Read Nzema Mɔl 35 Bible Online

Mɔl 35 - Nzema bible

Mɔl 35

¹ Nyamenle zele Gyekɔbo kɛ, “Dwazo kɔ Bɛtɛle na kɔdɛnla ɛkɛ. Si azukponle maa Nyamenle ne mɔɔ yele ɔ nwo hilele wɔ ɛkɛ ne, wɔ mekɛ mɔɔ ɛnee ɛlɛnriandi ɛ diema Yisɔ la.”

²Yemɔti Gyekɔbo hanle hilele ye abusua ne nee bɛdabɛ mɔɔ bɛwɔ ye sua nu ɛkɛ ne la kɛ, “Bɛvuandi bɛ nyamenle gyɛne gyɛne ne mɔɔ bɛlɛ la bɛgua, bɛnlua bɛ nwo na bɛhakyi bɛ adɛladeɛ mɔɔ bɛwula la.

³Akee bɛdwazo bɛmaa yɛhɔ Bɛtɛle, amaa meazi azukponle meamaa Nyamenle ne mɔɔ diele me nzɛlɛlɛ wɔ mekɛ mɔɔ ɛnee mewɔ anwongyelelɛ nu la. Yemɔ yɛɛ ɔ nee me ɛlua ɛleka biala mɔɔ mehɔ la a.”

⁴Yemɔti bɛyeyele bɛ mmonle mɔɔ bɛlɛ nee bɛ nzo nu asomadeɛ ne mɔ amuala bɛmanle Gyekɔbo. Na Gyekɔbo vunle bɛ wulale oku baka kpole ne mɔɔ wɔ Hyikɛm kandiba la abo.

⁵Bɛzile nu mɔɔ bɛkɔ la, ɛzulolɛ kpole dɔle azuamgbole mɔɔ zuozua Hyikɛm la amra anwo zo, yemɔti bɛ biala anga ɛlalɛ kɛ ɔkɛkpo Gyekɔbo amra ne mɔ.

⁶Gyekɔbo nee ɔ sa zo ne mɔ kɔsɔɔti hɔdwule Lɛze, mɔɔ wɔ Keena azɛlɛ zo la. Ɛnɛ bɛfɛlɛ sua ɛhye Bɛtɛle.

⁷Ɔzile azukponle wɔ ɛkɛ ne na ɔvɛlɛle ɛleka ne Bɛtɛle Nyamenle,[45] ɔboalekɛ ɛkɛ ne a mekɛ mɔɔ ɔnriandi ɔ diema Yisɔ la Nyamenle yele ɔ nwo hilele ye a.

⁸Ɛkɛ ne a Dɛbola, mɔɔ nea Relɛbɛka la wule a. Bɛziele ye wɔ oku baka bie abo wɔ Bɛtɛle nyiakɛ, na bɛvɛlɛle ɛkɛ ne “Ɛzunlɛ oku Baka.”

⁹Nyamenle yele ɔ nwo hilele Gyekɔbo bieko wɔ mekɛ mɔɔ ɔvi Mɛsɔpɔteemea ɔrale la, na ɔyilale ye.

¹⁰ Nyamenle zele ye kɛ, “Bɛfɛlɛ wɔ Gyekɔbo; ɔvi ɛnɛ mɔɔ kɔ la, bɛnrɛvɛlɛ wɔ Gyekɔbo bieko. Wɔ duma a le Yizilayɛ.” Yemɔti bɛvɛlɛle ye Yizilayɛ.

¹¹ Na Nyamenle zele ye kɛ, “Mame a mele Nyamenle Bedevinli[46] ne a. Ɛbanyia ɛ bo zo amra dɔɔnwo na bɛ nwo azo. Ɛbayɛ maanle na maanle maanle dɔɔnwo vi wɔ nuhua bavinde, na arelemgbunli vi wɔ nuhua avinde.

¹²Mebava azɛlɛ ne mɔɔ menvale memanle Ebileham nee Ayezeke la meamaa wɔ. Mebava azɛlɛ ne meamaa ɛ bo zo amra mɔɔ vi ɛ nzi bara la.”

¹³Akee Nyamenle vi ɔ nwo ɛkɛ ne wɔ ɛleka mɔɔ ɔdendɛle ɔhilele ye la na ɔhɔle.

¹⁴ Na Gyekɔbo kpɔnlanle bolɛ sika wɔ ɛleka mɔɔ Nyamenle dendɛle hilele ye la, ɔguale nza zolɛ ɔbɔle azu, na ɔguale ɔlivi nwole zolɛ.

¹⁵Yemɔti Gyekɔbo vɛlɛle ɛleka mɔɔ Nyamenle dendɛle hilele ye la, Bɛtɛle.[47]

¹⁶Akee bɛvi Bɛtɛle bɛdule bɛ bo. Bɛhɔle bie, noko mɔɔ ɛnee bɛ nee Yifelate avinli tɛwa la, Relahyɛle ako hanle ye, na ɔyɛle se kpalɛ.

¹⁷Mɔɔ ɛnee akee ye awolɛ nyane ne ɛyɛ kpole la, raalɛ ne mɔɔ die ye awolɛ la zele ye kɛ, “Mmasulo, ɔluakɛ ɛbanyia ralɛ nrenya bieko.”

¹⁸Na mɔɔ ɔbawu la (ɔluakɛ ɔwule), ɔdonle kakula ne Bɛnonae.[48] Noko kakula ne ɔ ze donle ye Bɛngyaman.[49]

¹⁹Yemɔti Relahyɛle wule na bɛziele ye wɔ Yifelate adevinli ne. Ɛkɛ ne a ɛnɛ bɛfɛlɛ ye Bɛtelɛhɛm la.

²⁰Na Gyekɔbo kpɔnlanle bolɛ sika wɔ nla ne azo; na ɛnɛ nee ɛnɛ, ɔtɛkpɔnla ɛkɛ, ɔtɛkile Relahyɛle nla ne.

²¹Yizilayɛ zɔle ye adendulɛ ne azo na ɔhɔyɛle ye azokoɛleɛ wɔ Yidaa tawa ne anzi lɔ.

²² Mekɛ mɔɔ Yizilayɛ wɔ maanle ɛhye anu la, Wulubɛn hɔdoale ɔ ze mgbɔnla ne mɔɔ bɛfɛlɛ ye Belehaa la, ɔ nee ye lale; na Yizilayɛ dele. Gyekɔbo lɛ mralɛ mrenya bulu nee nwiɔ.

²³Ɔ ye Liya amra mrenya ne mɔ a le Wulubɛn (yemɔ a le Gyekɔbo ara nrenya kpanyinli a), Semɛyɔn, Livae, Dwuda, Yesakaa, yɛɛ Zɛbulɛn.

²⁴Relahyɛle amra mrenya a le Dwosefi nee Bɛngyaman.

²⁵Belehaa amra mrenya a le Dan nee Nafetalae. Belehaa le Gyekɔbo aye Relahyɛle sonvolɛ raalɛ.

²⁶Liya sonvolɛ raalɛ Zelepa amra mrenya a le Gaade nee Ahya. Gyekɔbo amra mrenya mɔɔ ɔwole bɛ wɔ Mɛsɔpɔteemea la ɛne.

²⁷Gyekɔbo radwule ɔ ze Ayezeke sua zo wɔ Mameli anzɛɛ Keleate Aaba. Ɛke ko ye ala a bɛfɛlɛ ye Hibulɔn la; ɛke a Ebileham nee Ayezeke dɛnlanle a.

²⁸Mekɛ ne anu ɛnee Ayezeke ɛli ɛvolɛ ɛya ko abulatwɛ.

²⁹Na Ayezeke wule, bɛziele ye na ɛnee yeyɛ ɛrelera nwosonwoso. Ɔ mra mrenya Yisɔ nee Gyekɔbo a ziele ye a.