Read Nzema Mɔl 15 Bible Online

Mɔl 15 - Nzema bible

Mɔl 15

¹Ɛhye mɔ anzi, Ebilam dele Ɛdɛnkɛma edwɛkɛ ne wɔ ɛnyelɛzodeɛnwunlɛ nu kɛ, “Ebilam, mmasulo, na mebabɔ ɛ nwo bane. Wɔ ahatualɛ bayɛ kpole kpalɛ.”

²Ebilam hanle kɛ, “O Ɛdɛnkɛma Nyamenle, duzu yɛɛ ɛbava wɔamaa me a, ɔluakɛ menlɛ ralɛ, yɛɛ sonla mɔɔ kɛkala bali me agya la a le Ɛleyizɛ mɔɔ vi Dɛmasekɛse la.

³Ɛtɛmanle metɛwole; kanranli mɔɔ bɛwo ye me sua nu ɛke la a bali me agya a.”

⁴Na Ebilam dele kɛ Ɛdɛnkɛma ɛlɛtendɛ ahile ye bieko kɛ, “Nrenya ɛhye ɛnrɛli wɔ agya. Ɛdawɔ ɛ kunlu ralɛ nrenya a bali wɔ agya a.”

⁵ Akee Ɛdɛnkɛma vale ye vindele na ɔzele ye kɛ, “To ɛ nye anwomanyunlu na nea saa ɛkɛhola nwɔlɔra ne mɔ tia a. Zɔhane ala yɛɛ ɛ bo zo amra bayɛ a.”

⁶ Ebilam liele Ɛdɛnkɛma lile, na ɛhye manle ɔzɔle Ɛdɛnkɛma anye na ɔliele ye ɔdole nu.

⁷Ɛdɛnkɛma zele Ebilam kɛ, “Medame a mele Ɛdɛnkɛma mɔɔ nee wɔ vi Yule mɔɔ wɔ Babelonia la rale kɛ mefa azɛlɛ ɛhye meamaa wɔ kɛ wɔ ɛdeɛ ɔ la.”

⁸Na Ebilam bizale kɛ, “O Awulae Nyamenle, na kɛ menwɔzi menwɔyɛ na meanwu kɛ azɛlɛ ne bayɛ me ɛdeɛ ɛ?”

⁹Ɛdɛnkɛma buale kɛ, “Fa ɛnlankɛ mɔɔ ɛli ɛvolɛ nsa, abɔnkye belɛ mɔɔ ɛli ɛvolɛ nsa, boane nyinli mɔɔ ɛli ɛvolɛ nsa, abubule yɛɛ mɔlɔnoma kakula bɛla.”

¹⁰Ebilam sesale bɛ rale, ɔhunle bɛ ɔkpukekpukele bɛ nu nwiɔ nwiɔ, na ɔvale ko biala ebule ɔdole ye ebule ko ne anwo. Nloma ne mɔ ɛdeɛ, yeamkpukekpuke bɛ nu nwiɔ nwiɔ.

¹¹Saa nloma mɔɔ di nane funli la ba nwolɛ a, ɛnee yevoa bɛ.

¹²Sɛnzɛne ne ɛlɛkɔ ahɔdɔ la, nafelɛ kpole vale Ebilam, na awozinli kpole anu ɛzulolɛ bie rahedale ɔ nwo zo.

¹³Na Ɛdɛnkɛma zele Ebilam kɛ, “Nwu ye wienyi kɛ ɛ bo zo amra badu adenle ahɔ azɛlɛ bie mɔɔ ɛnle bɛ ɛdeɛ la azo na bɛahɔyɛ ahanra wɔ ɛkɛ. Bɛbasisi bɛ toonwo ɛvolɛ ɛya nna,

¹⁴ na nzinlii mebadea maanle ne mɔɔ bɛbahɔzonle ye la, na bɛbava anwonyia dɔɔnwo bɛavi maanle zɔhane anu bɛahɔ.

¹⁵Wɔmɔ ɛdeɛ, ɛbava anzonudwolɛ wɔahɔ wɔ ɛkɛla nzi. Ɛbanyi wɔayɛ kpanyinli kpalɛ na wɔawu.

¹⁶Ɛ bo zo amra awolɛndoazo fane nna ne azo amra bazia ara ɛke, ɔluakɛ Amɔlema amumuyɛ ne ɛtɛwiele munli di mɔɔ metea bɛ a.”

¹⁷Mɔɔ sɛnzɛne ne dɔle na maanle nu yɛle awozinli la, senle siase mɔɔ ɛlɛkpu esike nee tɛkɛ mɔɔ ɛlɛsɔ gbolamgbolam la razenle nane ebule ebule ne mɔ avinli.

¹⁸Na kenle ko ne Ɛdɛnkɛma nee Ebilam yɛle ngyekyeleɛ. Ɛdɛnkɛma zele Ebilam kɛ, “Meva azɛlɛ ɛhye memaa ɛ bo zo amra. Azɛlɛ ne vi Yigyibiti ɛweɛne zo kɔdwu Azukpole Yufileti ne anloa.

¹⁹Kinama, Kinaezema, Kademma,

²⁰Hɛtema, Pɛlɛzema, Relɛfeeyemma,

²¹Amɔlema, Keenama, Gɛgahyema, yɛɛ Gyibɛsema azɛlɛ ne mɔ amuala boka nwolɛ.”