Read Nzema 1 Arl 15 Bible Online

1 Arl 15 - Nzema bible

1 Arl 15

¹Yizilayɛ belemgbunli Nibate ara Gyɛlɔbowam lile ɛvolɛ bulu nee mɔtwɛ wɔ ebia zo la yɛɛ Abaegya bɔle ebialilɛ bo wɔ Dwuda maanle nu a.

²Ɔlile ebia ne ɛvolɛ nsa wɔ Gyɛlusalɛm. Ɔ nli a le Abaehyalɔn (Abesalɛm) ara raalɛ Meeyaka.

³Ɔvale ɔ ze agyakɛ na ɔyɛle ɛtane mɔɔ ɔ ze yɛle la amuala bie. Yeanli Ɛdɛnkɛma ye Nyamenle ne mɛla zo nɔhalɛ nu, kɛmɔ ɔ nlenya Devidi lile la.

⁴ Noko ɔlua Devidi ati Ɛdɛnkɛma ye Nyamenle ne manle Abaegya ara nrenya lile ye agya lile belemgbunli wɔ Gyɛlusalɛm, amaa Gyɛlusalɛm agyinla kpundii.

⁵ Ɔboalekɛ Devidi nyɛleɛ zɔle Ɛdɛnkɛma anye yɛɛ ɔyɛle debie biala mɔɔ Ɛdɛnkɛma zele ye la. Ɛleka mɔɔ ɔvonle la a le edwɛkɛ ne mɔɔ fane Hɛtenli Yulaya anwo la ala.

⁶Konle ne mɔɔ Rilihɔbowam nee Gyɛlɔbowam bɔle ɔ bo la dɔle Abaegya asa azo na ɔdaye noko ɔ nee Gyɛlɔbowam honle. Bɛhɛlɛ debie biala mɔɔ Abaegya yɛle wɔ ye mekɛ zo la wɔ Dwuda Arelemgbunli Tetedwɛkɛ Buluku ne anu.

⁸Abaegya hɔle ayile nu na bɛwulale ye mrɛlatɛlɛ nu wɔ Devidi suakpole zo. Ɔ ra nrenya Esa a lile ebia ne a.

⁹Bɛvale Esa bɛziele Dwuda belemgbunli wɔ mekɛ mɔɔ ɛnee Yizilayɛ Belemgbunli Gyɛlɔbowam ɛli ɛvolɛ abulanwiɔ wɔ ebia zo la.

¹⁰Esa dɛnlanle Gyɛlusalɛm, ɔlile ebia ne ɛvolɛ abulanla nee ko. Ɔ nla a le Meeyaka mɔɔ le Abesalɛm (Abaehyalɛm) ara raalɛ ne.

¹¹Esa ɛbɛla zɔle Ɛdɛnkɛma anye kɛ ɔ nlenya Devidi ɛdeɛ ne la.

¹²Ɔduale mrenya tuutuu ɛbɛla ɛbɔlɛ wɔ ɛleka ɛleka mɔɔ bɛsonle la wɔ maanle ne anu na ɔvuandinle awozonle mɔɔ ɔ ze mɔ zieziele la amuala ɔguale.

¹³Akee ɔdule ɔ nla Meeyaka ɔvile Ɛhyenlema dibilɛ ne azo, ɔboalekɛ ɛnee yeyɛ bozonle raalɛ Ahyela ne ananze mɔɔ le kyibadeɛ la, na ɔsonle ye. Esa bubule Ahyela ananze ne na ɔhɔyelale ye wɔ Azule Kedelɔn ne anloa.

¹⁴Esa anzɛkye mmonle azua ne mɔ amuala bɔbɔ ɛdeɛ, noko ɔvale ye ahonle muala ɔzonlenle Ɛdɛnkɛma wɔ mekɛ mɔɔ ɔde aze la.

¹⁵Ɔhwenle ninyɛne mɔɔ ɔ ze dule ziele ɛkɛ manle Ɛdɛnkɛma nee ezukoa nvutuke nee dwɛtɛ fufule ninyɛne mɔɔ ɔdaye yeyɛ na yedu yemaa Ɛdɛnkɛma la amuala ɔrale Ɛzonlenlɛ Sua ne anu.

¹⁶Konle amkpa Dwuda Belemgbunli Esa nee Yizilayɛ Belemgbunli Beeyahya avinli ɛlɛ.

¹⁷Yizilayɛ Belemgbunli Beeyahya vale konle doale Dwudama na ɔkyekyele Releema, amaa yeadua adenle mɔɔ awie ɛngɔ Dwuda yɛɛ awie vi Dwuda ɛnvinde ɛngɔ ɛleka biala la.

¹⁸Esa vale dwɛtɛ fufule nee ezukoa nvutuke mɔɔ wɔ Ɛzonlenlɛ Sua ne anu la nee mɔɔ wɔ belemgbunli sua nu ɛkɛ ne la amuala manle ye sonvolɛma ne mɔ kɛ bɛva bɛhɔmaa Bɛneheedade, mɔɔ le Selea belemgbunli ne mɔɔ de Dɛmasekɛse la. Bɛneheedade ɔ ze a le Tabelamɔn yɛɛ ɔ nlenya a le Hizeɔn. Esa manle bɛhɔzele Bɛneheedade kɛ,

¹⁹“Maa yɛyɛ mediema, yɛhye yɛ nwo file, kɛmɔ yɛ ze mɔ yɛle la. Mefa dwɛtɛ fufule nee ezukoa nvutuke ɛhye mekyɛ wɔ. Bɔ mɔdenle te ɛ nwo fi Yizilayɛ Belemgbunli Beeyahya anwo, amaa yeaye ye ɛlɔnema ne wɔ me azɛlɛ ye azo.”

²⁰Bɛneheedade liele Belemgbunli Esa nzuzulɛ ne dole nu na ɔmanle ye ɛlɔnema hɔdoale Yizilayɛ azuamgbole ne bie mɔ bɛ nee bɛ honle. Ɔhonle ɔvale Ayedwɔn nee Dan nee Ebɛle Bɛte Meeyaka nee azuamgbole ne mɔ mɔɔ wɔ Galeli Tandane ne anloa la nee Nafetalae maanle ne amuala.

²¹Belemgbunli Beeyahya dele edwɛkɛ ɛhye la ɔgyakyile Releema sua ne ɛkyekyelɛ na ɔhɔdɛnlanle Tɛza.

²²Belemgbunli Esa bɔle nolo wɔ Dwuda maanle ne anu amuala kɛ awie biala ɛhɔzoa awolɛ nee mbaka mɔɔ ɛnee Beeyahya lɛ ɛlɛkyekye Releema la ɛrɛla Dwuda. Na Belemgbunli Esa vale awolɛ nee mbaka ɛhye mɔ kyekyele Giba wɔ Bɛngyaman maanle nu nee Mezepa.

²³Bɛhɛlɛ mɔdenle mɔɔ Belemgbunli Esa bɔle, ye akɛnrasesebɛ nee ye tumi nee azua mɔɔ ɔkyekyele la amuala anwo edwɛkɛ wɔ Dwuda Arelemgbunli Tetedwɛkɛ Buluku ne anu. Esa yɛle kpanyinli kpalɛ na nzinlii ɔ gyakɛ hunle ye manle ɔyɛle abubura.

²⁴Belemgbunli Esa hɔle ayile nu na bɛwulale ye mrɛlatɛlɛ nu wɔ alehelɛ ɛleka ne mɔɔ wɔ Devidi suakpole zo la. Na ɔ ra nrenya Gyɛhɔhyafate lile ebia ne.

²⁵Belemgbunli Esa lile ɛvolɛ nwiɔ wɔ Dwuda ebia ne azo la yɛɛ Gyɛlɔbowam ara Needabe ɔdaye ɔralile Yizilayɛ ebia ne a; ɔziele Yizilayɛma ɛvolɛ nwiɔ.

²⁶Ɔvale ɔ ze agyakɛ, ye ɛbɛla anzɔ Ɛdɛnkɛma anye. Ɔmanle Yizilayɛma yɛle ɛtane ko ne ala mɔɔ ɔ ze manle bɛyɛle la bie.

²⁷Ahaegya ara Beeyahya mɔɔ vi Yesakaa abusua ekpunli ne anu la yɛle Needabe anwo ɛlɔne. Ɔhunle ye wɔ Gebɛtɔn mɔɔ wɔ Filisitia azɛlɛ zo la. Mekɛ ne anu ɛnee Needabe nee Yizilayɛma amuala ɛhɔ Gebɛtɔnoma anwo nzia.

²⁸Beeyahya hunle Needabe wɔ mekɛ mɔɔ ɛnee Belemgbunli Esa ɛli ɛvolɛ nsa wɔ Dwuda ebia ne azo la na ɔvale ebia ne.

²⁹ Beeyahya dɛnlanle ebia ne azo ala la yɛɛ ɔbɔle Gyɛlɔbowam abo zo amra ɛhunlɛ bo a; yeangyakyi sonla ko bɔbɔ. Ɔhunle bɛ kɔsɔɔti, kɛmɔ Ɛdɛnkɛma edwɛkɛ ne mɔɔ ɔluale ye akɛlɛ Ahaegya mɔɔ vi Hyaelo la anwo zo hanle la se la.

³⁰Gyɛlɔbowam manle Ɛdɛnkɛma, Yizilayɛ Nyamenle ne vale ɛya wɔ ɛtane mɔɔ ɔdaye Gyɛlɔbowam ɔyɛle, na eza ɔmanle Yizilayɛma amuala yɛle bie la anwo. Ɛhye ati a bɛbɔle ɔ bo zo bɔkɔɔ a.

³¹Bɛhɛlɛ mɔdenle mɔɔ Needabe bɔle la wɔ Yizilayɛ Arelemgbunli Tetedwɛkɛ Buluku ne anu.

³²Yizilayɛ Belemgbunli Beeyahya nee Belemgbunli Esa honle mekɛ biala.

³³Belemgbunli Esa lile ɛvolɛ nsa wɔ Dwuda ebia ne azo la ɛnee Ahaegya ara Beeyahya de Tɛza na yebɔ ɔ bo ɔlɛsie Yizilayɛ maanle ne. Ɔlile ebia ne ɛvolɛ abulanwiɔ nee nna.

³⁴Beeyahya ɛbɛla anzɔ Ɛdɛnkɛma anye. Ɔyɛle Gyɛlɔbowam ɛtane ne mɔ mɔɔ ɔyɛle la bie, na ɔmanle Yizilayɛma yɛle ɛtane.