Read Nzema Mɔl 29 Bible Online

Mɔl 29 - Nzema bible

Mɔl 29

¹Akee Gyekɔbo zɔle ye adendulɛ ne azo na ɔhɔdwule menli mɔɔ wɔ aduduleɛ la azɛlɛ zo.

²Ɔdole ɔ nye la, ɔnwunle bula bie wɔ ɛya bie anu na mboane ekpunli nsa gugua nwolɛ, ɔluakɛ bula zɔhane azo yɛɛ bɛmaa bɛ nzule a. Bolɛ ne mɔɔ heda bula ne azo la le kpole,

³yemɔti mboane ne mɔ bagua ɛkɛ, na saa bɛ nloa wie yia na mboaneneavolɛma ne mɔ ba a, bɛ muala bɛabɔ nu bɛahundo bolɛ ne na bɛamaa mboane ne mɔ nzule. Bɛwie a ɛnee eza bɛhundo bolɛ ne bɛheda bula ne azo.

⁴Gyekɔbo bizale bɛ kɛ, “Me mediema, nienwu a bɛvi a?” Bɛbuale ye kɛ, “Yɛvi Hɛlan.”

⁵Gyekɔbo bizale bɛ kɛ, “Bɛze Neehɔ ara Leeban ɔ?” Bɛbuale ye kɛ, “Yɛze ye.”

⁶Gyekɔbo bizale bɛ kɛ, “Ɔte kpɔkɛ ɔ?” Bɛbuale ye kɛ, “Ɔte kpɔkɛ. Nea, ɔ ra raalɛ Relahyɛle a nee ye mboane ne mɔ ɛlɛba la.”

⁷Gyekɔbo zele kɛ, “Bɛnlea, ewia ne gyi zo ɛsesebɛ. Ɔtɛdwule mɔɔ bɛmaa nyɛmoa ne mɔ kuohua bɛ nloa ɛleka ko a. Bɛmaa mboane ne mɔ nzule na bɛva bɛ bɛhɔ adidi.”

⁸Bɛbuale kɛ, “Yɛngola yɛnyɛ ye zɔhane, kyesɛ mboane ekpunli ekpunli ne mɔ anloa yia kolaa na yeahundo bolɛ ne yeavi bula ne azo, na yɛamaa nyɛmoa ne mɔ nzule.”

⁹Mɔɔ ɔ nloa wɔ zolɛ ɔ nee mboaneneavolɛma ne mɔ ɛlɛtendɛ la, yɛɛ Relahyɛle nee ɔ ze mboane ne mɔ rale a, ɔluakɛ ɛnee ɔdaye a ɔnea bɛ a.

¹⁰Gyekɔbo nwunle ɔ nli adiema Leeban ara raalɛ Relahyɛle nee mboane ne mɔ ala la, ɔhɔle ɔhɔhundole bolɛ ne ɔyele ye wɔ bula ne azo na ɔmanle ɔ wuvuanyi ne mboane ne mɔ nzule.

¹¹Akee Gyekɔbo vole Relahyɛle anvoka anwo na ɔdukuele nu ɔzunle.

¹²Na Gyekɔbo hanle hilele Relahyɛle kɛ ɔle ɔdaye Relahyɛle ɔ ze busuanli, na ɔ nli a le Relɛbɛka. Na Relahyɛle nriandile hɔhanle edwɛkɛ ne hilele ɔ ze Leeban.

¹³Leeban dele ye awozoa ne nganeɛ la, ɔnriandile ɔrayiale ye, ɔyɛle ye atuu, ɔvole ɔ nvoka anwo, na ɔ nee ye rale sua nu. Gyekɔbo hanle edwɛkɛ biala hilele Leeban,

¹⁴na Leeban zele Gyekɔbo kɛ, “Amgba, ɛle me dehelɛ bɔkɔɔ!” Na ɔ nee ye dɛnlanle siane ko.

¹⁵Akee Leeban zele Gyekɔbo kɛ, “Me busuanli a le wɔ suzuamgba ɛdeɛ, noko ɔnle kɛ ɛyɛ gyima ɛmaa me mɔɔ mendua wɔ kakɛ a. Ka mɔɔ kenle ko ɛkɛlie la kile me.”

¹⁶Leeban lɛ ɔ mra mraalɛ nwiɔ. Bɛfɛlɛ kpanyinli ne Liya, yɛɛ bɛfɛlɛ ekyi ne Relahyɛle.

¹⁷Liya anye le monzomonzo, na Relahyɛle gyi zo sengɔɔnwo, yɛɛ ɔ nwo yɛ fɛ kpalɛ.

¹⁸Gyekɔbo kulo Relahyɛle, yemɔti ɔhanle kɛ, “Mesonle wɔ ɛvolɛ nsuu na meagya ɛ ra raalɛ ekyi ne, Relahyɛle.”

¹⁹Leeban buale kɛ, “Ɔle kpalɛ kɛ menwɔva ye menwɔmaa wɔ tɛla kɛ menwɔva ye menwɔmaa awie gyɛne la. Ɛ nee me ɛdɛnla.”

²⁰Yemɔti Relahyɛle ati, Gyekɔbo zonlenle ɛvolɛ nsuu, noko mekɛ ne yɛle ɔ nye zo kenle kɛyɛ nsa bie, ɔluakɛ ɛnee ɔkulo Relahyɛle kpole kpalɛ.

²¹Akee Gyekɔbo zele Leeban kɛ, “Fa me ye ne maa me maa me nee ye ɛhɔla, ɔluakɛ me mekɛ ne ɛdwu.”

²²Yemɔti Leeban dole ɔ sa vɛlɛle menli dɔɔnwo na ɔdole ɛkponle kpole bie wɔ ye awuke nu ɛkɛ.

²³Noko nɔe ne ɔvale ɔ ra raalɛ Liya a ɔhɔmanle Gyekɔbo a, na Gyekɔbo nee ye lale.

²⁴(Leeban vale ye sonvolɛ raalɛ Zelepa manle Liya kɛ ye sonvolɛ raalɛ ɔ.)

²⁵Na aleɛ hyenle la, Gyekɔbo nwunle kɛ tɛ Relahyɛle ɔ, na Liya ɔ. Gyekɔbo bizale Leeban kɛ, “Na duzu edwɛkɛ a ɛ nee me ɛli la? Meanga kɛ mesonle wɔ meagya Relahyɛle ɔ? Duzu ati yɛɛ wɔbɛlɛbɛla me zɛhae ɛ?”

²⁶Leeban buale ye kɛ, “Bɛnyɛ ye zɔhane wɔ yɛ maanle ye anu. Saa ralɛ raalɛ kpanyinli ne ɛtɛkɔle agyalɛ a, yɛnva kakula ne yɛmmaa agyalɛ.

²⁷Kendɛ na ɛ nee ɛhye bɛwie bɛ dapɛne ko anyelielɛ ne, na nzinlii yɛanlea na saa ɛkɛzonle me ɛvolɛ nsuu bieko a, meava ɔdaye noko meamaa wɔ.”

²⁸Gyekɔbo kponlenle zolɛ na ɔwiele ye dapɛne ko anyelielɛ ne. Akee Leeban vale ɔ ra raalɛ Relahyɛle manle Gyekɔbo gyale ye.

²⁹(Leeban vale ye sonvolɛ raalɛ Belehaa manle Relahyɛle kɛ ye sonvolɛ raalɛ ɔ.)

³⁰Yemɔti Gyekɔbo nee ɔdaye noko lale, na ɔhulole Relahyɛle dɔɔnwo ɔdɛlale Liya. Na Relahyɛle ati ɔzonlenle Leeban ɛvolɛ nsuu bieko.

³¹Mɔɔ Ɛdɛnkɛma nwunle kɛ Gyekɔbo ɛngulo Liya la, ɔmanle ɔ ko lale ɛkɛ, na Relahyɛle yɛle mota.

³²Liya nrenzɛle na ɔwole ralɛ nrenya, na ɔdonle ye Wulubɛn,[26]

³³Ɔnrenzɛle bieko na eza ɔwole ralɛ nrenya, na ɔzele kɛ, “Kɛmɔ Ɛdɛnkɛma ɛnwu kɛ bɛngulo me la ati yɛɛ yemaa me ralɛ nrenya ɛhye noko a;” na ɔdonle ye Semɛyɔn.[27]

³⁴Ɔnrenzɛle bieko na ɔwole ralɛ nrenya, na ɔzele kɛ, “Kɛkala ɛdeɛ, akee me hu nee me bayɛ ko, ɔboalekɛ mewo mrenya nsa memaa ye.” Yemɔti ɔdonle ye Livae.[28]

³⁵Ɔnrenzɛle bieko na ɔwole ralɛ nrenya na ɔzele kɛ, “Kɛkala ɛdeɛ, mebaye Ɛdɛnkɛma ayɛlɛ.” Yemɔti ɔdonle ye Dwuda.[29] Akee ye awolɛ tikale.