Read Nzema 1 Arl 6 Bible Online

1 Arl 6 - Nzema bible

1 Arl 6

¹Yizilayɛma vile Yigyibiti la, ye ɛvolɛ ɛya nna abulatwɛ ne azo mɔɔ ɛnee Sɔlɔmɔn ɛli ɛvolɛ nna wɔ ebia zo la, ɛvolɛ ne anu siane nwiɔ ne mɔɔ bɛfɛlɛ ye “Zive” la anu yɛɛ Sɔlɔmɔn bɔle ɔ bo kɛ ɔsi Ɛdɛnkɛma Ɛzonlenlɛ Sua ne a.

²Sua ne akunlu tendenle le mita abulanwiɔ nee nsuu, ye tɛtɛlɛ le mita ngɔnla yɛɛ ye anwumahɔlɛ le mita bulu nee nsa nee foa ko.

³Sua ne anyunlu abenlana ne tɛtɛlɛ le mita nna nee foa ko yɛɛ ye tendenle le mita ngɔnla, kɛ ɛleka nwuanzanwuanza ne ɛdeɛ ne la.

⁴Adokule mɔɔ akunlu buke noko ye findezo le feɔ la gugua Ɛzonlenlɛ Sua ne tɛbanu nee ye tɛbanu bane ne mɔ anwo.

⁵Wɔ Ɛzonlenlɛ Sua ne tɛbanu nee ye tɛbanu yɛɛ ɔ nzi, bɛzile sua nzɛzo nsa bɛzɔle ye bane ne mɔ. Nzɛzo ko biala anwumahɔlɛ le mita nwiɔ nee ekyi.

⁶Sua ne abo ekpumgbunli ne mɔ, ko biala tɛtɛlɛ le mita nwiɔ nee ekyi, avinli nzɛzo ekpumgbunli ne mɔ le asɛɛ mita nsa yɛɛ zolɛ ɛdeɛ ne mɔ le mita nsa nee ekyi. Mɔɔ Ɛzonlenlɛ Sua ne bane ne mɔ ɛlɛkɔ anwuma la, ɛnee ye ɛzamo ne azo ɛlɛte. Bɛyɛle ye zɔhane amaa sua nzɛzo ko biala mɔɔ bɛkɛzi la zolɛ mbaka ne mɔ anwolowolo Ɛzonlenlɛ Sua ne bane ne mɔ anu, na bɛagua bane ne mɔ azo.

⁷Awolɛ ne mɔɔ bɛzieziele nwolɛ wɔ ɛleka mɔɔ bɛdule bɛ la a bɛvale bɛzile sua ne a. Zɔhane ati awie ande kɛ bɛlɛfa hamenle anzɛɛ akuma anzɛɛ bulalɛ bie bɛabɔ debie zo wɔ mekɛ mɔɔ bɛlɛsi Ɛzonlenlɛ Sua ne la.

⁸Sua ne mɔɔ wɔ ɔ bo la anlenkɛ ne di kɔ Ɛzonlenlɛ Sua ne nyevile nu yɛɛ ɛkɛ ne a bɛfo kpolike bɛkɔ avinli nee ɔ ti zo ekpumgbunli ne mɔ anu a.

⁹Akee Belemgbunli Sɔlɔmɔn zile sua ne wiele. Ɔvale sida mbaka mgbunla nee ye ndaboa ɔzɛle ɔ nye.

¹⁰Sua nzɛzo nsa ne mɔɔ bɛdole ye wɔ Ɛzonlenlɛ Sua ne anwo la, ko biala anwumahɔlɛ le mita nwiɔ nee ekyi, yɛɛ bɛvale sida mgbunla a bɛzɔle ye nee Ɛzonlenlɛ Sua ne a.

¹¹Ɛdɛnkɛma zele Sɔlɔmɔn kɛ,

¹²“Sua ye mɔɔ ɛlɛsi la, saa ɛdua me adenle ne anu, ɛdi me mɛla ne mɔ azo, ɛfa ɛsie na ɛfa ɛbɔ wɔ ɛbɛla a, yemɔ me nee wɔ balua, kɛmɔ me ɛwɔkɛ ne mɔɔ membɔle ɛ ze Devidi la se la.

¹³Eza me nee Yizilayɛma balua yɛɛ me rɛle ɛnrɛvi bɛ ɛlɛ.”

¹⁴Akee Sɔlɔmɔn wiele sua ne si.

¹⁵Sɔlɔmɔn vale sida ndaboa zɛle Ɛzonlenlɛ Sua ne akunlu bane ne mɔ anwo ɔvi ɔ bo azɛlɛ nwo toonwo ɔdwule anwuma, ɔhedale aakɔ ne mɔ anye. Akee ɔvale sepelɛse ndaboa ɔzɛle azɛlɛ ne anwo.

¹⁶Eza ɔvale sida ndaboa ɔpɛle sua ne anu wɔ sua ne abo nehane, mɔɔ ye tɛtɛlɛ le mita ngɔnla la na ɔvale ɛkɛ ne ɔyɛle Nwuanzanwuanza Nu Nwuanzaanwu Ɛleka.

¹⁷Sua ne findezo ne ekpumgbunli ne mɔɔ wɔ Nwuanzanwuanza Nu Nwuanzaanwu Ɛleka ne anyunlu la tendenle le mita bulu nee mɔtwɛ.

¹⁸Bɛzele ninyɛne mɔɔ le kɛ awa nee ndotolo mɔɔ ɛkpakyekpakye la wɔ sida mbaka ne mɔɔ bɛvale bɛzɛle sua ne anu la azo. Bɛvale sida ndaboa bɛzɛle sua ne anu, amaa awie annwu awolɛ ne mɔ mɔɔ bɛvale bɛzile sua ne la ko bɔbɔ.

¹⁹Azubɔlɛ ɛleka ne wɔ sua ne abo nehane, na ɛkɛ ne a bɛvale Ɛdɛnkɛma Ngyekyeleɛ Ɛlɛka ne bɛhɔziele a.

²⁰Azubɔlɛ ɛleka ne tendenle le mita ngɔnla, ye tɛtɛlɛ le mita ngɔnla yɛɛ ye anwumahɔlɛ noko le mita ngɔnla. Bɛholole ezukoa nvutuke bɛguale ye bane ne mɔ anwo, yɛɛ bɛvale sida ndaboa bɛbobɔle azukponle ne anwo.

²¹Sɔlɔmɔn vale ezukoa nvutuke fɔlele Ɛzonlenlɛ Sua ne anu, ɔvale ezukoa nvutuke nwɔnzɔnwɔnzɔ ɔsosɔle sua ne akunlu ɛleka nwuanzanwuanza ne anlenkɛ ne anloa, na ɔvale bie ɔfɔlele ɛleka nwuanzanwuanza ne.

²²Ɔvale ezukoa nvutuke ɔguale sua ne akunlu bane ne mɔ kɔsɔɔti anwo toonwo ɔyiale. Azukponle ne noko mɔɔ wɔ Nwuanzanwuanza Nu Nwuanzaanwu Ɛleka ne la, ɔholole ezukoa nvutuke ɔguale nwolɛ.

²³Ɔmanle bɛvale ɔlivi baka bɛzele abɔdeɛ nwiɔ mɔɔ lɛ ndɛbalɛ, mɔɔ ko tendenle le mita nna nee foa ko la bɛziele Nwuanzanwuanza Nu Nwuanzaanwu Ɛleka ne.

²⁴Abɔdeɛ nwiɔ ne tendenle nee bɛ mgbole sɛ. Ko biala lɛ ndɛbalɛ nwiɔ mɔɔ ko tendenle le mita nwiɔ nee ekyi la. Ɛhye ati ɔvi ndɛbalɛ ko ati mɔɔ kɔkpula ndɛbalɛ ko ne noko ati la le mita nna nee foa ko.

²⁷Bɛziele bɛ mu nwiɔ nwolɛ wɔ Nwuanzanwuanza Nu Nwuanzaanwu Ɛleka ne, mɔɔ ko biala andɛba ko kpula bane yɛɛ bɛ mu nwiɔ bɛ ndɛba ne mɔ ati nee ɔ ti kpula zolɛ wɔ sua ne avinli sɛsɛ.

²⁸Ɔholole ezukoa nvutuke ɔguale abɔdeɛ nwiɔ ne mɔɔ lɛ ndɛbalɛ la anwo.

²⁹Akee ɔmanle bɛzele abɔdeɛ mɔɔ lɛ ndɛbalɛ, mrɛlɛ nee mbaka ndotolo mɔɔ ɛkpakyekpakye la wɔ sua ne akunlu ekpumgbunli ne nee findezo ekpumgbunli ne anu bane ne mɔ anwo. Azɛlɛ ne mɔ anwo noko, bɛyɛle bɛ ezukoa nvutuke sɔɔnwo.

³¹Ɔvale ɔlivi baka ndaboa ɔbobɔle anlenkɛ ɔduale Nwuanzanwuanza Nu Nwuanzaanwu Ɛleka ne ekpumgbunli ɛdeɛ ne anuhɔlɛ ne. Anlenkɛ ne bɔ nwo nwiɔ yɛɛ ɔ ti zo yɛ kɛ ɔyɛ twɔlɔɔnwo la.

³²Bɛzele ninyɛne mɔɔ le kɛ abɔdeɛ mɔɔ lɛ ndɛbalɛ, mrɛlɛ nee ndotolo mɔɔ ɛkpakyekpakye la wɔ nlenkɛ ne mɔ anwo, yɛɛ akee bɛholole ezukoa nvutuke bɛguale zolɛ.

³³Bɛvale ɔlivi baka a bɛbobɔle findezo ekpumgbunli ne anlenkɛ felɛmo ne a.

³⁴Anlenkɛ mɔɔ bɔ nwolɛ nwiɔ na ko bɔ nwolɛ nwiɔ mɔɔ bɛbubu a ɔyɛ boɛ, na bɛvale sepelɛse baka ndaboa a bɛbobɔle la a dua ye a.

³⁵Adwinli mɔɔ bɛlile bɛguale nwolɛ la a le abɔdeɛ nwiɔ mɔɔ lɛ ndɛbalɛ la, mrɛlɛ nee ndotolo, yɛɛ bɛholole ezukoa nvutuke bɛguale zolɛ.

³⁶Bɛzile edwɛkɛlilɛ ɛleka wɔ Ɛzonlenlɛ Sua ne anyunlu na bɛliele nwolɛ bane bɛyiale. Sua ne bane ne mɔ, bɛvale awolɛ bɛdole ye fadum ɛhonlone nsa yɛɛ bɛvale sida mbaka bɛdoale zolɛ ɛhonlone ko.

³⁷Mekɛ mɔɔ Sɔlɔmɔn ralile ebia ne la, ye ɛvolɛ nna ne azo siane ne mɔɔ bɛfɛlɛ ye “Zive” la anu yɛɛ bɛwulale Ɛzonlenlɛ Sua ne aze a.

³⁸Ye ɛvolɛ bulu nee ko ne anu, siane ne mɔɔ tɔ zolɛ mɔtwɛ, mɔɔ bɛfɛlɛ ye “Buulu ” la anu a bɛwiele sua ne anwo debie biala yɛ na bɛyele bɛ sa nwolɛ a, kɛmɔ bɛhyehyɛle la pɛpɛ. Sɔlɔmɔn vale ɛvolɛ nsuu a zile Ɛzonlenlɛ Sua ne a.