Read Nzema 2 Sam 24 Bible Online

2 Sam 24 - Nzema bible

2 Sam 24

¹ Eza Ɛdɛnkɛma vale Yizilayɛma anwo ɛya bieko, na ɔmanle Devidi ahonle futule bɛ nwo. Ɔzele ye kɛ, “Kɔ kɔdia Yizilayɛma nee Dwudama kɔsɔɔti.”

²Yemɔti belemgbunli ne zele Dwowabe nee safohyenlema ne mɔ, mɔɔ nee ye wɔ la kɛ, “Bɛhɔ Yizilayɛ mbusua ekpunli ekpunli ne mɔ anu, ɔvi Dan mɔɔ kɔkpula Biyɛ Hyiba la na bɛdia bɛ kɔsɔɔti bɛmaa menwu bɛ dodo.”

³Na Dwowabe zele belemgbunli ne kɛ, “Ɛdɛnkɛma wɔ Nyamenle ne ɛmaa menli ne ɛyɛ mɔnwo ɛya ɛmaa awulae me belemgbunli ɛnwu ye ɔ nye zo. Na duzu ati bɔbɔ yɛɛ Nana kulo kɛ ɔyɛ ɛhye a?”

⁴Noko belemgbunli ne manle bɛlile ye edwɛkɛ ɛdeɛ ne azo. Yemɔti Dwowabe nee ye safohyenlema ne vile belemgbunli ne anyunlu na bɛhɔle menli ne ɛdianlɛ.

⁵Bɛpɛle Dwɔdan ne na bɛyɛle bɛ azokoɛleɛ wɔ Alowɛ. Bɛbɔle ɔ bo wɔ suakpole ne mɔɔ wɔ bɔnza ne avinli la azo na bɛhɔle Gate nee Gyeezɛ.

⁶Akee bɛhɔle Geleade nee Keedɛhye mɔɔ wɔ Hɛtema maanle nu la, na bɛrale Dan; bɛvi Dan la, bɛhɔle Saedɛn adɔleɛ.

⁷Akee bɛhɔle nyiakɛ wɔ suakpole Taya mɔɔ bɛbɔ nwolɛ bane la azo nee Haevae nee Keenama azuamgbole ne mɔ azo. Nzinlii bɛhɔle Biyɛhyiba mɔɔ wɔ Dwuda nyiakɛ afoa nu la.

⁸Siane ngɔnla kenle abulanwiɔ yɛɛ bɛwiele menli ne tia a; bɛhɔle maanle ne anu azua ne mɔ kɔsɔɔti azo na bɛziale bɛrale Gyɛlusalɛm.

⁹Na Dwowabe vale menli ne dodo hɔmanle belemgbunli ne. Bɛdianle menli apenle ngoko ɛya mɔtwɛ mɔɔ kola ko la wɔ Yizilayɛ, yɛɛ Dwudama le apenle ngoko ɛya nnu.

¹⁰Mɔɔ Devidi wiele menli ne tia la ye adwenle bule ye fɔlɛ. Na ɔhanle kɛ, “Ɛdɛnkɛma, meyɛ ɛtane kpole wɔ mɔɔ meyɛ la anwo. Mesɛlɛ wɔ, fa wɔ sonvolɛ, me ɛtane kyɛ me, ɔluakɛ meli ngoaseasɛm.”

¹¹Nwonlomɔ ne mɔɔ Devidi dwazole la, Ɛdɛnkɛma edwɛkɛ ne dwule Nyamenle kpɔmanvolɛ Gaade mɔɔ yemɔ a ɔka Nyamenle nrɛlaleɛ ɔkile Devidi la anwo zo na ɔzele ye kɛ,

¹²“Kɔha kile Devidi kɛ, Ɛdɛnkɛma se: Memaa wɔ ninyɛne nsa; nea nuhua ye ko maa menyɛ memaa wɔ.”

¹³Yemɔti Gaade rale Devidi ɛkɛ rahanle mɔɔ Ɛdɛnkɛma hanle la hilele ye, na ɔbizale Devidi kɛ, “Boni a ɛkulo a? Ɛvolɛ nsa[12] ɛhɔnezilɛ wɔ wɔ maanle ye anu, siane nsa ɛnriandilɛ mɔɔ ɛnriandi wɔ kpɔvolɛma anyunlu anzɛɛ kenle nsa ewule nzane wɔ wɔ maanle ye anu? Dwenle nwolɛ na maa me nwolɛ mualɛ maa menva mengɔmaa Ɛdɛnkɛma.”

¹⁴Na Devidi zele Gaade kɛ, “Mewɔ anwongyelelɛ nu! Noko akee kɛ dasanli kɛdua me kakɛ la, maa Ɛdɛnkɛma mumua ne ɛdua me kakɛ, ɔluakɛ yemɔ, ye anwunvɔnezelɛ le kpole.”

¹⁵Yemɔti Ɛdɛnkɛma manle ewule nzane dɔle Yizilayɛma anwo, ɔvi nwonlomɔ ne toonwo ɔhɔkpulale kenle ne mɔɔ ɔdaye Ɛdɛnkɛma ɔhilele la. Na ɔvi Dan mɔɔ kɔkpula Biyɛhyiba la, menli apenle ngoko abulasuu wule.

¹⁶Na mɔɔ Nyamenle soanvolɛ ne dendenle ɔ sa kɛ ɔbɔ Gyɛlusalɛm la, Ɛdɛnkɛma hakyile ye adwenle wɔ suakpole ne ɛzɛkyelɛ nwo na ɔzele Nyamenle soanvolɛ ne kɛ, “Gyakyi! Ɛhye ala le kpalɛ!” Ɛnee Nyamenle soanvolɛ ne wɔ Gyibɛsenli Alɔna ma ɛwozolɛ ɛleka ne.

¹⁷Mɔɔ Devidi nwunle Nyamenle soanvolɛ ne mɔɔ ɛlɛkuhu menli ne mɔ la, ɔzɛlɛle Ɛdɛnkɛma kɛ, “Mame, meze kɛ meyɛ ɛtane na mebɔ munzule, na mboane ɛhye mɔ, duzu a bɛyɛ a? Mesɛlɛ wɔ, maa wɔ ndeanlɛ ne ɛyɛ me ngome nee egya awuke nu amra ɛdeɛ.”

¹⁸Gaade rale Devidi ɛkɛ ne kenle ko ne razele ye kɛ, “Kɔ Gyibɛsenli Alɔna ma ɛwozolɛ ɛleka ne kɔzi azukponle maa Ɛdɛnkɛma.”

¹⁹Yemɔti Devidi lile Gaade edwɛkɛ ne azo, kɛmɔ Ɛdɛnkɛma hanle ala la.

²⁰Alɔna manle ɔ nye zo la, ɔnwunle kɛ belemgbunli nee ye mgbanyima ne mɔ ɛlɛba ɔ nwo ɛkɛ. Ɔhɔyiale bɛ na ɔdule ɔdɔle belemgbunli ne agyakɛ anu, ɔbutule ɔ nyunlu aze na ɔbizale ye ahye.

²¹Na Alɔna bizale kɛ, “Duzu ati a Nana ɛra ye sonvolɛ ye ɛke a?” Devidi buale ye kɛ, “Mera kɛ mebadɔ wɔ ma ɛwozolɛ ɛleka ye, meazi azukponle wɔ ɛke meamaa Ɛdɛnkɛma, amaa ewule nzane ye azi aze.”

²²Na Alɔna zele Devidi kɛ, “Nana, fa azɛlɛ ne na eza fa debie biala mɔɔ ɛdawɔ ɛkulo la bɔ azu ne maa Ɛdɛnkɛma. Nlankɛ ne mɔ mɔɔ ɛfa wɔayɛ azubɔdeɛ wɔabɔ azu ne la ɛne, nyɛmoa ne mɔ akɔme mbaka ne mɔ nee ndaboa ne mɔ mɔɔ bɛfa bɛwozo ma ne la ɛne. Fa bɛ muala yɛ ɛyɛne.”

²³Alɔna vale ɛhye mɔ kɔsɔɔti manle belemgbunli ne na ɔvale ɔzɔle zolɛ kɛ, “Ɛdɛnkɛma wɔ Nyamenle ne ɛlie wɔ azu ne.”

²⁴Na belemgbunli ne zele Alɔna kɛ, “Kyɛkyɛ, metua ɛhye mɔ kɔsɔɔti kakɛ, ɔboalekɛ nane ɛyelalɛ azu mɔɔ mebɔ meamaa Ɛdɛnkɛma, me Nyamenle, mɔɔ membɔ nwolɛ kakɛ la, menrɛbɔ.” Yemɔti Devidi dɔle ma ɛwozolɛ ɛleka ne nee nlankɛ ne mɔ dwɛtɛ fufule ngoko abulanlu.

²⁵Akee ɔzile azukponle ne ɔmanle Ɛdɛnkɛma na ɔbɔle nane ɛyelalɛ nee anzonudwolɛ azu. Ɛdɛnkɛma diele ye nzɛlɛlɛ ne na ewule nzane ne gyakyile Yizilayɛma.