Read Nzema Mɔl 7 Bible Online

Mɔl 7 - Nzema bible

Mɔl 7

¹Ɛdɛnkɛma zele Nowa kɛ, “Ɛ nee wɔ sua nu amra amuala bɛvo ɛlɛne ne anu, ɔluakɛ menwu kɛ ɛ ngomekye ala a ɛdi pɛlepɛle wɔ ewiade ye amuala anu a.

²Fa nane ko biala mɔɔ anwo te la, nyinli nee belɛ nsuu, nuhua mɔɔ anwo ɛnde la, yemɔ fa nyinli nee belɛ ala.

³Fa nloma bɛdabɛ noko, ko biala nyinli nee belɛ nsuu. Sesa ɛhye mɔ amuala kɔ ɛlɛne ne anu, amaa nzinlii bɛanyia bɛ ɛsaso wɔ azɛlɛ ye azo amuala.

⁴Ɔluakɛ ɛnɛ anwo zo kenle nsuu, mebamaa ezule kpole bie adɔ nɔɔzo nee ewiazo kenle abulanla, azɛkye ninyɛne mɔɔ mebɔ la amuala.”

⁵Nowa yɛle debie biala mɔɔ Ɛdɛnkɛma zele ye la.

⁶Nowa lile ɛvolɛ ɛya nsia la yɛɛ azuyilɛ ne rale a.

⁷ Ɔ nee ɔ ye nee ɔ mra mrenya nee bɛ mraalɛ ne mɔ hɔvole ɛlɛne ne anu, amaa azuyilɛ ne anva bɛ.

⁸Bɛvale nane nee nloma mɔɔ anwo te nee mɔɔ anwo ɛnde la, nee debie biala mɔɔ twenle ɔ nwo aze la, ko biala nyinli nee belɛ

⁹bɛhɔle ɛlɛne ne anu, kɛmɔ Nyamenle zele ye ala la.

¹⁰Ɛhye anzi kenle nsuu, azuyilɛ ne vale azɛlɛ ye.

¹¹ Nowa lile ɛvolɛ ɛya nsia la, ye siane ne mɔɔ tɔ zolɛ nwiɔ na ye kenle bulu nee nsuu ne azo, azule mgbole mɔɔ deda azɛlɛ ye azo la nee azɛlɛ ye abo nzule ne mɔ amuala gulule nu dukuele; na anwuma ezule noko dukuele,

¹²ɔdɔle bilididi nɔɔzo nee ewiazo toonwo kenle abulanla, ɔbule aze na ɔyɛle azɛlɛ ye azo faanwo.

¹³Kenle ko ne mɔɔ ezule ne dukuele la, Nowa nee ɔ ye nee ɔ mra mrenya ne mɔ, Hyɛm, Ham, yɛɛ Gyeefɛte nee bɛ mraalɛ nsa ne,

¹⁴nee nane ngakyile biala nee ye ɛsaso, nyɛmoa nee bɛ ɛsaso, debie biala mɔɔ twenle ɔ nwo aze wɔ azɛlɛ ye azo nee ye ɛsaso vole ɛlɛne ne anu.

¹⁵Ɔvale abɔdeɛ ngakyile ne mɔ mɔɔ die ɛnwomenle la ko biala, nyinli nee belɛ,

¹⁶kɛmɔ Nyamenle zele ye la ɔvole ɛlɛne ne anu. Na Ɛdɛnkɛma dole ɛlɛne ne anlenkɛ ne anu.

¹⁷Azuyilɛ ne hɔle zolɛ toonwo kenle abulanla, nzule ne yile kpole kpalɛ manle ɛlɛne ne tulule.

¹⁸Nzinlii nzule ne yile kpole na ɛlɛne ne luale nzule ne anye.

¹⁹Nzule ne hɔle zolɛ yɛle kuma, monlɔmonlanle awoka ndendenle ne mɔ mɔɔ wɔ aleɛabo la amuala.

²⁰Nzule ne monlɔmonlanle awoka ne mɔ na ɔhɔle anwuma kɛyɛ mita nsuu.

²¹Abɔdeɛ biala mɔɔ wɔ azɛlɛ ye azo la, nloma, nyɛmoa, nanemgbole nee ngɛkɛba, yɛɛ menli kɔsɔɔti wule.

²²Azɛlɛ resee zo debie biala mɔɔ die ɛnwomenle la wule, kokye anga.

²³Ɛdɛnkɛma zɛkyele debie biala mɔɔ die ɛnwomenle mɔɔ wɔ azɛlɛ ye azo la, sonla, nane, debie biala mɔɔ twenle ɔ nwo aze, yɛɛ nloma. Nowa nee bɛdabɛ mɔɔ bɛwɔ ɛlɛne ne anu la ala a hale a.

²⁴Ɔlile kenle kɔkɔlɛ ɛya ko abulanlu kolaa na nzule ne abɔ ɔ bo kɛ ɔsesa.