Read Nzema 2 Sam 15 Bible Online

2 Sam 15 - Nzema bible

2 Sam 15

¹Ɛhye anzi, Abesalɛm nyianle ye konle ehwili nee nwolɛ mgbɔnwɔ yɛɛ sinzavolɛma abulanlu.

²Alehyenlɛ biala nwonlomɔ mangyee ne Abesalɛm kɔgyinla suakpole ne anlenkɛ kpole ne anloa. Na saa awie lɛ ye edwɛkɛ kamaa belemgbunli aziezie a ɛnee ɔbiza ye kɛ, “Ɛvi suakpole boni azo?” Na saa ɔka kɛ, “Wɔ sonvolɛ, mevi Yizilayɛ abusua ekpunli zɛhae anu” a,

³ɛnee Abesalɛm ɛha ɛhile ye kɛ, “Nea, wɔ edwɛkɛ yɛ fɛ bɔkɔɔ na belemgbunli ɛnlɛ awie kpaziwɔkɛ biala mɔɔ di wɔ edwɛkɛ ne amaa wɔ a.”

⁴Eza ɔfa ɔsɔ zolɛ kɛ, “Me kunlu a anrɛɛ mame a mele maanle ye ndɛnebuavolɛ a! Anrɛɛ awie biala mɔɔ kɛva ye edwɛkɛ kɛrɛlɛ me la menwɔli ye nɔhalɛ nu menwɔmaa ye.”

⁵Saa ahenle bikye ye kɛ ɔbabɔ ɔ ti aze yeamaa ye a ɛnee yezɔ ahenle yeyɛ ye atuu.

⁶Ɛhye yɛɛ Abesalɛm yɛle manle Yizilayɛma kɔsɔɔti mɔɔ rale belemgbunli ɛkɛ ne kɛ ɔziezie bɛ edwɛkɛ ɔmaa bɛ la a. Ɛhye manle Yizilayɛma kɔsɔɔti hulole Abesalɛm edwɛkɛ.

⁷Ɛvolɛ nna pɛle nu la Abesalɛm zele belemgbunli ne kɛ, “Nana, mesɛlɛ wɔ, maa me adenle maa mengɔ Hibulɔn mengɔnye me ɛwɔkɛ mɔɔ membɔle Ɛdɛnkɛma la.

⁸Mekɛ mɔɔ mewɔ Gihyɛ mɔɔ wɔ Arelam la, membɔle ɛwɔkɛ kɛ, ‘Saa Ɛdɛnkɛma boa me maa mesia meba Gyɛlusalɛm a, menwɔhɔzonle ye wɔ Hibulɔn.’ ”

⁹Belemgbunli ne zele ye kɛ, “Kɔ anzonudwolɛ nu.” Yemɔti Abesalɛm hɔle Hibulɔn.

¹⁰Akee Abesalɛm zoanle menli awozinli nu wɔ Yizilayɛ mbusua ekpunli ekpunli ne mɔ kɔsɔɔti anwo zo manle bɛhɔzele bɛ kɛ, “Saa bɛte aweɛne tendenle ne ane ala a, bɛdea nuhua bɛha ye kɛ, ‘Abesalɛm a di belemgbunli wɔ Hibulɔn a.’ ”

¹¹Abesalɛm dole ɛsalɛ vɛlɛle menli ɛya nwiɔ na ɔ nee bɛ vi Gyɛlusalɛm hɔle. Ɛnee menli ɛhye mɔ ɛnze adwenle ɛtane ne mɔɔ Abesalɛm ɛva la anwo bie fee. Yemɔti bɛmɛ, bɛlɛ adwenle kpalɛ a bɛhɔle a.

¹²Na mɔɔ Abesalɛm bɔ azu ne la, ɔzoanle ɔmanle bɛhɔvɛlɛle Ahetɔfɛle mɔɔ vi Gaelo la. Nrenya ɛhye le Belemgbunli Devidi folɛdulɛma ne mɔ ko. Mɔɔ ɔrale la, ɔmanle Abesalɛm maamɔvo adwenle ne anu mianle yɛɛ eza ɔnyianle boavolɛma dɔɔnwo.

¹³Ɛbɔfoɔ rale Devidi ɛkɛ razele ye kɛ, “Yizilayɛma kɔsɔɔti ɛkpo wɔ na bɛva bɛ ahonle bɛmaa Abesalɛm.”

¹⁴Mɔɔ Devidi dele la ɔzele ye mgbanyima kɔsɔɔti mɔɔ nee ye wɔ Gyɛlusalɛm ɛkɛ ne la kɛ, “Bɛha bɛ nwo bɛmaa yɛye yɛ nwo zo na anrɛɛ Abesalɛm kɛbɔ yɛ bo zo bɔkɔɔ. Bɛha bɛ nwo na anrɛɛ ɔkɛbu yɛ nyunlu ɔkɛmaa munzule kɛdo yɛ na ɔkɛbɔ suakpole ye tɔɔ!”

¹⁵Na belemgbunli ne mgbanyima ne mɔ zele ye kɛ, “Nana, yɛboɔboa yɛ nwo kɛ debie biala mɔɔ ɛkɛha ɛkɛhile yɛ la yɛkɛyɛ.”

¹⁶Yemɔti belemgbunli ne yele ɔ nwo zo, zɔhane ala yɛɛ ye mgbanyima nee ye sua nu amra yɛle a. Ɔgyakyile ye mgbɔnla bulu kɛ bɛzinza ye suakunlu ɛkɛ ne.

¹⁷Bɛkɔ na bɛhɔdwule awuke ne mɔɔ wɔ sua ne awieleɛ kpalɛ la, bɛgyinlanle.

¹⁸Ye mgbanyima ne mɔ razenle, na bɛgyinlanle ye foa ko. Ye sinzavolɛma ne mɔ zenle lumuale ɔ nyunlu. Ɛlɔnema ɛya nsia ne mɔɔ ɔ nee bɛ vi Gate la noko zenle lumuale ɔ nyunlu.

¹⁹Akee belemgbunli ne zele Yeteeyae mɔɔ nea bɛ nwo zo la kɛ, “Duzu ati a ɛdawɔ noko ɛboka yɛ nwo a? Sia kɔ kɔdɛnla belemgbunli fofolɛ ne anwo ɛkɛ, ɔluakɛ ɛle ɛyɛvolɛ, yɛɛ eza ɛvi wɔ maanle nu a wɔnriandi wɔradane a.

²⁰Anoma ala a ɛdwule ɛke a. Duzu ati a ɔwɔ kɛ mefa wɔ mekɔduolua nu wɔ mekɛ mɔɔ ɛleka mumua ne mɔɔ melɛkɔ la, medame menze la a? Fa ɛ mediema ne mɔ sia kɔ. Ɛdɛnkɛma ɛhile ye ɛhulolɛ kpole ne ɛmaa wɔ na ɔ nee wɔ ɛlua kɛnlɛma.”

²¹Na Yeteeyae buale belemgbunli ne kɛ, “Nana, meka tease Ɛdɛnkɛma metane wɔ kɛ, ɛleka biala mɔɔ me awulae belemgbunli ne kɔ la, saa ewule nu o, ngoane nu o, wɔ sonvolɛ, me nee wɔ bahɔ.”

²²Na Devidi zele Yeteeyae kɛ, “Baze kɔ ɛ.” Yemɔti Yeteeyae nee ɔ sa zo ne mɔ, mgbanyinli nee ngakula kɔsɔɔti zenle hɔle.

²³Mɔɔ menli ne mɔ kɔ la ezuavolɛ ne kɔsɔɔti zunle. Belemgbunli ne hɔpɛle azudenle Kedelɔn ne; menli ne kɔsɔɔti noko pɛle na bɛbɔle bɛ ti fienemgbole ne anu lɔ.

²⁴Abayata rale bie, Zeedɔko nee Livaema mɔɔ zo Nyamenle Ngyekyeleɛ Ɛlɛka ne la noko rale. Bɛzokoɛle bɛziele ye aze hɔkpulale mekɛ mɔɔ menli ne amuala wiele se la.

²⁵Akee belemgbunli ne zele Zeedɔko kɛ, “Bɛva Nyamenle Ngyekyeleɛ Ɛlɛka ne bɛzia bɛhɔ suakpole ne azo. Saa ɔyɛ Ɛdɛnkɛma ɛhulolɛ a, ɔbamaa meazia mearanwu ye bieko nee ye Ndanlɛ Sua ne;

²⁶na saa ɔse kɛ ɔ nye ɛnlie me nwo a, debie biala mɔɔ ɔkulo la ɔva ɔyɛ me.”

²⁷Belemgbunli ne eza zele sɛlɛvolɛ Zeedɔko kɛ, “Fa ɛ ra nrenya Ahaemaze nee Abayata ara nrenya Dwɔnatan sia kɔ suakpole ne azo anzonudwolɛ nu.

²⁸Mebahendɛ azule ne anloa, ɛleka mɔɔ bɛpɛ la wɔ fienemgbole ye anu kɔkpula mekɛ mɔɔ menwɔde ɛ nloa anu nrɛlaleɛ la.”

²⁹Yemɔti Zeedɔko nee Abayata vale Nyamenle Ngyekyeleɛ Ɛlɛka ne ziale hɔle Gyɛlusalɛm na bɛhɔdɛnlanle ɛkɛ.

³⁰Devidi vole hɔle Ɔlivi Boka ne azo. Ɔkɔ la ɛnee ɔlɛsu, ɔ gyakɛ gua aze na yeheda ɔ ti zo, na bɛdabɛ mɔɔ bɛ nee ye lua la noko hedɛhedale bɛ ti zo. Bɛhɔle boka ne azo; bɛkɔ la ɛnee bɛlɛsu.

³¹Bɛhanle bɛhilele Devidi kɛ, “Ahetɔfɛle boka maamɔvoma mɔɔ nee Abesalɛm lua la anwo.” Na Devidi zele kɛ, “O Ɛdɛnkɛma, mesɛlɛ wɔ, maa Ahetɔfɛle folɛdulɛ biala ɛyɛ mgbane.”

³²Mɔɔ Devidi dwule boka ne azo, ɛleka mɔɔ bɛsonle Nyamenle la, Akaenli Huhyae rayiale ye, ɛnee yesuosua ye tɛladeɛ ne anu na yeva ndɛtɛlɛ yeyɛ ɔ ti zo.

³³Devidi zele ye kɛ, “Saa ɛ nee me kɔ a ɛbayɛ ngyegyelɛ wɔamaa me.

³⁴Sia kɔ suakpole ne azo na kɔze Abesalɛm kɛ, ‘O belemgbunli, mele wɔ sonvolɛ; mekɛ bie mɔɔ ɛze ɛhɔ la, menzonlenle ɛ ze, zɔhane ala yɛɛ mera mebazonle wɔ a.’ Ye zɛhae, yemɔ ɛbahola wɔazɛkye Ahetɔfɛle maamɔvo adwenle biala mɔɔ ɔkɛbɔ la.

³⁵Zeedɔko nee Abayata a le sɛlɛvolɛma mɔɔ bɛ nee bɛ wɔ lɔ a. Edwɛkɛ biala mɔɔ bɛkɛha wɔ belemgbunli suakunlu ɛkɛ ne la baha kile bɛ.

³⁶Bɛ mra mrenya nwiɔ ne, Zeedɔko ara Ahaemaze nee Abayata ara Dwɔnatan wɔ lɔ. Edwɛkɛ biala mɔɔ kɛzi la, bɛzoa bɛ bɛmaa bɛraha bɛhile me.”

³⁷Yemɔti Devidi agɔnwo Huhyae ziale hɔle suakpole ne azo wɔ mekɛ ko ne ala mɔɔ ɛnee Abesalɛm ɛlɛba aravo Gyɛlusalɛm la.