Read Nzema 1 Arl 11 Bible Online

1 Arl 11 - Nzema bible

1 Arl 11

¹ Sɔlɔmɔn anye liele nyɛvolɛ mraalɛ dɔɔnwo anwo. Ɔgyale Yigyibiti belemgbunli ne ara raalɛ ne, eza ɔgyale Mowabe, Amɔn, Yidɔm, Saedɛn nee Hɛte mraalɛ.

² Maanle ɛhye mɔ, Ɛdɛnkɛma hanle nwolɛ edwɛkɛ hilele Yizilayɛma kɛ, “Bɛmmagya bie, yɛɛ bɛmmamaa bɛdabɛ noko bɛgya Yizilayɛma bie, amaa bɛannyia adenle bɛandwe bɛ bɛangɔ bɛ awozonle ɛzonlenlɛ nu.” Noko bɛmɛ yɛɛ akee Sɔlɔmɔn hulole bɛ a.

³Ɔgyale arelemgbunli amra mraalɛ ngome ɛya nsuu yɛɛ ɔlɛ mgbɔnla ɛya nsa. Na ye mraalɛ ne mɔ hakyile ye adwenle.

⁴Sɔlɔmɔn yɛle kpanyinli bɔkɔɔ la ye mraalɛ ne mɔ hakyile ye adwenle manle ɔzonlenle maanle zo awozonle. Yeanli nɔhalɛ yeammaa Ɛdɛnkɛma ye Nyamenle ne, kɛmɔ ɔ ze Devidi yɛle la.

⁵Sɔlɔmɔn hakyile zonlenle Saedɛnema bozonle raalɛ ne mɔɔ bɛfɛlɛ ye Asetate la nee Amɔnoma bozonle anwo ɛzulolɛ ne mɔɔ bɛfɛlɛ ye Molɛke la.

⁶Sɔlɔmɔn yɛle ɛtane tiale Ɛdɛnkɛma; yeanli Ɛdɛnkɛma anzi nɔhalɛ nu, kɛmɔ ɔ ze Devidi yɛle la.

⁷Ɔzile Mowabe bozonle anwo ɛzulolɛ ne mɔɔ bɛfɛlɛ ye Kimɔhye la yɛɛ Amɔn bozonle anwo ɛzulolɛ ne mɔɔ bɛfɛlɛ ye Molɛke la mmonle azua wɔ boka ne mɔɔ wɔ Gyɛlusalɛm aduduleɛ la azo.

⁸Zɔhane ala yɛɛ Sɔlɔmɔn yɛle manle ye nyɛvolɛ mraalɛ ne mɔ amuala a. Ɔsisile azua ɔmanle bɛyelale ɛyɛlɛ bɛzonlenle bɛ maanle nu awozonle ne mɔ.

⁹Zɔhane ati Ɛdɛnkɛma vale Sɔlɔmɔn anwo ɛya. Ɔboalekɛ Sɔlɔmɔn ɛhakyi ɔ nzi ɛzi Ɛdɛnkɛma, Yizilayɛ Nyamenle ne mɔɔ ɛye ɔ nwo ɛhile ye fane nwiɔ,

¹⁰ɛha ɛhile ye kɛ ɔmmasonle nyamenle gyɛne bie ɔboka ɔ nwo la. Sɔlɔmɔn anli Ɛdɛnkɛma mɛla zo.

¹¹Ɛdɛnkɛma zele Sɔlɔmɔn kɛ, “Kɛmɔ wɔandie me ne na ɛdawɔ ɛ nye fuu wɔbulu me ngyekyeleɛ nee me mɛla mɔɔ meva memaa wɔ la azo la ati, mebalie me maanle ne ɛ sa nu na meava meamaa wɔ sonvolɛma ne mɔ bie.

¹²Noko ɔlua ɛ ze Devidi ati, menrɛlie maanle ne wɔ wɔ mekɛ zo; mebalie ye wɔ ɛ ra nrenya asa anu.

¹³Eza bɔbɔ menrɛlie maanle ne amuala ɛ sa nu; ɔlua me akɛlɛ Devidi ati nee Gyɛlusalɛm maanle mumua ne mɔɔ mekpa nu meye la ati, mebava Yizilayɛma anu ekpunli ko meamaa ɛ ra nrenya azie bɛ.”

¹⁴Na Ɛdɛnkɛma manle Yidɔm amra ne anu ko mɔɔ bɛfɛlɛ ye Heedade la dwazole Sɔlɔmɔn anwo zo.

¹⁵Mekɛ mɔɔ Devidi honle vale Yidɔm la, Devidi safohyenle kpanyinli ne mɔɔ bɛfɛlɛ ye Dwowabe la hɔle kɛ ɔkazie menli mɔɔ dɔle konle ne anu la. Ɔvale nu ɔhunle mrenya mɔɔ hale Yidɔm la kɔsɔɔti.

¹⁶Dwowabe nee Yizilayɛma dɛnlanle ɛkɛ ne toonwo siane nsia na ɔbɔle mrenya mɔɔ wɔ Yidɔm ɛkɛ ne la abo zo bɔkɔɔ,

¹⁷ɔhale Heedade ala. Heedade nee ɔ ze ngɛkɛlɛ mɔɔ le Yidɔmma la bie mɔ nriandile hɔle Yigyibiti. (Mekɛ ne anu ɛnee Heedade le kakula.)

¹⁸Bɛyele bɛ nwo wɔ Medean bɛrale Pɛlan na bɛranyianle menli wɔ Pɛlan ɛkɛ ne bɛ nee bɛ hɔle Yigyibiti belemgbunli ne ɛkɛ. Yigyibiti belemgbunli ne manle Heedade sua nee aleɛ; eza ɔmanle ye azɛlɛ.

¹⁹Heedade nyianle ɔ nyunlu wɔ Yigyibiti belemgbunli ne ɛkɛ na ɔlua zo belemgbunli ne vale ɔdaye ɔ ye, Belemgbunli Raalɛ Taapɛnize adiema raalɛ manle Heedade gyale ye.

²⁰Taapɛnize adiema raalɛ ne nee Heedade wole ralɛ nrenya na bɛdonle ye Gɛnubɛte, na Taapɛnize lile ye adane wɔ Yigyibiti belemgbunli ne sua nu ɛkɛ bokale belemgbunli ne amra mrenya ne mɔ anwo.

²¹Mekɛ mɔɔ Heedade dele ye wɔ Yigyibiti kɛ Belemgbunli Devidi ɛhɔ ayile nu na ye safohyenle kpanyinli Dwowabe ɔdaye noko yewu la, Heedade nwunle Yigyibiti belemgbunli ne na ɔzele ye kɛ, “Maa me adenle maa mengɔ me maanle nu.”

²²Belemgbunli ne bizale ye kɛ, “Duzu ati ɔ? Wɔhyia debie nwo meanyɛ meammaa wɔ ati a ɛkulo kɛ ɛkɔ a?” Heedade buale belemgbunli ne kɛ, “Wɔmɔ maa mengɔ me maanle nu.” Nzinlii Heedade yɛle belemgbunli wɔ Yidɔm na ɔyɛle Yizilayɛma anwo ɛlɔne kpole kpalɛ.

²³Nyamenle eza manle Yilayada ara nrenya Rilizɔn dwazole Sɔlɔmɔn anwo zo. Ɛnee Rilizɔn ɛnriandi ɔ menle Hadadizɛ mɔɔ le Zoba belemgbunli ne.

²⁴Na ɔboɔboale agbamgbanvolɛ bie anloa na ɔlile bɛ ti. (Ɛhye zile mekɛ mɔɔ Devidi lile Belemgbunli Hadadizɛ anwo zo konim na yehu Seleama mɔɔ ɛnee le Hadadizɛ konle nu agɔnwolɛma la.) Rilizɔn nee ɔ sa zo ne mɔ hɔle Dɛmasekɛse hɔdɛnlanle ɛkɛ na bɛvale Rilizɔn bɛziele Selea belemgbunli.

²⁵Ɔyɛle Yizilayɛma kpɔvolɛ wɔ Belemgbunli Sɔlɔmɔn mekɛ zo, ɔyɛle ninyɛndane kɛmɔ Heedade yɛle la; ɔhyile Yizilayɛma bɔkɔɔ wɔ mekɛ mɔɔ ɔdi Selea ebia ne la.

²⁶Sonla ko mɔɔ ɔdaye ɔhakyile ɔ nzi ɔzile Belemgbunli Sɔlɔmɔn la a le ye sonvolɛma ne mɔ ko mɔɔ bɛfɛlɛ ye Gyɛlɔbowam mɔɔ le Nibate ara nrenya ne. Nibate le Yifelaemnli; ɔvi Zɛlɛda. Ɔ nli le kunlanvolɛ raalɛ, bɛfɛlɛ ye Zɛlua.

²⁷Deɛ mɔɔ yemɔti Gyɛlɔbowam kpɔle Sɔlɔmɔn la ɛne. Sɔlɔmɔn tua Gyɛlusalɛm aduduleɛ kuma kpole ne yealie suakpole ne anwo bane la,

²⁸ɛnee Gyɛlɔbowam le kpavolɛ katakyie mɔɔ anwo yɛ se a. Sɔlɔmɔn nwunle ye zɛhae la ɔvale ye ɔziele kpanyinli mɔɔ nea Dwosefi sua nu amra mɔɔ ɛlɛyɛ mialeranu gyima la anwo zo.

²⁹Kenle ko bie mɔɔ Gyɛlɔbowam dule ɔ bo Gyɛlusalɛm kɛ ɔkɔ adenle la, Nyamenle kpɔmanvolɛ Ahaegya mɔɔ vi Hyaelo la yiale ye adevinli ne. Ɛnee Gyɛlɔbowam angome a lua a.

³⁰Ahaegya yele tɛladeɛ fofolɛ ne mɔɔ ɔwula la, ɔsuosuanle nuhua ngyebangyeba bulu nee nwiɔ

³¹na ɔzele Gyɛlɔbowam kɛ, “Die tɛladeɛ azinli azinli ye anu bulu fa, ɔboalekɛ kɛ Ɛdɛnkɛma Yizilayɛ Nyamenle ne se la ɛne, ‘Ɔnrɛhyɛ biala, mebalie Yizilayɛ maanle ne meavi Sɔlɔmɔn asa anu na meava maanle ne anu mbusua ekpunli bulu meawula ɛ sa nu.

³²Ɔlua me akɛlɛ Devidi nee Gyɛlusalɛm mɔɔ ɔle suakpole mɔɔ mekpa nu meye ye kɛ ɔle me ɛdeɛ la ati, mebava ekpunli ko meamaa Sɔlɔmɔn.

³³Ɔboalekɛ Sɔlɔmɔn ɛkpo me yehɔzonle Saedɛn bozonle raalɛ Asetate nee Mowabe bozonle Kimɔhye nee Amɔn bozonle Melekɔn ne. Sɔlɔmɔn ɛdu me nloa ɛdo. Yeyɛ ɛtane, kɛmɔ ɔ ze Devidi yɛle la.

³⁴Noko ɔlua me akɛlɛ Devidi mɔɔ memkpale nu menyele ye na ɔdaye noko ɔdiele me edwɛkɛ la ati, memaa yeali belemgbunli toonwo yeawu, menrɛlie maanle ne amuala menrɛvi Sɔlɔmɔn asa anu.

³⁵Mebalie Yizilayɛ maanle ne meavi Sɔlɔmɔn ara asa anu na meava nuhua mbusua ekpunli bulu meawula ɛ sa nu meamaa wɔazie bɛ.

³⁶Mebamaa Sɔlɔmɔn ara nrenya ne azie abusua ekpunli ko ala na dahuu meanyia me akɛlɛ Devidi abo zo amra ne bie ali ebia wɔ Gyɛlusalɛm. Suakpole ɛhye yɛɛ mekpa nu meye kɛ bɛzonle me wɔ zolɛ a.

³⁷Gyɛlɔbowam, mebamaa wɔazie Yizilayɛma nee maanle biala mɔɔ ɛkɛhulo kɛ ɛkɛzie bɛ la.

³⁸Saa ɛyɛ tieyɛ ɛmaa me bɔkɔɔ, ɛdi me mɛla zo, na ɛyɛ mɔɔ menwɔze wɔ la, ɛsɔ me nye, kɛmɔ me akɛlɛ Devidi yɛle la a, me nee wɔ badɛnla dahuu; ɛbazie Yizilayɛma na ɛ mra ali ebia ne, kɛmɔ menyɛle memanle Devidi la.

³⁹Sɔlɔmɔn ninyɛndane ne ati mebahwe Devidi abo zo amra anzo, noko ɔnrɛyɛ kpole biala.’ ”

⁴⁰Yemɔti Sɔlɔmɔn bɔle adwenle kɛ ɔku Gyɛlɔbowam, na Gyɛlɔbowam nriandile hɔdanenle Yigyibiti Belemgbunli Hyaehyake. Ɔdɛnlanle Yigyibiti ɔhɔkpulale mekɛ mɔɔ Sɔlɔmɔn hɔle ayile nu la.

⁴¹Akee Sɔlɔmɔn ɛbɛla mɔɔ ɔbɔle nee mɔɔ ɔyɛle nee ye nrɛlɛbɛ ne, bɛhɛlɛ bɛ wɔ Sɔlɔmɔn anwo Tetedwɛkɛ Buluku ne anu.

⁴²Sɔlɔmɔn dɛnlanle Gyɛlusalɛm ziele Yizilayɛma ɛvolɛ abulanla.

⁴³Ɔhɔle ayile nu na bɛwulale ye mrɛlatɛlɛ nu wɔ ɔ ze Devidi suakpole zo, na ɔ ra Rilihɔbowam lile ebia ne.