Read Nzema Mɔl 32 Bible Online

Mɔl 32 - Nzema bible

Mɔl 32

¹Gyekɔbo zɔle ye adendulɛ ne azo, na ɔkɔ la ɔ nee Nyamenle soanvolɛma yiale.

²Gyekɔbo nwunle bɛ la ɔhanle kɛ, “Nyamenle ɛlɔnema ɛne!” Yemɔti ɔvɛlɛle ɛleka ne Meehaneeyem.[40]

³Gyekɔbo zoanle menli manle bɛlumuale ɔ nyunlu wɔ ɔ diema Yisɔ anwo lɔ wɔ Siyɛ azɛlɛ zo, wɔ Yidɔm maanle nu.

⁴Ɔzele bɛ kɛ, “Bɛhɔha bɛhile me menle Yisɔ kɛ, medame ye akɛlɛ Gyekɔbo, mengɔle Leeban anwo lɔ, na nehane a mewɔ toonwo mɔɔ yeradwu bekezɛ a.

⁵Melɛ nlankɛ, asoaso, mboane nee mbɔnkye, yɛɛ sonvolɛ mraalɛ nee mrenya. Na mezoa bɛ kɛ bɛraha bɛhile ye, amaa yealie me gyɛlɛɛnye.”

⁶Menli mɔɔ ɔzoanle bɛ la hɔle rale na bɛrahanle bɛhilele Gyekɔbo kɛ, “Yɛhɔdole ɛ diema Yisɔ, ɔlɛba yearayia wɔ, na menli ɛya nna li ɔ nzi.”

⁷Gyekɔbo ahonle dule kpole na ɛzulolɛ hanle ye. Yemɔti ye menli mɔɔ ɔ nee bɛ lua la, ye nyɛmoa, ye nlankɛ, yɛɛ ye afunlumu ne mɔ, ɔhyɛle ko biala anu nwiɔ na ɔyɛle bɛ ekpunli nwiɔ,

⁸na ɔdwenlenle nwolɛ kɛ, “Saa Yisɔ nee bɛ yia na ɔbɔ ekpunli ko abo zo a, ekpunli ko ne mɔɔ ɛha la banriandi.”

⁹Na akee Gyekɔbo zɛlɛle kɛ, “O me ze Ebileham Nyamenle, me ze Ayezeke Nyamenle, O Ɛdɛnkɛma mɔɔ zele me kɛ menzia mengɔ me sua nu nee me nwo amra anu na ɛkɛyɛ me boɛ a,

¹⁰me nwo ɛnfɛta wɔ ahunlunyele bebelebe ne nee nɔhalɛ mɔɔ wɔli wɔmaa me la. Ɔluakɛ kpɔma ala a melɛ mɔɔ menvale mempɛle Azule Dwɔdan ye a. Na kɛkala, meyɛ menli ekpunli nwiɔ a mera a.

¹¹Mesɛlɛ wɔ, die me wɔ me diema Yisɔ asa anu, ɔluakɛ mesulo kɛ ɔbara yearahu yɛ muala, ngakula ne mɔ nee bɛ nli mɔ.

¹² Wɔmɔ yɛɛ ɛhanle kɛ, ‘Mebayɛ wɔ boɛ na meamaa ɛ bo zo amra anwo azo kɛ ɛnweazo anwea, mɔɔ bɛ somaa ti bɛnrɛhola bɛ tia a.’ ”

¹³Yemɔti kenle ko ne nɔe ne ɔlale ɛkɛ ne. Ɔnleanle ninyɛne mɔɔ ɔlɛ la anu na ɔyeyele bie wɔ nuhua kɛ ɔfa yeamaa bɛahɔmaa ɔ diema Yisɔ kɛ ye ahyɛlɛdeɛ ɔ.

¹⁴Ninyɛne mɔɔ ɔyeyele la ɛne: mbɔnkye mbelɛ ɛya nwiɔ yɛɛ nyinli abulanwiɔ, mboane mbelɛ ɛya nwiɔ yɛɛ nyinli abulanwiɔ,

¹⁵afunlumu abulasa nee bɛ mra, nlankɛ mbelɛ abulanla yɛɛ nyinli bulu, yɛɛ asoaso mbelɛ abulanwiɔ yɛɛ nyinli bulu.

¹⁶Ɔvale ɛhye mɔ ɔwulale ye sonvolɛma ne mɔ asa anu. Ekpunli ko biala angome nee ye kavolɛ. Akee ɔzele ye sonvolɛma ne mɔ kɛ, “Bɛze bɛlumua me nyunlu na bɛmaa adenle ɛdeda bɛ ekpunli ekpunli ne mɔ avinli.”

¹⁷Ɔzele sonvolɛ ne mɔɔ lumua la kɛ, “Saa me diema Yisɔ yia bɛ na ɔbiza wɔ kɛ, ‘Ɛ menle a le nwane? Ɛkɔ nienwu? Nwane a lɛ ɛhye mɔ mɔɔ ɛlɛka bɛ la?’ a,

¹⁸se ye kɛ, ‘Bɛle wɔ akɛlɛ Gyekɔbo ɛdeɛ. Bɛle ahyɛlɛdeɛ mɔɔ yezoa yɛ kɛ yɛva yɛhɔmaa me menle Yisɔ a. Ɔdaye mumua ne ɔli yɛ nzi ɔlɛba.’ ”

¹⁹Zɔhane ala yɛɛ ɔhanle ɔhilele sonvolɛma ne mɔ mɔɔ tɔ zolɛ nwiɔ, nee mɔɔ tɔ zolɛ nsa, nee bɛdabɛ mɔɔ bɛlɛka nyɛmoa ne mɔ la amuala a. Ɔzele bɛ kɛ, “Saa bɛyia Yisɔ a, bɛha edwɛkɛ ko ne ala bɛhile ye,

²⁰na bɛva bɛzɔ zolɛ kɛ, ‘Eza wɔ sonvolɛ Gyekɔbo mumua ne li yɛ nzi ɛlɛba.’ ” Ɔluakɛ ɔdwenlenle nwolɛ kɛ, “Me ahyɛlɛ ninyɛne ne mɔ bamaa yeagyakyi ɛya biala mɔɔ yeva ye me nwo la na meahɔdo ye. Medie medi kɛ ɔbalie me.”

²¹Yemɔti ɔmanle bɛvale ninyɛne ne mɔ bɛlumuale ɔ nyunlu, na yemɔ ɔhale azokoɛleɛ ne kenle ko ne nɔe ne.

²²Kenle ko ne nɔe ne ala Gyekɔbo vale ye mraalɛ nwiɔ ne, ye sonvolɛ mraalɛ nwiɔ ne, yɛɛ ye ngakula bulu nee ko ne amuala pɛle Azule Gyeebɔko ne wɔ ye ɛleka mɔɔ bɛkola bɛwudwu bɛpɛ la.

²³Ɔvale bɛ ɔpɛle azule ne, ɔvale debie biala mɔɔ ɔlɛ la ɔpɛle.

²⁴Akee ɔhale ɔ ngome wɔ azule ne anzi, na nrenya bie nee ye rafutule toonwo aleɛ hyenle.

²⁵Na mɔɔ nrenya ne nwunle kɛ yeangola yeangomo Gyekɔbo anwo zo la, ɔvale ɔ sa ɔhanle Gyekɔbo ɛzɔlɛ, na Gyekɔbo adwongu huanenle wɔ ɛfutulɛ ne anu.

²⁶ Akee ɔzele Gyekɔbo kɛ, “Gyakyi me maa mengɔ, na aleɛ ɛlɛkye.” Gyekɔbo hanle kɛ, “Menrɛgyakyi wɔ menrɛmaa ɛnrɛhɔ, kyesɛ ɛyila me.”

²⁷Nrenya ne bizale Gyekɔbo kɛ, “Kɛ bɛfɛlɛ wɔ ɛ?” Ɔbuale kɛ, “Bɛfɛlɛ me Gyekɔbo.”

²⁸ Nrenya ne zele kɛ, “Bɛnrɛvɛlɛ wɔ Gyekɔbo bieko, bɛbavɛlɛ wɔ Yizilayɛ[41] ɔluakɛ ɛ nee Nyamenle nee menli ɛpele, na wɔli konim.”

²⁹ Gyekɔbo bizale ye kɛ, “Mebodo wɔ, bɔ wɔ duma kile me.” Nrenya ne bizale ye kɛ, “Duzu ati yɛɛ ɛbiza me duma a?” Akee ɔyilale Gyekɔbo.

³⁰Gyekɔbo hanle kɛ, “Me nee Nyamenle yɛ nye ɛyɛ nna, noko metɛte ngoane nu.” Yemɔti ɔvɛlɛle ɛkɛ ne Pɛneɛle.[42]

³¹Mɔɔ sɛnzɛne ne dudule la yɛɛ Gyekɔbo vi Pɛneɛle dule ɔ bo a, na ɛnee ye ɛzɔlɛ ne ati ɔtia ɔtɔ zo.

³²Yemɔti ɛnɛ nee ɛnɛ, Yizilayɛma ɛnli adwongu ndinli ne mɔɔ zɔ bowule ne mɔɔ wɔ ɛzɔlɛ ne anu la, ɔboalekɛ nrenya ne vale ɔ sa hanle Gyekɔbo adwongu ndinli ne.