Read Nzema Mɔl 31 Bible Online

Mɔl 31 - Nzema bible

Mɔl 31

¹Na Gyekɔbo dele kɛ Leeban amra mrenya ne mɔ ɛlɛkeha kɛ, “Gyekɔbo ɛva yɛ ze agyadeɛ ne amuala ɛyɛ ye ɛdeɛ, na yelua yɛ ze anwo zo yenyia ɔ nwo.”

²Gyekɔbo eza nwunle kɛ Leeban ɛmbu ye, kɛmɔ alumua ne ɔbu ye la.

³Na Ɛdɛnkɛma zele Gyekɔbo kɛ, “Sia kɔ ɛ ze nee ɛ nwo amra sua zo, na me nee wɔ balua.”

⁴Yemɔti Gyekɔbo zoanle manle bɛhɔvale Relahyɛle nee Liya bɛrale ɛya ne mɔɔ ye mboane ne mɔ wɔ nuhua la anu.

⁵Ɔzele bɛ kɛ, “Menwu kɛ bɛ ze anye ɛnlie me nwo kɛ alumua ne la. Noko me ze mɔ Nyamenle ne nee me lua.

⁶Bɛdabɛ bɛze kɛ meva me anwosesebɛ muala mezonle bɛ ze.

⁷Noko bɛze ɛli me ndunlumi, yehakyi me ahatualɛ ne fane bulu, na Nyamenle ammaa ye adenle yeammaa yeanva ɔ sa yeanga me.

⁸Saa ɔka kɛ, ‘Wɔ ahatualɛ a le nyɛmoa anwo ndetɛndeta ne’ a, ɛnee nyɛmoa ne mɔ ɛlɛwo anwo ndeta; yɛɛ saa ɔka kɛ, ‘Wɔ ahatualɛ a le anwo meɛbea ne’ a, ɛnee nyɛmoa ne mɔ wo anwo meɛbea.

⁹Zɛhae yɛɛ Nyamenle ɛyɛ ɛlie bɛ ze mboane nee nlankɛ ɛmaa me a.

¹⁰“Mekɛ mɔɔ nyɛmoa ne mɔ fa nrenzɛ la anu, menganle ɛlalɛ, na ɛlalɛ ne anu memanle me nye zo la, menwunle kɛ mbɔnkye nyinli mɔɔ kola fola la amuala le ndeta nee meɛbea.

¹¹Na Nyamenle soanvolɛ ne vɛlɛle me, ‘Gyekɔbo!’ Membuale kɛ, ‘Mewɔ ɛke!’

¹²Na ɔzele me kɛ, ‘Maa ɛ nye zo nea nehane. Mbɔnkye nyinli mɔɔ kola fola la amuala le ndeta nee meɛbea, ɔluakɛ menwu mɔɔ Leeban ɛlɛfa ayɛ wɔ la amuala.

¹³ Mame a mele Bɛtɛle, ɛleka mɔɔ ɛkpɔnlanle bolɛ sika ne, ɛguale nwole zolɛ, ɛbɔle me ɛwɔkɛ ne la Nyamenle ne. Dwazo, ɛvi maanle ɛhye anu tu, na sia kɔ azɛlɛ ne mɔɔ bɛwole wɔ zolɛ la azo.’ ”

¹⁴Na Relahyɛle nee Liya buale ye kɛ, “Yɛmɛ, yɛnlɛ agyadeɛ biala wɔ yɛ ze sua nu.

¹⁵Ɔbu yɛ kɛ yɛle nyɛvolɛ, ɔluakɛ yedɔne yɛ, yɛɛ ezukoa biala mɔɔ bɛkɛva bɛkɛmaa ye mɔɔ le yɛ ɛdeɛ la ɛnee yeva yebɔ ɔ nwo.

¹⁶Agyadeɛ ɛhye mɔ amuala mɔɔ Nyamenle ɛlie ɛvi yɛ ze asa anu la le yɛ nee yɛ mra ɛdeɛ. Yemɔti kɛkala, yɛ mɔɔ Nyamenle ɛze wɔ la.”

¹⁷Yemɔti Gyekɔbo boɔboale ɔ nwo kɛ ɔsia yeahɔ ɔ ze anwo lɔ wɔ Keena azɛlɛ zo. Ɔvolale ye mraalɛ ne nee ɔ mra ne mɔ afunlumu zo, ɔhanle ye nyɛmoa ne mɔ ɔguale ɔ nyunlu, na ɔvale ye debie biala mɔɔ ɔnyianle ye wɔ Mɛsɔpɔteemea azɛlɛ zo la.

¹⁸

¹⁹Ɛnee Leeban ɛhɔ kɛ ɔkapepɛ ye mboane nwo enrinli, na Relahyɛle wuale ɔ ze sua nu mmonle ne mɔ.

²⁰Gyekɔbo anga angile Leeban kɛ ɔwɔ ye adwenle nu kɛ ɔbanriandi.

²¹Na ɔvale ye debie biala ɔnriandile. Ɔpɛle Azule Yufileti ne na ɔbɔle ɔ ti Geleade maanle nu awoka ne mɔ azo.

²²Gyekɔbo nriandile la, ye kenle nsa yɛɛ bɛhɔbɔle Leeban amaneɛ a.

²³Leeban vale ɔ nwo amra na bɛdinle Gyekɔbo toonwo kenle nsuu na bɛkpumgbunle ye wɔ Geleade maanle nu awoka ne mɔ anu.

²⁴Na Nyamenle rale Arelamenli Leeban anwo nɔɔzo wɔ ɛlalɛ nu na ɔzele ye kɛ, “Nea boɛ na wɔanga edwɛkɛ biala, kpalɛ o, ɛtane o, wɔangile Gyekɔbo.”

²⁵Na Leeban hɔdole Gyekɔbo. Ɛnee Gyekɔbo ɛyɛ ye azokoɛleɛ wɔ awoka ne mɔ anu, na Leeban ɔdaye ɔ nee ɔ nwo amra bɛrayɛle bɛ azokoɛleɛ wɔ Geleade awoka ne mɔ anu.

²⁶Leeban bizale Gyekɔbo kɛ, “Duzu debie a wɔyɛ la, kɛ wɔbɛlɛbɛla me, na wɔva me mra mraalɛ ne mɔ ɛlɛkɔ kɛ menli mɔɔ bɛhye bɛ nuokɛ wɔ konle nu a?

²⁷Duzu ati a ɛbɛlɛbɛlale me, ɛveale ɛ nwo ɛnriandile, na wɔanga wɔangile me, wɔammaa meanva anyelielɛ, edwɛndolɛ, aweɛne, nee getaa ɛbɔlɛ meangyakyi wɔ adenle a?

²⁸Na duzu ati bɔbɔ yɛɛ wɔammaa meanvo me nlɔnra nee me mra mraalɛ ne mɔ anvoka anwo, me nee bɛ anli nrɛlaleɛ ɛ? Mɔɔ wɔyɛ la, wɔanyɛ ye boɛ fee.

²⁹Anrɛɛ mekola me nee wɔ di ye pɛsɛɛ, na ɛ ze Nyamenle ne dendɛle hilele me nɔe kɛ, ‘Nea boɛ na wɔanga edwɛkɛ biala, kpalɛ o, ɛtane o, wɔangile Gyekɔbo.’

³⁰Kɛmɔ ɛ nwo ɛlɛdɔ ɛ ze sua nu la ati yɛɛ ɛlɛkɔ a, na duzu ati a ɛwuale me mmonle ne mɔ ɛ?”

³¹Gyekɔbo buale kɛ, “Ɛnee medwenle kɛ ɛbaza me wɔalie ɛ mra mraalɛ ne mɔ, yemɔti menzulole.

³²Awie mɔɔ ɛkɛnwu wɔ mmonle ne mɔ wɔ ye ɛkɛ ne la, bava ye ngoane adua. Yɛ nwo amra a ɛbɔ yɛ ɛyia la; debie biala mɔɔ le wɔ ɛdeɛ na ɛkɛnwu ye me ninyɛne ye anu la, ka na fa.” Ɛnee Gyekɔbo ɛnze kɛ Relahyɛle yɛɛ ɛwua mmonle ne a.

³³Yemɔti Leeban wolole Gyekɔbo ndanlɛ sua ne anu, ɔhɔle Liya ndanlɛ sua ne anu, ɔhɔle sonvolɛ mraalɛ nwiɔ ne ndanlɛ sua ne mɔ anu na yeannwu ɛhwee. Akee ɔvi Liya ndanlɛ sua ne anu ɔvindele ɔhɔwolole Relahyɛle ndanlɛ sua ɛdeɛ ne anu.

³⁴Relahyɛle sesale awuke ne anu mmonle ne mɔ la, ɔvale bɛ ɔguale ebia mɔɔ bɛfa bɛsie afunlumu nwo zo bɛtɛnla zolɛ la anu na ɔdɛnlanle zolɛ. Leeban nleɛnleanle ndanlɛ sua ne anu ɛleka biala, na yeannwu ye mmonle ne.

³⁵Ɔradwule Relahyɛle anwo ɛkɛ ne la, Relahyɛle hanle hilele ye kɛ, “Egya mmafa ɛya kɛ yera me nwo na menrɛdwazo a, ɔboalekɛ mebu me sa.” Yemɔti Leeban nleɛnleanle ɛkɛ ne amuala, na yeannwu mmonle ne mɔ.

³⁶Akee Gyekɔbo vale ɛya na ɔhwile Leeban anyunlu; ɔzele ye kɛ, “Duzu ɛtane a meyɛ a? Duzu munzule yɛɛ mebɔ, mɔɔ yemɔti wɔvoa me ndinlizo a?

³⁷Wɔnleɛnlea me ninyɛne ne mɔ amuala anu wɔwie, duzu debie yɛɛ wɔnwu ye nu mɔɔ le wɔ ɛdeɛ a? Mɔɔ wɔnwu ye la fa finde ɛke maa yɛ nwo amra ye ɛli nwolɛ daselɛ na bɛha mɔɔ bɛka la bɛhile yɛ.

³⁸Ɛvolɛ abulanwiɔ ye mɔɔ me nee wɔ ɛradɛnla la, wɔ mboane mbelɛ nee mbɔnkye mbelɛ ako ɛtɛkpɔnenle ɛlɛ, yɛɛ metɛkyele wɔ mboane nyinli ne mɔ bie metɛdile.

³⁹Mɔɔ nanemgbole hyele ye hunle ye bɔbɔ la, meanva ye funli meambɛlɛ wɔ, mefa bie mesie ɔ bo zo. Saa bɛwua bie ewiazo anzɛɛ nɔɔzo a, ɛdie bie ɛfi me ɛkɛ ne.

⁴⁰Ewia bɔ me alehyenlɛ nu, ɛyɛlɛ ku me nɔɔzo, me nye ɛnze nafelɛ.

⁴¹Ɛvolɛ abulanwiɔ ne mɔɔ meli wɔ wɔ sua nu la, menzonlenle nuhua ɛvolɛ bulu nee nna wɔ ɛ mra mraalɛ nwiɔ ne ati, yɛɛ mboane ne mɔ noko ati, menzonlenle ɛvolɛ nsia, yɛɛ wɔhakyi me ahatualɛ ne fane bulu.

⁴²Saa tɛ me ze Nyamenle ne, Ebileham Nyamenle ne, yɛɛ Ayezeke Ɛzulolɛ ne mɔɔ gyi me nzi la a, anrɛɛ nɔhalɛ, wɔmaa melɛ me sa mgbane mezia mehɔ. Nyamenle nwunle me amaneɛnwunlɛ nee ɛvɛlɛ mɔɔ mevɛ la ati yɛɛ nɔe ɔhwile ɛ nyunlu a.”

⁴³Akee Leeban zele Gyekɔbo kɛ, “Ngakula mraalɛ ne mɔ le me mra, ngakula ne mɔ le me ngakula, mboane ne mɔ le me mboane, yɛɛ debie biala mɔɔ ɛnwu ye ɛke la le me ɛdeɛ. Noko kɛkala menlɛ edwɛkɛ biala menga wɔ me mra mraalɛ ne mɔ anzɛɛ bɛ kunlu mralɛ mɔɔ bɛwo bɛ la anwo.

⁴⁴Yemɔti maa yɛyɛ ngyehyɛlɛ yɛhye ɔ bo, mɔɔ kyekye wɔ nee medame a, na ɔyɛ daselɛ ɔgyinla yɛ mu nwiɔ yɛ avinli.”

⁴⁵Na Gyekɔbo vale bolɛ kpɔnlanle ye sika.

⁴⁶Akee ɔzele ɔ nwo amra ne mɔ kɛ, “Bɛsesa awolɛ bɛhua ye edukue.” Na bɛsesale awolɛ bɛhuanle ye edukue na bɛlile debie wɔ awolɛ edukue ne anwo.

⁴⁷Leeban donle ye Gyigaa Seehaduta,[37] na Gyekɔbo donle ye Geelide.[38]

⁴⁸Leeban zele kɛ, “Ɛnɛ, awolɛ edukue ɛhye le daselɛ wɔ yɛ mu nwiɔ yɛ avinli.” Yemɔti bɛvɛlɛle awolɛ edukue ne Geelide,

⁴⁹na bɛvɛlɛle bolɛ sika ne Mezepa.[39] Na Leeban hanle kɛ, “Saa yɛ mu nwiɔ yɛkpakye a, Ɛdɛnkɛma ɛzinza wɔ nee medame.

⁵⁰Saa ɛkile me mra mraalɛ ne mɔ nyane anzɛɛ ɛgyakyi bɛ ɛkɛ ɛgya mraalɛ gyɛne a, kakye kɛ awie ɛngyi yɛ mu nwiɔ yɛ avinli bɔbɔ ɛdeɛ, noko Nyamenle di yɛ mu nwiɔ daselɛ.

⁵¹Nea awolɛ edukue ɛhye nee bolɛ sika ne mɔɔ meva mezie yɛ mu nwiɔ yɛ avinli la.

⁵²Awolɛ edukue ne le daselɛ yɛɛ bolɛ sika ne le daselɛ, kɛ menrɛbɔ menrɛdɛla edukue ɛhye menrɛra ɛ nwo zo, yɛɛ ɛdawɔ noko ɛnrɛbɔ ɛnrɛdɛla edukue ne nee bolɛ sika ne ɛnrɛra me nwo zo kɛ ɛbayɛ me ɛtane.

⁵³Ebileham Nyamenle ne, Neehɔ Nyamenle ne, bɛ ze mɔ Nyamenle ne ɛli yɛ daselɛ.” Yemɔti Gyekɔbo ɔdaye ɔvale ɔ ze Ayezeke Ɛzulolɛ ne ɔhanle ndane.

⁵⁴Akee Gyekɔbo bɔle azu wɔ boka ne azo, na ɔvɛlɛle ɔ nwo amra ne kɛ bɛrakpula bɛ sa. Bɛlile debie, na bɛlale boka ne azo kenle ko ne nɔe ne.

⁵⁵Aleɛ hyenle nwonlomɔ mangyee ne la, Leeban dwazole, ɔvole ɔ mra mraalɛ nwiɔ ne nee ye nlɔnra ne mɔ anvoka anwo ɔ nee bɛ lile nrɛlaleɛ; ɔyileyilale bɛ na ɔziale ɔhɔle ye sua zo.