Read Nzema Mɔl 30 Bible Online

Mɔl 30 - Nzema bible

Mɔl 30

¹Mɔɔ Relahyɛle nwunle kɛ ɔ nee Gyekɔbo anwo la, ɔ nye bolole ɔ diema raalɛ ne, na ɔzele Gyekɔbo kɛ, “Maa menwo mralɛ anrɛɛ menwɔwu.”

²Gyekɔbo vale Relahyɛle anwo ɛya na ɔzele ye kɛ, “Mele Nyamenle mezɔ wɔ awodeɛ ne anloa kɛ ɛmmawo mralɛ ɔ?”

³Relahyɛle zele kɛ, “Me sonvolɛ raalɛ Belehaa ɛne, ɛ nee ye ɛla maa ɔwo ralɛ ɔdo me gyakɛ azo, na eza ɔlua ɔ nwo zo meanyia mralɛ.”

⁴Yemɔti ɔvale ye sonvolɛ raalɛ Belehaa ɔmanle Gyekɔbo kɛ ɔ ye ɔ. Na Gyekɔbo nee ye lale.

⁵Belehaa nrenzɛle na ɔwole ralɛ nrenya ɔmanle Gyekɔbo.

⁶Akee Relahyɛle hanle kɛ, “Nyamenle ɛli me edwɛkɛ ɛmaa me, na yedie me ne, na yemaa me ralɛ nrenya.” Yemɔti ɔdonle ye Dan.[30]

⁷Relahyɛle sonvolɛ raalɛ Belehaa eza nee Gyekɔbo nrenzɛle na ɔwole ralɛ nrenya bieko.

⁸Na Relahyɛle hanle kɛ, “Me nee me diema raalɛ ne yɛpele kpole kpalɛ, na meli konim.” Yemɔti ɔdonle ye Nafetalae.[31]

⁹Mɔɔ Liya nwunle kɛ ye awolɛ ne ɛtika la, ɔvale ye sonvolɛ raalɛ Zelepa ɔmanle Gyekɔbo kɛ ɔ ye ɔ.

¹⁰Liya sonvolɛ raalɛ Zelepa nee Gyekɔbo wole ralɛ nrenya.

¹¹Na Liya hanle kɛ, “Meyɛ saleɛnli”, yemɔti ɔdonle ye Gaade.[32]

¹²Liya sonvolɛ raalɛ Zelepa eza nee Gyekɔbo wole ralɛ nrenya.

¹³Na Liya hanle kɛ, “Fɛlɛko ɛyi me! Ɔluakɛ mraalɛ bavɛlɛ me fɛlɛko;” yemɔti ɔdonle ye Ahya.[33]

¹⁴Mekɛ dwule mɔɔ bɛte hwiiti la, Wulubɛn hɔnwunle baka bie mɔɔ bɛfɛlɛ ye mandileki la wɔ ɛya ne anu, na ɔdudule ɔrɛlɛle ɔ nli Liya. Na Relahyɛle hanle hilele Liya kɛ, “Mebodo wɔ, maa me ɛ ra nrenya ne mandileki ne bie.”

¹⁵Liya bizale ye kɛ, “Ɛdwenle kɛ ɔle nzɛmedɛ kɛ wɔza me wɔlie me hu la ɔ? Yeanga ye zɔhane, eza ɛbalie me ra ye mandileki ne noko.” Relahyɛle buale ye kɛ, “Ɛ ra ne mandileki ne ati, ɛnɛ nɔe Gyekɔbo nee wɔ bala.”

¹⁶Mɔɔ aleɛ muanle nwolɛ, na Gyekɔbo vi ɛbɔ nu ɛlɛba la, Liya hɔyiale ye adenle na ɔzele ye kɛ, “Ɔwɔ kɛ ɛba me ɛkɛ ne ɛnɛ, ɔluakɛ meva me ra ne mandileki mebɔ wɔ ɛkpa.” Yemɔti ɔ nee ye hɔlale kenle ko ne nɔe ne.

¹⁷Na Nyamenle diele Liya nzɛlɛlɛ. Ɔnrenzɛle na ɔ nee Gyekɔbo wole ɔ ra nrenya mɔɔ tɔ zolɛ nnu la.

¹⁸Liya hanle kɛ, “Nyamenle ɛdua me ɛkpabɔdeɛ ne ɛmaa me, ɔluakɛ menvale me sonvolɛ raalɛ ne memanle me hu.” Yemɔti ɔdonle ye Yesakaa.[34]

¹⁹Liya nrenzɛle bieko na ɔwole Gyekɔbo ara nrenya mɔɔ tɔ zolɛ nsia la.

²⁰Na ɔzele kɛ, “Nyamenle ɛlo me agyalɛ nu ahyɛlɛdeɛ mɔɔ le kpalɛ a. Kɛkala akee me hu bali me eni, ɔboalekɛ mewo mralɛ mrenya nsia memaa ye.” Yemɔti ɔdonle ye Zɛbulɛn.[35]

²¹Nzinlii ɔwole ralɛ raalɛ na ɔdonle ye Daena.

²²Akee Nyamenle hakyele Relahyɛle na ɔdiele ye nzɛlɛlɛ, ɔdukuele ye awodeɛ ne ɔmanle ye.

²³Ɔnrenzɛle na ɔwole ralɛ nrenya. Na ɔhanle kɛ, “Nyamenle ɛkpa me nyiane.”

²⁴Ɔdonle ye Dwosefi[36] na ɔhanle kɛ, “Mesɛlɛ Ɛdɛnkɛma kɛ ɔmaa me ralɛ nrenya bieko.”

²⁵Mɔɔ Relahyɛle wole Dwosefi la, Gyekɔbo zɛlɛle Leeban kɛ ɔmaa ye adenle ɔmaa ɔhɔ ye sua zo.

²⁶Ɔzele ye kɛ, “Maa menva me mraalɛ ne mɔ nee me mra ne mɔ, mɔɔ bɛ ti menzonlenle wɔ la mengɔ. Ɛdawɔ ɛze ɛzonlenlɛ mɔɔ meva mezonle wɔ la.”

²⁷Leeban buale ye kɛ, “Saa ɛkɛmaa me adenle a anrɛɛ meha ɛhye, menwu kɛ ɔlua wɔmɔ ɛ ti, Ɛdɛnkɛma ɛyila me.

²⁸Yemɔti ka mɔɔ ɛkɛlie la, na menwɔdua menwɔmaa wɔ.”

²⁹Gyekɔbo hanle kɛ, “Ɛdawɔ ɛze kɛ mezi mezonle wɔ nee kɛ wɔ nlankɛ nee mboane ɛzi ɛda me mekɛ zo la.

³⁰Ɔluakɛ ɛnee wɔ nyɛmoa le ekyi bie yɛɛ membale a, kɛkala bɛ nwo ɛzo dɔɔnwo kpalɛ, yɛɛ medame me ti, Ɛdɛnkɛma ɛyila wɔ wɔ debie biala anu. Na kɛkala menea a akee yedwu mekɛ mɔɔ ɔwɔ kɛ medwenle me sua nu amra anwo a.”

³¹Leeban bizale ye kɛ, “Duzu yɛɛ menva memaa wɔ a?” Gyekɔbo buale ye kɛ, “Menlie debie. Saa ɛkɛyɛ ɛhye ɛkɛmaa me a, anrɛɛ menwɔnlea wɔ mboane ne mɔ bieko.

³²Maa meneɛnlea wɔ mboane ne mɔ anu ɛnɛ demua ye ala, na menye boane anwo ndeta biala nee boane ralɛ anwo bile biala, yɛɛ abɔnkye anwo ndeta biala, na fa bɛmɛ yɛ me ahatualɛ.

³³Ɛhye yɛɛ saa kenle bie ɛkpondɛ me nɔhalɛ a ɔbamaa wɔanwu ye a. Ɛbanleɛnlea mɔɔ wɔva wɔmaa me la anu na abɔnkye biala mɔɔ anwo ɛnle ndeta anzɛɛ boane anzɛɛ boane ralɛ biala mɔɔ anwo ɛnle ndeta anzɛɛ boane ralɛ biala mɔɔ anwo ɛnle bile mɔɔ ɛkɛnwu ye wɔ me mboane nee me mbɔnkye ɛdeɛ ne mɔ anu la kile kɛ menwuale.”

³⁴Leeban zele ye kɛ, “Ɔle kpalɛ! Yɛ ye kɛ mɔɔ wɔha la.”

³⁵Na kenle ko ne, Leeban yeyele mbɔnkye nyinli nee mbelɛ anwo ndetɛndeta nee mboane mralɛ mɔɔ le bile la ɔmanle ɔ mra mrenya ne mɔ kɛ bɛhɔzie.

³⁶Ɔ nee bɛ hɔle ɛleka mɔɔ saa ɛvi Gyekɔbo anwo ɛkɛ ne ɛkɔ lɔ a bɛtia kenle nsa la. Na Gyekɔbo nleanle Leeban mboane ne mɔɔ hale la.

³⁷Akee Gyekɔbo hɔpɛle “alemɔndo”, “pɔpola”, yɛɛ “pilen” mbaka amolɛ na ɔyeyele bɛ nwo abonle ne bie ndenrɛndenra, ɔmanle mbaka ne mɔ anwo yɛle ndetɛndeta.

³⁸Ɔvale mbaka ne mɔ mɔɔ yezunzo nwolɛ abonle ne bie mɔ la ɔhɔguale mboane ne mɔ nee mbɔnkye ne mɔ ahyɛnze anzɛɛ ninyɛne mɔɔ bɛno nu nzule la anu. Ɔyɛle ɛhye, ɔluakɛ saa nyɛmoa ne mɔ ba kɛ bɛbanlo nzule a, yɛɛ bɛfola bɛ nwo a.

³⁹Na kɛmɔ nyɛmoa ne mɔ fola bɛ nwo wɔ mbaka anwo ndeta ne mɔ anwo la ati, bɛwo bɛ mra a nyɛmoa mralɛ ne mɔ anwo le ndeta.

⁴⁰Gyekɔbo yele mboane mralɛ ne mɔ vile mbɔnkye ne mɔ anu na ɔmanle bɛ nye hɔle Leeban nyɛmoa anwo bile nee ndetɛndeta ne mɔ anwo. Ɔyele ye nyɛmoa ɛdeɛ ne ɔvile Leeban ɛdeɛ ne anu. Yeanva bɛ yeambɔ Leeban ɛdeɛ ne anu.

⁴¹Saa ayɛmoa bie mɔɔ anwo yɛ se la ɛlɛnrenzɛ a, Gyekɔbo fa mbaka ne mɔ gua ɛleka mɔɔ ayɛmoa ne mɔ no nzule la, amaa yeawo ndeta.

⁴²Na saa ayɛmoa ne anwo ɛnyɛ se a, yemɔ ɔnyɛ ye zɔhane. Yemɔti ɛnee nyɛmoa ne mɔ mɔɔ anwo yɛ se la amuala le Gyekɔbo ɛdeɛ, yɛɛ mɔɔ anwo ɛnyɛ se la amuala le Leeban ɛdeɛ.

⁴³Gyekɔbo yɛle ye zɛhae na ɔnyianle ɔ nwo kpole kpalɛ; ɔnyianle nyɛmoa, sonvolɛ mrenya nee mraalɛ, afunlumu nee asoaso dɔɔnwo.