Read Nzema Mɔl 16 Bible Online

Mɔl 16 - Nzema bible

Mɔl 16

¹Ebilam aye Sɛleeyae anwo ralɛ. Ɔlɛ ye Yigyibitinli sonvolɛ raalɛ bie, bɛfɛlɛ ye Heega.

²Na Sɛleeyae hanle hilele Ebilam kɛ, “Nea, Ɛdɛnkɛma ammaa meanwo. Yemɔti ɛ nee me sonvolɛ raalɛ ne ɛhɔla. Wɔannea a ɔkɛyɛ kɛ yemɔ ɔbawo mralɛ yeamaa me.” Na Ebilam diele ɔ ye Sɛleeyae ane.

³Yemɔti mɔɔ Ebilam lile ɛvolɛ bulu wɔ Keena azɛlɛ zo la, ɔ ye Sɛleeyae vale ye Yigyibitinli sonvolɛ raalɛ ne manle ɔ hu yɛle ɔ ye.

⁴Ebilam nee Heega lale, na ɔnrenzɛle. Na mɔɔ Heega nwunle kɛ yenrenzɛ la, ɛnee akee ɔmbu ɔ menle raalɛ ne bie.

⁵Na Sɛleeyae zele Ebilam kɛ, “Abule mɔɔ ɛbu me la ɛbu ɛdawɔ.[6] Menvale me sonvolɛ raalɛ memanle wɔ kɛ ɛ nee ye bɛla, na yenwu kɛ yenrenzɛ la, akee yeyɛ mɔɔ ɔwowɔ me nye mbaka a! Ɛdɛnkɛma ɔdaye ɔbua yɛ mu nwiɔ ndɛne!”

⁶Ebilam buale ye kɛ, “Ayi, wɔ sonvolɛ raalɛ ne wɔ ɛ sa nu, debie biala mɔɔ fɛta la fa yɛ ye.” Yemɔti Sɛleeyae hilele Heega abodelɛ, na ɔnriandile.

⁷Ɛdɛnkɛma soanvolɛ hɔdole ye wɔ ɛsɛlɛ ne azo nzubula bie mɔɔ wɔ Hyulu adenle zo la anwo,

⁸na ɔbizale ye kɛ, “Sɛleeyae sonvolɛ raalɛ Heega, nienwu a ɛvi wɔra ɛke a, yɛɛ nienwu ɛleka a ɛlɛkɔ a?” Ɔbuale ye kɛ, “Melɛnriandi meavi me menle raalɛ Sɛleeyae anwo.”

⁹Ɛdɛnkɛma soanvolɛ ne zele ye kɛ, “Sia kɔ ɛ menle raalɛ ne anwo lɔ na kɔyɛ bɛlɛvolɛ maa ye.”

¹⁰Eza Ɛdɛnkɛma soanvolɛ ne zele ye kɛ, “Mebamaa ɛ bo zo amra azo mɔɔ awie biala ɛnrɛhola bɛ tia a.

¹¹Nea, ɛlɛnrenzɛ, ɛbawo ralɛ nrenya na wɔado ye duma, Yehyemeeyɛle;[7] ɔboalekɛ Nyamenle ɛde wɔ nyane ɛzunlɛ ne.

¹²Ɔbayɛ nrenya mɔɔ ye subane bayɛ kɛ asoaso mɔɔ bɛtɛtetele ye la. Ɔbahyi awie biala, yɛɛ awie biala bahyi ye, na ɔ nee ɔ nwo amra biala ɛnrɛdɛnla.”

¹³Na Heega hanle kɛ, “Asoo amgba menwu Nyamenle anyunlu na metɛte aze?” Na ɔvɛlɛle Ɛdɛnkɛma mɔɔ nee ye dendɛle la, “Nyamenle mɔɔ nwu me la.”

¹⁴Zɔhane ati bɛvɛlɛle nzubula ne Biyɛleehaelɔe (Ɔ bo a le “Teasenli ne mɔɔ nwu me la Bula.”) Ɔwɔ Keedɛhye nee Bilɛde avinli.

¹⁵ Heega nee Ebilam wole ralɛ nrenya na Ebilam donle ye Yehyemeeyɛle.

¹⁶Mɔɔ Heega wole Yehyemeeyɛle la, ɛnee Ebilam ɛli ɛvolɛ abulatwɛ nee nsia.