Read Nzema 1 Arl 18 Bible Online

1 Arl 18 - Nzema bible

1 Arl 18

¹Nzinlii, kɛyɛ ɛvolɛ nsa anzi, Ɛdɛnkɛma dendɛle hilele Yilaegya kɛ, “Mebamaa ezule adɔ na fa ɛ nwo kɔhile Belemgbunli Ehabe.”

²Yemɔti Yilaegya zile nu hɔle kɛ ɔlɛ ɔ nwo ɔkahile Ehabe. Mekɛ ne anu ɛnee Samɛlea ɛhɔne ɛdeɛ ne akee anu ɛyɛ se kpole kpalɛ.

³Na Ehabe vɛlɛle Obadaya mɔɔ nea belemgbunli suakunlu ɛkɛ ne la. (Obadaya le sonla mɔɔ sulo Ɛdɛnkɛma kpole a.

⁴Mekɛ mɔɔ Gyɛzɛbɛle kuhu Nyamenle kpɔmanvolɛma ne mɔ la, Obadaya liele bɛ nuhua ɛya ko ngoane. Ɔvale bɛ abulanlu abulanlu ɔveɛveale awolɛ mbɔne nu na ɔmanle bɛ aleɛ nee nzule.)

⁵Ehabe zele Obadaya kɛ, “Kɔkpɔsa[11] azudenle ne mɔ nee mbɔnza mɔɔ wɔ maanle ye la anu kɛ yɛkɛnyia nya nya bie yɛkɛmaa yɛ mgbɔnwɔ nee yɛ mgbɔnwɔndua ne mɔ na bɛanwu.”

⁶Ɔlua zo bɛlile mgbakyelɛ nu; Ehabe vale ɛleka ko yɛɛ Obadaya ɔdaye ɔbɔle ɔ ti ɛleka fofolɛ.

⁷Obadaya dɔle adenle zo la ɔrayiale Yilaegya; ɔnwunle ye sonla holɛ, yemɔti ɔhotole ye na ɔzele ye kɛ, “Me menle Yilaegya, wɔmɔ ɛ?”

⁸Ɔbuale ye kɛ, “Ɛhɛe, medame Yilaegya ɛ. Kɔze ɛ menle kɛ Yilaegya ɛra.”

⁹Obadaya buale ye kɛ, “Duzu ɛtane a meyɛ, mɔɔ yemɔti ɛye me wɔamaa Ehabe ahu me a?

¹⁰Meka Ɛdɛnkɛma wɔ Nyamenle ne kɛ, mennwu maanle ko nee sua biala mɔɔ Ehabe ɛtɛsoanle menli wɔ zolɛ kɛ bɛhɔkpondɛ wɔ a. Saa menli mɔɔ kɛhɔ wɔ ɛkpondɛlɛ la kɔto belemgbunli biala na ɔka kɛ ɛnle ɛkɛ a, Ehabe maa belemgbunli ne ka ye maanle ne anu ndane kɛ amgba ɔ nye ambɔ ɛ nwo zo fee.

¹¹Kɛkala, ɛlɛsoa me kɛ mengɔnga mengile me menle Ehabe kɛ, ‘Yilaegya ɛra’.

¹²Kɛ metu me bo la ɛnee Nyamenle Sunsum ne ɛye wɔ ɛvi ɛke ɛhɔ ɛleka mɔɔ menze a. Ehabe ba badwu ɛke na ɛnle ɛke a, ɔbahu me. Kakye kɛ ɔvi me ngakula nu, mezonle Ɛdɛnkɛma dedee a yeradwu ɛnɛ a.

¹³Me menle, ɔkɛyɛ kɛ ɛtɛtele nyɛleɛ mɔɔ menyɛle wɔ mekɛ mɔɔ Gyɛzɛbɛle kuhu Nyamenle kpɔmanvolɛma ne mɔ la, nee kɛ menzile menvale Nyamenle kpɔmanvolɛma ɛya ko menveale awolɛ mbɔne nu la. Mengyɛle bɛ nu nwiɔ na menvale bɛ abulanlu abulanlu menveale, memanle bɛ aleɛ nee nzule.

¹⁴Ɛse mengɔnga mengile Ehabe kɛ, ‘Yilaegya ɛra?’ Saa meyɛ ɛhye a, ɔbahu me!”

¹⁵Yilaegya buale ye kɛ, “Meka tease Tumivolɛ Ɛdɛnkɛma mɔɔ megyi ɔ nyunlu ɛke la kɛ, megyinla me gyakɛ anu ɛke; Ehabe banwu me ɛnɛ kenle ko ye.”

¹⁶Zɔhane ati Obadaya hɔhanle hilele Ehabe na Ehabe hɔle kɛ ɔkayia Yilaegya.

¹⁷Ehabe anye bobɔle Yilaegya ala la, ɔbizale ye kɛ, “Ɛnee ɛdawɔ Yilaegya, mɔɔ wɔgyegye Yizilayɛ maanle ye kpole la ɛhye ɔ?”

¹⁸Yilaegya buale kɛ, “Tɛ mame a megyegye Yizilayɛma a. Wɔmɔ, nee ɛ ze sua nu amra a ɛgyegye Yizilayɛma a. Ɔluakɛ bɛzie Nyamenle mɛla ne ahane na bɛhɔli awozonle Beeyale ne mɔ anzi.

¹⁹Zɔhane ati maa bɛhɔze Yizilayɛma amuala kɛ bɛrayia me wɔ Kamɛle Boka ne azo. Maa bozonle Beeyale ahɔmenle ɛya nna abulanlu ne nee bozonle raalɛ Ahyela ɛdeɛ ɛya nna ne mɔ mɔɔ Belemgbunli Raalɛ Gyɛzɛbɛle nee bɛ di nee bɛ no la ɛrayia me.”

²⁰Yemɔti Ehabe vɛlɛle Yizilayɛma nee ahɔmenle ne mɔ kɔsɔɔti manle bɛrayiale Kamɛle Boka ne azo.

²¹Yilaegya rale ɛlɔne ne amuala anyunlu na ɔzele bɛ kɛ, “Duzu ati a bɛ adwenle ɛngya na bɛyɛ bɛ adwenle nwiɔ nwiɔ ɛ? Saa Ɛdɛnkɛma a le Nyamenle a, bɛdoa ye; na saa bɛkɛzonle bozonle Beeyale noko a, ɛnee bɛdoa ye.” Na menli ne mɔ ampili ye.

²²Na Yilaegya zele ɛlɔne ne kɛ, “Medame, me ngome ala a mele Nyamenle kpɔmanvolɛ mɔɔ meha a; bozonle Beeyale ahɔmenle ne mɔ le ɛya nna abulanlu.

²³Bɛmaa yɛ nlankɛ nyinli nwiɔ na bɛmaa bozonle Beeyale ahɔmenle ne mɔ ɛva ko ɛpepɛ ɛgua ɛyɛzinli mɔɔ bɛkpula la azo. Bɛmmafa senle bɛgua nu. Medame noko mebabia ɛnlankɛ ko ne na meagua ye ɛyɛzinli mɔɔ bɛkpula la azo; menrɛdo senle nu.

²⁴Saa yɛyɛ ɛhye na ɔwie a akee bɛvɛlɛ bɛ nyamenle ne, na medame mebavɛlɛ Ɛdɛnkɛma me Nyamenle ne, na Nyamenle ne mɔɔ kɛrazɔ senle kɛyela nane ne la, yemɔ a le Nyamenle a.” Menli ne kɔsɔɔti zulole zolɛ kɛ “Ɛhɛe, yɛdie yɛto nuhua. Ɔdaye ne ala ɛne”

²⁵Yilaegya zele Beeyale ahɔmenle ne mɔ kɛ, “Bɛlumua bɛva nlankɛ ne mɔ ko na bɛbia ye, ɔluakɛ bɛmɛ a bɛ nwo zonle a. Bɛmmafa senle bɛgua bɛ ɛyɛzinli ne mɔɔ bɛhua la anu. Bɛzɛlɛ bɛ nyamenle ne bɛmaa ɔdo senle nu.”

²⁶Bɛvale bɛ ɛnlankɛ ne, bɛwiele ye bia, na bɛguale ye azukponle ne azo; bɛzɛlɛle bozonle Beeyale ne sumunli nwonlomɔ dedee ɔhɔkpulale sɛnzɛngyinla. Bɛvɛlɛle ye kɛ, “O Beeyale, tie yɛ ɛ!” Na bɛande ɛnelɛ biala, yɛɛ awie biala anzulo zolɛ. Bɛwuluwulule bɛbɔle azukponle ne anwo mgbɔlɔka, noko awie ambua bɛ.

²⁷Ɔdwule sɛnzɛngyinla la, Yilaegya golole bɛ nwo kɛ, “Bɛdea bɛvɛlɛ ye kpalɛ! Se ɔle nyamenle o! Ɔkɛyɛ kɛ ɔlɛdwenle anzɛɛ ɔlɛsɔho ɔ gyakɛ, anzɛɛ yedu adenle. Bie noko a ɛnee nafelɛ a ɛva ye kpole a, yemɔti ɔwɔ kɛ bɛtunwue ye.”

²⁸Amgba noko ahɔmenle ne mɔ deɛdeanle nuhua kpalɛ; bɛvale dadeɛ nee ɛtweneɛ bɛbodɛbodale bɛ nwo, kɛmɔ bɛ maamɛla ne se la, bɛmanle bɛ nwo amuala yɛle mogya ngome takaa zɛhae.

²⁹Sɛnzɛne ne kpalile la, bɛdeɛdeanle nuhua mgbole mgbole bie, noko bɛanyia mualɛ, bɛande nganeɛ yɛɛ awie ampili bɛ toonwo kɛyɛ sɛnzɛngyinla nee aledwolɛ muleɛ nu.

³⁰Akee Yilaegya zele ɛlɔne ne amuala kɛ, “Bɛbikye me nwo ɛke.” Menli ne bikyele ye. Ɔyɛle Ɛdɛnkɛma azukponle ne mɔɔ bɛzɛkyele ye la boɛ.

³¹ Akee Yilaegya sesale awolɛ bulu nee nwiɔ; ko biala gyi ɛkɛ maa Yizilayɛ abusua ekpunli ko. Mbusua bulu nee nwiɔ ɛhye a le Gyekɔbo amra ne mɔ. Gyekɔbo ɛhye a Ɛdɛnkɛma donle ye Yizilayɛ la.

³²Ɔvale awolɛ ne mɔ ɔzile azukponle ɔmanle Ɛdɛnkɛma. Akee ɔvunle kuma kuloonwu mɔɔ kɛli nzule litili bulu nee nna la wɔ nwolɛ.

³³Ɔhanle ɛyɛzinli ne mɔ ɔkpulale nwolɛ wɔ azukponle ne azo na ɔpepɛle nane ne ɔguale ɛyɛne ne azo. Na ɔzele menli ne kɛ, “Bɛsesa nzule mbuakɛ nna tetɛkɛɛ bɛgua ɛyɛne ne nee nane ne mɔɔ bɛbayela la azo.”

³⁴Bɛsesale bɛwiele la ɔzele bɛ kɛ bɛza angola nna bieko bɛgua zolɛ. Na amgba bɛyɛle ye zɔhane bieko. Yilaegya eza zele bɛ kɛ, “Bɛyɛ ye zɔhane bieko bɛmaa ɔyɛ nsa.” Na bɛyɛle ye zɔhane.

³⁵Nzule ne akee bule ɛyɛzinli ne abo na ɔdenrɛle ɔhɔguale kuma ne anu ɔyile ye tɛkɛɛ.

³⁶Ɔdwule mekɛ mɔɔ bɛfa bɛyɛ ewiazo nzɛlɛlɛ la, Yilaegya rale azukponle ne anwo na ɔzɛlɛle kɛ, “O Ɛdɛnkɛma, Ebileham, Ayezeke nee Yizilayɛ Nyamenle, maa bɛdabɛ mɔɔ bɛyia ɛke la ɛnwu ye ɛnɛ kenle ye kɛ wɔmɔ a ɛle Nyamenle wɔ Yizilayɛ a, yɛɛ wɔ sonvolɛ a le me, yɛɛ ɛdawɔ a wɔzoa me kɛ menyɛ ninyɛne ɛhye mɔ a.

³⁷Bua me, O Ɛdɛnkɛma! Bua me, maa menli mɔɔ ɛyia ɛke la ɛnwu kɛ wɔmɔ Ɛdɛnkɛma a ɛle Nyamenle a, na ɛkulo kɛ ɛ nee bɛ sia ba sua nu.”

³⁸Na ɛkɛ ne ala Ɛdɛnkɛma manle senle vi anwuma radɔle azubɔdeɛ ne anu yelale nane ne, ɛyɛne ne, awolɛ ne mɔ nee azɛlɛ ne manle nzule ne mɔɔ gyi kuma ne anu la sesanle bɔkɔɔ.

³⁹Menli ne amuala nwunle ɛhye la bɛbutubutule na bɛzele kɛ, “Ɛdɛnkɛma, yemɔ a ɔle Nyamenle a; Ɛdɛnkɛma, yemɔ a ɔle Nyamenle a.”

⁴⁰Akee Yilaegya zele kɛ, “Bɛhye bozonle Beeyale ahɔmenle ne mɔ kɔsɔɔti, bɛmmamaa ko bɔbɔ fi ɛsalɛ.” Bɛnwinwinle bɛ ɛkɛ ne na Yilaegya vale bɛ rale azule Kaehyɔn ne anloa, na ɔhunle bɛ muala.

⁴¹Akee Yilaegya zele Ehabe kɛ, “Kɔli na no, ɔboalekɛ mede nganeɛ mɔɔ kile kɛ ezule ɛlɛba aradɔ a.”

⁴² Yemɔti Ehabe hɔle kɛ ɔkali debie. Yilaegya vole hɔle Kamɛle Boka ne azo, ɔkponle ɔ nwo na ɔvale ɔ ti ɔzianle ɔ gyakɛ avinli.

⁴³Akee ɔzele ye sonvolɛ ne kɛ, “Kɔ ɛ nyunlu na to ɛ nye nyevile nu.” Sonvolɛ ne hɔle na ɔrahanle kɛ, “Mennwu debie wɔ nehane.” Yilaegya zele ye kɛ, “Kɔ zɔhane fane nsuu.”

⁴⁴Na sonvolɛ ne hɔle mɔɔ tɔ zolɛ fane nsuu ne la, ɔrahanle ɔhilele Yilaegya kɛ, “Menwu amungu ekyi bie mɔɔ ye kpole le kɛ sonla sa taakɛ la kɛ ɔlɛmaa ɔ nwo zo wɔ nyevile nu lɔ.” Yilaegya zele ye sonvolɛ ne kɛ, “Ka ɛ nwo kɔze Belemgbunli Ehabe kɛ, ɔziezie ye konle ehwili ne mɔɔ ɔtɛnla nu la na ɔmaa ɔ nwo ɛyɛ ndɛ ɔhɔ sua nu na anrɛɛ ezule kɛbo ye.”

⁴⁵Yeangyɛ biala yɛɛ maanle nu munlanle na eza ɔbɔle ɔ bo kɛ ɔtu anwoma a. Ezule ne dɔle kpole kpalɛ. Ehabe hanle ye ehwili ne hɔle Gyɛzɛlii nehane.

⁴⁶Mekɛ ne anu ɛnee Ɛdɛnkɛma Sunsum ne gyi Yilaegya anwo, yemɔti ɔbɛzale na ɔnriandile ɔlumuale Ehabe anyunlu ɔhɔle Gyɛzɛlii.