Read Nzema 2 Sam 14 Bible Online

2 Sam 14 - Nzema bible

2 Sam 14

¹Akee Zɛluaya ara Dwowabe nwunle kɛ Belemgbunli Devidi anwo ɛlɛdɔ Abesalɛm kpole,

²yemɔti ɔzoanle ɔmanle bɛhɔvale raalɛ bie wɔ Tɛkowa. Raalɛ ne ze nrɛlɛbɛ kpole kpalɛ. Mɔɔ ɔrale la Dwowabe zele ye kɛ, “Kpati yɛ kɛ ɛwɔ nyanelilɛ nu. Keda nyanelilɛ ɛdanlɛ. Mmayɛ ɛ nwo bɔkɔbɔkɔ biala; yɛ kɛ sonla mɔɔ ye awie ɛwu na yeli nyane dedee la.

³Na kɔ belemgbunli ne ɛkɛ kɔha edwɛkɛ mɔɔ meka meahile wɔ la kile ye.” Na Dwowabe vale nrɛlaleɛ ne manle ye.

⁴Mɔɔ Tɛkowa raalɛ ne hɔle belemgbunli ne ɛkɛ ne la, ɔdule ɔdɔle ɔ gyakɛ anu enililɛ nu na ɔhanle kɛ, “Nana, mesɛlɛ wɔ, boa me.”

⁵Belemgbunli ne bizale ye kɛ, “Duzu a ɛhyia wɔ a?” Ɔbuale ye kɛ, “Nana, mele kunlanvolɛ, me hu ɛwu.

⁶Wɔ sonvolɛ raalɛ, melɛ mralɛ mrenya nwiɔ; bɛlile butule wɔ ɛbɔ nu, bɛannyia awie amkpɔda bɛ, yemɔti ko bɔle ɔ gɔnwo debie hunle ye.

⁷Kɛkala, me nwo amra kɔsɔɔti ɛhɔ afoa na bɛze me kɛ, ‘Fa sonla ne mɔɔ hunle ɔ diema ne la bɛla maa yɛhu ye bie.’ Saa bɛyɛ ɛhye a ɛnee ɔkile kɛ bɛnlua me anyevinli ala ɛne. Me hu ɛnrɛnyia ye kɔliagya yɛɛ ye duma baminli ewiade ye anu.”

⁸Belemgbunli ne zele raalɛ ne kɛ, “Kɔ sua nu na mebanlea meaziezie wɔ edwɛkɛ ne.”

⁹Na Tɛkowa raalɛ ne hanle hilele belemgbunli ne kɛ, “Nana, mɔɔ ɛkɛyɛ la biala anwo fɔlɛlilɛ ne ɛgua me nee egya awuke nu amra yɛ ti zo. Belemgbunli nee ye dehelɛ abusua ne ɛnli fɔlɛ.”

¹⁰Belemgbunli ne zele kɛ, “Awie biala mɔɔ kɛnwunlonwunla wɔ la, baha kile me na ɔnrɛyɛ zɔhane bieko ɛlɛ.”

¹¹Raalɛ ne hanle kɛ, “Nana, ka Ɛdɛnkɛma wɔ Nyamenle ne kɛ menli mɔɔ di mogya nzenralɛ la ɛnrɛha mogya ɛnrɛgua bieko, amaa me ra ne anyia ɔ ti.” Belemgbunli ne hanle kɛ, “Meka tete Ɛdɛnkɛma kɛ, ɛ ra nrenya ne ati enrinli ko bɔbɔ ɛnrɛde ɛnrɛdɔ aze.”

¹²Akee raalɛ ne zele kɛ, “Nana, mesɛlɛ wɔ, wɔ sonvolɛ raalɛ, mekulo kɛ meka edwɛkɛ kpɔkɛ ko.” Belemgbunli ne zele ye kɛ, “Tendɛ.”

¹³Raalɛ ne hanle kɛ, “Na duzu ati yɛɛ wɔyɛ ɛtane ɛhye wɔtia Nyamenle menli ne a? Edwɛkɛ ɛhye mɔɔ wɔha la kile kɛ wɔbu ɛ nwo fɔlɛ. Duzu ati a ɛnrɛmaa ɛ ra nrenya ne mɔɔ ɛdɔ ɛbɔ nu la ɛnrɛzia ɛnrɛra ɛ?

¹⁴Ɔwɔ nuhua kɛ yɛ muala yɛbawu. Yɛle kɛ nzule mɔɔ ɛbɔ ɛkponde azɛlɛ nwo la, ɛsa ye bieko a ɔnyɛ boɛ. Nyamenle ɛngu sonla, na ɔfa adenle bie azo ɔmaa sonla mɔɔ ɔdaye Nyamenle yevoa ye la ɛnga ye sonlamgbane nu. Sonla mɔɔ ɛva sulosulo ɛdɔ ɛbɔ nu la noko, belemgbunli kola maa ɔsia ɔba sua nu bieko.

¹⁵Mera kɛ mebaha edwɛkɛ ɛhye meahile wɔ, Nana, ɔboalekɛ menli ne ɛha me ɛzulolɛ; yɛɛ melɛ anyelazo kɛ ɛkɛyɛ me ɛbizalɛdeɛ ɛkɛmaa me.

¹⁶Meze kɛ belemgbunli badie me na yealie me yeavi ahenle ne mɔɔ kpondɛ kɛ ɔku me nee me ra nrenya ne na ɔye yɛ aluma ɔfi azɛlɛ ye mɔɔ Nyamenle ɛva ɛmaa ye menli la azo la asa anu.

¹⁷ Wɔ sonvolɛ raalɛ, menyianle adwenle kɛ me awulae belemgbunli baha me ahonle ado azule nu, ɔluakɛ me awulae belemgbunli le kɛ Nyamenle soanvolɛ la, ɔze kpalɛ, ɔze ɛtane. Ɛdɛnkɛma wɔ Nyamenle ne nee wɔ ɛlua.”

¹⁸Na belemgbunli ne zele raalɛ ne kɛ, “Mmafa debie biala ɛfea me. Edwɛkɛ mɔɔ mebiza wɔ la, kpakye nuhua wienyi ka kile me.” Raalɛ ne hanle kɛ, “Nana, tendɛ.”

¹⁹Belemgbunli ne bizale ye kɛ, “Ɛnee Dwowabe a ɛha edwɛkɛ ɛhye ɛhile wɔ a?” Raalɛ ne buale kɛ, “Meka meka kɛ, mekoati wɔ kpuyia ye anwo fee a ɔnyɛ boɛ. Nana, kɛmɔ ɛdawɔ wɔha la, wɔ sonvolɛ Dwowabe yɛɛ bɔle adwenle ɛhye a. Yemɔ yɛɛ ɔhilele me mɔɔ ɔwɔ kɛ meyɛ nee mɔɔ ɔwɔ kɛ meka la amuala a.

²⁰Na ɔyɛle ɛhye kɛ ɔfa yeamaa boɛ adoa boɛ. Nana ze nrɛlɛbɛ kɛ Nyamenle soanvolɛ, ɔze aleɛabo edwɛkɛ biala.”

²¹Belemgbunli ne zele Dwowabe kɛ, “Mekponle wɔ nzuzulɛ ne azo. Kɔ na kɔva Abesalɛm bɛla.”

²²Na Dwowabe dule dɔle belemgbunli agyakɛ anu enililɛ nu na ɔhanvole ye ɔzele kɛ, “Ɛnɛ demua ye, wɔ sonvolɛ, menwu ye wienyi kɛ Nana kulo me edwɛkɛ, yemɔti yɛɛ wɔkponle me ɛbizalɛdeɛ ye wɔmaa me a.”

²³Na Dwowabe hanle ɔ nwo hɔle Gihyɛ hɔvale Abesalɛm rale Gyɛlusalɛm.

²⁴Na belemgbunli ne zele kɛ, “Mmamaa ɔba suakunlu ɛke. Maa ɔdɛnla ɔdaye ye sua nu. Memkpondɛ kɛ me nye nwu ye.” Yemɔti Abesalɛm angɔ belemgbunli suakunlu ɛkɛ, ɔdɛnlanle ɔdaye ye sua nu.

²⁵Wɔ Yizilayɛ maanle ne anu, nrenya biala ɛnle nu mɔɔ anwo yɛ fɛ nee Abesalɛm sɛ a. Ɛbɔ ye ye anwuma toonwo mɔɔ dwu ye aze la, ye ɛleka biala ɛnle ɛkɛ mɔɔ sonla ka nwolɛ edwɛkɛ ɛtane a ɔyɛ boɛ a.

²⁶Ɔ ti enrinli le buzuu yɛɛ nuhua pi. Yemɔti ɛvolɛ biala ɔpepɛ, amaa yeanyɛ ɛnlomboɛ somaa yeammaa ye. Ɔpepɛ enrinli ne na ɔsuzu a ɔto tone nu kilo nwiɔ, kɛmɔ belemgbunli nzuzudeɛ ne kile la.

²⁷Abesalɛm wole mralɛ mrenya nsa yɛɛ ralɛ raalɛ ko, bɛfɛlɛ ye Teemaa na ye anwofɛlɛko ne bo zolɛ.

²⁸Abesalɛm dɛnlanle Gyɛlusalɛm toonwo ɛvolɛ nwiɔ, noko ɔ nye annwu belemgbunli anyunlu ɛlɛ.

²⁹Yemɔti ɔzoanle ɔmanle bɛhɔvɛlɛle Dwowabe kɛ ɔrava ye ɔhɔ belemgbunli ɛkɛ; na Dwowabe angɔ. Ɔzoanle bieko, na Dwowabe angɔ.

³⁰Yemɔti Abesalɛm zele ye sonvolɛma ne kɛ, “Bɛhɔ ɛbɔ ne anu; bɛbanwu kɛ Dwowabe ma ɛya avule ne zua me ɛdeɛ ne. Bɛhɔdo senle nu bɛyela ye.” Na Abesalɛm sonvolɛma ne hɔdole senle ɛya ne anu yelale ye.

³¹Dwowabe zile nu hɔle Abesalɛm sua nu hɔbizale ye kɛ, “Duzu ati a wɔ sonvolɛma ne ɛhɔdo senle me ɛya ne anu ɛ?”

³²Abesalɛm buale ye kɛ, “Mengɛlale wɔ nrɛlaleɛ kɛ ɛrɛla, amaa meazoa wɔ wɔ belemgbunli ɛkɛ meamaa wɔahɔbiza ye kɛ, ‘Duzu ati a wɔmaa mevi Gihyɛ mera ɛ? Ɔle kpalɛ kɛ anrɛɛ mendɛnlanle nehane.’ Yemɔti mekpondɛ kɛ ɛ nee me kɔ belemgbunli ɛkɛ ne. Saa medi fɔlɛ a ɔhu me.”

³³Yemɔti Dwowabe hɔle belemgbunli ɛkɛ ne na ɔhɔbɔle ye amaneɛ. Belemgbunli zoanle manle bɛhɔvɛlɛle Abesalɛm, na Abesalɛm rale. Ɔdwule ɛkɛ ne la, ɔbutule azɛlɛ ne anwo ɔbɔle ɔ ti aze ɔmanle ye na belemgbunli ne vale Abesalɛm bɔle ye ɛbolɛ.