Read Nzema 2 Sam 16 Bible Online

2 Sam 16 - Nzema bible

2 Sam 16

¹Mɔɔ Devidi hɔle ɔ nyunlu ekyii wɔ boka ne azo la, ɔ nee Mɛfebɔhyɛte sonvolɛ Zaeba yiale arɛlevilɛ nu. Ɔlɛ asoaso nwiɔ mɔɔ bɛva bɛ bɛbɔ nwo la, na yeva kpanwo ahunguma ɛya nwiɔ, vanye ma welera siakɛ ɛya ko, bakama amolɛ siakɛ ɛya ko yɛɛ nwanye kodoku ko yekyekye asoaso ne mɔ anzi.

² Belemgbunli ne bizale Zaeba kɛ, “Duzu ati a wɔva ninyɛne ɛhye mɔ kɔsɔɔti wɔra a?” Zaeba buale ye kɛ, “Asoaso ne mɔ le belemgbunli awuke nu amra ɛdeɛ kɛ bɛdɛnla zolɛ, kpanwo ne nee ma amolɛ ne le mgbavolɛ ne mɔ ɛdeɛ, yɛɛ nwanye ne le bɛdabɛ mɔɔ bɛ nwo kɛbɛlɛ bɛ wɔ fienemgbole ne anu la ɛdeɛ.”

³Belemgbunli ne bizale ye kɛ, “Na ɛ menle ara nrenya ne wɔ nienwu?” Zaeba buale ye kɛ, “Ɔwɔ Gyɛlusalɛm; ɔse, ‘Ɔze ye wienyi kɛ Yizilayɛma bava ɔ ze belemgbunli maanle ne amaa ye.’ ”

⁴Belemgbunli ne zele Zaeba kɛ, “Nea, debie biala mɔɔ le Mɛfebɔhyɛte ɛdeɛ la le wɔ ɛdeɛ.” Zaeba zele kɛ, “Mele wɔ sonvolɛ; dahuu mebayɛ mɔɔ belemgbunli ne kpondɛ la.”

⁵Mɔɔ Belemgbunli Devidi dwule Bahulem la, Sɔɔlo abo zo amra ne mɔ ko, mɔɔ le Gila ara Hyemɛyae, rayiale ye. Ɔba kɔsɔɔti la ɛnee ɔ ne la zo ɔlɛbɔ Devidi sasa.

⁶Hyemɛyae kpale Devidi nee ye mgbanyima ne mɔ awolɛ wɔ mekɛ mɔɔ ɛnee ye mgbanyima nee ye sinzavolɛma ɛbɔ ɛyia ye la.

⁷Mɔɔ Hyemɛyae bɔ sasa ne la ɔzele kɛ, “Dwazo ɛkɛ ne, kɔ nehane, kɔdiawu, sonlamgbane!

⁸Ɛdɛnkɛma ɛdua wɔ kakɛ kɛ ɛvale Sɔɔlo belemgbunli maanle ne na ɛhanle ɔ bo zo amra mogya ɛguale a. Ɛdɛnkɛma ɛlie belemgbunli maanle ne ɛmaa ɛ ra Abesalɛm. Wɔ munzule doa wɔ, kɔdiawu!”

⁹Zɛluaya ara Abehyae zele belemgbunli ne kɛ, “Duzu ati bɔbɔ yɛɛ twea funli ɛhye kɛbɔ Nana aholoba ɛ? Nana, maa mengɔnli ɔ ti ne antɛnlɛma memaa ye.”

¹⁰Na belemgbunli ne zele Abehyae nee ɔ diema Dwowabe kɛ, “Bɛmɛ Zɛluaya amra, ɛhye ɛnle bɛ edwɛkɛ. Saa Ɛdɛnkɛma yɛɛ ɛze ye kɛ ɔbɔ Devidi sasa a ɛnee nwane a lɛ adenle kɛbiza ye kɛ, ‘Duzu ati a wɔyɛ ɛhye ɛ?’ ”

¹¹Akee Devidi zele Abehyae nee ye mgbanyima ne mɔ amuala kɛ, “Me kunlu ralɛ bɔbɔ ɛlɛpɛ me nwo adenle yeahu me, na Bɛngyamanenli ye ɛdeɛ mɔɔ ɛlɛyɛ la yɛɛ yɛ bɛ azibɛnwo a. Bɛgyakyi ye bɛmaa ɔbɔ me sasa. Ɛdɛnkɛma a se ɔyɛ a.

¹²Bie a ɛnee Ɛdɛnkɛma banwu kɛ mezi meyɛ anwunvɔne la na yeamaa me nyilalɛ yeazie sasa ye mɔɔ ɛnɛ bɛlɛbɔ me la abo zo.”

¹³Yemɔti Devidi nee ye menli ne zɔle bɛ adendulɛ ne azo. Mɔɔ bɛlɛkɔ la ɛnee Hyemɛyae lua boka ne anye anwo ɔlɛ sasabɔlɛ ne ɔzi ye zo, ɔkpa ye awolɛ na ɔfuandi anwea ɔgua bɛ nwo.

¹⁴Na belemgbunli ne nee menli ne gyi zolɛ toonwo bɛhɔdwule Dwɔdan ne anloa; ɛnee akee bɛvɛ, bɛ nwo ɛyɛ bɛ bɛtɛɛ, yemɔti ɛkɛ ne yɛɛ bɛliele bɛ ɛnwomenle bie a.

¹⁵Abesalɛm nee Yizilayɛma mɔɔ nee ye lua la hɔvole Gyɛlusalɛm; Ahetɔfɛle ɔdaye ɔboka nwolɛ bie.

¹⁶Mɔɔ Devidi agɔnwo Akaenli Huhyae rale Abesalɛm ɛkɛ ne la, ɔdeanle nuhua kɛ, “Belemgbunli ɛnyi ɛhyɛ! Belemgbunli ɛnyi ɛhyɛ!”

¹⁷Abesalɛm bizale ye kɛ, “Asoo wɔ nɔhalɛ ne mɔɔ ɛdi ɛmaa ɛ gɔnwo Devidi la, yemɔ ɛne? Duzu ati a ɛ nee ye angɔ a?”

¹⁸Huhyae zele Abesalɛm kɛ, “Kyɛkyɛ, sonla ne mɔɔ Ɛdɛnkɛma nee ye menli ne nee mɔɔ Yizilayɛma kɔsɔɔti ɛkpa nu ɛye ye la, yemɔ yɛɛ mewɔ ye afoa a.

¹⁹Saa meanzonle me menle ara ne a ɛnee nwane bieko a ɔwɔ kɛ mesonle ye a? Kɛ mezi mezonle ɛ ze la, zɔhane ala yɛɛ mebazonle wɔ a.”

²⁰Akee Abesalɛm zele Ahetɔfɛle kɛ, “Fa wɔ adwenle bɛla; duzu debie a ɔwɔ kɛ yɛyɛ a?”

²¹Ahetɔfɛle zele Abesalɛm kɛ, “Ɛ ze mgbɔnla ne mɔ mɔɔ yegyakyi bɛ kɛ bɛzinza suakunlu ɛkɛ ne la, ɛ nee bɛ kɔsɔɔti ɛla. Ɛhye bamaa Yizilayɛma kɔsɔɔti anwu kɛ ɛ nee ɛ ze bɛpɛ amodinli nu, na menli mɔɔ li ɛ nzi la banyia akɛnrazilɛ.”

²² Yemɔti bɛzile ndanlɛ sua wɔ suakunlu azua ne mɔ ko ati zo, na Abesalɛm nee ɔ ze mgbɔnla ne mɔ lale ngoko ngoko wɔ Yizilayɛma kɔsɔɔti anye zo.

²³Mekɛ ne anu, folɛ biala mɔɔ Ahetɔfɛle kɛdu la le kɛ asɛɛ Nyamenle a ɛha a. Yemɔti Devidi nee Abesalɛm lile Ahetɔfɛle folɛdulɛ biala azo.