Read Nzema Mɔl 49 Bible Online

Mɔl 49 - Nzema bible

Mɔl 49

¹Akee Gyekɔbo vɛlɛle ɔ mra mrenya ne mɔ na ɔzele bɛ kɛ, “Bɛvɛlɛvɛlɛ bɛ nwo bɛrɛla bɛmaa menga mɔɔ kenle bie bazi bɛ nwo zo la mengile bɛ.

²“Bɛbɔ nu bɛrɛla, Gyekɔbo amra mrenya. Bɛradie mɔɔ bɛ ze Yizilayɛ ka ahile bɛ la.

³“Wulubɛn, wɔmɔ a ɛle me ra kpanyinli a, Me anwosesebɛ nee me kpoleyɛlɛ nu ralɛ mɔɔ lumua. Wɔlie duma adubɛnwo nu, wɔlie duma anwosesebɛ nu.

⁴Noko ɛse kɛ azule, yemɔti ɛnrɛnyia duma, Ɔboalekɛ ɛlale ɛ ze ɛkpa zo, Ɛvale ɔ ye; ɛguale nwolɛ evinli!

⁵“Semɛyɔn nee Livae le mediema; Bɛ ayedɛ ɛnze kyɛ.

⁶O me ɛkɛla, ɛ nee bɛ mmafa adwenle! O me sunsum, ɛ nee bɛ mmatu; Ɔluakɛ bɛfa ɛya a bɛku menli, Bɛ nwo tɛ bɛ a bɛbubu nlankɛ ndwɛlɛ.

⁷Munzule ɛha bɛ ɛyavalɛ, Ɔluakɛ bɛ ɛya nloa yɛ se. Munzule ɛha bɛ ahonle ɛfutulɛ, Ɔluakɛ ɔle amumuyɛ! Mebahyɛ bɛ nuhua na meabɔ bɛ asande wɔ Yizilayɛ.

⁸“Dwuda, ɛ mediema mrenya ne mɔ baye wɔ ayɛlɛ; Ɛbali wɔ kpɔvolɛma anwo zo konim. Ɛ ze amra mrenya babɔ bɛ ti aze amaa wɔ.

⁹ Me ra Dwuda le kɛ awenade ralɛ, Ɔku ye kpɔvolɛ ne na ɔsia ɔbada. Ɔda na ɔtenrɛ ɔ nwo a, awenade belɛ ɔ, Nwane a kola tunwue ye a?

¹⁰Belemgbunlililɛ ɛnrɛvi Dwuda sua nu, Yɛɛ mɛlalilɛma ɛnrɛkpa ye belemgbunli ebia bo, Kɔkpula kɛ ɔkɛdwu mɔɔ lɛ ye la ɛkɛ ne. Maanle maanle kɔsɔɔti badie ye.

¹¹Ɔkenda ye asoaso ralɛ wɔ vanye baka nwo, Ɔkenda ye asoaso wɔ vanye baka kpole nwo. Ɔfa nwanye ɔnrinzi ye adɛladeɛ nu, Na ɔkpo ye anwuma tɛladeɛ wɔ vanye ma nzule nu.

¹²Nwanye bamaa ɔ nye ayɛ yɔɔnwo, Na meleke amaa ɔ gye ayɛ nwohyee.

¹³“Zɛbulɛn badɛnla nyevile nloa; Ɔbayɛ ahonle mɔɔ meli gyinla zo a, Yɛɛ ye ɛweɛne badwu Saedɛn.

¹⁴“Yesakaa le asoaso mɔɔ anwo yɛ se a, Ɔla mboane tunli ne mɔ avinli.

¹⁵Ɔnwunle kɛ ɛnwomenlelielɛ ɛleka le kpalɛ, Yɛɛ azɛlɛ ne noko le kɛnlɛma; Yemɔti ɔhanle ɔ nwo aze ɔzoale adesoa, Na ɔyɛle gyima ɛsesebɛ ɛyɛlɛ nu kanra.

¹⁶“Dan babua ye menli ne ndɛne, Kɛ Yizilayɛ mbusua ekpunli ne mɔ anu ko.

¹⁷Dan bayɛ ɔ nwo ɛwɔlɛ ala adenle nu, Ɛkyenlebenle mɔɔ la adehane, ɔkeka mgbɔnwɔ ne mɔ agyakɛ, Ɔmaa mɔɔ de zo la tu tɔ alɛnranyunlu.

¹⁸“O Ɛdɛnkɛma, melɛkendɛ wɔ ngoanelielɛ ne.

¹⁹“Nwule bawua Gaade, Na ɔbavoa bɛ ndinlizo.

²⁰“Ahya azɛlɛ bahye aleɛ amaa ye, Na yeado ɛkponle kɛ arelemgbunli.

²¹“Nafetalae le kɛ kutu mɔɔ ɛhwee ɛngyegye ye, Na ɔwo mralɛ ngɛnlɛma.

²²“Dwosefi le kɛ baka mɔɔ so na ɔgyi azule nloa la, Ye ngane ne mɔ twenlehwenle bane ti.

²³Ɛdadolɛma tetale ye, bɛtotole ye ɛda, Na bɛgyegyele ye kpole kpalɛ.

²⁴Noko ye ɛda ɛdeɛ ne andɔ aze. Ɔ sa nu yɛle ɛsesebɛ wɔ Gyekɔbo Nyamenle Bedevinli ne tumi nu, Wɔ Mboaneneavolɛ Yizilayɛ Pepɛdievolɛ ne duma nu.

²⁵Ɛ ze Nyamenle ne ɛnlea ɛ nwo zo, Nyamenle Bedevinli ne ɛdɔ nyilalɛ dɔɔnwo vi anwuma ɛgua ɛ nwo zo. Ɔva nyilalɛ ɔvi azɛlɛ buma nu ɔrɛlɛ wɔ, Ɔmaa wɔ nyɛfonlɛ nloa nee ɛkolɛ nu nyilalɛ.

²⁶Ɛ ze nyilalɛ ne mɔ, Mɔɔ yɛ ɛnlomboɛ tɛla me awovolɛma ɛdeɛ ne, ɛnyi ɛyɛ kɛ awoka mɔɔ ɛndudu ɛlɛ, Ɛrɛla Dwosefi anwo zo, na ɔgua mɔɔ bɛdu ye bɛzie ahane, Bɛvi ɔ mediema ne mɔ anu la, anwo zo.

²⁷“Bɛngyaman le kɛ bɛdi mɔɔ kpondɛ nane ali; Ɔdi mɔɔ ɔkɛhye ye nwonlomɔ ne la, Ɔdwu nɔsolɛ a yeahye fofolɛ yeali.”

²⁸Ɛhye mɔ amuala a le Yizilayɛ mbusua ekpunli ekpunli bulu nee nwiɔ ne a; yɛɛ mɔɔ bɛ ze hanle hilele bɛ wɔ mekɛ mɔɔ ɔyileyila bɛ la ɛne. Ɔvale ko biala nyilalɛ mɔɔ ɔfɛta la ɔmanle ye.

²⁹Akee Yizilayɛ zele bɛ kɛ, “Ɔnrɛhyɛ biala na meadu me adenle meahɔ egya anwo lɔ. Saa mewu a, bɛzie me wɔ egya mɔ anwo ɛkɛ wɔ bolɛ bɔne ne mɔɔ wɔ Hɛtenli Yifolɔn ɛya ne anu,

³⁰ wɔ Makepilaa, Mameli aduduleɛ, wɔ Keena maanle nu la anu. Ebileham a dɔle azɛlɛ zɔhane vile Hɛtenli Yifolɔn ɛkɛ a, kɛ ɔfa yeayɛ azie.

³¹ Ɛkɛ ne a bɛziele Ebileham nee ɔ ye Sɛla a. Ɛkɛ ne a bɛziele Ayezeke nee ɔ ye Relɛbɛka a, yɛɛ ɛkɛ ne a menziele Liya a.

³²Azɛlɛ ne nee bolɛ bɔne ne mɔɔ wɔ nu la, bɛdɔle bɛvile Hɛtema lɔ.”

³³Gyekɔbo wiele tendɛ kile ɔ mra mrenya ne mɔ la, ɔnyenyanle ɔ nwo ɔlale, na ɔgule ye ɛnwomenle mɔɔ li amozi la, na ɔwule.