Read Nzema 2 Sam 11 Bible Online

2 Sam 11 - Nzema bible

2 Sam 11

¹ Nyenyensuo ne anu, ɛvolɛ ne anu mekɛ mɔɔ arelemgbunli ne mɔ fa ko bɛ konle ne mɔ la, Devidi zoanle Dwowabe nee ye mgbanyima nee Yizilayɛ ɛlɔnema kɔsɔɔti manle bɛhɔbɔle Amɔnoma abo zo bɔkɔɔ na bɛvale suakpole Relaba. Devidi ɔdaye mumua ne yeangɔ bie, yemɔ ɔdɛnlanle Gyɛlusalɛm.

²Kenle ko, mɔɔ sɛnzɛne ne tolole aze bie, na Devidi vi ye ewiazo nafelɛ nu dunwuele la, ɔvole suakunlu ɛkɛ ne sua ne ati zo ɔkpɔsɛkpɔsale zolɛ. Na ɔnwunle kɛ raalɛ bie ɛlɛbia. Raalɛ ne anwo yɛ fɛ bo zolɛ.

³Devidi zoanle manle bɛhɔbizale raalɛ holɛ ko ne. Bɛzele ye kɛ, bɛfɛlɛ ye Batehyɛba; ɔ ze a le Yilam yɛɛ ɔ hu a le Hɛtenli Yulaya.

⁴Devidi zoanle manle bɛhɔvɛlɛle ye. Ɔrale la ɔ nee ye lale. (Ɛnee bɔ zo mɔɔ yehɔ amozi yevi a.) Na raalɛ ne ziale hɔle sua nu.

⁵Raalɛ ne mekɛ kpale nwolɛ, na ɔzoanle ɔmanle bɛhɔbɔle Devidi amaneɛ kɛ, “Meva ɛkolɛ.”

⁶Devidi vale nrɛlaleɛ hɔmanle Dwowabe kɛ, “Maa Hɛtenli Yulaya ɛrɛla ɛranwu me.” Na Dwowabe manle Yulaya hɔle Devidi anwo lɔ.

⁷Mɔɔ Yulaya hɔle la, Devidi bizale ye saa Dwowabe nee ɛlɔnema ne te kpɔkɛ a; eza ɔbizale ye kɛ konle ne ɛlɛsi ahɔ la.

⁸Akee Devidi zele Yulaya kɛ, “Kɔ sua nu kɔnrinzi ɛ nwo na die wɔ ɛnwomenle.” Yulaya vile ɛkɛ ne hɔle, na belemgbunli manle bɛvale ahyɛlɛdeɛ bɛhɔmanle ye.

⁹Noko Yulaya angɔ sua nu; ɔ nee belemgbunli sinzavolɛma ne lale belemgbunli suakunlu anlenkɛ kpole ne anloa.

¹⁰Na bɛhanle bɛhilele Devidi kɛ Yulaya angɔ sua nu. Yemɔti ɔbizale ye kɛ, “Anzɛɛ ɛnvi adenle a wɔra a?”

¹¹Yulaya buale kɛ, “Nana, Yizilayɛma nee Dwudama wɔ konle nloa. Nyamenle Ngyekyeleɛ Ɛlɛka ne nee bɛ a wɔ lɔ a; me Safohyenle Kpanyinli Dwowabe nee ye boavolɛma la kpatawienyi nu. Duzu ati a ɔwɔ kɛ mame mekɔ sua nu, mekɔdi meno, na me nee me ye da ɛ? Meka ɛ ti metane wɔ kɛ menrɛyɛ nyɛleɛ mɔɔ le zɛhae la fee.”

¹²Yemɔti Devidi zele Yulaya kɛ, “Da ɛke ɛnɛ, ɛhyema mebagua wɔ adenle.” Yemɔti Yulaya woale Gyɛlusalɛm kenle nwiɔ.

¹³Devidi nee ye kpulale bɛ sa wɔ nɔsolɛ nu na bɛnlonle nza. Ɔmanle Yulaya bole kpole kpalɛ, noko eza yeangɔ sua nu. Ɔlale ye kundu ne azo wɔ suakunlu sinzavolɛma sua ne anu.

¹⁴Aleɛ hyenle la, Devidi hɛlɛle kɛlata manle Yulaya vale hɔmanle Dwowabe.

¹⁵Kɛlata ne anu, ɔzele Dwowabe kɛ, “Maa Yulaya ɛli ɛlɔne ne anyunlu kpalɛ kpalɛ, ɛleka mɔɔ konle ne anu yɛ se la, na twe ɛ nwo fi ɔ nwo amaa bɛabɔ ye bɛahu ye.”

¹⁶Yemɔti mɔɔ Dwowabe ɛlɔnema ne ɛnee ɛbɔ ɛyia suakpole ne la, ɔmanle Yulaya hɔle ɛleka mɔɔ konle ne anu ɛyɛ ɛsesebɛ kpalɛ la.

¹⁷Kpɔvolɛ ɛlɔnema ne vi suakpole ne azo vindele nee Dwowabe rahonle, na Devidi konle mgbanyima ne bie mɔ dɔle; Yulaya boka nwolɛ.

¹⁸Dwowabe zoanle manle bɛvale kɛ konle ne ɛlɛsi ahɔ ye la anwo edwɛkɛ kɔsɔɔti bɛhɔbɔle Devidi amaneɛ.

¹⁹Ɔzele soanvolɛma ne mɔ kɛ, “Saa bɛka bɛkile belemgbunli a

²⁰wɔannea a ɔbava ɛya yeabiza bɛ kɛ, ‘Duzu ati a bɛbikyele suakpole ne somaa kɛ bɛ nee bɛ kaho ɛ? Bɛnze kɛ bɛbawula ɛda bane ne mɔ anu bɛado ɔ?

²¹ Bɛngakye kɛ bɛzile bɛhunle Gediyɔn ara Abemɛlɛke la ɔ? Tibɛze yɛɛ raalɛzinli vuandinle ɛdibolɛ wɔ bane ne azo dole ɔ nwo zo hunle ye a. Duzu ati bɔbɔ yɛɛ akee bɛbikyele bane ne zɔhane a?’ Saa belemgbunli biza bɛ kpuyia ɛhye mɔ a bɛze ye kɛ, ‘Wɔ safohyenle Yulaya ɔdaye noko bɛhu ye.’ ”

²²Yemɔti soanvolɛ ne hɔhanle mɔɔ Dwowabe hanle hilele ye la amuala hilele Devidi.

²³Soanvolɛ ne hanle hilele Devidi kɛ, “Kpɔvolɛma ne mɔ asa homonle yɛ nwo zo na bɛratetale yɛ wɔ konle ɛleka ne, noko akee yɛvoanle bɛ toonwo yɛhɔdwule anlenkɛ kpole ne anloa.

²⁴Bɛtotole ɛda wɔ bane ne mɔ adokule ne mɔ anu, yemɔti belemgbunli konle mgbanyima ne bie mɔ ɛwu; yɛɛ wɔ sonvolɛ kpanyinli Yulaya ɔdaye noko yewu.”

²⁵Devidi zele soanvolɛ ne kɛ, “Kɔze Dwowabe kɛ ɔmmadi nyane, ɔluakɛ konle nu, kɛ ɔkɛyɛ biala la sonla kɛwu ala. Se ye kɛ ɔmia ɔ nwo kpalɛ na ɔva suakpole ne.”

²⁶Batehyɛba dele kɛ bɛhu ɔ hu la ɔzunle ye.

²⁷Bɛwiele ɛzɛne ne yɛ la, Devidi manle bɛhɔvale ye bɛrale ye suakunlu ɛkɛ ne manle ɔrayɛle ɔ ye na ɔ nee ye wole ralɛ nrenya. Na Ɛdɛnkɛma akunlu andwo nyɛleɛ ne anwo.