Read Nzema Mɔl 19 Bible Online

Mɔl 19 - Nzema bible

Mɔl 19

¹Nyamenle soanvolɛma nwiɔ ne dwule Sodɔm nɔsolɛ nu; ɛnee Lɔɔto de Sodɔm anlenkɛ kpole ne anloa. Mɔɔ Lɔɔto nwunle bɛ la, ɔdwazole ɔhɔyiale bɛ, ɔbutule bɛ nyunlu mutule nu

²na ɔzele kɛ, “Me menle mɔ, mesɛlɛ bɛ, bɛ nee bɛ sonvolɛ ɛhɔ sua nu, bɛhɔnrinzi bɛ gyakɛ anwo na bɛla, na aleɛbahye bɛadwazo ndɛ bɛahɔ.” Bɛbuale ye kɛ, “Kyɛkyɛ, yɛda gua ye azo nɔe.”

³Na Lɔɔto anye bolole kpalɛ ɔzɛlɛle bɛ, yemɔti bɛhakyile bɛ nwo bɛ nee ye hɔle sua nu. Lɔɔto manle ye sonvolɛma ne donle kpanwo mɔɔ mgbɔvonle ɛnle nu la, ɔdole bɛ ɛkponle na bɛlile.

⁴Na mɔɔ ɔdwule mekɛ mɔɔ bɛkala la, Sodɔm suakpole ne azo mrenya ngakula nee mgbanyinli, bɛ muala kɔsɔɔti, ko bɔbɔ anga amozi, bɛrale bɛrabɛnrale bɛyiale sua ne mɔɔ bɛwɔ nu la.

⁵Bɛvɛlɛle Lɔɔto na bɛbizale ye kɛ, “Menli mɔɔ razokoɛle wɔ nɔsolɛ ye la wɔ nienwu? Fa bɛ finde ɛke maa yɛva bɛ.”

⁶Lɔɔto vindele, ɔdole anlenkɛ ne anu na ɔdoale bɛ alie nwo lɔ

⁷ɔhɔzele bɛ kɛ, “Me mediema mrenya, mebodo bɛ, bɛmmayɛ amumuyɛ ɛhye.

⁸ Bɛdie, melɛ me mra mraalɛ nwiɔ mɔɔ ɛnze nrenya fee a. Bɛmaa menva bɛ membɛlɛ bɛ, na bɛ nee bɛ ɛyɛ debie biala mɔɔ bɛdabɛ bɛkulo la. Menli ɛhye mɔ ɛdeɛ, bɛmmayɛ bɛ ɛhwee, ɔluakɛ bɛle me nyɛvolɛ, yɛɛ ɔwɔ kɛ menea bɛ boɛ.”

⁹Na bɛzele ye kɛ, “Dwazo ɛkɛ ne! Wɔmɔ ɛdawɔ mumua ne ɛle ɛyɛvolɛ wɔ suakpole ye azo. Wɔmɔ ɛbahakyi yɛ kɔme nu ndɛnebuavolɛ. Yɛ nee wɔ bali ye ɛsesebɛ bɔbɔ yɛadɛla menli ɛhye mɔ.” Akee bɛholole Lɔɔto anwo zo na bɛyɛle kɛ bɛkabu anlenkɛ ne.

¹⁰Na menli nwiɔ ne dole bɛ sa hwenle Lɔɔto hɔle bɛ nwo ɛkɛ ne wɔ sua ne anu, na bɛdole anlenkɛ ne anu.

¹¹ Akee bɛmanle menli mɔɔ ɛrayi anlenkɛ ne anloa la amuala anye zinle; ngakula o, mgbanyinli o, biala ɛnnwu debie, yemɔti bɛlile nvuovua bɛkpondɛle anlenkɛ ne.

¹²Nɔe ne ala, menli nwiɔ ne zele Lɔɔto kɛ, “Ɛlɛ awie wɔ ɛke ɔ? Ka kile ɛ mra mrenya, ɛ mra mraalɛ nee bɛ hu mɔ anzɛɛ awie biala mɔɔ ɛze ye suakpole ye azo la maa bɛvi suakpole ye azo bɛye bɛ nwo,

¹³ɔluakɛ yɛsɛkye suakpole ye, ɔboalekɛ bɛ ɛtaneyɛlɛ ne ɛyɛ kpole yɛɛ bɛ ɛtane ne mɔ anwo ngehanleɛ ɛdwu Ɛdɛnkɛma anyunlu, na yezoa yɛ kɛ yɛrazɛkye suakpole ye.”

¹⁴Yemɔti Lɔɔto vindele nɔe ne hɔdunwuele ɔ mra mraalɛ ne mɔ bɛ hu mɔ mɔɔ baragya bɛ la, na ɔzele bɛ kɛ, “Bɛdwazo, bɛvi suakpole ye azo bɛye bɛ nwo, ɔluakɛ Ɛdɛnkɛma ɛlɛba arazɛkye suakpole ye.” Noko bɛdwenlenle kɛ ɔlɛbɔ nzɛmedɛ.

¹⁵Aleɛbahye ne, Nyamenle soanvolɛma ne mɔ zele Lɔɔto kɛ, “Ka ɛ nwo dwazo, fa ɛ ye nee ɛ mra mraalɛ nwiɔ ne mɔɔ wɔ ɛke la nriandi, anrɛɛ bɛ muala bɛkɛdɔ nzonle wɔ suakpole ye ndeanlɛ nu.”

¹⁶ Noko Lɔɔto hwenlehwenlenle ɔ bo aze, yemɔti menli ne mɔ zɔle ye nee ɔ ye nee ɔ mra mraalɛ ne mɔ asa na bɛ nee bɛ rale suakpole ne kandiba, ɔluakɛ ɛnee Ɛdɛnkɛma se bɛ anwunvɔne.

¹⁷Na mɔɔ bɛ nee bɛ dwule suakpole ne kandiba la, bɛ nuhua ko zele kɛ, “Bɛnriandi bɛlie bɛ ngoane. Bɛmmato bɛ nye bɛ nzi, yɛɛ bɛmmagyinla ɛleka biala wɔ bɔnza ne anu. Bɛnriandi bɛhɔ awoka ne mɔ azo lɔ, anrɛɛ bɛkɛha esike nu.”

¹⁸Lɔɔto hanle kɛ, “O, kyɛkyɛ, me menle,

¹⁹bɛnlea, bɛ sonvolɛ ye ɛzɔ bɛ nye, na bɛze ye anwunvɔne kpole ɛhye bɛlie ye ngoane. Noko menrɛhola nriandi dwu awoka ne mɔ azo lɔ, anrɛɛ munzule ne kɛdo me adenle nu kɛmaa menwɔwu.

²⁰Suakpole ye mɔɔ zua ɛke ala la bikye mɔɔ menriandi mekɔ zolɛ a ɔle kpalɛ a, yɛɛ eza ɔle ekyi. Bɛmaa menriandi mengɔ ɛkɛ ne na mebanyia ngoane.”

²¹Ɔbuale ye kɛ, “Menwu wɔ anwunvɔne ɛhye noko, menrɛzɛkye sua zɔhane mɔɔ wɔha ye edwɛkɛ la.

²²Ka ɛ nwo nriandi kɔ ɛkɛ. Ɔboalekɛ saa ɛtɛdwule ɛkɛ ne a menrɛyɛ ɛhwee.” Zɔhane ati bɛvɛlɛle sua zɔhane Zowaa[10]

²³Mɔɔ Lɔɔto dwule Zowaa la, ɛnee sɛnzɛne ne ɛdudu.

²⁴Na Ɛdɛnkɛma manle sɔlefe nee senle vi anwuma dɔle kɛ ezule guale Sodɔm nee Gomɔla azo.

²⁵ Na ɔzɛkyele azuamgbole zɔhane mɔ, bɔnza ne anu amuala, nee menli mɔɔ wɔ azuamgbole ne mɔ azo la amuala, yɛɛ debie biala mɔɔ fifile azɛlɛ ne azo la.

²⁶Na Lɔɔto aye ne mɔɔ ɛnee li ɔ nzi la dole ɔ nye ɔ nzi, na ɔhakyile ngyenle mpila.

²⁷Ebileham dwazole nwonlomɔ mangyee ne ala na ɔhɔgyinlanle ɛleka mɔɔ ɔgyinlanle Ɛdɛnkɛma anyunlu la.

²⁸Ɔdole ɔ nye Sodɔm nee Gomɔla na ɔnleanle azɛlɛ ne mɔɔ la bɔnza ne anu la amuala azo, na ɔnwunle kɛ maanle ne mɔɔ ɛlɛyela la esike ne ɛdwazo bolonwonwo kɛ tɔlɔra senle.

²⁹Ɛnee kɛ Nyamenle zile zɛkyele azuamgbole zɔhane mɔ mɔɔ wɔ bɔnza ne anu la ɛne. Noko ɔhakyele Ebileham, yemɔti ɔyele Lɔɔto ɔvile nu wɔ mekɛ mɔɔ ɔsɛkye azuamgbole mɔɔ Lɔɔto dɛnlanle zolɛ la.

³⁰Ɛnee Lɔɔto sulo kɛ ɔkɛdɛnla Zowaa, yemɔti ɔ nee ɔ mra mraalɛ nwiɔ ne dule vile Zowaa na bɛhɔdɛnlanle bolɛ bɔne bie anu wɔ awoka ne mɔ anu.

³¹Na ralɛ raalɛ kpanyinli ne zele ekyi ne kɛ, “Yɛ ze ɛyɛ kpanyinli, yɛɛ nrenya biala ɛnle azɛlɛ ye azo mɔɔ nee yɛ kɛla, kɛmɔ bɛyɛ ye ewiade amuala la.

³²Bɛla, maa yɛnloa egya nwanye yɛmaa ɔbo, na yɛ nee ye ɛla, amaa yɛ nee ye anyia mralɛ yɛazie yɛ gyakɛ anu.”

³³Yemɔti kenle ko ne nɔe ne bɛmanle bɛ ze nwanye bɛmanle ɔbole na ralɛ raalɛ kpanyinli ne nee ye hɔlale. Ɔbole kpole somaa, yemɔti yeannwu kɛ ɔ ra raalɛ ne zile ralale na yeayɛ ye ɛdwazolɛ nu.

³⁴Aleɛ hyenle la, ralɛ raalɛ kpanyinli ne zele ekyi ne kɛ, “Nea, nɔe me nee egya lale. Maa yɛmaa ɔnlo nwanye ɔbo bieko ɛnɛ nɔe na ɛ nee ye ɛhɔla, na ɔlua ɔ nwo zo yɛanyia mralɛ.”

³⁵Yemɔti kenle ko ne nɔe ne bɛmanle bɛ ze nlonle nwanye bole, na ralɛ raalɛ ekyi ne doale ye nee ye hɔlale. Noko bɛ ze annwu ye, ɔluakɛ ɔbole somaa.

³⁶Zɛhae adenle zo yɛɛ Lɔɔto amra mraalɛ nwiɔ ne nee bɛ ze nrenzɛle a.

³⁷Ralɛ raalɛ kpanyinli ne wole ralɛ nrenya na ɔdonle ye Mowabe.[11] Ɔ bo zo amra a le Mowabema mɔɔ wɔ ɛkɛ ne ɛnɛ nee ɛnɛ la.

³⁸Ekyi ne noko wole ralɛ nrenya na ɔdonle ye Bɛnamae.[12] Ɔ bo zo amra a le Amɔnoma mɔɔ wɔ ɛkɛ ne ɛnɛ nee ɛnɛ la.