Read Nzema 1 Arl 5 Bible Online

1 Arl 5 - Nzema bible

1 Arl 5

¹Belemgbunli Helam mɔɔ vi Taya la agɔnwo kokye a le Devidi, yemɔti mekɛ mɔɔ ɔdele kɛ bɛva Sɔlɔmɔn bɛli ebia ne la, ɔzoanle ye sonvolɛma wɔ ɔ nwo ɛkɛ.

²Na Sɔlɔmɔn vale nrɛlaleɛ manle bɛhɔmanle ye kɛ,

³“Ɛdawɔ ɛze kɛ egya Devidi angola anzi sua ammaa Ɛdɛnkɛma yɛ Nyamenle ne, ɔboalekɛ ye kpɔvolɛma mɔɔ ɛnee ɛbɔ ɛyia ye la vale konle gyegyele ye dɔɔnwo na nzinlii, ɔdaye Ɛdɛnkɛma ɔhonle ɔmanle ye na ɔlile bɛ muala bɛ nwo zo konim.

⁴Kɛkala, mame melɛ anzonudwolɛ; Ɛdɛnkɛma ɛmaa me nzo nu ɛdwo me, mende kpɔvolɛ biala nganeɛ yɛɛ esiane biala ɛtɛbale.

⁵ Zɔhane ati menyia adwenle kɛ mesi sua meamaa Ɛdɛnkɛma me Nyamenle ne, kɛmɔ Ɛdɛnkɛma ɔdaye ɔ nloa edwɛkɛ se la. Ɔzele egya Devidi kɛ, ‘Ɛ ra ne mɔɔ mebava ye meazie wɔ ebia ne azo la bazi me Ɛzonlenlɛ Sua ne.’

⁶Yemɔti maa bɛpɛ Lɛbanɔn sida mbaka bɛmaa me. Me sonvolɛma baraboka wɔ menli ɛdeɛ ne mɔ mɔɔ ɛmaa bɛapɛ mbaka ne bɛamaa me la anwo. Mebadua wɔ menli ne mɔ ɛkpabɔlɛ kakɛ biala mɔɔ ɛkɛpɛ ɛkɛmaa me la; ɔluakɛ yɛ maanle ye anu, ɛdawɔ ɛze kɛ yɛnlɛ awie biala mɔɔ ze dubinli mbaka ɛpɛlɛ nye zo la kɛ Saedɛnema ala.”

⁷Helam dele Sɔlɔmɔn nrɛlaleɛ ne la ɔ nye liele kpole na ɔhanle kɛ, “Yɛyɛ Ɛdɛnkɛma mo kɛ yehyɛ Devidi ralɛ nrenya nrɛlɛbɛvolɛ mɔɔ ɛnɛ ɛlɛsie ɛlɔne kpole ɛhye a.”

⁸Na Helam vale nrɛlaleɛ hɔmanle Sɔlɔmɔn kɛ, “Mede wɔ nrɛlaleɛ ne. Mebali sida mbaka nee sepelɛse mbaka biala mɔɔ ɛkpondɛ la anwo gyima.”

⁹Me menli ne bahwe mbaka ne mɔ vi Lɛbanɔn aragua ɛnweanloa na bɛakyekye bɛ avile bɛava bɛalua nyevile zo bɛahɔgua ɛleka mɔɔ ɛkɛhile la, na ɛ sa aha bɛ. Ɔwɔ kɛ ɛdawɔ noko ɛboa me ɛmaa bɛfa aleɛ bɛbɛlɛ me nee me awuke nu amra.

¹⁰Ɔlua ngyehyɛlɛ ɛhye azo Helam manle bɛhɔmanle Sɔlɔmɔn sida nee sepelɛse mbaka biala mɔɔ ɔkpondɛ la

¹¹yɛɛ Sɔlɔmɔn noko manle bɛhɔmanle ye abɛlɛ mɔɔ to tone nu tɔno apenle nwiɔ nee ɔlivi nwole litili apenle ngoko ɛya nna.[4] Sɔlɔmɔn vale aleɛ ne hɔmanle Helam ɛvolɛ ɛvolɛ.

¹²Ɛdɛnkɛma lile ye ɛwɔkɛ zo na ɔmanle Sɔlɔmɔn nrɛlɛbɛ kpole kpalɛ, yemɔti anzonudwolɛ rale Helam nee Sɔlɔmɔn avinli na bɛ mu nwiɔ bɛyɛle agɔnwolɛyɛlɛ nwo ngyehyɛlɛ.

¹³Belemgbunli Sɔlɔmɔn manle bɛvale menli apenle ngoko abulasa bɛvile Yizilayɛ maanle ne anu amuala manle bɛrayɛle mianleranu gyima.

¹⁴Ɔvale menli ne ɔwulale Adonaelam asa anu. Ɔhyɛle bɛ nu ekpunli nsa, ekpunli ko biala le menli apenle bulu yɛɛ ɔhyehyɛle ye mɔɔ saa ekpunli ko kɔdi siane ko wɔ Lɛbanɔn a ɛnee yerali siane nwiɔ wɔ sua nu.

¹⁵Sɔlɔmɔn lɛ menli apenle ngoko abulatwɛ mɔɔ kpukekpuke awolɛ wɔ awoka ne mɔ azo, yɛɛ menli apenle ngoko abulasuu mɔɔ soa awolɛ ne a.

¹⁶Menli apenle nsa ɛya nsa a nea gyima ne azo a.

¹⁷Belemgbunli ne manle bɛkpukekpukele awolɛ mgbole mɔɔ anwo hyia na bɛsonle bolɛ la kɛ bɛva bɛwula sua ne abo.

¹⁸Sɔlɔmɔn menli ne nee Helam menli ne yɛɛ menli bie mɔɔ vi Babelɔn la hanle bɔle nu zieziele mbaka nee awolɛ ne mɔ anwo kɛ bɛfa bɛazi Ɛzonlenlɛ Sua ne.