Read Nzema Mɔl 13 Bible Online

Mɔl 13 - Nzema bible

Mɔl 13

¹Na Ebilam vale ɔ ye, yɛɛ Lɔɔto nee debie biala mɔɔ ɔlɛ la vile Yigyibiti, na ɔhɔle Keena nyiakɛ.

²Ebilam yɛle sukuavolɛ kpole kpalɛ, ɔlɛ nyɛmoa, dwɛtɛ fufule, yɛɛ ezukoa nvutuke.

³Na ɔluoluale nyiakɛ lɔ toonwo ɔhɔdwule Bɛtɛle, ɛleka mɔɔ ɔlumuale ɔbɔle ye aseseɛ ne la, wɔ Bɛtɛle nee Eyae avinli.

⁴Ɔhɔle ɛleka ne mɔɔ ɔlumuale ɔzile ye azukponle ne la, na ɔzonlenle Ɛdɛnkɛma.

⁵Lɔɔto noko mɔɔ nee Ebilam hɔle la, ɔdaye ɔnyianle mboane, mbɔnkye, nlankɛ, yɛɛ ndanlɛ azua.

⁶Yemɔti ɔrale kɛ ɛnee akee bɛ mu nwiɔ bɛnzo azɛlɛ ne mɔɔ bɛde zolɛ la azo. Ɔluakɛ bɛ mu nwiɔ bɛ anwonyia ne mɔ ɛyɛ mgbole yɛɛ eza bɛ nwo ɛzo.

⁷Yemɔti ɔngyɛ ɛnee kpolera ɛdɔ bɛ mu nwiɔ bɛ menli mɔɔ nea bɛ nyɛmoa ne mɔ la avinli. (Mekɛ ne anu ɛnee Pɛlɛzema nee Keenama wɔ azɛlɛ ne azo.)

⁸Ebilam zele Lɔɔto kɛ, “Mmamaa yɛmaa kpolera tɔ yɛ mu nwiɔ yɛ avinli, anzɛɛ wɔ menli nee me menli mɔɔ nea yɛ nyɛmoa ne mɔ la avinli, ɔboalekɛ yɛle abusua ko.

⁹Azɛlɛ tɛtɛtɛlɛlɛ a la yɛ nyunlu lɔ la. Te ɛ nwo. Saa ɛkɔ bɛne zo a, mebahɔ fema zo, yɛɛ saa ɛkɔ fema zo noko a, mebahɔ bɛne zo.”

¹⁰ Lɔɔto dole ɔ nye nleanle azɛlɛ ne na ɔnwunle kɛ Dwɔdan Bɔnza ne anu, toonwo mɔɔ kɔdwu Zowaa la lɛ nzule dɔɔnwo kɛ Ɛdɛnkɛma tola ne anu nee Yigyibiti azɛlɛ zo la. (Mekɛ ne anu ɛnee Ɛdɛnkɛma ɛtɛsɛkyele azuamgbole Sodɔm nee Gomɔla.)

¹¹Na Lɔɔto vale Dwɔdan Bɔnza na ɔvale ɔ ti ɔbɔle aduduleɛ ɔdele ɔ nwo ɔvile Ebilam anwo.

¹²Ebilam dɛnlanle Keena azɛlɛ zo, na Lɔɔto hɔdɛnlanle azuamgbole ne mɔ mɔɔ wɔ Bɔnza ne anu la bie mɔ azo na akee ɔdule ɔhɔdɛnlanle Sodɔm.

¹³Sodɔmma le amumuyɛ; bɛyɛle ɛtane mgbole bɛtiale Ɛdɛnkɛma.

¹⁴Mɔɔ Lɔɔto dele ɔ nwo vile Ebilam anwo la, Ɛdɛnkɛma zele Ebilam kɛ, “Gyinla ɛleka mɔɔ ɛwɔ la, na maa ɛ nye zo nea ɛbɔ nu afoa nu, nyevile nu afoa nu, yɛɛ aduduleɛ nee adɔleɛ afoa nu,

¹⁵ ɔluakɛ mebava azɛlɛ ne mɔɔ ɛ nye dua ye la amuala meamaa wɔ nee ɛ bo zo amra, meamaa yeayɛ bɛ ɛdeɛ bɔkɔɔ.

¹⁶Mebamaa ɛ bo zo amra azo kɛ ɛnwea, mɔɔ bɛnrɛhola bɛ tia a.

¹⁷Dwazo na kpɔsa kɔ azɛlɛ ne ati nee ɔ bo, kpɔsa nwu azɛlɛ ne tɛtɛlɛ nee ye tendenle, ɔluakɛ mebava meamaa wɔ.”

¹⁸Yemɔti Ebilam dudule ye ndanlɛ sua ne na ɔhɔdɛnlanle Mameli oku mbaka ne mɔ mɔɔ wɔ Hibulɔn la anwo. Na ɛkɛ ne, ɔzile azukponle ɔmanle Ɛdɛnkɛma.