Read Nzema 2 Sam 18 Bible Online

2 Sam 18 - Nzema bible

2 Sam 18

¹Akee Devidi boɔboale ye ɛlɔnema ne anloa. Ɔhyɛle bɛ nuhua ekpunli ekpunli apenle apenle nee ɛya ɛya na ɔmanle bɛ safohyenlema mɔɔ nea bɛ nwo zo a.

²Ɔvale ekpunli ko ɔwulale Dwowabe asa anu; ɔvale ekpunli ne mɔɔ tɔ zo nwiɔ la ɔwulale Dwowabe adiema nrenya Zɛluaya ara Abehyae asa anu yɛɛ ɔvale ekpunli ne mɔɔ tɔ zolɛ nsa la ɔwulale Gatenli Yetae asa anu. Akee belemgbunli ne zele menli ne kɛ, “Medame mumua ne me nee bɛ bahɔ.”

³Na menli ne zele ye kɛ, “Nana, ɛngɔ bie. Ɔluakɛ yɛmɛ, saa ɔkyele zolɛ na yɛnriandi bɔbɔ a, menli ɛnrɛdwenle yɛ nwo. Saa bɛbu yɛ nuhua nwiɔ na bɛku ko a, bɛnrɛdwenle yɛ nwo. Na wɔmɔ, ɛsonle bolɛ ɛtɛla yɛ nuhua apenle kɛyɛ bulu; yemɔti ɔle kpalɛ kɛ ɛkɛdɛnla suakpole ye azo na ɛkɛrɛlɛ yɛ moalɛ ala.”

⁴Belemgbunli ne zele kɛ, “Debie biala mɔɔ bɛdabɛ bɛdwenle nwo a ɔle kpalɛ la menwɔyɛ.” Akee belemgbunli ne gyinlanle suakpole ne anlenkɛ kpole ne foa ko wɔ mekɛ mɔɔ ye ɛlɔnema ne zile nu ekpunli ekpunli apenle apenle nee ɛya ɛya kɛ bɛkɔ la.

⁵Na ɔzele Dwowabe, Abehyae nee Yetae kɛ, “Bɛnlea me ti na bɛ nee kakula Abesalɛm ɛli ye bɛtɛɛ.” Na mɔɔ belemgbunli ne hanle wɔ Abesalɛm anwo hilele safohyenlema ne la, menli ne kɔsɔɔti dele.

⁶Devidi ɛlɔnema ne hɔtetale Yizilayɛma na bɛ nee bɛ honle wɔ Yifelaem kpɔkɛ ne anu.

⁷Na Devidi asa azo ne mɔ lile Yizilayɛma anwo zo konim; bɛhunle bɛ nuhua dɔɔnwo kpalɛ mɔɔ kɛdwu apenle ngoko abulanwiɔ la kenle ko ne.

⁸Konle ne dɛlɛle kpɔkɛ ne anu ɛleka biala, na menli dɔɔnwo wule kpɔkɛ ne anu dɛlale menli mɔɔ dɔle dadeɛ nloa la.

⁹Arɛlevilɛ nu ala, Abesalɛm hɔkponzale Devidi ɛlɔnema ne bie mɔ. Ɛnee ɔde ɛkpɔnwɔndua zo, na ɛkpɔnwɔndua ne nriandile hɔvale baka kpole bie mɔɔ bɛfɛlɛ ye oku la abo, na Abesalɛm akɔme hɔtosale baka ne ngane ne bie takola avinli manle ɔzinzele anwomanyunlu, na ɛkpɔnwɔndua ne wɔlɔle ɔ nwo hɔle.

¹⁰Nrenya bie nwunle ye na ɔrabɔle Dwowabe amaneɛ kɛ, “Yɛmenle, menwunle kɛ Abesalɛm zinze oku baka bie azo.”

¹¹Dwowabe zele nrenya ne kɛ, “Duzɔne! Ɛdawɔ ɛnwunle ye ɛ nye zo? Duzu ati a wɔangu ye ɛkɛ ne ala ɛ? Anrɛɛ menwɔva fɛlɛkolilɛ ngome menwɔmaa wɔ dwɛtɛ fufule ngoko bulu nee akyeso.”

¹²Na nrenya ne buale Dwowabe kɛ, “Saa bɛmaa me dwɛtɛ fufule ngoko apenle bɔbɔ a, menrɛdende me sa wɔ belemgbunli ne ara ne anwo, ɔluakɛ yɛ muala yɛdele ye yɛ nzo nu kɛ belemgbunli ɛlɛka ahile ɛdawɔ, Abehyae nee Yetae kɛ, ‘Bɛnlea me ti na bɛnwu kakula Abesalɛm anwunvɔne.’

¹³Saa meandie belemgbunli ne aneɛ yɛɛ mengunle ye a anrɛɛ kɛ ɔkɛyɛ biala la ɔbade, na ɛnrɛpepɛ ɛnrɛlie me noko.”

¹⁴Dwowabe zele kɛ, “Menlɛ ɛ nwo alagye.” Ɔvale atwɛ nsa ɔhɔwowɔle Abesalɛm akɛnra azo wɔ mekɛ mɔɔ ɛnee ɔ nye gyi zo na ɔtɛsinze oku baka ne azo la.

¹⁵Na mgbavolɛ bulu mɔɔ soa Dwowabe konle ninyɛne ne mɔ la bɔle yiale Abesalɛm na bɛbobɔle ye bɛhunle ye.

¹⁶Akee Dwowabe wule aweɛne nu manle ɛlɔnema ne mɔ gyakyile Yizilayɛma ne mɔ ɛvoanlɛ na bɛziale bɛrale.

¹⁷Bɛyele Abesalɛm funli ne na bɛvuandinle ye bɛdole kuma kpole bie anu wɔ kpɔkɛ ne anu. Bɛhuohuanle awolɛ edukue kpole bie ɔ nwo zo. Na Yizilayɛma kɔsɔɔti guale ɛbɔ nu. Ko biala hɔle ɔdaye ye sua zo.

¹⁸Mekɛ mɔɔ Abesalɛm de aze la, ɔkpɔnlanle mpila wɔ Belemgbunli Bɔnza ɔvale ɔyɛle ɔdaye ye ngakyelɛ deɛ. Ye edwɛkɛ a le kɛ, “Meanwo ralɛ nrenya na bɛava bɛahakye me.” Yemɔti ɔvale mpila ne ɔdonle ɔ nwo, na ɛnɛ nee ɛnɛ ala, bɛtɛfɛlɛ ye Abesalɛm Ngakyedeɛ (Ngakyelɛ Mpila).

¹⁹Akee Zeedɔko ara Ahaemaze zele kɛ, “Bɛmaa menriandi waa mengɔmbɔ belemgbunli amaneɛ kɛ Ɛdɛnkɛma ɛye ye ɛvi ye kpɔvolɛma asa anu.”

²⁰Dwowabe buale ye kɛ, “Kyɛkyɛ, ɛnva nrɛlaleɛ biala ɛngɔ ɛnɛ. Maa ɔyɛ na kenle fofolɛ, ɔboalekɛ ɛnɛ kenle ye, belemgbunli ara nrenya ɛwu.”

²¹Akee Dwowabe zele Sudanenli akɛlɛ ne kɛ, “Kɔ na kɔha mɔɔ wɔnwu ye la kile belemgbunli.” Sudanenli akɛlɛ ne bɔle ɔ ti aze na ɔdɔle adenle zo.

²²Eza Ahaemaze zele Dwowabe bieko kɛ, “Mɔɔ ɔba la ɛrɛla, medame noko mekpo Sudanenli ne.” Dwowabe bizale ye kɛ, “Me ra, duzu ati a ɛkulo kɛ ɛfɛ ɛvɛlɛ mgbane ɛhye a, ɔluakɛ ɛze ye wienyi kɛ ɛnrɛnyia amaneɛbɔlɛ ɛhye anwo nganvolɛ biala.”

²³Ahaemaze zile zolɛ kɛ, “Kɛ ɔkɛyɛ biala la, ɔwɔ kɛ mekɔ.” Dwowabe zele ye kɛ, “Ɛnee kɔ ɛ!” Na Ahaemaze hanle guale ye, ɔvale Dwɔdan Bɔnza ɔhɔzenle Sudanenli ne anwo.

²⁴Ɛnee Devidi de suakpole ne anuhɔlɛ nlenkɛ mgbole nwiɔ ne mɔɔ ko wɔ ɔ kunlu, ko wɔ ɔ nzi la avinli. Sinzavolɛ ne luale bane ne anwo vole hɔle anuhɔlɛ ne ati zo. Na mɔɔ ɔmanle ɔ nye zo la, ɔnwunle kɛ nrenya ko lɛ ɛnriandilɛ ɛlɛba.

²⁵Sinzavolɛ ne manle ɔ ne zo na ɔbɔle belemgbunli amaneɛ. Na belemgbunli ne zele kɛ, “Saa ɔdaye ɔ ngome ɛdeɛ a ɛnee ɔ nee amaneɛ fɛlɛko lua.” Na ɛnee ahenle lɛ ɛnriandilɛ kpalɛ a ɛlɛba a, na yebikye.

²⁶Sinzavolɛ ne eza kanlea la ɛnee sonla fofolɛ ɔdaye ɔlɛ ɛnriandilɛ ɔlɛba; ɔdendenle ɔ nloa anlenkɛ kpole ne anu na ɔzele kɛ, “Nana, sonla fofolɛ ɔdaye ɔlɛ ɛnriandilɛ ɔlɛba!” Belemgbunli ne zele kɛ, “Ɔdaye noko ɔ nee amaneɛ fɛlɛko lua.”

²⁷Sinzavolɛ ne zele kɛ, “Ahenle mɔɔ lumua la zɔho Zeedɔko ara Ahaemaze.” Na belemgbunli ne zele kɛ, “Ɔle sonlakpalɛ, yemɔti ɔ nee nrɛlaleɛ kpalɛ lua.”

²⁸Akee Ahaemaze deanle nuhua zele belemgbunli kɛ, “Debie biala ɛhɔ boɛ!” Ɔdule ɔdɔle belemgbunli agyakɛ anu na ɔzele kɛ, “Ayɛlɛyelɛ ɛha Ɛdɛnkɛma wɔ Nyamenle ne kɛ yeye wɔ kpɔvolɛma mɔɔ hakyile bɛ nzi zile wɔ la yemaa a.”

²⁹Belemgbunli ne bizale ye kɛ, “Kakula Abesalɛm anwo kɔlɔnwo ɔ?” Ahaemaze buale ye kɛ, “Mɔɔ Dwowabe zoanle me la, menwunle kɛ ɛnee ɛkɛ ne ɛyɛ begyebegye zɛhae, noko meangola meannwu deɛ holɛ ko ne.”

³⁰Belemgbunli ne zele kɛ, “Twe ɛ nwo kɔgyinla nehane.” Yemɔti ɔhɔgyinlanle ahane.

³¹Akee Sudanenli akɛlɛ ne ɔdaye ɔrale na ɔrahanle kɛ, “Melɛ amaneɛ fɛlɛko melɛbɛlɛ me awulae belemgbunli. Ɔluakɛ Ɛdɛnkɛma ɛlie wɔ ɛvi kpɔvolɛma mɔɔ honle tiale wɔ la asa anu ɛnɛ.”

³²Belemgbunli bizale Sudanenli ne kɛ, “Kakula Abesalɛm anwo kɔlɔnwo ɔ?” Sudanenli ne zele kɛ, “Nana, me kunlu a anrɛɛ wɔ kpɔvolɛma nee menli mɔɔ honle tiale wɔ kɛ bɛkpondɛ wɔ nee munzule la kɔsɔɔti aha agua kɛ kpavolɛ ɛhye la.”

³³Nyane hanle belemgbunli ne kpole kpalɛ. Ɔhɔle ekpumgbunli ne mɔɔ wɔ anuhɔlɛ kpole ne ati zo la anu na ɔhɔzunle. Mɔɔ ɔkɔ kɔsɔɔti la ɛnee ɔlɛsu kɛ, “O me ra Abesalɛm, me ra, me ra Abesalɛm! Ɛnee ɛmmaa mame menwu, o me ra, me ra Abesalɛm.”