Read Nzema 2 Sam 13 Bible Online

2 Sam 13 - Nzema bible

2 Sam 13

¹Devidi ara nrenya Abesalɛm lɛ ɔ diema raalɛ anwo fɛlɛko ko. Bɛfɛlɛ ye Teemaa. Devidi lɛ ɔ ra nrenya bieko, bɛfɛlɛ ye Amenɔn. Na Amenɔn kulo Teemaa kpole kpalɛ.

²Amenɔn hulole Teemaa toonwo ɔmanle ɛhulolɛ ne bɔle ye anwonyane, ɔboalekɛ, kɛmɔ ɛnee Teemaa le belamunli na ɔnze nrenya la ati, Amenɔn nwunle kɛ, ɔyɛ se kɛ ɔkɛhola ye debie yɛ.

³Amenɔn lɛ ɔ gɔnwo bie, bɛfɛlɛ ye Dwɔnadabe. Ɔ ze a le Devidi adiema Hyemɛya. Dwɔnadabe le sonla mɔɔ ze adwenle mgbole bɔ a.

⁴Ɔzele Amenɔn kɛ, “Ɛle belemgbunli ra, noko dahuu biala ɛnee wɔyɛ ɛ nwo alɔbɔlɛ alɔbɔlɛ. Ka deɛ holɛ ko mɔɔ ɛlɛgyegye wɔ la kile me.” Amenɔn zele ye kɛ, “Mekulo me diema raalɛ Teemaa, mɔɔ le Abesalɛm ɔ nli ara ɛdeɛ ne.”

⁵Dwɔnadabe zele ye kɛ, “Da na kpati yɛ kɛ ɛnde kpɔkɛ fee la. Saa wɔ papa ba kɛ ɔbakpɔla wɔ a ka kile ye kɛ, ‘Maa me diema raalɛ Teemaa ɛramaa me debie menli. Maa ɔrado deɛ ne wɔ ɛke na meanlea nu, na eza yeasesa yeawula me nloa anu.’ ”

⁶Yemɔti Amenɔn lale na ɔkpatile ɔyɛle kɛ asɛɛ yewu yewie ala ɛne. Mɔɔ belemgbunli ne rale kɛ ɔbakpɔla ye la, Amenɔn zele ye kɛ, “Mesɛlɛ wɔ, maa me diema Teemaa ɛrɛla ɛrayɛ debie ɛmaa me wɔ me nwo ɛke na ɔdaye mumua ne ɔsesa ɔwula me nloa anu.”

⁷Yemɔti Devidi zoanle manle bɛhɔzele Teemaa kɛ, “Kɔ ɛ diema Amenɔn sua nu lɔ kɔdo debie maa ye.”

⁸Teemaa hɔle na ɔhɔnwunle kɛ yela. Ɔvale ɛdɔkɛ ɔfetele ɔloale wɔ ɔ nyunlu ɛkɛ.

⁹Ɔvale ɔhɔziele Amenɔn anyunlu ɛkɛ, noko yeanli. Amenɔn zele ye kɛ, “Maa awie biala ɛvinde.” Yemɔti awie biala vindele.

¹⁰Akee Amenɔn zele Teemaa kɛ, “Fa aleɛ ne bɛla sua kunlu ɛke. Dɛ ye ɛ sa nu maa menli.” Teemaa vale aleɛ ne hɔmanle ye wɔ sua kunlu lɔ.

¹¹Mɔɔ ɔvale ɔbikyele ye kɛ ɔli la, ɔzɔle ye nu na ɔzele ye kɛ, “Me diema raalɛ, maa me nee wɔ ɛla.”

¹²Ɔbuale ye kɛ, “Me diema, kyɛkyɛ, mmafa anwosesebɛ, ɛkye me mialera nu ɛ nee me yɛ debie biala, ɔluakɛ ɛbɛla zɛhae, bɛmbɔ ye fee wɔ Yizilayɛ maanle ye anu. Mmabɔ munzule ɛbɛla ɛhye.

¹³Nyiane kpole ɛhye, nienwu a mefa meabɔ me ti a? Na wɔmɔ, bɛkɛva ye kɛ Yizilayɛ sɛnvolɛma ne mɔ ko a le wɔ. Mesɛlɛ wɔ, fa ɛhye to belemgbunli anyunlu na ɔkɛva me ɔkɛmaa wɔ.”

¹⁴Noko Amenɔn amkponle; kɛmɔ ɔ nwo yɛ se tɛla ye la ati, ye anwosesebɛ ne bole Teemaa anwo zo, yemɔti ɔhyele ye mialera nu ɔvale ye.

¹⁵Amenɔn anye zo tetele ye la akee ɔkpɔle Teemaa ɔdɛlale kɛ ɔzile ɔhulole ye la. Na ɔzele ye kɛ, “Dwazo, finde kɔ.”

¹⁶Teemaa zele ye kɛ, “Me diema, ɛvoanlɛ mɔɔ ɛlɛfoa me la akee le ɛtane kpole tɛla mɔɔ wɔyɛ la.” Noko Amenɔn andie ye.

¹⁷Ɔvɛlɛle kpavolɛ ne mɔɔ sonle ye la na ɔzele ye kɛ, “Ye raalɛ ɛhye fi me nye zo ɛke, na to anlenkɛ ne anu.”

¹⁸Yemɔti ye sonvolɛ ne vindele ye na ɔdole anlenkɛ ne anu. Mekɛ ne anu ɛnee Teemaa wula tɛladeɛ tendenle asa ndendenle bie, ɔluakɛ tete ne, ɛnee adɛladeɛ mɔɔ belemgbunli amra mraalɛ mɔɔ ɛtɛkɔle agyalɛ ɛlɛ la wula la ɛne.

¹⁹Teemaa suosuanle tɛladeɛ ne mɔɔ ɔwula la anu na ɔvulale nzonle ɔguale ɔ ti zo. Ɔvale ɔ sa ɔguale ɔ ti zo na ɔzunle. Mɔɔ ɔlɛkɔ la ɛnee ɔlɛsu.

²⁰Mɔɔ ɔ diema Abesalɛm nwunle ye la, ɔbizale ye kɛ, “Amenɔn ɛfunlofunla wɔ ɔ? Me diema, mmasu. Ɛdawɔ ɛ diema ɔ; debie biala mɔɔ yeyɛ wɔ la mmafa ɛsie ɛ ti anu yɛɛ mmaka ɛkile awie biala.” Yemɔti Teemaa vale alɔbɔlɛ nee nyane dɛnlanle Abesalɛm sua nu ɛkɛ.

²¹Mɔɔ Belemgbunli Devidi dele edwɛkɛ mɔɔ ɛzi la, ɔvale ɛya kpole.

²²Abesalɛm ɛdeɛ, yeambuke ɔ nloa yeanga ɛhwee yeangile Amenɔn; ɔluakɛ ɛnee akee ɔkyi ye, ɔboalekɛ yeva anwosesebɛ yehye ɔ diema raalɛ ne mialera nu yeva ye.

²³Ɛvolɛ nwiɔ pɛle nu la, Abesalɛm pepɛle mboane nwo enrinli wɔ Beeyale Heezɔ mɔɔ zua Yifelaem la na ɔdole nwolɛ ɛkponle. Ɔdole ɛsalɛ ɔvɛlɛle belemgbunli amra mrenya ne mɔ kɔsɔɔti.

²⁴Abesalɛm eza hɔle belemgbunli ɛkɛ ne hɔzele ye kɛ, “Nana, melɛpepɛ me mboane ne mɔ anwo enrinli. Mesɛlɛ wɔ, Nana, ɛ nee wɔ mgbanyima ne mɔ bɛrɛla nwolɛ ɛkponledolɛ ne abo.”

²⁵Belemgbunli ne zele ye kɛ, “Kyɛkyɛ, me ra, yɛ muala yɛkɔ a ɔnrɛyɛ boɛ; ɛ nwo kɛhyele wɔ.” Abesalɛm yɛle mɔɔ kɛyɛ boɛ, noko belemgbunli angɔ. Na ɔyileyilale ye kosoɛɛ kɛ ɔhɔ.

²⁶Akee Abesalɛm hanle hilele ye kɛ, “Mesɛlɛ wɔ, saa ɛnrɛnyia adenle ɛnrɛra ɛdeɛ a ɛnee maa me diema Amenɔn ɛrɛla.” Belemgbunli bizale ye kɛ, “Duzu ati ɔ?”

²⁷Noko Abesalɛm hanle toonwo ɔmanle ɔ ze manle ɔ nee Amenɔn nee ɔ mediema mrenya ne mɔ amuala hɔle.

²⁸Na Abesalɛm zele ye sonvolɛma ne mɔ kɛ, “Bɛdie, saa bɛnwu kɛ Amenɔn ɛbo kpalɛ kpalɛ na mese bɛ kɛ, ‘Bɛyɛ bɛmaa Amenɔn’ a, bɛhu ye. Bɛmmasulo; medame a mese a. Bɛzi ahonle na bɛli mrenyasɛm.”

²⁹Kɛmɔ Abesalɛm zele bɛ la, sonvolɛma ne mɔ yɛle ye zɔhane ala. Na Devidi amra ne mɔ mɔɔ hale la vole bɛ mgbɔnwɔ ne mɔ azo nriandile hɔle.

³⁰Mɔɔ bɛlua adenle zo la, nrɛlaleɛ dole Devidi kɛ, “Abesalɛm ɛhu belemgbunli amra ne mɔ kɔsɔɔti, ko bɔbɔ anga.”

³¹Belemgbunli manle ɔ nwo zo, ɔsuosuanle ye tɛladeɛ ne anu na ɔweweɛle ɔ nwo aze. Ye sonvolɛma mɔɔ nee ye wɔ ɛkɛ ne la noko suosuanle bɛ adɛladeɛ ne mɔ anu.

³²Na Devidi adiema Hyemɛya ara Dwɔnadabe hanle kɛ, “Nana, bɛtɛkunle ɛ mra ne mɔ kɔsɔɔti. Amenɔn angomekye a ɛwu a. Ɔluakɛ sumunli kɛ Amenɔn hyele Abesalɛm adiema raalɛ Teemaa mialera nu vale ye la yɛɛ ɔbɔle ye ɛhunlɛ nwo adwenle ɔdole ɛkɛ a.

³³Yemɔti Nana, mmadwenle kɛ ɛ mra ne mɔ kɔsɔɔti ɛwu; Amenɔn ala a ɛwu a.”

³⁴Akee Abesalɛm nriandile. Mekɛ ne anu ala, ɛlɔnenli ne mɔɔ ɛlɛsinza la dole ɔ nye, na ɔnwunle kɛ menli dɔɔnwo vi Hɔlɔneeyem adenle zo ɛlɛtolo boka ne ara.

³⁵Na Dwɔnadabe zele belemgbunli ne kɛ, “Nana, kɛmɔ wɔ sonvolɛ menganle la, yeyɛ zɔhane, ɛ mra ne mɔ ɛra.”

³⁶Ɔ nloa ampe bɔbɔ ɛnee belemgbunli amra ne mɔ ɛvinde ɛkɛ. Bɛdukuele nuhua bɛzunle bɛmanle belemgbunli nee menli mɔɔ wɔ ɛkɛ ne la amuala zunle bie.

³⁷Abesalɛm nriandile la ɔhɔle Gihyɛ Belemgbunli Talemae mɔɔ ɔ ze a le Amehɛde la anwo lɔ. Ɔdɛnlanle nehane ɛvolɛ nsa. Devidi zunle ɔ ra Amenɔn hyɛle.

³⁹Na mɔɔ akee Devidi arɛle vile Amenɔn ewule ne la, ɔ nwo lɔle ɔ ra Abesalɛm.