Read Nzema Mɔl 44 Bible Online

Mɔl 44 - Nzema bible

Mɔl 44

¹Akee Dwosefi zele ye sonvolɛ ne mɔɔ nea ye awuke nu ɛkɛ ne la kɛ, “Fa aleɛ dɔɔnwo biala mɔɔ menli ne bɛdabɛ bɛkɛhola ye soa la wulowula bɛ ahodoku ne mɔ anu, na fa ko biala ezukoa mɔɔ ɔkɛva ɔkɛmaa wɔ la sia ye kodoku ne anloa.

²Fa me dwɛtɛ fufule kɔpo ne sia bɛ diema ekyi ne kodoku ne anloa, na fa ye ezukoa ne mɔɔ ɔvale ɔrale kɛ ɔfa yearadɔ abɛlɛ la boka nwolɛ.” Na sonvolɛ ne yɛle, kɛmɔ Dwosefi zele ye la.

³Bɛvale mgbavolɛ ne mɔ asoaso ne mɔ bɛmanle bɛ nwonlomɔ mangyee ne ala, na bɛguale bɛ adenle.

⁴Mɔɔ bɛvi suakpole ne azo bɛyele bɛ nwo na bɛhɔle moa ekyii la, Dwosefi zoanle ye sonvolɛ ne kɛ, “Ka ɛ nwo toa menli ne mɔ. Saa ɛto bɛ a, biza bɛ kɛ, ‘Duzu ati a bɛva ɛtane bɛdua kpalɛ kakɛ ɛ?

⁵Duzu ati a bɛwua me menle kɔpo ne a? Yemɔ anu a ɔno a, yɛɛ yemɔ a ɔnea nu ɔfa ɔnwu mɔɔ bazi la a. Bɛyɛ ɛtane kpole!’ ”

⁶Sonvolɛ ne zile nu na ɔhɔdole bɛ adenle nu, na ɔhanle edwɛkɛ ne ɔhilele bɛ.

⁷Na bɛzele ye kɛ, “Duzu ati a yɛmenle kɛraha edwɛkɛ zɛhae kɛhile yɛ ɛ? Ɔkɛbɔ yɛ tɔ kɛ wɔ sonvolɛma, yɛkɛbɔ ɛbɛla mɔɔ le zɛhae a.

⁸Nea, ɛkenle ezukoa ne bɔbɔ mɔɔ ɛnee wɔ yɛ ahodoku ne mɔ anloa la, yɛhɔdwule Keena na yɛnwunle ye la, yɛvale yɛziale yɛrale. Ɛnee akee duzu ati yɛɛ yɛkɛwua dwɛtɛ fufule anzɛɛ ezukoa nvutuke wɔ ɛ menle ne sua nu a?

⁹Wɔ sonvolɛma ye ɛ, nuhua ko biala mɔɔ ɛkɛnwu kɔpo ne wɔ ye ɛkɛ ne la, ku ye, na maa yɛdayɛ noko mɔɔ yɛha la yɛyɛ wɔ ahanra.”

¹⁰Sonvolɛ ne zele kɛ, “Mɔɔ bɛha la ɛyɛ ɛkɛ. Bɛ nuhua ko biala mɔɔ menwɔnwu kɔpo ne wɔ ye ɛkɛ ne la bayɛ me kanranli. Bɛdabɛ mɔɔ bɛkɛha la bɛnli ɛzonle biala.”

¹¹Yemɔti ɛkɛ ne ala bɛzokoɛzokoɛle bɛ ninyɛne ne mɔ bɛziele aze, na bɛtulutulule bɛ ahodoku ne mɔ anloa.

¹²Sonvolɛ ne bɔle ɔ bo kpanyinli ne anwo zo ɔnleɛnleanle bɛ ninyɛne ne mɔ anu na ɔrawiele ye wɔ kakula ne anwo zo. Na bɛnwunle kɔpo ne wɔ Bɛngyaman kodoku ɛdeɛ ne anu.

¹³Mediema ne mɔ suosuanle bɛ adɛladeɛ ne mɔ anu, bɛkyekyele bɛ ninyɛne ne bɛzoale bɛ asoaso ne mɔ, na bɛziale bɛhɔle suakpole ne azo.

¹⁴Dwuda nee ɔ mediema ne mɔ hɔdwule Dwosefi sua nu ɛkɛ ne la, ɛnee ɔtɛbɔ ɛkɛ; na bɛdule bɛguale aze wɔ ɔ nyunlu.

¹⁵Dwosefi bizale bɛ kɛ, “Na duzu ɛbɛla a bɛbɔ la? Bɛnze kɛ sonla le kɛ medame, mekola meye ngonyia menwu mɔɔ bazi la ɔ?”

¹⁶Dwuda buale kɛ, “Na yɛnwu mɔɔ yɛka yɛahile yɛ menle bɔbɔ a? Duzu edwɛkɛ yɛɛ yɛlɛ yɛka a? Anzɛɛ kɛ yɛzi yɛye ɛzonle ɛhye wɔ yɛ nwo zo ɛ? Nyamenle ɛmaa yɛ fɔlɛlilɛ ɛla ali wienyi. Kɛkala yɛle wɔ ahanra. Yɛdayɛ yɛ muala nee ahenle mɔɔ bɛnwunle kɔpo ne wɔ ye ɛkɛ ne la, yɛle wɔ ahanra.”

¹⁷Dwosefi zele kɛ, “Ɔkɛbɔ me tɔ kɛ menwɔyɛ debie zɛhae a. Ahenle ne mɔɔ vale me kɔpo ne la, yemɔ ala a bayɛ me kanranli a. Bɛdabɛ mɔɔ bɛha la, bɛzia bɛhɔ bɛ ze anwo lɔ anzonudwolɛ nu.”

¹⁸Akee Dwuda hwenle bikyele Dwosefi na ɔhanle kɛ, “O me menle, mebodo wɔ, maa wɔ sonvolɛ, menva me edwɛkɛ mendo ɛ nyunlu. Mmafa me nwo ɛya, ɔluakɛ ɛle kɛ belemgbunli ne ala la.

¹⁹Me menle, ɛbizale wɔ sonvolɛma ye kɛ, ‘Bɛ ze wɔ ɛkɛ ɔ? Bɛlɛ bɛ diema nrenya bie wɔ ɛkɛ ɔ?’

²⁰Na yɛbuale wɔ kɛ, ‘Yɛ ze wɔ ɛkɛ, yeyɛ kpanyinli, yɛɛ yɛlɛ yɛ diema nrenya ekyi ko wɔ ɛkɛ. Egya wole ye wɔ mekɛ mɔɔ ɛnee yewie ɛrelera yɛ la. Kakula zɔhane adiema nrenya mɔɔ ɔ nee ye vi ɛkolɛ ko anu la ɛwu. Ɔ nli akunlu ɛdeɛ ne, ɔdaye ɔ ngome a yeha a, yɛɛ ɔ ze kulo ye kpalɛ.’

²¹Na ɛzele wɔ sonvolɛma ye kɛ, ‘Bɛva ye bɛrɛla bɛmaa menwu ye.’

²²Yɛhanle yɛhilele me menle kɛ, ‘Kakula ne fi ɔ ze anwo ɛkɛ ne a ɔnyɛ boɛ, ɔluakɛ saa ɔfi ɔ ze anwo a, ɔ ze bawu.’

²³Na ɛzele yɛ kɛ, ‘Saa bɛanva bɛ diema nrenya ekyi ne bɛamba a, bɛnrɛnwu me nyunlu bieko.’

²⁴“Yɛdwule sua nu la, wɔ sonvolɛma, yɛbɔle yɛ ze amaneɛ na yɛhanle wɔ edwɛkɛ ne amuala yɛhilele ye.

²⁵Yemɔti mɔɔ egya hanle kɛ, ‘Bɛhɔ bieko bɛhɔdɔ aleɛ ekyi bɛrɛla’ la,

²⁶yɛbuale kɛ, ‘Yɛnrɛhɔ. Saa yɛ diema ekyi ne kɔ bie a yɛɛ yɛkɛhɔ a, ɔluakɛ saa yeangɔ bie a nrenya ne ɛnrɛnlea yɛ nyunlu.’

²⁷Na egya zele yɛ kɛ, ‘Bɛdabɛ bɛze kɛ me ye wole mralɛ mrenya nwiɔ.

²⁸Ko ɛgyakyi me ɛhɔ, na menganle kɛ nanemgbole bie a ɛhu ye a. Metɛnwunle ye toonwo a yeradwu ɛnɛ a.

²⁹Kɛkala mɔɔ mewie kpanyinli yɛ la, saa bɛfa ɛhye noko bɛkɔ, na edwɛkɛ bie si ɔ nwo zo a, ɛnee ɔkile kɛ mefa nyane a meahɔ ɛbolɔ a.’

³⁰“Zɔhane ati yɛmenle, saa mesia meahɔ egya anwo lɔ na kakula ne ɛmboka nwo a, ɔ nye mgbane mɔɔ kɛbobɔ yɛ kɛ yɛra na kakula ye ɛmboka nwolɛ la bamaa yeawu. Ye ngoane nee ye debie biala wɔ kakula ne nu, yɛɛ yeyɛ kpanyinli noko, yemɔti nyane mɔɔ yɛbamaa yeaha ye la bahu ye.

³²Menvale me nwo membɔle agyinlanu memanle kakula ne wɔ egya ɛkɛ na menganle kɛ, ‘Saa meanva ye meambɛlɛ wɔ a, ɛnee fa ɛzonle ne amuala soa me wɔ mekɛ mɔɔ mede ngoane nu la.’

³³Yemɔti mebodo mesɛlɛ wɔ, maa wɔ sonvolɛ, menga ɛke kɛ wɔ kanranli, na maa kakula ne nee ɔ mediema ne mɔ ɛhɔ.

³⁴Ɔluakɛ saa kakula ne ɛmboka nwolɛ a ɛnee kɛ mesi meazia meahɔ egya anwo lɔ ɛ? Mesulo mɔɔ kɛzi egya anwo zo la.”