Read Nzema 2 Sam 7 Bible Online

2 Sam 7 - Nzema bible

2 Sam 7

¹ Akee Devidi bɔle ɔ nwo atɛnlase. Ɛdɛnkɛma bɔle ɔ nwo bane wɔ ye kpɔvolɛma mɔɔ ɛbɔ ɛyia ye la asa anu.

²Na belemgbunli ne akee zele Nyamenle kpɔmanvolɛ Neetan kɛ, “Mame mede mbaka sua nu na Nyamenle Ngyekyeleɛ Ɛlɛka ne gyi ndanlɛ sua nu.”

³Na Neetan zele belemgbunli ne kɛ, “Kɔ na kɔyɛ debie biala mɔɔ wɔ wɔ ahonle nu la, ɔluakɛ Ɛdɛnkɛma nee wɔ lua.”

⁴Na kenle ko ne nɔe ne, Ɛdɛnkɛma zele Neetan kɛ,

⁵“Kɔ kɔze me sonvolɛ Devidi kɛ, ‘Kɛ medame Ɛdɛnkɛma mese la ɛne: Wɔmɔ yɛɛ ɛsi sua wɔamaa meadɛnla nu ɔ?

⁶Sumunli kɛ menyele Yizilayɛma menvile Yigyibiti azɛlɛ zo mɔɔ yeradwu ɛnɛ la, metɛtɛnlanle sua nu ɛlɛ. Meli tutɛnla wɔ ndanlɛ azua nu.

⁷Ɛleka kɔsɔɔti mɔɔ me nee Yizilayɛma ɛhɔ la, meanga edwɛkɛ kpɔkɛ ko bɔbɔ meangile Yizilayɛ mgbanyima mɔɔ menyele bɛ kɛ bɛli Yizilayɛma ati la kɛ, duzu ati a bɛtɛfale sida mbaka bɛtɛsile sua bɛtɛmanle me ɛ?’

⁸“Yemɔti ka kile me sonvolɛ Devidi kɛ, medame Tumivolɛ Ɛdɛnkɛma mese, ‘Menyele wɔ menvile mboane ɛnleanlɛ zo wɔ fiene ne anu kɛ ɛrali me menli Yizilayɛma belemgbunli;

⁹yɛɛ adenle biala anu me nee wɔ ɛlua. Meli wɔ kpɔvolɛma kɔsɔɔti anwo zo konim memaa wɔ; mebamaa wɔalie duma kpole, kɛmɔ mgbolema mɔɔ wɔ aleɛabo la lɛ ye la.

¹⁰Mekpondɛ ɛleka memaa me menli Yizilayɛma na mebɔ bɛ atɛnlase. Gyegyeravolɛma ɛnrɛgyegye bɛ bieko, maamɔvoma ɛnrɛnwunlonwunla bɛ bieko, kɛmɔ bɛyɛle ye dɛba ne la. Sumunli kɛ bɛradɛnlanle azɛlɛ ye azo la, maamɔvoma ɛgyegye bɛ toonwo, na ɛhye ɛnrɛzi bieko. Mebɔ bɛ ɛwɔkɛ kɛ mebapepɛ mealie bɛ wɔ bɛ kpɔvolɛma asa anu na meamaa bɛ bo zo adɛlɛ.

¹²Saa mekɛ dwu na ɛsia ɛkɔ wɔ ɛkɛla nzi, na bɛwula wɔ mrɛlatɛlɛ nu wɔ wɔ mgbanyinli avinli a, mebakpogya ɛ bo zo amra ne mɔ ko zo na meakyekye ye belemgbunli maanle ne kpundii meamaa ye.

¹³Yemɔ yɛɛ ɔbazi ɛzonlenlɛ sua yeamaa me a, na mebanlea kɛ ye belemgbunli maanle ne ɛgyinla kpundii dahuu.

¹⁴ Mebayɛ ɔ ze, na ɔdaye ɔbayɛ me ra. Saa ɔyɛ ɛtane a mebadea ye, kɛmɔ selɛ tea ɔ ra la.

¹⁵Menrɛye me nye ɔ nwo zo, kɛmɔ menyele menvile Sɔɔlo anwo zo la, menvale ye menziele ahane, amaa wɔali belemgbunli la.

¹⁶ Ɛ bo zo badɛlɛ amaa wɔ belemgbunli maanle ne ayɛ maandimase dahuu. Wɔ belemgbunlililɛ ne ɛnrɛbɔ aze ɛlɛ.’ ”

¹⁷Neetan hanle edwɛkɛ biala mɔɔ Nyamenle hanle hilele ye la hilele Devidi.

¹⁸Akee Belemgbunli Devidi hɔle Ndanlɛ Sua ne anu hɔdɛnlanle Ɛdɛnkɛma anyunlu na ɔzɛlɛle kɛ, “O Tumivolɛ Ɛdɛnkɛma, me nee me awuke nu amra, mɔɔ wɔyɛ wɔmaa yɛ la, yɛnfɛta.

¹⁹Noko ɛhye le ɛ nye zo debie ekyi bie; yɛɛ mɔɔ akee ɛlɛyɛ bɔbɔ la bo zolɛ. O Tumivolɛ Ɛdɛnkɛma, wɔbɔ me bo zo amra ɛwɔkɛ wɔ mekɛ tendenle mɔɔ bara la.

²⁰O Tumivolɛ Ɛdɛnkɛma, na duzu bieko bɔbɔ yɛɛ mame Devidi melɛ meka a? Ɔluakɛ ɛze wɔ sonvolɛ.

²¹O Tumivolɛ Ɛdɛnkɛma, ɔlua wɔ ɛwɔkɛ ne ati nee wɔ ahunlunyele kpole ne ati yɛɛ wɔyɛ nyɛleɛ kpole ɛhye wɔmaa wɔ sonvolɛ ɛnwu ye a.

²²O Ɛdɛnkɛma Nyamenle, ɛle kpole; nyamenle bieko ɛnle ɛkɛ mɔɔ le kɛ ɛdawɔ a, yɛɛ nyamenle bieko ɛnle ɛkɛ mɔɔ yɛdayɛ yɛde ye yɛ nzo nu kɛ ɛ ngome ala.

²³ Maanle biala ɛnle aleɛabo kɛ wɔ menli Yizilayɛma mɔɔ ɛkpɔnenle bɛ na ɛyɛle bɛ wɔ menli la. Ninyɛne mgbole nee nwanwane ninyɛne mɔɔ ɛyɛle ɛmanle bɛ la ɛmaa wɔ duma ɛkponde aleɛabo ɛleka biala. Mekɛ mɔɔ wɔ menli mɔɔ ɛyele bɛ ɛvile Yigyibiti la kɔ bɛ nyunlu la, ɛdule maanle maanle nee bɛ awozonle ne mɔ.

²⁴Wɔyɛ Yizilayɛma wɔ menli wɔ melɛ mɔɔ ɛnlɛ awieleɛ, na wɔmɔ Ɛdɛnkɛma wɔyɛ bɛ Nyamenle.

²⁵“Na kɛkala, O Ɛdɛnkɛma Nyamenle, kɛmɔ ɛdawɔ wɔha wɔ wɔ sonvolɛ ye nee ɔ bo zo amra anwo la, moa zolɛ na maa ɔyɛ zɔhane;

²⁶na bɛkɛbɔ wɔ duma bɛkɛze kɛ, ‘Tumivolɛ Ɛdɛnkɛma le Yizilayɛ Nyamenle’, na wɔ sonvolɛ Devidi belemgbunlililɛ ne ɛnrɛbɔ aze ɛlɛ wɔ ɛ nyunlu.

²⁷Tumivolɛ Ɛdɛnkɛma, Yizilayɛ Nyamenle, melɛ akɛnrazilɛ yɛɛ melɛyɛ nzɛlɛlɛ ɛhye a, ɔboalekɛ wɔye ɛhye mɔ kɔsɔɔti wɔhile wɔ sonvolɛ Devidi kɛ ɛbayɛ ɔ bo zo amra arelemgbunli.

²⁸“O Ɛdɛnkɛma Nyamenle, ɛle Nyamenle bɔkɔɔ; wɔ edwɛkɛ le nɔhalɛ, yɛɛ wɔbɔ wɔ sonvolɛ ye ɛwɔkɛ kpalɛ ɛhye.

²⁹Yemɔti mesɛlɛ wɔ kɛ yila me bo zo amra amaa dahuu ɛ nye ala bɛ nwo zo. Wɔmɔ Ɛdɛnkɛma Nyamenle yɛɛ wɔbɔ ɛwɔkɛ ɛhye a, yemɔti yila me bo zo amra wɔ melɛ mɔɔ ɛnlɛ awieleɛ.”