Read Nzema 1 Arl 20 Bible Online

1 Arl 20 - Nzema bible

1 Arl 20

¹Selea Belemgbunli Bɛneheedade boɔboale ye ɛlɔnema mɔɔ wɔ ye belemgbunli maanle ne anu la amuala anloa. Arelemgbunli abulasa nee nwiɔ ne mɔɔ wɔ ɔ bo la kɔsɔɔti anloa yiale. Ɔlɛ ye mgbɔnwɔ nee konle ehwili mɔ. Ɔvale konle ɔhɔtetale suakpole Samɛlea amra kɛ ɔ nee bɛ ko.

²Ɔzoanle menli wɔ Samɛlea kɛ bɛhɔha bɛhile Yizilayɛ Belemgbunli Ehabe kɛ, “Medame Bɛneheedade, mese,

³‘Wɔ dwɛtɛ fufule o, wɔ ezukoa nvutuke o, ye finde fa bɛlɛ me. Akee wɔ mraalɛ anwofɛlɛko ne mɔ nee ɛ mra noko le me ɛdeɛ.’ ”

⁴Yizilayɛ belemgbunli ne buale ye kɛ, “Nana, me belemgbunli, mekponle mɔɔ wɔha la azo. Medame mumua ne mele wɔ ɛdeɛ, yɛɛ debie biala mɔɔ melɛ la le wɔ ɛdeɛ.”

⁵Soanvolɛma ne mɔ ziale razele Yizilayɛ belemgbunli ne kɛ, “Bɛneheedade se, ‘Menzoanle menli memanle bɛrazele wɔ kɛ ɛye wɔ dwɛtɛ fufule, wɔ ezukoa nvutuke, wɔ mraalɛ ngɛnlɛma ne mɔ nee ɛ mra ɛrɛlɛ me.’

⁶Noko akee ɛhyema, kɛyɛ bekezɛ, mebazoa me sonvolɛma meamaa bɛaranleɛnlea wɔ sua nu nee wɔ mgbanyima ne mɔ azua nu, na debie biala mɔɔ bɛ sa kɛdɔ zolɛ na bɛnea a ɔhyia la bɛava bɛarɛlɛ me.”

⁷Ɛhye manle Yizilayɛ belemgbunli vɛlɛle ye maanle ne anu mgbanyima na ɔbɔle bɛ amaneɛ kɛ, “Ayi mɔ, bɛnlea ngyegyelɛ bie mɔɔ Selea belemgbunli zo doa me a. Ɔzoanle kɛ bɛraha bɛhile me kɛ menva me mraalɛ nee me mra, me dwɛtɛ fufule nee me ezukoa nvutuke membɛlɛ ye; medame noko meamkpo.”

⁸Ye mgbanyima ne mɔ nee ye ezuavolɛ ne amuala zele ye kɛ, “Mmapili ye bɔbɔ na ɔ nwo ayɛ ye fɛ. Mmakponle!”

⁹Yemɔti ɔhanle ɔhilele Belemgbunli Bɛneheedade soanvolɛma ne kɛ, “Bɛhɔha bɛhile Nana, me belemgbunli ne kɛ, medie mɔɔ ɔlumuale ɔbizale la meto nu na nzinlii ɛdeɛ mɔɔ ɔlɛbiza la, ɔnrɛnyia ye.” Bɛneheedade soanvolɛma ne ziale hɔbɔle ye amaneɛ na bɛziale bɛrahanle bɛhilele Yizilayɛ belemgbunli ne kɛ,

¹⁰“Bɛneheedade se, ‘Saa me nee wɔ anli, meanva menli meammaa bɛambanzɛkye Samɛlea a, awozonle mɔɔ wɔ me maanle ye anu la ɛdua me kakɛ ɛgua me bie zo.’ ”

¹¹Yizilayɛ belemgbunli ne buale kɛ, “Bɛhɔze Bɛneheedade kɛ ɔho konle ne na ɔwie a yeadu ɔ nloa anu.”

¹²Mekɛ ne anu ɛnee Bɛneheedade nee ye arelemgbunli ne mɔ ɛlɛno nza wɔ avanye. Ɔdele nrɛlaleɛ ne la ɔhanle ɔhilele ye ɛlɔnema ne kɛ, “Awie biala ɛzia ɛhɔ ye ɛlɔne nu na bɛhɔva suakpole ne.”

¹³Nyamenle kpɔmanvolɛ bie rale Ehabe anwo ɛkɛ ne razele ye kɛ, “Ehabe, kɛ Ɛdɛnkɛma se la ɛne, ‘Wɔnwu ɛlɔne pinopino ɛhye ɔ? Mebaye bɛ meamaa wɔ ɛnɛ kenle ye, amaa wɔalie wɔado nuhua kɛ medame a mele Ɛdɛnkɛma a.’ ”

¹⁴Ehabe bizale ye kɛ, “ Ɛnee nwane mɔ a di bɛ ti ahɔho ali konim ne a?” Nyamenle kpɔmanvolɛ ne buale kɛ, “Ɛdɛnkɛma se, ‘Mgbavolɛ mɔɔ wɔ maanzinli ne mɔ safohyenle mgbanyinli ne mɔ abo la a baho ali konim ne a.’ ” Eza Ehabe bizale kɛ, “Nwane a le safohyenle kpanyinli mɔɔ balumua ado etu a?” Nyamenle kpɔmanvolɛ ne buale kɛ, “Ɛdawɔ ɔ.”

¹⁵Belemgbunli Ehabe vɛlɛle ye ɛlɔnema mɔɔ wɔ maanzinli ne mɔ safohyenlema ne mɔ abo, na bɛrale la, ɛnee bɛlua menli ɛya nwiɔ abulasa nee nwiɔ. Akee ɔvɛlɛle Yizilayɛ ɛlɔnema ne amuala. Bɛ nloa le apenle nsuu.

¹⁶Yizilayɛ ɛlɔnema ne dule bɛ bo ewiazo ketekete ne kɛ bɛkɔ Bɛneheedade nee ye ɛlɔnema ne anwo zo. Mekɛ ne anu ɛnee Bɛneheedade nee ye arelemgbunli abulasa nee nwiɔ ne mɔɔ boka ɔ nwo la ɛnlo nza ɛbo zɛhae ala wɔ avanye ne.

¹⁷Mgbavolɛ mɔɔ wɔ maanzinli ne mɔ safohyenle mgbanyinli ne mɔ abo la lumuale vindele. Bɛneheedade zoanle menli kɛ bɛhɔkpɔla adenle zo na ye menli mɔɔ ɔzoanle bɛ la ziale rahanle hilele ye kɛ, “Nana, ɛlɔne ɛkpuke Samɛlea ɛlɛba.”

¹⁸Na ɔzele bɛ kɛ, “Saa bɛlɛba ye anzonudwolɛ nu o, bɛlɛba ye konle zo o, bɛhye bɛ anyewɔzo.”

¹⁹Maanzinli ne mɔ anu mgbavolɛ ɛlɔnema ne bɔle konle ne abo na Yizilayɛma rabokale bɛ.

²⁰Biala hunle ye Selea sonla ɛdeɛ ne mɔɔ ɔ nee ye bɔle ye zo la. Seleama ne mɔ angola nuhua sɔ na bɛnriandile. Yizilayɛma voanle bɛ. Bɛneheedade dɛnlanle ye ɛkpɔnwɔ zo ɔ nee ɛkpɔnwɔ zo tɛnlavolɛma ne bie mɔ nriandile.

²¹Yizilayɛ Belemgbunli Ehabe voanle bɛ ndinlizo, ɔhyele mgbɔnwɔ nee konle ehwili ne bie mɔ ɔzɛkyele bɛ na ɔhunle Seleama dɔɔnwo kpalɛ.

²²Nyamenle kpɔmanvolɛ ne hwenle bikyele Yizilayɛ belemgbunli ne na ɔzele ye kɛ, “Sia kɔboɔboa ɛ nwo; nea wɔ ɛlɔnema ne mɔ maa bɛboɔboa bɛ nwo. Ɔluakɛ Selea belemgbunli ne bava konle aradoa wɔ wɔ nyenyensuo mekɛ ne anu.”

²³Selea mgbanyima ne hanle hilele bɛ belemgbunli ne kɛ, “Deɛ mɔɔ yemɔti yeangola Yizilayɛma la a le kɛ, bɛ nyamenle ne mɔ le awoka zo nyamenle. Maa yɛ nee bɛ ɛbɔ ye zo wɔ azɛlɛ sɛsɛ zo na ɛbanwu kɛ bɛnrɛhola yɛ.

²⁴Akee yɛ ɛhye. Kakyi arelemgbunli ne mɔ; mmamaa bɛdi menli ne ati bieko, na fa safohyenlema siezie bɛ bo zo ne mɔ.

²⁵Akee kpondɛ ɛlɔnema mɔɔ kɛyɛ kɛ mɔɔ yɛminli bɛ la abo zo, mgbɔnwɔ nee konle ehwili mɔ amuala, na akee maa yɛhɔzɔ bɛ wɔ azɛlɛ mɔɔ la aze la azo na ɛbanwu kɛ yɛbabila bɛ teledede zɛhae.” Belemgbunli Bɛneheedade kponlenle na ɔlile ye mgbanyima ne mɔ ɛdeɛ ne azo.

²⁶Wɔ nyenyensuo mekɛ ne mɔlebɛbo, Bɛneheedade boɔboale ye ɛlɔnema anloa na ɔhɔdoale Yizilayɛma wɔ suakpole Efɛke azo kɛ bɛ nee bɛ kaho.

²⁷Yizilayɛma dole ɛsalɛ vɛlɛle bɛ ɛlɔnema na bɛmanle bɛ konle ninyɛne. Bɛraguale ye ekpunli ngyikyi nwiɔ kɛ asɛɛ mbɔnkye la kɛ bɛ nee Seleama ne mɔ ko. Seleama somaa vale ɛleka wienyi ne amuala. Bɛ nee Yizilayɛma anye bɔ zolɛ.

²⁸Nyamenle kpɔmanvolɛ rahanle hilele Yizilayɛ belemgbunli ne kɛ, “Ɛdɛnkɛma se, ‘Seleama se mame mele awoka zo Nyamenle na menle azɛlɛ mɔɔ la aze la Nyamenle. Yemɔti menli pemgbenleamgbe ne mɔɔ wɔnwu bɛ wɔ nehane la, memaa Yizilayɛma abila bɛ teledede zɛhae na wɔanwu kɛ amgba medame a mele Ɛdɛnkɛma a.’ ”

²⁹Seleama nee Yizilayɛma guale ye ekpunli ekpunli dedee kenle nsuu. Kenle nsuu ne azo a konle dele a; Yizilayɛma hunle Selea ɛlɔnema mɔɔ dua aze la apenle ngoko ɛya wɔ kenle ko ne.

³⁰Selea ɛlɔnema ne mɔɔ hale la nriandile hɔle suakpole Efɛke azo na suakpole ne bane ne dele guale Selea ɛlɔnema apenle ngoko abulanwiɔ nee nsuu anwo zo hunle bɛ. Bɛneheedade ɔdaye ɔnriandile ɔhɔveale sua bie anu wɔ suakpole ne azo.

³¹Ye sonvolɛma ne mɔ hanle hilele ye kɛ, “Nana, yɛde kɛ Yizilayɛ arelemgbunli se anwunvɔne; bɛmaa yɛheda ɛrele na yɛbɔ file yɛgua yɛ kɔme yɛhɔnwu Yizilayɛ belemgbunli ne kɛ ɔkɛnwu wɔ anwunvɔne na yeangu wɔ.”

³²Yemɔti bɛhedale ɛrele, bɛbɔle file bɛguale bɛ kɔme. Akee bɛhɔhanle bɛhilele Yizilayɛ belemgbunli ne kɛ, “Wɔ akɛlɛ Bɛneheedade se ɔkpa wɔ kyɛlɛ na ɛmmaku ye.” Ehabe bizale kɛ, “Bɛneheedade tɛte aze ɔ? Ɔle me diema!”

³³Ɛnee Bɛneheedade menli ne mɔ ɛlɛsɛlɛ kɛ belemgbunli Ehabe kɛmaa bɛ mualɛ kpalɛ, yemɔti ɔ nloa ampe na bɛabua ye kɛ, “Ɛ diema Bɛneheedade wɔ ɛkɛ.” Ehabe zele kɛ, “Bɛhɔva ye bɛrɛla.” Bɛneheedade rale la Ehabe zele ye kɛ ɔravo ye ehwili ne anu.

³⁴Bɛneheedade hanle hilele Ehabe kɛ, “Mebazia meava azuamgbole mɔɔ egya zale ɛ ze liele la amuala meamaa wɔ. Eza mebamaa wɔabukebuke gualilɛ ɛleka ɛleka wɔ Dɛmasekɛse, kɛmɔ egya yɛle ye wɔ Samɛlea la.” Ehabe buale kɛ, “Saa wɔze zɔ a ɛnee mebadwula wɔ.” Ɔ nee ye yɛle ngyehyɛlɛ bɛhyele ɔ bo na akee ɔdwulale ye kɛ ɔhɔ.

³⁵Ɛdɛnkɛma manle Nyamenle kpɔmanvolɛ ekpunli ne anu sonla ko hɔzele ɔ gɔnwo kpɔmanvolɛ ko kɛ, “Mebodo wɔ, bɔ me!” Na ɔ gɔnwo ne ambɔ ye.

³⁶ Zɔhane ati ɔhanle ɔhilele ye kɛ, “Wɔanli Ɛdɛnkɛma anloa edwɛkɛ zo, yemɔti saa ɛvi me nwo ɛke ɛye ɛ nwo ala a, awenade bahye wɔ.” Amgba ɔyele ɔ nwo ɛkɛ ne ala la ɔ nee awenade yiale na awenade ne hunle ye.

³⁷Nyamenle kpɔmanvolɛ ko ne ala hɔyiale awie fofolɛ wɔ adevinli na ɔzele ye kɛ, “Ayi, bɔ me!” Nrenya ne finle ye manle ɔbodale.

³⁸Akee Nyamenle kpɔmanvolɛ ne vale ɛdanlɛ bɔle ɔ nye bɔlɛ mɔɔ bɛnnwu ye sonla holɛ la na ɔhɔgyinlanle adenle nu ɔhendɛle belemgbunli ne.

³⁹Belemgbunli ne dwule ɛkɛ ne la, Nyamenle kpɔmanvolɛ ne deanle nu vɛlɛle ye kɛ, “Wɔ akɛlɛ, mengɔle konle ne anloa bie, na ɛlɔnema ne ko vale nrenya bie manle me na ɔzele me kɛ, ‘Fa nrenya ɛhye sie; saa wɔannea ye boɛ na ɛmaa ɔnriandi a, ɛbava ɛ ti kanrɛlɛ ne wɔadua anzɛɛ ɛbadua dwɛtɛ fufule apenle nsa.’

⁴⁰Na kɛmɔ wɔ akɛlɛ, me nwo hyelele me na medi akɔneaba la, sonla ne ɛnriandi.” Belemgbunli ne buale ye kɛ, “Ɛ ngome wɔbua ɛ nwo ndɛne. Ɛbadua nwolɛ ndeanlɛ ne.”

⁴¹Na ɛkɛ ne ala Nyamenle kpɔmanvolɛ ne akee yele ɔ nyunlu ɛdanlɛ ne, na belemgbunli ne nwunle kɛ Nyamenle kpɔmanvolɛma ne mɔ bie ɔ.

⁴²Nyamenle kpɔmanvolɛ ne zele belemgbunli ne kɛ, “Kɛ Ɛdɛnkɛma se la ɛne, ‘Wɔmaa sonla ne mɔɔ meha kɛ bɛhu ye la ɛnriandi, yemɔti ɛbava wɔ ngoane wɔadua. Eza wɔmaa ye ɛlɔnema ne mɔɔ ɔwɔ kɛ bɛsɛkye bɛ la ɛvi ɛsalɛ, yemɔti, ɔwɔ kɛ bɛsɛkye wɔ ɛlɔnema ɛdeɛ ne.’ ”

⁴³Yizilayɛ belemgbunli ne hɔle sua nu wɔ Samɛlea, na ɛnee ye adwenle ɛha ɛbɔ nu kpalɛ na ɔ rɛle ɛbɔ.