Read Nzema Mɔl 26 Bible Online

Mɔl 26 - Nzema bible

Mɔl 26

¹Saa ɛye ɛhɔne ne mɔɔ Ebileham mekɛ zo rale la a, ɛhɔne bieko rale azɛlɛ ne azo. Na Ayezeke hɔle Filisitiama Belemgbunli Abemɛlɛke anwo lɔ wɔ Gilaa.

²Ɛdɛnkɛma yele ɔ nwo hilele ye wɔ ɛkɛ ne ɔzele ye kɛ, “Mmakɔ Yigyibiti. Tɛnla azɛlɛ ne mɔɔ menwɔze wɔ kɛ ɛdɛnla zolɛ la azo.

³ Duolua azɛlɛ ɛhye azo ala na me nee wɔ balua. Mebayila wɔ, ɔluakɛ ɛdawɔ nee ɛ bo zo amra yɛɛ mebava azɛlɛ ɛhye meamaa bɛ a, na mebali me ɛwɔkɛ ne mɔɔ membɔle ɛ ze Ebileham la azo.

⁴Mebamaa ɛ bo zo amra ayɛ dɔɔnwo kɛ anwomanyunlu nwɔlɔra. Mebava azɛlɛ ɛhye mɔ amuala meamaa ɛ bo zo amra, na ɛ bo zo amra anwo zo yɛɛ maanle maanle kɔsɔɔti mɔɔ wɔ ewiade la balua anyia nyilalɛ a.

⁵Ɔboalekɛ Ebileham diele me ne na ɔvale me folɛdulɛ, ɔlile me mɛla nee ngyehyɛlɛ ne mɔ azo.”

⁶Yemɔti Ayezeke dɛnlanle Gilaa.

⁷ Menli mɔɔ wɔ maanle ne anu la bizale ye ɔ ye anwo edwɛkɛ la, ɔzele kɛ, “Ɔle me diema raalɛ”, ɔluakɛ ɔsulo kɛ ɔkɛha kɛ, “Me ye ɔ”, anrɛɛ ɔlua Relɛbɛka ati menli mɔɔ wɔ maanle ne anu la kɛhu ye, ɔboalekɛ Relɛbɛka anwo yɛ fɛ kpalɛ.

⁸Mɔɔ ɔdɛnlanle ɛkɛ ne ɔhyɛle kpalɛ la, kenle ko Filisitia Belemgbunli Abemɛlɛke gyi ye nvɛnzɛlɛ ne anu la, ɔnwunle kɛ Ayezeke nee ɔ ye Relɛbɛka ɛlɛdi anyezo.

⁹Yemɔti Abemɛlɛke vɛlɛle Ayezeke na ɔbizale ye kɛ, “Nea, raalɛ ne le ɛ ye, na duzu ati yɛɛ ɛse ɔle ɛ diema ɛ?” Ayezeke buale kɛ, “Ɔboalekɛ ɛnee medwenle kɛ ɔlua yemɔ ɔ ti bɛkɛhu me.”

¹⁰Abemɛlɛke bizale ye kɛ, “Na ɛhye mɔɔ wɔva wɔli yɛ la abo a le duzu? Menli mɔɔ wɔ maanle ye anu la bie kola nee ye da, na anrɛɛ wɔhwe munzule kpole wɔmaa yɛ.”

¹¹Yemɔti Abemɛlɛke bɔle ye menli ne mɔ kɔkɔ kɛ, “Ɛdawɔ biala mɔɔ ɛkɛva ɛ sa ɛkɛha nrenya ɛhye anzɛɛ ɔ ye la, ɔwɔ kɛ bɛku wɔ.”

¹²Ɛvolɛ zɔhane Ayezeke yɛle egyinli wɔ ɛkɛ ne azɛlɛ ne azo, na ɛbuhenle ne dwule la ye bɛyɔba ne bɔle nwolɛ ɛya. Ɛdɛnkɛma yilale ye, na ɔnyianle ɔ nwo.

¹³Na ɔhɔle zolɛ ɔnyianle ninyɛne, ɔkpazile toonwo akee ɔyɛle sukoavolɛ kpole kpalɛ.

¹⁴Ɔnyianle mboane nee nlankɛ dɔɔnwo; ye awuke yɛle kpole na nuhua yɛle gbudugbudu, yemɔti Filisitiama anye bolole ye.

¹⁵Filisitiama vulale ndɛtɛlɛ duoduale bula ne mɔ mɔɔ ɔ ze Ebileham maanle ye sonvolɛma bɔle wɔ mekɛ mɔɔ ɔde aze la amuala.

¹⁶Na Abemɛlɛke zele Ayezeke kɛ, “Ɛvi yɛ maanle ye anu tu, na ɛ nwo bɔbɔ akee ɛyɛ ɛzulolɛ ɛdɛla yɛ.”

¹⁷Yemɔti Ayezeke vi maanle ne anu dule na ɔhɔyɛle ye azokoɛleɛ wɔ Gilaa bɔnza ne anu na ɔdɛnlanle ɛkɛ.

¹⁸Na Ayezeke eza bɔle bula ne mɔ mɔɔ bɛbɔle bɛ wɔ mekɛ mɔɔ ɔ ze Ebileham de aze la bieko, ɔluakɛ ɔ ze Ebileham wule la, Filisitiama duoduale bula ne mɔ. Na Ayezeke vale aluma mɔɔ ɛnee ɔ ze ɛva ɛtoto bula ne mɔ la vɛlɛle bɛ.

¹⁹Ayezeke sonvolɛma ne hɔle bɔnza ne anu lɔ na bɛhɔbɔle bula bie na bɛnyianle nzule dɔɔnwo wɔ nu la,

²⁰Gilaa menli mɔɔ ka nyɛmoa la radoale Ayezeke sonvolɛma ne mɔ bɛ nee bɛ zule nwolɛ kpolera bɛzele kɛ, “Nzule ne le yɛ ɛdeɛ.” Yemɔti ɔdonle bula ne Yisɛke,[19] ɔboalekɛ bɛ nee ye zule ɔ bo zo kpolera.

²¹Bɛhɔbɔle bula bieko, na eza bɛlile ɔ bo zo butule, yemɔti ɔvɛlɛle ye Setena.[20]

²²Akee ɔvi ɛkɛ ne ɔhɔle ɔ nyunlu ekyii na ɔhɔbɔle bula bieko, na yemɔ butule amba nwolɛ. Yemɔti ɔdonle ye Rilihɔbo,[21] ɔzele kɛ, “Kɛkala akee Ɛdɛnkɛma ɛmaa yɛ ɛleka, na yɛbakpazi wɔ azɛlɛ ye azo.”

²³Ayezeke vi ɛkɛ ne la ɔhɔle Biyɛhyiba.

²⁴Na Ɛdɛnkɛma yele ɔ nwo hilele ye wɔ kenle ko ne mɔɔ ɔdwule ɛkɛ ne la nɔe ne, ɔzele ye kɛ, “Mame a mele ɛ ze Ebileham Nyamenle ne a; mmasulo, ɔluakɛ me nee wɔ a lua a. Mebayila wɔ na meamaa ɛ bo zo amra azo ayɛ dɔɔnwo wɔ me sonvolɛ Ebileham ati.”

²⁵Yemɔti ɔzile azukponle wɔ ɛkɛ ne na ɔzonlenle Ɛdɛnkɛma, na ɔzile ye ndanlɛ sua wɔ ɛkɛ. Ayezeke sonvolɛma ne bɔle bula wɔ ɛkɛ ne.

²⁶ Akee Abemɛlɛke vi Gilaa hɔle Ayezeke anwo ɛkɛ. Ɔ nee Ahɛzate mɔɔ tu ye folɛ la yɛɛ ye Safohyenlema Kpanyinli Faekɔlo a hɔle a.

²⁷Ayezeke bizale ye kɛ, “Bɛdabɛ mumua ne bɛkyi me, bɛdu me, na duzu ati a akee bɛra me nwo ɛke a?”

²⁸Bɛbuale ye kɛ, “Yɛnwu ye wienyi kɛ Ɛdɛnkɛma nee wɔ a lua a. Yemɔti yɛse, maa yɛha ndane yɛyɛ ngyehyɛlɛ yɛhye ɔ bo

²⁹kɛ ɛnrɛyɛ yɛ ɛtane biala, kɛmɔ yɛanva yɛ sa yɛanga wɔ, yɛanyɛ wɔ ɛhwee na yɛgyakyi wɔ adenle anzonudwolɛ nu kɛ ɛhɔ la. Wɔmɔ, ɛle sonla mɔɔ Ɛdɛnkɛma ɛyila wɔ a.”

³⁰Yemɔti Ayezeke dole bɛ ɛkponle, na bɛlile na bɛnlonle.

³¹Akee bɛ muala bɛdwazole nwonlomɔ mangyee ne ala na bɛhanle ndane. Na Ayezeke manle bɛ adenle manle bɛhɔle anzonudwolɛ nu.

³²Kenle ko ne ala Ayezeke sonvolɛma ne rahanle bula mɔɔ bɛbɔ la anwo edwɛkɛ hilele ye na bɛzele ye kɛ,

³³“Yɛnyia nzule.” Ɔvɛlɛle ye Hyiba.[22] Yemɔti ɛnɛ nee ɛnɛ, bɛfɛlɛ suakpole ne Biyɛhyiba.

³⁴Yisɔ lile ɛvolɛ abulanla la, ɔgyale Hɛtenli Biyɛlae ara raalɛ Dwudete, yɛɛ Hɛtenli Yilɔn ara raalɛ Basɛmate;

³⁵na bɛmanle ɛbɛla ɛbɔlɛ ne bɔbɔ bɔnlebɔnlenle Ayezeke nee Relɛbɛka ati anu.