, yaapa ak hv kangam jaqnum. Israelwg nyiilu ho mwam kaap yaanbo nyega akkam doomanum. Mwv nyiilug pengko ho nyi mwlwngam ao yaanbo nyi ak gob nyinum.

³‍Soulwg ab Kisig svdam tulungv nyiinum. Hoqgab mwwg ko tuup Soulnvn Kis benum, “Noqg lvgab nyega yaapa tulungam boolayil svdam nyiinbo tulungam wgdvl meegaq ta.”

⁴‍Hoo mwv Iprayimg diisw gvdangam wpeqnum hoo Salisag gvdangam wpeqnum, hvbmabde bulv svdam tulungam meepa maanum. Hoo bulv Saalimwg gvdangam wpeqnum, hvbmabde bulv svdam tulungv hoqho daqmanum. Ho bulv Benjaminwg gvdangam wpeqnum, hvbmabde svdam tulungam meepa maanum.

⁵‍Hwdlo bulv Jup gvdaho haaikun, Soul mwwg nyera akam benum, “Kuj ngulv wkur nukuj, hvbmab nyiloqkam ngoqg ab svdam tulungam mwwdwq kuram hoo ngulam ya mwv mwwdwq tai yi.”

⁶‍Hvbmabde mwv mwam benum, “Kaato, soq bopam so Pwnbog nyi ak doodwk hvdo, hoo mwv mwlwg xikumnam nyi ngvk hvdo; mwwg hog mwlw benamv jvqtw dvk hvdo. Hoqgab ngulv mwwg dookub wnuj. Ngulv hogloq lamtab wiyin dvn ham lokam mwv ngulam bekin kamyi nvpv.”

⁷‍Ho Soul mwwg nyerangam benum, “Hvbmabde ngulv wb nyiloqkam, hoggv ngulv nyi ak bwa jitayin? Hoggab ngulug dvs baqnam mam duiyum paku, hoo Pwnbo nyi ak ham aky gokam jis dooma. Hoggv ngulug lvgab doodo?”

⁸‍Nyerangv Soulnvn lokta birwqnum, “Ngoqg lvgab rup sikil taqg doodo, hoo ngulug lamtangam ngulam betam kudwb ngo Pwnbog nyi ak ham soq sam jitayin”

⁹(Otuqho Israel ho hwdlo nyi akv Pwnbog pagoqkam cengdwb mwwb nyiloqkam, mwv benum, “Haato, kuj ngulv kvvjwql betambo dookub wnuj,” swnyw-soolog “nyiqry benboam” otuqho kvvjwql betambo akv hvl benum.)

¹⁰‍Hoo Soul mwwg nyerangam benum, “Hv kvtaqb bedo; haato, ngulv wnuj.” Ho bulv Pwnbog nyi akwg dook bopamb wnum.

¹¹‍Bulv diisw bopamb caanum, ho nyem nyijwr ata go iss bwwtab wnbov bulam wrwqnum hoo bulam toxnum, “Kvvjwql betam bov so dood yv?”

¹²‍Bulv birwqnum, “Mwv doodo; kaato, mwv nulug otuqb sija da wnwn. Nyebiab wn. Mwv sija da bopam so haanum, hoggab nyiilungv soolo guukumko nyook pwr jik lo pwr jinum.

¹³‍Mwv guukumko nyook aob dvs dvtab caama taab, nulv bopam mam haada kalam mwam kaapa yin pv. Hoggab mwv haama deedib nyiilungv dvlaram, ho mwv pwr jinam mam xeexaq dvb nyiky dvn; hoq kokwb goqnam nyi mwlwngv dvtayin. Sija da caan, nulv mwam nyebia jaqb kaapa tayin.”

¹⁴‍Hoqgab bulv bopamb caanum. Ho bulv bopam urab hoodu yukho Samuyel guukumko nyookub caadwb mwwg lamta ho bulug daiyab lingrwq rwqdul doonam.

¹⁵‍At Sw Samuyelnvn otuq aal loogwn ho Soulwg pagoqkam bekinnum:

¹⁶“Aaram mam soq mood so ngo Benjamin gvda hoqgv noqg dookub nyi ak kanam tayin, hoo mwam no ngoqg Israelwg nyiilu gab lvpw at gob darxaqto. Mwv ngoqg nyiilungam Palistan nyi tulug alaq hoqgv ywwlin tayin. Hoggab ngoqg nyiilungam ngo kaapa paku, hoggab bulug xabnamv ngoqg dook si hvvc paku.”

¹⁷‍Hwdlo Samuyel Soulnvn kaapa yin, At Sw mwam betamnum, “Soq siilak nam ngo agam gooknum nyi akv! Mwv ngoqg nyiilungam pvvb bwwl doog tayin.”

¹⁸‍Ho Soul Samuyel dookub toggoq hoqgv hvvnwq banv hoo benum, “Ngam betam tvb hogloq ho kvvjwql betambo nyi akwg nammv?”

¹⁹‍Samuyel Soulnvn birwqnum, “Ngo lak kvvjwql betambo akv. Ngoqg otuqb guukumko nyookub caato, hoggab soolo nulv ngoqg lvgab dvs dvmin gvtayin, hoo aaram mam ngo nulam wwm taikun hoo nulv hog nvkam mwwdwn ham ngo betam tayin.

²⁰‍Aal loum otuqho nulug svdam nyiinbo tulungam nulv mwwdwq maabv, hoggab hoq tulu ham kaapa paku. Hvbmabde Israel mwlwg mwwbynamv hiyv? Hoqhv noqg gab maai yv hoo noqg abwg nombu gab maai yv?”

²¹‍Soul birwqnum, “Ngo Benjamin nyob hoqgv maai yv, Israelwg nyob luura lo mwlwngam nyob anyo yaanbo maai yv? Hoo Benjaminwg nyob hoqgv ngoqg dvparv mwlwngam yan yaama dvn yv? Hoggub no ngam soq sib agam goodwn?”

²²‍Ho Samuyel Soul nvla mwwg yaapa akam boolayil hoo bulam dookum ko uraho boolwqnum hoo goqnam mwlwg otuqho bulam doomnum, hoqho nyiv cammum gob nyinum.

²³‍Hoo Samuyel dvm mvnboam benum, “Nam ngoqg bilwq tvl ‘Vpwb ap tvk hvl nam ngoqg jilwqnam ham bwa ta.’”

²⁴‍Hoqgab dvm mvnbov hoqho doonbo axar-xarg naarab layil hoo ham Soulwg agaho ap jinum. Hoo Samuyel benum, “Kaato, hognvkv pvvnum ham noqg aga si ap jipa kun. Xuqnam moodv haama taab dvto, hoggab soq si noqgab pvvj pakun, ho no nyiin lvgab dvba dvb nyiyi nvpv.” Hoqgab Soul hoq aalho Samuyel lvgab dvnum.

²⁵‍Hoo hwdlo guukumko nyook hoqgv bopam urab ipoq yukho, ao ko namho Soul gab kartam ak puup jinum, hoo mwv hoqhv yubnum.

²⁶‍Ho ar huur-mumur ho Samuyel Soulnvn goqunum, “Gorabto, noqg lamtab ngo nam kanam taikun.” Ho Soul gorabnum, hoo mwv la Samuyel bunyiv lyobub lengnv wba sunum.

²⁷‍Bulv bopam lvvgho wdul dooyikho, Samuyel Soulnvn benum, “Nyerangam ngulug otuqb wco nvk hvl beto, hoo hwdlo mwv wdul dooikam, soq so no atv meeg doonu to, ho Pwnbog gomcwram nam ngo cengm dvb betam tayin.”