Read Nzema Mɔl 46 Bible Online

Mɔl 46 - Nzema bible

Mɔl 46

¹Yemɔti Yizilayɛ vale mɔɔ ɔlɛ la amuala na ɔzile nu kɛ ɔkɔ. Ɔhɔdwule Biyɛhyiba la, ɔbɔle azu ɔmanle ɔ ze Ayezeke Nyamenle ne.

²Na nɔe ne Nyamenle dendɛle hilele ye wɔ ɛnyelɛzodeɛnwunlɛ nu, na ɔzele ye kɛ, “Gyekɔbo, Gyekɔbo!” Gyekɔbo liele zolɛ kɛ, “Mewɔ ɛke.”

³Na Nyamenle zele ye kɛ, “Medame Nyamenle, mɔɔ le ɛ ze mɔ Nyamenle ne la ɔ. Mmasulo kɛ ɛkɛhɔ Yigyibiti, ɔluakɛ mebayɛ wɔ maanle wɔ ɛkɛ ne.

⁴Me nee wɔ bahɔ Yigyibiti, na eza meava wɔ meazia meara. Dwosefi banwu wɔ ewule nu.”

⁵Na Gyekɔbo zile nuhua wɔ Biyɛhyiba. Yizilayɛ amra ne mɔ vale bɛ ze, bɛ mra, nee bɛ mraalɛ ne mɔ guale ehwili ne mɔ mɔɔ Yigyibiti belemgbunli ne manle bɛvale bɛrale la anu.

⁶ Eza bɛvale bɛ nlankɛ nee bɛ ninyɛne mɔɔ bɛnyianle wɔ Keena azɛlɛ zo la amuala bɛhɔle Yigyibiti. Gyekɔbo nee ɔ bo zo amra kɔsɔɔti;

⁷ɔ mra mrenya, ɔ mra mrenya amra mrenya, ɔ mra mraalɛ nee ɔ mra mrenya amra mraalɛ, ɔ nee bɛ kɔsɔɔti hɔle Yigyibiti.

⁸Gyekɔbo abo zo amra mɔɔ ɔ nee bɛ hɔle Yigyibiti la ɛne: Gyekɔbo nee ɔ mra ne mɔ. Akee ɔ ra nrenya kpanyinli Wulubɛn

⁹amra mrenya: Heenɔko, Palu, Hɛzelɔn, yɛɛ Kaamae.

¹⁰Semɛyɔn amra mrenya: Gyɛmuwɛle, Gyeemen, Ohade, Gyeeken, Zohaa, yɛɛ Hyɔɔlo mɔɔ ɔ nli le Keenanli la.

¹¹Livae amra mrenya: Gɛhyɔn, Kohate, yɛɛ Mɛlɛlae.

¹²Dwuda amra mrenya: Ɛɛ, Onan, Hyila, Pɛlɛze, yɛɛ Zilaa. (Ɛɛ nee Onan wule Keena.) Pɛlɛze amra mrenya a le Hɛzelɔn nee Hamɛle.

¹³Yesakaa amra mrenya: Tola, Pua, Gyahyɛbe, yɛɛ Hyemelɔn.

¹⁴Zɛbulɛn amra mrenya: Silɛde, Yilɔn, yɛɛ Gyaalile.

¹⁵Ɛhye mɔ a le mralɛ mrenya mɔɔ Gyekɔbo nee ɔ ye Liya wole bɛ wɔ Mɛsɔpɔteemea a. Bɛ ra raalɛ a le Daena. Ɛka bɛ muala ɛbɔ nu a, ɛnee mralɛ nee nlɔnra mraalɛ nee mrenya mɔɔ Gyekɔbo luale ɔ ye Liya anwo zo nyianle la le abulasa nee nsa.

¹⁶Gaade amra mrenya: Zɛfɔn, Hagae, Hyunae, Ɛzebɔn, Yilae, Alɔdae, yɛɛ Alilae.

¹⁷Ahya amra mrenya: Yemena, Yehyeva, Yehyevae, Bɛlaya, yɛɛ bɛ diema raalɛ Sɛla. Bɛlaya amra mrenya a le Hibɛ nee Malekeɛle.

¹⁸Liya sonvolɛ raalɛ Zelepa abo zo amra ne mɔɔ ɔ nee Gyekɔbo nyianle la le bulu nee nsia.

¹⁹Gyekɔbo aye Relahyɛle amra mrenya a le Dwosefi nee Bɛngyaman.

²⁰ Dwosefi amra mrenya mɔɔ ɔwole bɛ wɔ Yigyibiti azɛlɛ zo la a le Manasɛ nee Yifelaem. Bɛ nli a le Hɛleɔpɔlese kɔmenle Pɔtefɛla ara raalɛ Asɛnate.

²¹Bɛngyaman amra mrenya: Bila, Bikɛ, Ahyebɛle, Gila, Neeyaman, Yihae, Wulohye, Mɛpem, Hɛpem, yɛɛ Aade.

²²Gyekɔbo nee ɔ ye Relahyɛle abo zo amra ne le bulu nee nna.

²³Dan ara nrenya a le Huhyem.

²⁴Nafetalae amra mrenya: Gyaazili, Gunae, Gyizɛ, yɛɛ Hyelɛm.

²⁵Relahyɛle sonvolɛ raalɛ Belehaa, mɔɔ Leeban vale manle ye la abo zo amra mɔɔ ɔ nee Gyekɔbo nyianle la ɛne.

²⁶Menli mɔɔ Gyekɔbo nee bɛ hɔle Yigyibiti, mɔɔ le ɔdaye ɔ bo zo amra fɔɔnwo la, saa ɛye ɔ mra mrenya ne mɔ mraalɛ ne mɔ nu a, bɛlua menli abulasia nee nsia.

²⁷Dwosefi amra mɔɔ ɔwole bɛ wɔ Yigyibiti la le nwiɔ; Gyekɔbo sua nu amra amuala mɔɔ ɔ nee bɛ hɔle Yigyibiti la le abulasuu.

²⁸Akee Gyekɔbo zoanle Dwuda kɛ ɔhɔbɔ Dwosefi amaneɛ kɛ ɔ nee ye ɛyia Gohyɛn, na bɛhɔdwule Gohyɛn.

²⁹Na Dwosefi boɔboale ɔ nwo ɔvole ye konle ehwili nu ɔhɔyiale ɔ ze Gyekɔbo wɔ Gohyɛn. Ɔvale ɔ nwo ɔhilele ɔ ze, na ɔdule ɔdɔle ɔ kɔme nu ɔzunle ɔguale ɔ nwo ɔhyɛle kpalɛ.

³⁰Na Gyekɔbo hanle kɛ, “Kɛkala mɔɔ menwu ɛ nyunlu na menwu kɛ ɛtɛte ngoane nu la, mewu bɔbɔ a ɔnyɛ ɛhwee.”

³¹Dwosefi hanle hilele ɔ ze nee ɔ mediema ne mɔ kɛ, “Mekɔ belemgbunli ne ɛkɛ meahɔbɔ ye amaneɛ kɛ, ‘Me mediema mrenya ne mɔ nee egya sua nu amra mɔɔ anrɛɛ wɔ Keena la ɛra me nwo ɛke.

³²Mebaha kɛ menli ne le mboaneneavolɛma, ɔluakɛ bɛsie nlankɛ; na bɛva bɛ mboane nee bɛ nlankɛ, nee bɛ debie biala mɔɔ bɛlɛ la bɛra.’

³³Na saa belemgbunli ne fɛlɛ bɛ na ɔbiza bɛ kɛ, ‘Duzu gyima a bɛyɛ a?’

³⁴bɛha kɛ, ‘Wɔ sonvolɛma sie nlankɛ, na yemɔ a le gyima mɔɔ sumunli yɛ ngakula nu yɛ nee egya yɛyɛ toonwo mɔɔ yeradwu ɛnɛ a.’ Saa bɛka ye zɔhane a yɛɛ bɛbamaa bɛadɛnla Gohyɛn a, ɔluakɛ mboaneneavolɛ biala le kyibadeɛ maa Yigyibitima.”