Read Nzema 1 Arl 12 Bible Online

1 Arl 12 - Nzema bible

1 Arl 12

¹Rilihɔbowam hɔle Hyikɛm. Ɛkɛ ne a ɛnee Yizilayɛma kɔsɔɔti ɛbɔ gua ɛlɛkendɛ na bɛava ye bɛazie belemgbunli a.

²Mɔɔ Nibate ara Gyɛlɔbowam mɔɔ nriandile Belemgbunli Sɔlɔmɔn hɔle Yigyibiti la dele edwɛkɛ ne la, ɔziale ɔ nzi ɔrale.

³Mbusua ekpunli ne bie mɔ manle bɛhɔvɛlɛle Gyɛlɔbowam bɛrale, na bɛ muala bɛhɔle Rilihɔbowam ɛkɛ ne bɛhɔzele ye kɛ,

⁴“ Ɛ ze Sɔlɔmɔn sisile yɛ kpole kpalɛ na ɔzoale yɛ ɛnlomboɛ. Yemɔti nea te mɔɔ ɛ ze ɛkyekye ɛzoa yɛ la azo bie maa yɛ nwo ɛdɔ yɛ na yɛkɛzonle wɔ.”

⁵Ɔbuale bɛ kɛ, “Bɛhɔ na ɔdi kenle nsa a bɛzia bɛradie nwolɛ mualɛ.” Yemɔti menli ne ziale hɔle.

⁶Belemgbunli Rilihɔbowam yele edwɛkɛ ne dole mgbanyima mɔɔ boale ɔ ze Sɔlɔmɔn wɔ ye mekɛ zo la anyunlu na ɔbizale bɛ kɛ, “Duzu mualɛ a menva memaa menli ne a?”

⁷Mgbanyima ne mɔ zele ye kɛ, “Saa ɛto ɛ nwo aze ɛmaa menli ne mɔ, ɛbu bɛ bie, na ɛtendɛ kɛnlɛma ɛkile bɛ a, bɛbazonle wɔ dahuu.”

⁸Rilihɔbowam anli mgbanyima ne mɔ edwɛkɛ ne anwo bie; ɔhɔyiale ɔdaye ɔ gɔnwo mɔ mgbavolɛ mɔɔ ɔ nee bɛ dule la

⁹na ɔbizale bɛ kɛ, “Menli ne se mende bɛ ɛvɛlɛ zo ekyii, na kɛ bɛ adwenle se bɛ ɛ?”

¹⁰Ɔ gɔnwo mgbavolɛ ne mɔ dule ye folɛ kɛ, “Se menli ne mɔɔ se ɛde bɛ adesoa ne azo la kɛ, ‘Tɛ bie bɔbɔ a egya yɛle bɛ la. Me sa amozi ɛrɛlɛsɛka bɔbɔ le kpole tɛla egya anze; bɔ zo mɔɔ bɛbanwu amaneɛ a.

¹¹Saa egya zoale bɛ adesoa ɛnlomboɛ a, mame, mebazoa bɛ ye molozo. Saa egya vale nɛnemile a bilale bɛ a, mame, mebava empele a meabila bɛ a.’ ”

¹²Kenle nsa ne dwule la Gyɛlɔbowam nee menli ne kɔsɔɔti rale Rilihɔbowam agyakɛ azo, kɛmɔ ɔhanle ɔhilele bɛ kɛ, “Kenle nsa dwu a bɛzia bɛrɛla bɛradie nwolɛ mualɛ” la.

¹³Rilihɔbowam anva mgbanyima ne mɔ adwenle ɛdeɛ ne,

¹⁴ɔlile ɔ gɔnwo mɔ mgbavolɛ ne mɔ folɛdulɛ ne azo na ɔdendɛle ɛtane ɛtane ɔhilele ye menli ne mɔ kɛ, “Saa egya zoale bɛ adesoa ɛnlomboɛ a, mame, mebazoa bɛ ye molozo. Saa egya bilale bɛ nɛnemile a, mame, mebava empele a meabila bɛ a.”

¹⁵Belemgbunli ne ande ɔ nyunlu angile menli ne, ɔboalekɛ ɛnee Ɛdɛnkɛma kulo kɛ ye edwɛkɛ ne mɔɔ ɔvale ɔluale Nyamenle kpɔmanvolɛ Ahaegya mɔɔ vi Hyaelo la anloa kɛ ɔha ɔhile Gyɛlɔbowam la yɛ nɔhalɛ.

¹⁶Yizilayɛma amuala nwunle kɛ Belemgbunli Rilihɔbowam ambu bɛ bie, yemɔti bɛhanle bɛhilele ye kɛ, “Duzu bɔbɔ yɛɛ yɛnyia ye wɔ Devidi abusua nu a? Yɛnlɛ agyadeɛ biala wɔ Gyesi anlɔnra ɛhye ɛkɛ. Yizilayɛma, awie biala ɛhɔ ye sua nu na bɛmaa Devidi anlɔnra ne ɛva ɔ nwo.” Ɛhye ati Yizilayɛma dele atua.

¹⁷Na Rilihɔbowam ziele Yizilayɛma mɔɔ wɔ Dwuda azuamgbole ne mɔ azo la.

¹⁸Rilihɔbowam akee zoanle Adɔnelam mɔɔ nea maanle ne mialeranu gyimayɛlɛ zo la wɔ Yizilayɛma ɛkɛ ne na bɛzile ye awolɛ bɛhunle ye. Ɔrale ye zɛhae la Belemgbunli Rilihɔbowam hanle ɔ nwo vole ye konle ehwili nu nriandile hɔle Gyɛlusalɛm.

¹⁹Ɔvi mekɛ zɔhane, Yizilayɛ sɔlɔ maanzinli ne mɔ anu amra ɛyɛ Devidi abo zo amra anwo ɛlɔne toonwo a yeradwu ɛnɛ a.

²⁰Yizilayɛma amuala dele kɛ Gyɛlɔbowam ɛzia ɔ nzi vi Yigyibiti ɛra la bɛvɛlɛle ye wɔ bɛ ayia bo na bɛvale ye bɛziele Yizilayɛ belemgbunli. Biala anli Devidi abo zo amra ne anzi kɛ Dwuda abusua ekpunli ne anu amra ne mɔ ala.

²¹Mekɛ mɔɔ Sɔlɔmɔn ara Rilihɔbowam dwule Gyɛlusalɛm la, ɔyiale Dwuda abusua ekpunli ne nee Bɛngyaman abusua ekpunli ne anu amra ɛlɔnema apenle ngoko ɛya ko abulatwɛ. Ɛnee ye adwenle a le kɛ ɔ nee Yizilayɛma mɔɔ wɔ sɔlɔ maanzinli ne mɔ anu mɔɔ ɛde bɛ nwo la kaho na yeayɛ maanle ne maanle ko mɔɔ ɔdaye ala a ɔsie bɛ la.

²²Na Nyamenle zoanle ye kpɔmanvolɛ Hyɛmaya kɛ

²³ɔva nrɛlaleɛ ɔhɔmaa Rilihɔbowam yɛɛ Dwuda nee Bɛngyaman mbusua ekpunli ne mɔ anu amra kɛ,

²⁴“Bɛmmafa konle bɛtoa bɛ mediema Yizilayɛma; bɛzia bɛhɔ sua nu. Medame Ɛdɛnkɛma a memaa ɛhye ɛzi a.” Bɛdiele Ɛdɛnkɛma nrɛlaleɛ ne na bɛhɔle sua nu.

²⁵Akee Belemgbunli Gyɛlɔbowam kyekyele Hyikɛm sua ne mɔɔ wɔ Yifelaem awoka ne mɔ azo la kpalɛ na ɔdɛnlanle ɛkɛ; nzinlii ɔdule ɛkɛ ɔhɔkyekyele Pɛnuwɛle sua ne.

²⁶Ɔhanle ye ɔ ti anu kɛ, “Saa meannea boɛ na me menli ye amuala kɔ Gyɛlusalɛm kɛ bɛkazonle Ɛdɛnkɛma wɔ Ɛzonlenlɛ Sua ne anu a bɛbahakyi bɛ adwenle na bɛazonle Belemgbunli Rilihɔbowam mɔɔ wɔ Dwuda la na bɛarahu me.”

²⁸ Yemɔti ɔdwenlenle nwolɛ na ɔvale ezukoa nvutuke ɔguale nlankɛ mralɛ ananze nwiɔ na ɔhanle ɔhilele menli ne kɛ, “Bɛhɔ Gyɛlusalɛm bɛvɛ bie ala, yeyɛ boɛ! Yizilayɛma, bɛnlea! Bɛ nyamenle ne mɔ mɔɔ nee bɛ vi Yigyibiti rale la ɛne.”

²⁹Ɔvale nlankɛ ne mɔ ko ɔziele Bɛtɛle na ɔvale ko ɔziele Dan.

³⁰Nyɛleɛ ɛhye manle menli ne yɛle ɛtane, ɔluakɛ ɛnee menli ne kɔsonle ezukoa nvutuke nlankɛ mralɛ ananze ne mɔ mɔɔ wɔ Bɛtɛle nee Dan la.

³¹Eza Gyɛlɔbowam sisile azua wɔ awoka zo na ɔvale menli mɔɔ ɛnle Livae abusua ekpunli ne anu la ɔyɛle bɛ sɛlɛvolɛma wɔ ɛkɛ.

³²Gyɛlɔbowam ziele siane mɔtwɛ ne kenle bulu nee nnu ne kɛ ɔle nyamenlezonlenlɛ nu ɛvoyia, kɛmɔ bɛdi ye wɔ Dwuda la. Ɔbɔle azu wɔ Bɛtɛle azukponle ne azo ɔmanle ezukoa nvutuke nlankɛ mralɛ ananze ne mɔ mɔɔ ɔguale la, na ɔmanle menli mɔɔ yeyɛ bɛ sɛlɛvolɛma wɔ ɛleka ɛleka la pɛle ralile Bɛtɛle.

³³Kɛmɔ ɔhyehyɛle ala la, siane mɔtwɛ ne kenle bulu nee nnu ne azo, Gyɛlɔbowam hɔle Bɛtɛle kɛ ɔkakpu ɛyɛlɛ yeabɔ azu wɔ azukponle ne mɔɔ yeyɛ la azo yeava yeabɔ ɛvoyialilɛ ne mɔɔ yehyehyɛ yemaa Yizilayɛma la abo.