Read Nzema 2 Sam 3 Bible Online

2 Sam 3 - Nzema bible

2 Sam 3

¹Sɔɔlo abusua ne ɛlɔnema nee Devidi ɛlɔnema ne honle hyɛle kpalɛ. Na Devidi tumi ne yɛle kpole na Sɔɔlo abusua ne ɛlɔnema anwo hanle aze.

² Devidi wole mralɛ mrenya nsia wɔ Hibulɔn. Bɛmɛ a le: Amenɔn, ɔ nli a le Ahenoam mɔɔ vi Gyɛzɛli la;

³Keleabe, ɔ nli a le Abegeli mɔɔ Neebale mɔɔ ɛha ɛleka bie la gyale ye la; ɔvi Kamɛle. Abesalɛm, ɔ nli a le Meeyaka, Belemgbunli Talemae mɔɔ vi Gɛhyɔ la ara raalɛ ɔ;

⁴Adonaegya, ɔ nli a le Hagete; Hyɛfataya, ɔ nli a le Abaetale;

⁵yɛɛ Yetelɛyam, ɔ nli a le Ɛgela. Devidi wole mralɛ mrenya ɛhye mɔ wɔ Hibulɔn.

⁶Mɔɔ Devidi ɛlɔnema ne nee Sɔɔlo ɛlɔnema ne konle ne anu yɛle se la, Abenɛɛ tumi ne akee yɛle kpole kpalɛ wɔ Sɔɔlo abo zo amra ne avinli.

⁷Ɛnee Sɔɔlo lɛ ye mgbɔnla bie, bɛfɛlɛ ye Relezepa; ɔ ze a le Eyiya. Kenle ko Sɔɔlo ara Yehyebɔhyɛte vale zile Abenɛɛ anyunlu kɛ, “Duzu ati a wɔva ɛ sa wɔha egya mgbɔnla ne a?”

⁸Edwɛkɛ ɛhye manle Abenɛɛ vale ɛya kpole manle ɔhanle kɛ, “Ɛdwenle kɛ mehakyi me nzi mezi Sɔɔlo ɔ? Anzɛɛ ɛdwenle kɛ melɛsonle Dwuda? Ɔvi mɔlebɛbo ne, meli nɔhalɛ memaa ɛ ze Sɔɔlo, ɔ mediema nee ɔ gɔnwo mɔ; melie wɔ mevi Devidi asa anu, meammaa yeanli ɛ nwo zo konim; ɛnɛ ɛlɛto me ɛzonle wɔagua me nyunlu aze wɔ raalɛ duma nu.

⁹ Ɛdɛnkɛma bɔle Devidi ɛwɔkɛ kɛ ɔbalie belemgbunli maanle ne yeavi Sɔɔlo nee ɔ bo zo amra asa anu, na yeazie Devidi Yizilayɛ nee Dwuda belemgbunli, ɔvi maanle ne ati mɔɔ kɔdwu ɔ bo la. Saa meannea meammaa ɛwɔkɛ ɛhye anyɛ zɔhane a Nyamenle ɛhu me.”

¹¹Yehyebɔhyɛte zulole Abenɛɛ, yemɔti yeangola edwɛkɛ kpɔkɛ ko bɔbɔ ka.

¹²Abenɛɛ zoanle menli wɔ Devidi anwo wɔ Hibulɔn manle bɛhɔzele ye kɛ, “Azɛlɛ ne, nwane ɛdeɛ ɔ? Maa yɛyɛ ngyehyɛlɛ na menwɔboa wɔ menwɔmaa ɛkɛlie Yizilayɛ maanle ne kɔsɔɔti.”

¹³Devidi zele ye kɛ, “Mede; meyɛ wɔ mo. Memaa wɔ mɛla ko ɛhye. Saa ɛkola zolɛ di a me nee wɔ kɛyɛ ngyehyɛlɛ ne. Mɛla ne a le kɛ, mmamaa menwu ɛ nyunlu, mɔɔ mekanwu ɛ nyunlu la ɛnee ɛ nee me ye Maekale, Sɔɔlo ara raalɛ ne, ɛra.”

¹⁴ Akee Devidi zoanle menli wɔ Sɔɔlo ara Yehyebɔhyɛte ɛkɛ ne manle bɛhɔzele ye kɛ, “Maa me sa ɛha me ye Maekale mɔɔ menvale Filisitia mrenya ɛya ko atoa ati nwoma menzule ɔ ti asoa la ndɛndɛ.”

¹⁵Yehyebɔhyɛte zoanle manle bɛhɔzale Paleteɛle mɔɔ ɛnee gya Maekale la bɛliele ɔ ye ne bɛvile ɔ sa nu. Paleteɛle ɔ ze a le Leyihye.

¹⁶Na mɔɔ bɛ nee Maekale kɔ la, ɔ hu vale ɛzunlɛ doale ye toonwo ɔhɔdwule Bahulem. Na Abenɛɛ zele ye kɛ, “Sia ɛ nzi!” Na Paleteɛle ziale.

¹⁷Akee Abenɛɛ nee Yizilayɛ mgbanyima hanle bɛ ti kpulale nwolɛ zele kɛ, “Mekɛ tendenle mɔɔ ɛraze ɛhɔ la, ɛnee bɛlɛkpondɛ Devidi bɛamaa yeali bɛ belemgbunli.

¹⁸Kɛkala, mekɛ ne akee ɛdwu, ɔluakɛ Ɛdɛnkɛma ɛbɔ Devidi ɛwɔkɛ kɛ, ‘Mebalua me sonvolɛ Devidi anwo zo mealie me menli Yizilayɛma meavi Filisitiama nee bɛ kpɔvolɛma mɔɔ ɛha la asa anu.’ ”

¹⁹Abenɛɛ eza dendɛle hilele Bɛngyaman abusua ekpunli ne anu amra. Akee ɔtelele zolɛ ɔhɔle Hibulɔn kɛ ɔkaha debie mɔɔ Yizilayɛma nee Bɛngyaman abusua ekpunli ne ɛlie ɛdo nu kɛ bɛyɛ la yeahile Devidi.

²⁰Abenɛɛ nee mgbanyima abulanwiɔ ne dwule Hibulɔn la Devidi dole bɛ ɛkponle kpole bie.

²¹Abenɛɛ zele Devidi kɛ, “Nana, mekɔ meahɔboɔboa Yizilayɛma kɔsɔɔti anloa meamaa wɔ. Bɛ muala bɛ nee wɔ bayɛ ngyehyɛlɛ na bɛalie bɛado nu kɛ ɛle bɛ belemgbunli na wɔazie maanle ne kɔsɔɔti kɛmɔ ɛkpondɛ la.” Yemɔti Devidi manle Abenɛɛ adenle manle ɔhɔle anzonudwolɛ nu.

²²Nzinlii Dwowabe nee Devidi mgbanyima ne bie mɔ vi ɛleka mɔɔ bɛhɔtetale menli bɛwuale bɛ ninyɛne la rale. Bɛ nee anwonyia dɔɔnwo rale. Ɛnee Abenɛɛ ɛnle Devidi anwo ɛkɛ wɔ Hibulɔn, ɔboalekɛ Devidi ɛgua ye adenle ɛmaa yehɔ na yebɔ ye ɛwɔkɛ kɛ bɛbabɔ ɔ nwo bane.

²³Dwowabe nee ye ɛlɔnema ne rale la, bɛdele kɛ Abenɛɛ rale belemgbunli ɛkɛ na yezia yehɔ anzonudwolɛ nu.

²⁴Dwowabe hɔle belemgbunli ɛkɛ ne hɔbizale ye kɛ, “Nana, na duzu debie a wɔyɛ la? Abenɛɛ rale ɛ nwo ɛke; duzu ati a wɔmaa yehɔ anzonudwolɛ nu a?

²⁵Ɛze kɛ Abenɛɛ rabɛlɛbɛlale wɔ, dole wɔ agyiba, amaa yeanwu wɔ ɛhɔlɛ nee wɔ ɛralɛ nu na yeanwu adenle biala mɔɔ ɛfa nuhua la.”

²⁶Mɔɔ Dwowabe vi Devidi anwo ɛkɛ ne vindele la, ɔzoanle ɔmanle bɛkpole Abenɛɛ, bɛhɔhyele ye wɔ Saela bula ne azo bɛ nee ye rale; noko Devidi ande nwolɛ bie fee.

²⁷Bɛ nee Abenɛɛ rale Hibulɔn la, Dwowabe vale ye vindele anlenkɛ kpole ne anzi lɔ kɛ asɛɛ ɔka edwɛkɛ yeahile ye, na ɔwɔle ye dadeɛ ɔ kunlu ɔhunle ye. Bɛhunle Abenɛɛ, ɔboalekɛ yehu Dwowabe adiema Asahɛle.

²⁸Nzinlii mɔɔ Devidi dele la, ɔhanle kɛ, “Medame nee me belemgbunli maanle ye ɛnli fɔlɛ wɔ Ɛdɛnkɛma anyunlu wɔ Abenɛɛ mogya nwo.

²⁹Ye mogya ne ɛgua Dwowabe nee ɔ ze awuke nu amra kɔsɔɔti ati zo. Wɔ awolɛndoazo biala anu, ye busuanli bie ɛva raalɛ nwo ewule, anzɛɛ kokobɛ[3] ɛdila ye. Kyesɛ mraalɛ gyima ala na yeahola ye yɛ anzɛɛ bɛhu ye bie wɔ konle nu anzɛɛ ɔ nloa anu aleɛ ɛbɔ ye.”

³⁰Yemɔti Dwowabe nee ɔ diema Abehyae zenrale Abenɛɛ kɛ ɔhunle bɛ diema Asahɛle wɔ Gebɛyɔn konle ne anu la.

³¹Akee Devidi zele Dwowabe nee menli mɔɔ nee ye lua la kɛ, “Bɛsuosua bɛ adɛladeɛ ne mɔ anu. Bɛheda ɛrele na bɛzu Abenɛɛ.” Belemgbunli ɔdaye mumua ne ɔlile funli ɛlɛka ehwili ne anzi.

³²Bɛziele Abenɛɛ wɔ Hibulɔn; belemgbunli dukuele nu zunle wɔ azie ne azo na zɔhane ala yɛɛ menli mɔɔ hale la zunle a.

³³Devidi zunle Abenɛɛ yele awolɛ zele kɛ, “Abenɛɛ, anzɛɛ ɔwɔ kɛ ɛwu kɛ koasea la ɔ?

³⁴Bɛankyekye ɛ sa, bɛangua ɛ gyakɛ nwɔnzɔnwɔnzɔ; Kɛmɔ sonla si wu maamɔvoma asa anu la, zɔhane ala yɛɛ wɔwu a.” Na menli ne kɔsɔɔti eza zunle Abenɛɛ bieko.

³⁵Alehyenlɛ ne anu, menli ne bodole Devidi kɛ ɔli debie, na ɔzele kɛ, “Nyamenle ɛdua me kakɛ ɛgua me bie zo kɛ menwɔli debie kolaa na sɛnzɛne adɔ a.”

³⁶Kɛmɔ debie biala mɔɔ belemgbunli yɛle la yɛle bɛ anyelielɛ la, menli ne kɔsɔɔti nwunle nyɛleɛ ɛhye na bɛ nye liele nwolɛ.

³⁷Yemɔti Devidi menli ne amuala nee Yizilayɛma kɔsɔɔti nwunle ye kenle ko ne kɛ belemgbunli ne ɛnlɛ adwenle ɛtane biala kɛ ɔku Abenɛɛ.

³⁸Belemgbunli zele ye mgbanyima ne kɛ, “Bɛnze kɛ belemgbunli ra nee sonlakpole ɛwu Yizilayɛ maanle ye anu ɛnɛ kenle ye ɔ?

³⁹Ɛdɛnkɛma ɛyila me ɛzie me belemgbunli, noko ɛnɛ kenle ye, me sa ɛhondo aze. Zɛluaya amra mrenya ne mɔ te me ɛbolɛ somaa. Ɛdɛnkɛma ɛdua ɛtanevolɛma kakɛ mɔɔ ɔfɛta bɛ amumuyɛ ne mɔ la.”