Read Nzema 2 Sam 4 Bible Online

2 Sam 4 - Nzema bible

2 Sam 4

¹Mɔɔ Yehyebɔhyɛte dele kɛ bɛhu Abenɛɛ wɔ Hibulɔn la, ɔ nwo bubule ye, Yizilayɛma kɔsɔɔti zulole.

²Yehyebɔhyɛte lɛ menli nwiɔ mɔɔ nea nwule ekpunli ekpunli ne mɔ anwo zo a. Bɛfɛlɛ ko Beeyana yɛɛ bɛfɛlɛ ko ne Rilikabe. Bɛ ze a le Relemɔn mɔɔ vi Biyɛlo la yɛɛ ɔvi Bɛngyaman abusua ekpunli ne anu. (Bɛtia Biyɛlo bɛboka Bɛngyaman maanle ne anwo.

³Biyɛlo amra nriandile hɔle Geteeyem, na ɛkɛ ne a bɛdɛnla toonwo yeradwu ɛnɛ a.)

⁴ Sɔɔlo ara Dwɔnatan ɛnee lɛ ɔ ra nrenya mɔɔ agyakɛ ɛbubu a. Bɛfɛlɛ ye Mɛfebɔhyɛte. Ɔlile ɛvolɛ nnu la yɛɛ nrɛlaleɛ vi Gyɛzɛli rale kɛ bɛhu Sɔɔlo nee Dwɔnatan a; ye adanedivolɛ ne vale ye nriandile. Ɛnriandilɛ ne anu, kɛmɔ adanedivolɛ ne kpondɛ ye ndɛndɛ la ati, kakula ne dɔle aze na ɔyɛle abubura.

⁵Relemɔn amra mrenya ne mɔ, Rilikabe nee Beeyana, zile nu ewia henlema hɔle Yehyebɔhyɛte sua nu. Bɛhɔdwule la ɛnee yela ɔlɛdie ye ɛnwomenle.

⁶Ɛnee anlenkɛ sinzavolɛ raalɛ ne ɛlɛkpa ma nu na ɔdaye noko ɔ nye wuanenle ye manle ɔvale nu ɔlafele. Rilikabe nee ɔ diema Beeyana yɛle nyaa wolole suakunlu ɛkɛ ne.[4]

⁷Mɔɔ bɛwolole la bɛnwunle kɛ Yehyebɔhyɛte ɛlafe, bɛhunle ye, na bɛpɛle ɔ ti. Bɛvale ɔ ti ne bɛluale Dwɔdan Bɔnza, nɔe ne bɛdiale toonwo

⁸bɛvale bɛrɛlɛle Devidi wɔ Hibulɔn. Bɛzele belemgbunli ne kɛ, “Sɔɔlo, wɔ kpɔvolɛ ne mɔɔ ɛnee ɛlɛkpondɛ wɔ ahu wɔ la ara Yehyebɔhyɛte ati ne ɛne. Nana, Ɛdɛnkɛma ɛzenra Sɔɔlo nee ɔ bo zo amra ɛdua bɛ kakɛ ɛnɛ demua ye ɛmaa wɔ.”

⁹Devidi buale Rilikabe nee ɔ diema Beeyana kɛ, “Meka tease Nyamenle ne mɔɔ ɛlie me ɛvi munzule kɔsɔɔti anu la!

¹⁰ Ɛbɔfoɔ ne mɔɔ rahanle hilele me wɔ Zekelage kɛ Sɔɔlo ɛwu la dwenlenle kɛ ɔlɛ amaneɛ fɛlɛko ɔlɛbɛlɛ me. Memanle bɛhyele ye bɛhunle ye. Ɛhye a le kakɛ mɔɔ menvale menduale ye wɔ ye amaneɛ fɛlɛko ne anwo a.

¹¹Duzu ati yɛɛ amumuyɛma mɔɔ kɛhu tenlenenli wɔ ɔdaye ye sua nu, wɔ nafelɛ nu la, bɛnrɛdua bɛ kakɛ molozo ɛ? Mebalie ye mogya meavi bɛ lɔ na meaye bɛ zo meavi aleɛabo.”

¹²Devidi manle ye mgbavolɛ ne mɔ hunle bɛ. Bɛpepɛle bɛ sa nee bɛ gyakɛ na bɛhendɛhendanle bɛ wɔ mbaka zo wɔ Hibulɔn nzubula ne anwo. Akee bɛvale Yehyebɔhyɛte ati ne na bɛziele ye wɔ Abenɛɛ nla ne anu wɔ Hibulɔn.