Read Nzema 2 Sam 21 Bible Online

2 Sam 21 - Nzema bible

2 Sam 21

¹Belemgbunli Devidi mekɛ zo, ɛhɔne kpole bie rale toonwo ɛvolɛ nsa. Devidi bizale Ɛdɛnkɛma nwolɛ bie. Na Ɛdɛnkɛma zele ye kɛ, “Sɔɔlo nee ye abusua ne di fɔlɛ kɛ bɛha mogya bɛgua a, ɔboalekɛ bɛhunle Gebɛyɔnoma dɔɔnwo somaa.”

² (Yemɔti belemgbunli ne vɛlɛle Gebɛyɔnoma manle bɛrale. Gebɛyɔnoma ɛnle Yizilayɛma. Bɛle Amɔlema ekpunli ekyi bie mɔɔ ɛha a. Yizilayɛma bɔle bɛ ɛwɔkɛ kɛ bɛkɛzinza bɛ, noko Sɔɔlo bɔle mɔdenle biala kɛ ɔkɛbɔ bɛ bo zo bɔkɔɔ, amaa ɔ sa aha Yizilayɛma nee Dwudama.)

³Devidi bizale Gebɛyɔnoma kɛ, “Duzu a menyɛ memaa bɛ a? Ɛtane mɔɔ bɛva bɛyɛ bɛ la, duzu debie yɛɛ meyɛ a bɛ kunlu kɛdwo na bɛayileyila Ɛdɛnkɛma menli ne a?”

⁴Gebɛyɔnoma buale ye kɛ, “Tɛ dwɛtɛ fufule anzɛɛ ezukoa nvutuke edwɛkɛ a wɔ yɛ nee Sɔɔlo nee ye awuke nu amra avinli a, tɛ yɛmɛ yɛɛ ɔwɔ kɛ yɛku awie wɔ Yizilayɛ a.” Devidi zele kɛ, “Ɛnee duzu a bɛkulo kɛ meyɛ memaa bɛ a?”

⁵Bɛzele belemgbunli ne kɛ, “Sonla ne mɔɔ amkpondɛ yɛ nee ngoane na ɔhulole kɛ anrɛɛ ɛnee ɔkɛye yɛ ɔkɛvi Yizilayɛ maanle ye anu la,

⁶yemɔ yɛɛ bɛye ɔ bo zo amra mrenya ne mɔ anu nsuu bɛmaa yɛ bɛmaa yɛbɔ bɛ akɔnvo wɔ Ɛdɛnkɛma anyunlu wɔ Sɔɔlo mɔɔ Ɛdɛnkɛma ziele ye belemgbunli la sua zo Gebɛya a.” Belemgbunli ne buale kɛ, “Menwɔva menwɔmaa bɛ.”

⁷ Na kɛmɔ Devidi nee Sɔɔlo ara Dwɔnatan vale Ɛdɛnkɛma bɔle bɛ nwo ɛwɔkɛ la ati, Devidi gyakyile Dwɔnatan ara Mɛfebɔhyɛte, mɔɔ le Sɔɔlo anlɔnra ne,

⁸ na ɔvale Eyiya ara raalɛ Relezepa amra mrenya nwiɔ ne mɔɔ ɔ nee Sɔɔlo wole bɛ la, Amonae nee Mɛfebɔhyɛte; eza ɔvale Sɔɔlo ara raalɛ Melabe amra mrenya nnu ne, mɔɔ ɔ nee Bazeleeyae mɔɔ vi Mɛhola la ara nrenya Ɛdeleyɛle wole bɛ la

⁹ɔmanle Gebɛyɔnoma ne mɔ. Bɛbɔle bɛ akɔnvo wɔ boka ne azo wɔ Ɛdɛnkɛma anyunlu. Bɛ muala bɛwule kenle ko. Bɛbɔle ma ɛdelɛ bo ala la yɛɛ bɛhunle bɛ a.

¹⁰Na Eyiya ara raalɛ Relezepa vale ɛrele bɔle kpɔda wɔ bolɛ ne anwo, ɛleka mɔɔ avunli ne mɔ hendɛhenda la. Ɔdɛnlanle ɔ bo ɔzinzale avunli ne mɔ, ɔvi ɛbuhenle ne mɔlebɛbo toonwo ɔhɔdwule mekɛ mɔɔ ezule dɔle guale bɛ nwo zo la. Yeammaa nloma annyia adenle ambansuso avunli ne wɔ alehyenlɛ nu, yɛɛ nanemgbole noko annyia adenle anli bɛ nɔɔzo.

¹¹Mɔɔ Devidi dele mɔɔ Sɔɔlo mgbɔnla Relezepa ɛyɛ la,

¹² ɔhɔliele Sɔɔlo nee ɔ ra Dwɔnatan mbowule ne mɔ ɔvile Gyibɛsema ɛkɛ wɔ Geleade (Gyibɛsema wuale Sɔɔlo nee Dwɔnatan avunli ne mɔ wɔ Bɛte Hyan ɛleka kpatawienyi ne. Ɛkɛ ne a Filisitiama ne hunle bɛ wɔ boka Gelebowa azo la bɛrahendɛhendanle bɛ a.)

¹³Devidi vulale Sɔɔlo nee ɔ ra Dwɔnatan nee menli mɔɔ bɛhunle bɛ la mbowule ne mɔ.

¹⁴Bɛziele Sɔɔlo nee ɔ ra Dwɔnatan mbowule ne mɔ wɔ Sɔɔlo ɔ ze Kehye nla ne anu wɔ Zila, wɔ Bɛngyaman maanzinli nu. Akee bɛyɛle mɔɔ belemgbunli ne hanle hilele bɛ la amuala. Na Nyamenle diele maanlema ne nzɛlɛlɛ.

¹⁵Eza Filisitiama nee Yizilayɛma nyianle konle bieko. Na Devidi nee ye ɛlɔnema ne nee Filisitiama hɔhonle. Wɔ konle ne anu, mɔɔ ɛnee akee Devidi ɛvɛ kpole kpalɛ la,

¹⁶Filisitia menli kakanyinlima ne mɔ anu ko mɔɔ bɛfɛlɛ ye Yehyebaebinɔbo na ɔlɛ kɔbele atwɛ mɔɔ ye ɛnlomboɛ kɛyɛ kilo nsa nee foa ko, na ɔlɛ konle dadeɛ fofolɛ la yɛle kɛ ɔkahu Devidi.

¹⁷ Na Zɛluaya ara Abehyae raboale ye; ɔtetale Filisitianli kakanyinli ne na ɔhunle ye. Akee Devidi menli ne hanle ndane dole ɔ nwo kɛ, “Ɔvi ɛnɛ mɔɔ kɔ la, ɛngɔ konle bieko, anrɛɛ ɛkɛmaa Yizilayɛ kɛnlaneɛ ne kɛnlu.”

¹⁸ Ɛhye anzi eza Filisitiama nee Yizilayɛma nyianle konle bieko wɔ Gɔɔbo. Konle ne anu, Sebɛkae mɔɔ vi Huhya la hunle kakanyinlima ne mɔ ko mɔɔ bɛfɛlɛ ye Saafe la.

¹⁹Eza Filisitiama hanle konle bieko wɔ Gɔɔbo, na Gyeeyɛɛ[10] mɔɔ vi Bɛtelɛhɛm la ara Ɛleheenan hunle Golayate mɔɔ vi Gate la. Ye atwɛ baka ne kpole nee ye ɛnlomboɛ le kɛ ndanlɛnwolɛ melahyinli baka la.

²⁰Eza konle bieko zile Gate. Nrenya kakanyinli bie wɔ ɛkɛ. Ɔ sa nee ɔ gyakɛ mrɛlɛsɛka ne mɔ le nsia nsia; bɛ muala bɛle abulanwiɔ nee nna. Ɔle menli kakanyinlima ne mɔ abo zo amra ne mɔ bie.

²¹Ɔgolole Yizilayɛma anwo na Devidi adiema Hyemɛyae ara Dwɔnatan hunle ye.

²²Menli nna ɛhye mɔ le menli kakanyinlima mɔɔ vi Gate la abo zo amra ne mɔ bie, na Devidi nee ye ɛlɔnema ne hunle bɛ.