Read Nzema 1 Arl 19 Bible Online

1 Arl 19 - Nzema bible

1 Arl 19

¹Belemgbunli Ehabe hanle nyɛleɛ mɔɔ Yilaegya yɛle la amuala hilele Gyɛzɛbɛle, nee kɛ ɔzile ɔhunle ahɔmenle ne mɔ la.

²Ɛhye ati Gyɛzɛbɛle zoanle manle bɛhɔhanle bɛhilele Yilaegya kɛ, “Ɛhunlɛ mɔɔ wɔhu ahɔmenle ne mɔ la, saa ɛhyema bekezɛ ɛnee metɛkunle ɛdawɔ noko a awozonle ne mɔ ɛdua me kakɛ ɛgua me bie zo.”

³Na ɛzulolɛ hanle Yilaegya manle ɔ nee ye sonvolɛ ne bɛnriandile bɛhɔle Biyɛhyiba mɔɔ wɔ Dwuda la. Ɔgyakyile ye sonvolɛ ne wɔ Biyɛhyiba

⁴ na ɔdiale kenle ko adenle ɔhɔle fienemgbole ne anu lɔ, ɔhɔdɛnlanle baka bie abo na ɔzɛlɛle kɛ, “O Ɛdɛnkɛma, akee yeyɛ boɛ. Maa menwu na menle kpalɛ mendɛla egya mɔ.”

⁵Ɔhale baka ne abo ɔlafele; Nyamenle soanvolɛ radunwuele ye na ɔzele ye kɛ, “Dwazo na di debie.”

⁶Ɔmanle ɔ ti zo la ɔnwunle kɛ tata nee nzule dwora ko gyi ɔ ti sɔlɔ ɛkɛ. Ɔlile debie, ɔnlonle nzule ne na ɔdole ɔ ti ɛkɛ ne ɔlafele bieko.

⁷Nyamenle soanvolɛ ne rale bieko radunwuele ye zele ye kɛ, “Dwazo na di debie na anrɛɛ adenle ne kɛde wɔ somaa.”

⁸Yemɔti Yilaegya dwazole, ɔlile debie na ɔnlonle nzule; aleɛ zɔhane manle ye anwosesebɛ manle ɔdiale nɔɔzo nee ewiazo kenle abulanla ɔhɔdwule Nyamenle Boka ne mɔɔ bɛfɛlɛ ye Saenae la azo,

⁹na ɔhɔveale bolɛ bɔne bie anu ɔlale. Arɛlevilɛ nu ala Ɛdɛnkɛma dendɛle na ɔbizale Yilaegya kɛ, “Yilaegya, duzu yɛɛ ɛyɛ ye ɛke a?”

¹⁰ Ɔbuale kɛ, “Melɛtwe ɛdawɔ Tumivolɛ Ɛdɛnkɛma Nyamenle ɛ ti nungule, ɔluakɛ Yizilayɛma ɛgyakyi wɔ edwɛkɛ ne anzi ɛlilɛ, bɛbubu wɔ azukponle ne mɔ, na bɛhu wɔ kpɔmanvolɛma ne mɔ amuala; me ngomekye ala yɛɛ meha a, yɛɛ eza bɛlɛkpondɛ medame noko bɛahu me.”

¹¹Ɛdɛnkɛma zele Yilaegya kɛ, “Finde bagyinla me nyunlu wɔ boka ne azo.” Ɛdɛnkɛma akee razenle ɛkɛ, na anwoma bɔle na ahumu dule kpole bie manle awolɛ kpukekpukele, noko ɛnee Ɛdɛnkɛma ɛnle anwoma ne anu; ahumu ne anzi, azɛlɛ kpusule, noko ɛnee Ɛdɛnkɛma ɛnle azɛlɛkpusulɛ ne anu.

¹²Senle vindele azɛlɛ ɛkpusulɛ ne anzi, Ɛdɛnkɛma ɛnle senle ne anu. Na senle ne anzi akee ɛnelɛ nretee bie dendɛle.

¹³Yilaegya dele ɛnelɛ ne la ɔvale ye aguzo ne ɔkyikyile ɔ nyunlu, na ɔhɔgyinlanle bɔne ne anloa. Ɔdele kɛ ɛnelɛ bie ɛlɛtendɛ ahile ye kɛ, “Yilaegya, duzu yɛɛ ɛyɛ ye ɛke a?”

¹⁴Yilaegya buale kɛ, “Melɛtwe ɛdawɔ Tumivolɛ Ɛdɛnkɛma Nyamenle ɛ ti nungule, ɔluakɛ Yizilayɛma ɛkpo wɔ ngyekyeleɛ ne, bɛbubu wɔ azukponle ne mɔ na bɛhu wɔ kpɔmanvolɛma ne mɔ amuala; me ngomekye ala a meha a, yɛɛ eza bɛkpondɛ medame noko bɛahu me.”

¹⁵ Ɛdɛnkɛma zele ye kɛ, “Sia ɛ nzi kɔ Dɛmasekɛse fienemgbole ne anu lɔ, kɔkpokpa Hazeeyɛle nwole kɛ yemɔ a ɔbali belemgbunli wɔ Selea a.

¹⁶ Kpokpa Gyihu, Nemehyae ara nrenya ne noko nwole kɛ ɔbali Yizilayɛ belemgbunli, na kpokpa Hyeefate mɔɔ vi Ebɛle Mɛhola la ara nrenya Yilaehya ɔdaye nwole maa ɔyɛ Nyamenle kpɔmanvolɛ ɔli wɔ agya.

¹⁷Awie biala mɔɔ kɛnriandi kɛvi Hazeeyɛle abo la Gyihu bahu ye, mɔɔ kɛnriandi kɛvi Gyihu abo la Yilaehya bahu ye;

¹⁸ noko mebagyakyi menli apenle nsuu mɔɔ wɔ Yizilayɛ maanle ne anu mɔɔ ɛtɛsonlenle bozonle Beeyale ɛlɛ la.”

¹⁹Yilaegya vi ɛkɛ ne la ɔhɔnwunle Hyeefate ara Yilaehya kɛ ɔlɛso ɛya. Ɔlɛ nlankɛ ekpunli ekpunli bulu nee nwiɔ mɔɔ ngyela mbaka gyelegyela bɛ la kɛ bɛlɛwuduwudu azɛlɛ ne, na ɔdaye mumua ne ɔdoa nlankɛ ekpunli ne mɔɔ tɔ zolɛ bulu nee nwiɔ la. Yilaegya yɛle kɛ ɔse ɔ nwo la na ɔdole ye aguzo ne ɔguale Yilaehya anwo zo,

²⁰na Yilaehya gyakyile ye nlankɛ ne mɔ ɛkɛ na ɔnriandile ɔdoale Yilaegya ɔhanle ɔhilele ye kɛ, “Maa mengɔngɛla ɔmɔ nee egya na mearadoa wɔ.” Yilaegya buale ye kɛ, “Sia ɛ nzi ɛ. Mensisi ɛ nwo zo.”

²¹Yilaehya ziale na ɔrahunle ye nlankɛ ne mɔ na ɔvale ngyela mbaka ne mɔ ɔyɛle ɛyɛne ɔdonle nlankɛ ne mɔ ɔmanle menli ne lile. Akee ɔvile ɛkɛ na ɔhɔdoale Yilaegya kɛ ye boavolɛ.