Read Nzema Mɔl 47 Bible Online

Mɔl 47 - Nzema bible

Mɔl 47

¹Yemɔti Dwosefi hɔhanle hilele belemgbunli ne kɛ, “Egya nee me mediema mrenya ne mɔ, nee bɛ mboane, bɛ nlankɛ nee bɛ debie biala mɔɔ bɛlɛ la vi Keena azɛlɛ zo ɛra. Bɛwɔ Gohyɛn.”

²Ɔkɔ la ɔ nee ɔ mediema ne mɔ anu nnu hɔle, na ɔvale bɛ ɔhilele belemgbunli ne.

³Belemgbunli ne bizale Dwosefi amediema ne mɔ kɛ, “Duzu gyima a bɛyɛ a.” Bɛbuale kɛ, “Wɔ sonvolɛma le mboaneneavolɛma, kɛmɔ ɛnee yɛ ze mɔ de la.

⁴Yɛra wɔ maanle ye anu, ɔluakɛ yɛnnyia adidileka yɛmmaa yɛ mboane ne mɔ. Ɛhɔne mɔɔ ɛra Keena la bo zolɛ. Yɛbodo wɔ, maa wɔ sonvolɛma adenle maa bɛdɛnla Gohyɛn.”

⁵Belemgbunli ne zele Dwosefi kɛ, “Ɛ ze nee ɛ mediema ne mɔ ɛra ɛ nwo.

⁶Yigyibiti azɛlɛ ne a la ɛkɛ ne la. Maa ɛ ze nee ɛ mediema ne mɔ ɛdɛnla ɛleka mɔɔ ɛdawɔ ɛnea a ɔle kpalɛ la. Maa bɛdɛnla Gohyɛn azɛlɛ zo, na saa bie mɔ wɔ nuhua mɔɔ kɛhola a, maa bɛnlea me nlankɛ ne mɔ azo.”

⁷Akee Dwosefi vale ɔ ze Gyekɔbo rahilele belemgbunli ne. Na Gyekɔbo yileyilale belemgbunli ne.

⁸Akee belemgbunli ne bizale Gyekɔbo kɛ, “Wɔli ɛvolɛ nyɛ?”

⁹Gyekɔbo buale kɛ, “Meli ɛvolɛ ɛya ko abulasa; me ngoane mekɛ ne le ekyi bie ala, ɔndwu egya mɔ ɛdeɛ ne mɔɔ bɛlile la, noko nuhua le ɛvɛlɛ ngome.”

¹⁰Akee Gyekɔbo Yileyilale belemgbunli ne bieko na ɔhɔle.

¹¹Na Dwosefi bɔle ɔ ze nee ɔ mediema ne mɔ atɛnlase, na ɔmanle bɛ azɛlɛ kpalɛ wɔ Yigyibiti ɔmanle bɛvale bɛyɛle bɛ ɛdeɛ, kɛmɔ Yigyibiti belemgbunli ne hanle la. Azɛlɛ ne bikye Yigyibiti suakpole ne mɔɔ bɛfɛlɛ ye Relamɛsize la.

¹²Na Dwosefi manle ɔ ze, ɔ mediema ne mɔ nee ɔ ze sua nu amra kɔsɔɔti aleɛ, kɛmɔ bɛ dodo de la.

¹³Akee ɛhɔne ne anu yɛle ɛsesebɛ, ɔluakɛ ɛnee aleɛ fee ɛnle maanle ne anu. Yemɔti menli mɔɔ wɔ Yigyibiti nee Keena la anwo bɛlɛle bɛ na bɛnwanle.

¹⁴Dwosefi diedianle ezukoa mɔɔ ɔnyianle ye wɔ abɛlɛ ne mɔɔ ɔdɔnenle ɔmanle Yigyibitima nee Keenama la amuala, na ɔvale ɔhɔmanle belemgbunli ne.

¹⁵Akee mɔɔ menli mɔɔ wɔ yigyibiti nee Keena la ezukoa wiele la, Yigyibitima kɔsɔɔti rale Dwosefi ɛkɛ ne na bɛzele ye kɛ, “Yɛ ezukoa ɛwie! Maa yɛ aleɛ. Yemɔti ɛnea yɛ wɔamaa yɛawu ɔ?”

¹⁶Dwosefi buale bɛ kɛ, “Saa bɛ ezukoa ɛwie a ɛnee bɛva bɛ nlankɛ bɛrɛla bɛralie aleɛ.”

¹⁷Yemɔti bɛvale bɛ nlankɛ bɛrale. Na Dwosefi liele bɛ mgbɔnwɔ, bɛ mboane nee mbɔnkye, bɛ nlankɛ nee bɛ asoaso, na ɔmanle bɛ aleɛ wɔ ɛvolɛ zɔhane anu.

¹⁸Ɛvolɛ zɔhane zenle la, ye ɛvolɛ ne mɔɔ doa ye la anu, menli ne razele Dwosefi kɛ, “Ɛhye ɛnle nyiane debie mɔɔ ɔwɔ kɛ yɛfa yɛfea yɛ menle a. Yɛ ezukoa ɛwie, yɛɛ yɛ nyɛmoa kɔsɔɔti ɛyɛ yɛ menle ɛdeɛ. Yɛnlɛ ɛhwee kɛ yɛ sonlabaka ne yɛɛ yɛ azɛlɛ ala.

¹⁹Duzu ati a ɛnea yɛ wɔamaa yɛawu, yɛ azɛlɛ ye azɛkye ɛ? Tɔ yɛ nee yɛ azɛlɛ ne mɔ kɔsɔɔti na maa yɛ aleɛ, na yɛ muala yɛkɛyɛ belemgbunli ne ahanra. Eza maa yɛ ma maa yɛlua na azɛlɛ ye anla mgbane, na maa yɛ aleɛ na yɛanwu.”

²⁰Yemɔti Dwosefi dɔle Yigyibiti azɛlɛ ne kɔsɔɔti manle belemgbunli ne. Yigyibitima dɔnenle bɛ azɛlɛ ne mɔ, ɔluakɛ ɛnee ɛhɔne ne anu ɛyɛ ɛsesebɛ kpole kpalɛ.

²¹Azɛlɛ ne amuala yɛle belemgbunli ne ɛdeɛ, na menli ne amuala yɛle Yigyibiti belemgbunli ne ahanra, ɔvi maanle ne ati ɔhɔkpulale ɔ bo.

²²Ahɔmenle ne mɔ azɛlɛ ɛdeɛ ne ala yɛɛ Dwosefi andɔ a. Ɔluakɛ ɛnee belemgbunli ne maa ahɔmenle ne mɔ ezukoa mɔɔ bɛfa bɛbɔ bɛ nwo mgbɔlɔka a. Yemɔti bɛandɔne bɛ azɛlɛ ne.

²³Akee Dwosefi zele menli ne kɛ, “Bɛnwu ye kɛ, ɛnɛ kenle ye, medɔ bɛ nee bɛ azɛlɛ ne mɔ memaa belemgbunli ne. Memaa bɛ ma, na ɔwɔ kɛ bɛso ɛya na bɛdua.

²⁴Saa bɛbu bɛ bɛyɔba ne a, ɔwɔ kɛ bɛkyɛ nu nnu na bɛtu ɛkpɔ ko bɛbɛlɛ belemgbunli ne na bɛdabɛ bɛfa nna. Bɛ ɛdeɛ ɛkpɔ nna ne, bie yɛɛ bɛbava bɛalua ɛya fofolɛ a, bɛbali bie na bɛamaa bɛ mra nee bɛ mbusua ne mɔ bie bɛali.”

²⁵Na bɛbuale kɛ, “Wɔlie yɛ ngoane. Yɛmenle, maa yɛzɔ ɛ nye na yɛyɛ belemgbunli ne ahanra.”

²⁶Yemɔti Dwosefi lile mɛla kɛ Yigyibiti azɛlɛ ne kɔsɔɔti le belemgbunli ne ɛdeɛ. Mɛla ɛhye tɛbɔ ɛkɛ ne kɛkala kɛ, aleɛ biala mɔɔ kɛvinde azɛlɛ ne azo la, ɔwɔ kɛ bɛkyɛ nu nnu na belemgbunli ne nyia ɛkpɔ ko. Ahɔmenle ne mɔ azɛlɛ ɛdeɛ ne ala yɛɛ anyɛ belemgbunli ne ɛdeɛ a.

²⁷Gyekɔbo nee ye sua nu amra dɛnlanle Yigyibiti, wɔ Gohyɛn azɛlɛ zo, na bɛnyianle bɛ nwo. Bɛwole mralɛ na bɛyɛle dɔɔnwo kpalɛ.

²⁸Gyekɔbo hɔle Yigyibiti la ɔlile ɛvolɛ bulu nee nsuu wɔ ɛkɛ ne na yeawu. Yemɔti Gyekɔbo lile ɛvolɛ ɛya ko abulanla nee nsuu.

²⁹Mɔɔ ɔka ekyii Gyekɔbo wu la, ɔvɛlɛle ɔ ra Dwosefi na ɔzele ye kɛ, “Saa amgba ɛ nye sɔ me a, ɛnee fa ɛ sa fula me ɛzɔlɛ nu na bɔ ɛwɔkɛ kɛ ɛbali nɔhalɛ wɔamaa me. Mmasie me Yigyibiti ɛke;

³⁰ mekpondɛ kɛ ɛfa me ɛkɔ ɛleka mɔɔ egya mɔ wɔ la. Saa mewu a, ye me funli ne fi Yigyibiti ɛke na kɔzie me ɛleka mɔɔ bɛziele egya mɔ la.” Dwosefi buale kɛ, “Mebayɛ, kɛmɔ wɔha la.”

³¹Gyekɔbo zele ye kɛ, “Ɛnee ka ndane.” Dwosefi hanle ndane, na Gyekɔbo butule ye ɛkpa ne ati sɔlɔ na ɔyɛle Nyamenle mo.