Read Nzema Mɔl 41 Bible Online

Mɔl 41 - Nzema bible

Mɔl 41

¹Ɛvolɛ nwiɔ anzi, Yigyibiti belemgbunli ne hanle ɛlalɛ kɛ ɛnee ɔgyi Azule Naele ne anloa.

²Ɔnwunle kɛ nlankɛ mgbole, dɔlera nsuu vi azule ne anu ɛvinde na bɛlɛdidi ɛhonle ne mɔɔ wɔ ɛkɛ ne la anu.

³Ɔnwunle kɛ eza nlankɛ nwanlera, kengamgbaanwo nsuu bɛdabɛ bɛvi azule ne anu bɛvo bɛragyinlegyinla nlankɛ ɛhendeɛ ne mɔ anwo ɛkɛ wɔ azule ne anloa.

⁴Na nlankɛ nwanlera, kengamgbaanwo nsuu ne hyele nlankɛ mgbole, dɔlera nsuu ne lile. Na belemgbunli ne dunwuele.

⁵Eza ɔlafele, na ɔhanle ɛlalɛ bieko. Ɔnwunle kɛ abɛlɛ mbaka mgbole nsuu ɛwɔlɔwɔlɔ abɛlɛ baka ko anwo.

⁶Yeangyɛ biala ɛnee eza abɛlɛ mbaka ɛtane ɛtane, agyendo nsuu bɛdabɛ noko bɛwɔlɔwɔlɔ.

⁷Na abɛlɛ mbaka ɛtane ɛtane, agyendo nsuu ne memenle abɛlɛ mbaka mgbole nsuu ne. Belemgbunli ne dunwuele na ɔnwunle kɛ ɔle ɛlalɛ.

⁸ Yemɔti aleɛ hyenle la ɛnee ye adwenle ɛzɛkye. Na ɔzoanle ɔmanle bɛhɔvɛlɛle ngonyiama mɔɔ wɔ Yigyibiti la amuala nee maanle ne anu nrɛlɛbɛvolɛma ne amuala na ɔhanle ye ɛlalɛ ne ɔhilele bɛ. Noko bɛ nuhua ko bɔbɔ angola ɛlalɛ ne abo kile kile belemgbunli ne.

⁹Akee sonvolɛ ne mɔɔ nea belemgbunli ne nza nee ye ahyɛnze zo la hanle hilele ye kɛ, “Nana, ɛnɛ mehakye kɛ mevo.

¹⁰Mekɛ mɔɔ ɛvale me nee sonvolɛ ne mɔɔ to kpanwo la anwo ɛya, na bɛguale yɛ efiade wɔ belemgbunli sinzavolɛma safohyenle ne sua nu la,

¹¹kenle ko nɔɔzo me nee sonvolɛ ɛhendeɛ ne yɛhanle ɛlalɛ. Yɛ ɛlalɛ ne mɔ le ngakyile, yɛɛ asolo ko biala abo.

¹²Mekɛ ne anu ɛnee yɛ nee Hibulunli kpavolɛ bie mɔɔ le sinzavolɛma safohyenle ne sonvolɛ la a gua ɛkɛ a. Yɛhanle yɛ ɛlalɛ ne mɔ yɛhilele ye, na ɔhilele ɛlalɛ ne mɔ abo ɔhilele yɛ, kɛmɔ sonla ko biala ye ɛlalɛ ne de la.

¹³Na kɛ ɔzile ɔhilele ɔ bo ɔhilele yɛ la, zɔhane ala yɛɛ ɔyɛle a. Bɛvale me gyima ne bɛmanle me, yɛɛ bɛhendanle sonvolɛ ne mɔɔ to kpanwo la.”

¹⁴Belemgbunli ne zoanle manle bɛhɔvale Dwosefi ndɛndɛ zo wɔ efiade ne bɛrale. Ɔkpale ɔ kɛsa, ɔbiale, ɔhakyile ye adɛladeɛ mɔɔ ɔwula la, na akee ɔhɔle belemgbunli anyunlu.

¹⁵Na belemgbunli ne zele Dwosefi kɛ, “Meha ɛlalɛ bie, na awie biala ɛnle ɛkɛ mɔɔ kola kile ɔ bo a. Na mede noko kɛ wɔmɔ, saa bɛka ɛlalɛ bɛkile wɔ a ɛkile ɔ bo.”

¹⁶Dwosefi buale kɛ, “Nana, medame me ngome mengola. Nyamenle yɛɛ bahile ɔ bo ahile Nana a.”

¹⁷Na belemgbunli ne zele Dwosefi kɛ, “Wɔ me ɛlalɛ ne anu, menwunle kɛ ɛnee megyi Azule Naele ne anloa.

¹⁸Na nlankɛ mgbole, dɔlera nsuu vi azule ne anu vindele na bɛvole bɛradidile ɛhonle ne anu.

¹⁹Na nlankɛ nwanlera, kengamgbaanwo nsuu bɛdabɛ bɛvi azule ne anu bɛvindele. Nlankɛ zɛhae, metɛnwunle bie ɛlɛ wɔ Yigyibiti maanle ye anu.

²⁰Na nlankɛ nwanlera, kengamgbaanwo nsuu ne hyele alumua nlankɛ mgbole dɔlera nsuu ne lile.

²¹Noko bɛlile bɛ bɛwiele bɔbɔ la, ɛnee ɛnwu nlankɛ ne mɔ a ɛkɛze kɛ bɛtɛdile ɛhwee, ɔluakɛ ɛnee kɛ bɛde ala la yɛɛ bɛde a. Na mendunwuele.

²²Meka ɛlalɛ bieko la ɛnee abɛlɛ mbaka mgbole nsuu ɛwɔlɔwɔlɔ abɛlɛ baka ko anwo,

²³na abɛlɛ mbaka ɛtane ɛtane, agyendo nsuu wɔlɔle,

²⁴na bɛmemenle abɛlɛ mbaka mgbole nsuu ne. Meha ɛlalɛ ɛhye mehile ngonyiama ne mɔ, noko meannyia bɛ nuhua ko bɔbɔ angile ɔ bo angile me.”

²⁵Na Dwosefi buale kɛ, “Nana, ɛlalɛ ne le kokye. Nyamenle ɛye mɔɔ ɔbayɛ la ɛhile Nana.

²⁶Nlankɛ mgbole nsuu ne kile ɛvolɛ nsuu, yɛɛ abɛlɛ mbaka mgbole nsuu ne kile ɛvolɛ nsuu. Bɛ mu nwiɔ bɛ bo le kokye.

²⁷Nlankɛ nwanlera, kengamgbaanwo nsuu ne mɔɔ lile ɛhendeɛ ne mɔ anzi rale yɛɛ abɛlɛ mbaka ɛtane ɛtane, agyendo ne noko kile ɛhɔne ɛvolɛ nsuu.

²⁸Ɔle kɛ mɔɔ menganle mengilele Nana la. Nyamenle ɛye mɔɔ ɔbayɛ la ɛhile Nana.

²⁹Ɛvolɛ nsuu bara mɔɔ aleɛ babu kpole wɔ Yigyibiti azɛlɛ ye azo a.

³⁰Na saa ɛhye pɛ nuhua a, ɛvolɛ nsuu badoa zo, mɔɔ ɛhɔne kpole kpalɛ bara a, na arɛlevilɛ bɔbɔ ara kɛ mekɛ bie ɛnee aleɛ ɛbu Yigyibiti. Ɛhɔne ne bara azɛlɛ ye amuala azo.

³¹Ɛhɔne ne mɔɔ bara la ati, awie ɛnrɛnwu kɛ ɛnee azɛlɛ ye azo le aleɛ ngome, ɔluakɛ ɛhɔne ne bayɛ kpole kpalɛ.

³²Ɛlalɛ fane nwiɔ ne mɔɔ Nana hanle la kile kɛ Nyamenle ɛbɔ ye kpɔkɛ ɛwie, na ɔnrɛhyɛ biala na yeazi.

³³“Zɔhane ati Nana, ɔwɔ kɛ ɛye sonla mɔɔ ɔ nye gyi ɔ ti anwo na ɔze nrɛlɛbɛ la, na ɛfa ye ɛsie Yigyibiti azɛlɛ ye kɔsɔɔti anloa.

³⁴Nana ɛbɔ ɔ bo ɛyeye menli mɔɔ banlea azɛlɛ ne mɔ azo la, na ɔlie aleɛ biala mɔɔ kɛvinde Yigyibiti azɛlɛ ye azo la anu ngyɛnu nnu ɛkpɔ ko wɔ ɛvolɛ nsuu ne mɔɔ aleɛ babu la anu.

³⁵Maa bɛboɔboa aleɛ mɔɔ bɛbanyia ye wɔ ɛvolɛ kpalɛ ne mɔ anu la anloa, na maa tumi maa bɛva abɛlɛ bɛzie azuamgbole ne mɔ azo, na bɛzinza.

³⁶Zɛhae aleɛ ne mɔɔ bɛbaboɔboa ɔ nloa la yɛɛ bayɛ aleɛ mɔɔ bagyinla ɛkɛ amaa ɛvolɛ nsuu ɛhɔne ne mɔɔ bara Yigyibiti amuala la a, amaa saa ɛhɔne ne ba a, ɛhɔne angu maanlema ambɔ bɛ bo zo.”

³⁷Nzuzulɛ ne zɔle Yigyibiti belemgbunli ne nee ye mgbanyima ne mɔ amuala anye.

³⁸Na ɔzele ye mgbanyima ne mɔ kɛ, “Bɛnea a awie bie wɔ ɛkɛ tɛla ɛhye mɔɔ Nyamenle Sunsum ne wɔ ye nu la ɔ?”

³⁹Yemɔti belemgbunli ne zele Dwosefi kɛ, “Kɛmɔ Nyamenle ɛye ɛhye mɔ amuala ɛhile wɔ la, awie ɛnle ɛkɛ mɔɔ anye gyi ɔ ti anwo na ɔze nrɛlɛbɛ kɛ ɛdawɔ la.

⁴⁰Ɛbanlea me sua nu ɛke, na me menli ne amuala bayɛ tieyɛ amaa wɔ. Edwɛkɛ biala mɔɔ ɛkɛha la bɛbali zolɛ. Debie mɔɔ mefa metɛla wɔ la a le me belemgbunli ebia ne mɔɔ mede zolɛ la.”

⁴¹Belemgbunli ne zele Dwosefi kɛ, “Nea, meyɛ wɔ kpanyinli mɔɔ banlea Yigyibiti azɛlɛ ye amuala azo a.”

⁴²Akee ɔyele ɔ sa kpɔdelera ne mɔɔ ɔfa ɔsisi ngɛlata zo la ɔwulale Dwosefi asa, na bɛvale adɛladeɛ ngɛnlɛma bɛwulale ye, bɛvale ndweabane bɛdole ɔ kɔme;

⁴³na ɔmanle ɔdɛnlanle ye konle ehwili ne mɔɔ tɔ zolɛ nwiɔ la anu, na ye sonvolɛma deanle nu kɛ, “Bɛhoto ye!” Ɛnee kɛ bɛyɛle bɛvale Dwosefi bɛziele Yigyibiti azɛlɛ ne kɔsɔɔti anloa la ɛne.

⁴⁴Eza belemgbunli ne zele Dwosefi kɛ, “Mame a mele Yigyibiti belemgbunli a. Mese, saa ɛtɛdiele ɛtɛtole nuhua a, awie biala ɛnlɛ adenle kɛ ɔkɛva ɔ sa ɔkɛha anzɛɛ ɔ gyakɛ ɔkɛtia Yigyibiti azɛlɛ biala azo.”

⁴⁵Na belemgbunli ne manle Dwosefi Yigyibiti duma na ɔvɛlɛle ye Zafɛnate Pania. Belemgbunli ne eza manle bɛhɔgyale raalɛ bɛrɛlɛle Dwosefi. Bɛfɛlɛ raalɛ ne Asɛnate, yɛɛ ɔ ze a le Pɔtefɛla mɔɔ le kɔmenle kpanyinli wɔ Hɛleɔpɔlese[53] la. Dwosefi lile ɛvolɛ abulasa la yɛɛ ɔbɔle ɔ bo kɛ ɔsonle Yigyibiti belemgbunli ne a. Ɔvi belemgbunli suakunlu ɛkɛ ɔhɔkpɔsale Yigyibiti maanle ne anu amuala.

⁴⁶

⁴⁷Aleɛ mekɛ ɛvolɛ nsuu ne anu, azɛlɛ ne manle bɛnyianle aleɛ dɔɔnwo kpalɛ.

⁴⁸Ɔboɔboale ɛvolɛ nsuu ne anu aleɛ mɔɔ bɛnyianle la anloa, na ɔmanle bɛziele aleɛ mɔɔ bɛnyianle wɔ ɛya avule ne mɔ anu la wɔ azuamgbole ne mɔ azo.

⁴⁹Dwosefi manle bɛziele abɛlɛ dɔɔnwo mɔɔ nzinlii ɛnee akee bɛngola ye suzu. Yemɔti ɔmanle bɛgyakyile ye ɛzuzulɛ, ɔluakɛ abɛlɛ ne zonle somaa, bɛ somaa kɛyɛ kɛ ɛnweazo anwea.

⁵⁰Mɔɔ ɛhɔne ɛvolɛ nsuu ne kabɔ ɔ bo la ɛnee Dwosefi nee ɔ ye Asɛnate ɛwo mrenya nwiɔ.

⁵¹Dwosefi donle ralɛ nrenya kpanyinli ne Manasɛ.[54] Ɔse, “Nyamenle ɛmaa me rɛle ɛvi me nyane nee egya sua nu amra.”

⁵²Ralɛ nrenya ne mɔɔ tɔ zolɛ nwiɔ la, ɔdonle ye Yifelaem.[55] Ɔluakɛ ɔse, “Nyamenle ɛmaa mebɔ ɛdane wɔ me amaneɛnwunlɛ azɛlɛ zo.”

⁵³Ɛvolɛ nsuu ne mɔɔ nuhua a Yigyibiti nyianle aleɛ dɔɔnwo la wiele.

⁵⁴ Na ɛhɔne ɛvolɛ nsuu ne bɔle ɔ bo, kɛmɔ Dwosefi hanle ala la. Ɛhɔne zile maanle maanle kɔsɔɔti anu, na Yigyibiti ɛdeɛ, ɛnee aleɛ wɔ ɛkɛ.

⁵⁵Mɔɔ ɛhɔne ne hanle Yigyibiti la, maanlema amuala zunle vɛlɛle bɛ belemgbunli ne kɛ ɔmaa bɛ aleɛ. Na belemgbunli ne zele Yigyibitima amuala kɛ, “Bɛhɔ Dwosefi ɛkɛ, na bɛyɛ debie biala mɔɔ ɔkɛze bɛ la.”

⁵⁶Yemɔti mɔɔ akee ɛhɔne ne rale ye mgbole nu la, Dwosefi manle bɛbukebukele ɛleka ɛleka mɔɔ bɛvale aleɛ bɛziele la amuala, na bɛdɔnenle aleɛ bɛmanle Yigyibitima, ɔluakɛ ɛnee akee ɛhɔne ne ɛyɛ kpole wɔ Yigyibiti.

⁵⁷Yeanga ye zɔhane angome, eza maanle maanle dɔɔnwo rale Dwosefi anwo ɛkɛ ne wɔ Yigyibiti radɔle abɛlɛ, ɔboalekɛ ɛhɔne ne hanle ewiade amra amuala.