Read Nzema 2 Sam 17 Bible Online

2 Sam 17 - Nzema bible

2 Sam 17

¹Yeangyɛ biala Ahetɔfɛle zele Abesalɛm kɛ, “Maa menye ɛlɔnema apenle ngoko bulu nee nwiɔ na ɛnɛ nɔe mengɔ Devidi anwo zo.

²Mebahɔfofo ɔ nwo zo wɔ mekɛ mɔɔ ɛnee yevɛ na ɔ rɛle ɛbɔ la. Ɔ nye zo bada ye kpole bie na menli mɔɔ li ɔ nzi la banriandi agua ɛbɔ nu.

³Mebahu belemgbunli ne angomekye na meava menli mɔɔ li ɔ nzi la kɔsɔɔti mearɛlɛ wɔ kɛ atɔfolɛ raalɛ mɔɔ ɛlɛba ɔ hu sua nu la. Sonla kokye ala a ɛkpondɛ kɛ ɔwu a, na menli mɔɔ ɛha la amuala ɔwɔ kɛ sia ba sua nu anzonudwolɛ nu.”

⁴Folɛdulɛ ɛhye yɛle Abesalɛm nee Yizilayɛ mgbanyima ne mɔ fɛ kpole.

⁵Akee Abesalɛm zele kɛ, “Bɛvɛlɛ Huhyae bɛmaa yɛdie ɔdaye noko.”

⁶Huhyae rale la Abesalɛm zele ye kɛ, “Ahetɔfɛle folɛ mɔɔ ɛdu yɛ la ɛne, na ɛnea a ɔle kpalɛ kɛ yɛkɛyɛ ye zɔhane ɔ? Saa ɔnle kpalɛ a ɛnee ɛdawɔ fa wɔ adwenle bɛla.”

⁷Huhyae zele Abesalɛm kɛ, “Adwenle ɛhye mɔɔ ɛnɛ Ahetɔfɛle ɛva ɛra la ɛnle kpalɛ.

⁸Ɛdawɔ ɛze ye wienyi kɛ ɛ ze nee ye ɛlɔnema ne le menli mɔɔ ze konle nye zo kpole kpalɛ a. Kɛkala, bɛ ahonle ɛfutu kɛ ezile mɔɔ bɛhye ɔ mra la. Fa ɛhye sie ahane. Ɛ ze le ɛlɔnenli mɔɔ bɛto ye sɛbe a, yɛɛ nɔɔzo ɔ nee ye ɛlɔnema ne ɛnrɛla ɛleka ko.

⁹Kɛkala bɔbɔ, kabezɛ ɔvea bolɛ bɔne bie anu anzɛɛ ɛleka gyɛne bie. Na saa menli mɔɔ dumua ahɔteta Devidi la di akɔhoatɔ a, menli mɔɔ bade la baze kɛ, ‘Bɛbɔ Abesalɛm ɛdoavolɛma abo zo bɔkɔɔ.’

¹⁰Saa ɔba ye zɛhae a menli bɔbɔ mɔɔ lɛ ahonle kɛ awenade la bazulo. Ɔluakɛ Yizilayɛma kɔsɔɔti ze kɛ ɛ ze le nrenya katakyie, yɛɛ zɔhane ala a ye ɛlɔnema mɔɔ ɔ nee bɛ lua la de a.

¹¹Me folɛdulɛ a le kɛ, maa bɛboɔboa Yizilayɛma kɔsɔɔti anloa, ɔvi Dan ɔhɔkpula Biyɛhyiba; bɛ somaa bayɛ kɛ ɛnweazo anwea la, na ɛdawɔ mumua ne nea bɛ nwo zo ɛ nee bɛ ɛhɔ konle ne.

¹²Ɛleka biala mɔɔ ɔvea la yɛbahɔvinde ɔ nwo zo, na yɛava konle yɛadoa ye yɛanlua ye kɛ nzule nua senle la; na ɔdaye o, ye ɛlɔnema o, kokye bɔbɔ ɛnrɛha.

¹³Saa ɔnriandi ɔkɔfea suakpole bie azo a, Yizilayɛma kɔsɔɔti bava samgbenle nyɛma akyekye suakpole zɔhane na yɛahwe ye yɛahɔdo bɔnza ne anu. Yɛnrɛgyakyi bolɛ ekyi ko bɔbɔ wɔ boka ne azo.”

¹⁴Abesalɛm nee Yizilayɛma kɔsɔɔti hanle kɛ, “Huhyae adwenle ne le kpalɛ tɛla Ahetɔfɛle folɛdulɛ ɛdeɛ ne.” Ɔluakɛ Ɛdɛnkɛma ɛhyehyɛ kɛ ɔsɛkye Ahetɔfɛle folɛdulɛ ɛdeɛ ne, amaa yeamaa munzule ado Abesalɛm.

¹⁵Akee Huhyae zele sɛlɛvolɛma, Zeedɔko nee Abayata kɛ, “Folɛ mɔɔ Ahetɔfɛle dule Abesalɛm nee Yizilayɛ mgbanyima la ɛne. Medame noko me ɛdeɛ mɔɔ mendule bɛ la ɛne.

¹⁶Yemɔti bɛha bɛ nwo, bɛzoa menli ndɛndɛ bɛmaa bɛhɔha bɛhile Devidi kɛ, ɛnɛ nɔe, ɔmmada azule ne anloa ɛleka mɔɔ bɛpɛ la wɔ fienemgbole ne anu. Na ɔbɔ mɔdenle ɔpɛ Dwɔdan ne ɔhɔ ɔ nzi moa, amaa bɛ sa anga belemgbunli ne nee ye ɛlɔnema ne na bɛahu bɛ.”

¹⁷Ɛnee Dwɔnatan nee Ahaemaze ɛlɛkendɛ nzubula Ɛnlɔgɛle ne anloa wɔ Gyɛlusalɛm kandiba. Sonvolɛ raalɛ bie a kɔka edwɛkɛ mɔɔ ɛlɛsi la kile bɛ a na bɛdabɛ bɛahɔha bɛahile Belemgbunli Devidi, ɔluakɛ ɔnle kɛ bɛnwu bɛ kɛ bɛhɔ suakpole ne azo.

¹⁸Kenle ko kakula nrenya bie nwunle bɛ. Ɔhɔhanle ɔhilele Abesalɛm, yemɔti bɛ mu nwiɔ bɛnriandile bɛhɔle nrenya bie mɔɔ wɔ Bahulem la sua nu. Ɔlɛ bula bie wɔ ye awuke ne anu na bɛdwule nuhua.

¹⁹Nrenya ne aye ne vale debie hedale bula ne azo na ɔrɛlɛle ma zolɛ. Yemɔti awie biala andwenle kɛ debie wɔ ɛkɛ.

²⁰Abesalɛm sonvolɛma ne rale raalɛ ne sua nu la, bɛbizale ye kɛ, “Ahaemaze nee Dwɔnatan wɔ nienwu?” Raalɛ ne buale bɛ kɛ, “Bɛpɛle azule ne bɛhɔle ɔ nzi lɔ.” Mɔɔ bɛkpondɛle bɛ toonwo na bɛannwu bɛ la bɛziale bɛhɔle Gyɛlusalɛm.

²¹Mɔɔ bɛziale bɛhɔle la, Ahaemaze nee Dwɔnatan vi bula ne anu vindele na bɛhɔbɔle Belemgbunli Devidi amaneɛ. Bɛzele ye kɛ, “Dwazo, ka ɛ nwo kɔpɛ azule ne ndɛndɛ, ɔluakɛ Ahetɔfɛle folɛ mɔɔ ɛdu menli ne la ɛne.”

²²Na Devidi nee ye ɛlɔnema ne kɔsɔɔti hɔpɛle Dwɔdan ne. Mɔɔ maanle nu katete la ɛnee bɛ muala bɛwie Dwɔdan ne pɛ.

²³Mɔɔ Ahetɔfɛle nwunle kɛ bɛanva ye folɛdulɛ ne la, ɔvole ye asoaso ne azo na ɔhɔle ɔdaye ye sua zo. Ɔtotole ninyɛne boɛ na ɔbɔle ɔ nwo akɔnvo. Bɛziele ye wɔ ɔ ze nla ne anu.

²⁴Akee Devidi rale Meehaneeyem. Abesalɛm nee Yizilayɛma kɔsɔɔti pɛle Dwɔdan ne.

²⁵(Abesalɛm ɛyɛ Ameesa ɛlɔnema ne anwo zo neavolɛ yeva yehakyi Dwowabe. Ameesa le Yehyemeeyɛlenli Gyitɛ ara nrenya; ɔ nli a le Neehahye ara raalɛ Abegeli mɔɔ ɔ diema raalɛ a le Dwowabe ɔ nli Zɛluaya la.)

²⁶Na Yizilayɛma nee Abesalɛm yɛle bɛ azokoɛleɛ wɔ Geleade azɛlɛ zo.

²⁷Mɔɔ Devidi dwule Meehaneeyem la, Neehahye ara Hyobae mɔɔ vi Relaba mɔɔ wɔ Amɔnoma maanle nu la, Abeɛle ara Meekɛ mɔɔ vi Lodɛbaa yɛɛ Bazeleeyae mɔɔ vi Wulogɛlem mɔɔ wɔ Geleade la rayiale ye adenle.

²⁸Bɛvale ɛkpa, ahyɛnze nee mbuakɛ, ma, esamo, ma ngyehye, aluba akpatala nee alubandenra (somgbotekɛ), wolɛ, kyiisi yɛɛ mboane bɛrɛlɛle Devidi nee ye ɛlɔnema ne kɛ bɛli, ɔluakɛ bɛnwunle kɛ ɛnee ɛhɔne ɛlɛku menli ne na bɛvɛ, yɛɛ nzuhɔne noko ɛhu bɛ toonwo wɔ fienemgbole ne anu.