Read Nzema 1 Arl 14 Bible Online

1 Arl 14 - Nzema bible

1 Arl 14

¹Mekɛ ne anu anwonyane bɔle Gyɛlɔbowam ara nrenya Abaegya.

²Yemɔti Gyɛlɔbowam hanle hilele ɔ ye kɛ, “Dwazo, kakyi ɛ nwo sonla gyɛne bie mɔɔ awie ɛngola ɛnnwu wɔ sonla holɛ la na kɔ Hyaelo, wɔ Nyamenle kpɔmanvolɛ Ahaegya mɔɔ zele me kɛ mebazie Yizilayɛma la ɛkɛ ne.

³Fa kpanwo ahunguma bulu nee ‘Keeki’ nee wolɛ toba ko kɔmaa ye na biza yɛ ra ye ewule ne ati; ɔbaha mɔɔ bazi ɔ nwo zo la yeahile wɔ.”

⁴Gyɛlɔbowam aye ne yɛle ye zɔhane; ɔhɔle Ahaegya ɛkɛ wɔ Hyaelo. Ɛnee Ahaegya ɛyɛ kpanyinli kpalɛ, ɔ nye ɛyɛ, yemɔti ɔnnwu debie kpalɛ.

⁵Ɛdɛnkɛma hanle hilele ye kɛ, “Gyɛlɔbowam aye ne ɛlɛba arabiza wɔ ɔ ra ne mɔɔ ɛlɛwu la anwo. Zɔhane ati anrɛɛ ka ye zɛhae nee ye zɛhae kile ye.” Mekɛ mɔɔ Gyɛlɔbowam aye ne radwule awuke ne anu la, ɔhakyile ɔ nwo kɛ sonla gyɛne bie.

⁶Na mɔɔ Ahaegya dele ɔ gyakɛ abo wɔ anuhɔlɛ lɔ ala la, ɔhanle kɛ, “Gyɛlɔbowam aye, bɛla sua nu. Duzu ati a ɛlɛfea ɛ nwo kɛ ɛle awie gyɛne bie ɛ? Wɔ arɛlebɔlɛ nrɛlaleɛ bie wɔ ɛke.

⁷Kɔha kile Gyɛlɔbowam kɛ, ‘Kɛ Ɛdɛnkɛma, Yizilayɛ Nyamenle ne se la ɛne: Medame a memkpogyale wɔ zo kɛ ɛli Yizilayɛma belemgbunli a.

⁸Menliele belemgbunlililɛ ne menvile Devidi abo zo amra asa anu menvale memanle wɔ. Na kɛkala, wɔanva me akɛlɛ Devidi agyakɛ. Devidi lile nɔhalɛ manle me, ɔlile me mɛla zo na ɔyɛle mɔɔ sɔ me nye la.

⁹Na wɔmɔ, wɔvo me wɔdɛla menli mɔɔ lumuale lile ebia ne la. Wɔhakyi ɛ nzi wɔzi me bɔkɔɔ na wɔyɛ awozonle nee ananze wɔva wɔha me ɛya kpole.

¹⁰ Ɔlua ɛhye ati mebadu wɔ ebia ne azo na meahu ɛ bo zo amra mrenya ne mɔ amuala, ngakula nee mgbanyinli kɔsɔɔti bawu. Mebabɔ ɛ bo zo tɔɔ na meayela bɛ kɛ bɛyela ewula la.

¹¹Ɛ nwo sonla biala mɔɔ kɛwu suakpole zo la, ahwea bali ye nwonane yɛɛ mɔɔ kɛwu ɛbɔ nu noko la, nloma basuso ye nwonane ali. Medame Ɛdɛnkɛma a mese a.’ ”

¹²Ahaegya hɔle zolɛ hanle hilele Gyɛlɔbowam aye ne kɛ, “Dwazo kɔ; ɛdwu sua ne kandiba ala a, kakula ne bawu.

¹³Yizilayɛma amuala bazu ye na bɛazie ye. Ɔ ngomekye ala a ɔle Gyɛlɔbowam abo zo sonla mɔɔ bɛbaboɔboa bɛazie ye ɛzielɛ kpalɛ a, ɔluakɛ yemɔ ala a ɔle Gyɛlɔbowam abo zo sonla mɔɔ ye nyɛleɛ ɛzɔ Ɛdɛnkɛma anye a.

¹⁴Eza noko ɔnrɛhyɛ biala, Ɛdɛnkɛma balie belemgbunlililɛ ne avi Gyɛlɔbowam abo zo amra asa anu yeamaa belemgbunli fofolɛ yeamaa yeazie Yizilayɛma.

¹⁵Ɛdɛnkɛma badea Yizilayɛma, ɔbakpusu bɛ kɛ ndɔ mɔɔ gyigyi azule nu la na yeadudu bɛ bɛ bo yeavi azɛlɛ kɛnlɛma ye mɔɔ ɔvale ɔmanle bɛ ze mɔ la azo. Ɔbabɔ bɛ asande wɔ azule Yufileti anzi lɔ, ɔboalekɛ bɛha Ɛdɛnkɛma ɛya kɛ bɛyɛ bɛ bozonle raalɛ Ahyela mmonle bɛsɔ la.

¹⁶Gyɛlɔbowam ɛyɛ ɛtane yemaa Yizilayɛma amuala ɛyɛ ɛtane. Zɔhane ati Ɛdɛnkɛma baye ɔ nye wɔ Yizilayɛma anwo zo.”

¹⁷Gyɛlɔbowam aye ne akee rale Tɛza; ɔradwule ye sua nu ɛkɛ anuhɔlɛ ne ala la yɛɛ kakula ne wule a.

¹⁸Yizilayɛma amuala zunle ye na bɛziele ye, kɛmɔ Ɛdɛnkɛma luale ye kpɔmanvolɛ Ahaegya anwo zo hanle la.

¹⁹Gyɛlɔbowam nyɛleɛ nee ye ebialilɛ nee konle mɔɔ ɔhonle la amuala anwo edwɛkɛ mɔɔ ɛha la, bɛhɛlɛ bɛ wɔ Yizilayɛ Arelemgbunli Tetedwɛkɛ Buluku ne anu.

²⁰Gyɛlɔbowam ziele Yizilayɛ maanle ne ɛvolɛ abulanwiɔ nee nwiɔ na yeahɔ ayile nu. Ɔ ra nrenya Needabe a lile ebia ne a.

²¹Sɔlɔmɔn ara Rilihɔbowam lile ɛvolɛ abulanla nee ko la yɛɛ ɔbɔle ɔ bo kɛ ɔdi belemgbunli wɔ Dwuda a. Ɔdɛnlanle Gyɛlusalɛm ɔlile ebia ne ɛvolɛ bulu nee nsuu. Gyɛlusalɛm a le suakpole mɔɔ Ɛdɛnkɛma nleanle Yizilayɛ azuamgbole ne mɔ anu yele ziele ɛkɛ kɛ bɛzonle ye wɔ zolɛ a. Rilihɔbowam ɔ nli le Amɔnonli, bɛfɛlɛ ye Neeyama.

²²Dwudama yɛle ɛtane dɔɔnwo tiale Ɛdɛnkɛma dɛlale bɛ ze mɔ bɔbɔ, na ɔlua zolɛ Ɛdɛnkɛma vale ɛya.

²³ Ɔluakɛ bɛdabɛ noko bɛsisile mmonle azua na bɛkpɔnlanle bɛ bozonle raalɛ Ahyela ne mbaka wɔ awoka zo nee mbaka bo bɛzonlenle bɛ,

²⁴yɛɛ eza mrenya wɔ ɛleka zɛhae mɔ mɔɔ bɛbɔ tuutuu ɛbɛla a. Dwudama zukoale yɛle anyiemgba nyɛleɛ ne mɔɔ menli mɔɔ Ɛdɛnkɛma voanle bɛ vile azɛlɛ ne azo la yɛle la bie.

²⁵Rilihɔbowam ralile ebia ne la, ye ɛvolɛ nnu ne azo yɛɛ Yigyibiti belemgbunli Hyaehyake vale konle radoale Gyɛlusalɛm amra a.

²⁶Ɔsesale Ɛzonlenlɛ Sua ne anu ninyɛne ne mɔ nee ninyɛne mɔɔ wɔ belemgbunli sua nu la amuala ɔhɔle. Ɔvale debie biala, ɔsesale bɛ sa nu enyinlike ne mɔ mɔɔ Sɔlɔmɔn manle bɛvale ezukoa nvutuke bɛyɛle la bɔbɔ ɔhɔle.

²⁷Yemɔti Belemgbunli Rilihɔbowam vale ayera nee kɔbele yɛle bie ziele bɛ bo zo na ɔvale ɔwulale sinzavolɛma mɔɔ wɔ belemgbunli sua nu ɛkɛ ne la asa anu.

²⁸Mekɛ biala mɔɔ belemgbunli kɛze kɛ ɔkɔ Ɛzonlenlɛ Sua ne anu la, sinzavolɛma ne mɔ soa ninyɛne ne mɔ nee bɛ belemgbunli ne kɔ; bɛkpɔne na bɛkɔ sua nu a eza bɛazoa bɛ nee ye ahɔ na bɛava bɛahɔzie bɛ bo zo ne wɔ ɛzinzalɛ sua ne anu.

²⁹Nyɛleɛ biala mɔɔ Rilihɔbowam yɛle wɔ mekɛ mɔɔ ɔdi ebia ne la, bɛhɛlɛ bɛ kɔsɔɔti wɔ Dwuda Arelemgbunli Tetedwɛkɛ Buluku ne anu.

³⁰Mekɛ ne anu ɛnee kɛ Rilihɔbowam nee Gyɛlɔbowam gua konle zo ala ɛne.

³¹Amɔn raalɛ ne mɔɔ bɛfɛlɛ ye Neeyama la ara nrenya a le Rilihɔbowam. Rilihɔbowam hɔle ayile nu na bɛwulale ye mrɛlatɛlɛ nu wɔ Devidi suakpole zo. Ɔ ra nrenya Abaegya a lile ebia ne a.