Read Nzema 1 Arl 8 Bible Online

1 Arl 8 - Nzema bible

1 Arl 8

¹Akee Belemgbunli Sɔlɔmɔn yiale Yizilayɛ mgbanyima nee abusua ekpunli biala anu kpanyinli nee bɛ ze mɔ abo zo amra adile adile ne mɔ wɔ Gyɛlusalɛm kɛ bɛkaye Ɛdɛnkɛma Ngyekyeleɛ Ɛlɛka ne wɔ Devidi sua zo Zayɔn bɛara Ɛzonlenlɛ Sua ne anu.

²Siane nsuu ne mɔɔ bɛfɛlɛ ye “Ɛtanem” mɔɔ bɛdi Kpɔda Bo Ɛdɛnlanlɛ Ɛvoyia ne wɔ nu la yɛɛ Belemgbunli Sɔlɔmɔn yiale Yizilayɛma amuala a.

³Yizilayɛ adile adile ne mɔ amuala rale na sɛlɛvolɛma ne mɔ ramanle Ɛdɛnkɛma Ngyekyeleɛ Ɛlɛka ne zo

⁴na bɛvale bɛvindele. Sɛlɛvolɛma ne nee Livaema ne mɔ yeyele Ndanlɛ Sua ne mɔɔ ɛnee bɛyia nu la nee nuhua ninyɛne nwuanzanwuanza ne mɔ amuala.

⁵Belemgbunli Sɔlɔmɔn nee Yizilayɛma amuala yiale Ngyekyeleɛ Ɛlɛka ne anyunlu na bɛhunle mboane nee nlankɛ dɔɔnwo kpalɛ bɛbɔle azu.

⁶Akee sɛlɛvolɛma ne mɔ vale Ɛdɛnkɛma Ngyekyeleɛ Ɛlɛka ne raziele Ɛzonlenlɛ Sua ne Nwuanzanwuanza Nu Nwuanzaanwu Ɛleka ne wɔ abɔdeɛ nwiɔ ne mɔɔ lɛ ndɛbalɛ la abo.

⁷Abɔdeɛ nwiɔ ne mɔ andɛba ne mɔ keda ɛlɛka ne nee mbaka mɔɔ bɛvale bɛzoale la azo.

⁸Mbaka ne mɔ wowale; saa awie gyi Ɛzonlenlɛ Sua ne anu Nwuanzanwuanza Nu Nwuanzaanwu Ɛleka ne anuhɔlɛ ne a yɛɛ ɔnwu bɛ ti a, na saa ɔgyi ɛleka gyɛne biala a ɔnnwu bɛ. Bɛtɛbɔ ɛkɛ ne ɛnɛ nee ɛnɛ ala.

⁹ Debie gyɛne biala ɛnle ɛlɛka ne anu kɛ awolɛ ndɛbandɛba nwiɔ ne mɔɔ Mosisi vale guale nu wɔ Saenae Boka ne azo, ɛleka mɔɔ Ɛdɛnkɛma nee Yizilayɛma yɛle ngyekyeleɛ ne la ala. Bɛyɛle ngyekyeleɛ ne wɔ mekɛ mɔɔ bɛvi Yigyibiti bɛlɛba la.

¹⁰ Mekɛ mɔɔ sɛlɛvolɛma ne vi Nwuanzanwuanza Nu Nwuanzaanwu Ɛleka ne vindele la, amungu nwohyee mɔɔ kile Ɛdɛnkɛma anyunlunyia la rayile Ɛzonlenlɛ Sua ne tɛkɛɛ.

¹¹Ɛdɛnkɛma anyunlunyia ne rayile Ɛzonlenlɛ Sua ne tɛkɛɛ mɔɔ ɛnee akee sɛlɛvolɛma ne mɔ ɛngola nu wolo kɔyɛ bɛ gyima ne a.

¹² Na Sɔlɔmɔn yɛle nzɛlɛlɛ ɛhye: “Ɛdɛnkɛma, wɔbɔ sɛnzɛne ne wɔzie anwomanyunlu noko ɛse ɛbadɛnla awozinli kabii nu.

¹³Mezi Ɛzonlenlɛ Sua bedevinli ɛhye memaa wɔ, kɛ wɔ ɛleka mɔɔ ɛbadɛnla kpɔkpɔ.”

¹⁴Akee Belemgbunli Sɔlɔmɔn hakyile ɔ nye menli ne anwo na ɔzɛlɛle Nyamenle nyilalɛ ɔmanle bɛ na

¹⁵ɔzele bɛ kɛ, “Bɛye Yizilayɛ Ɛdɛnkɛma Nyamenle ne ayɛlɛ. Yeli ye ɛwɔkɛ mɔɔ ɔbɔle Egya Devidi la azo. Ɔzele ye kɛ,

¹⁶ ‘Sumunli kɛ menyele me menli Yizilayɛma menvile Yigyibiti la, metɛyele suakpole biala wɔ abusua ekpunli biala maanzinli nu kɛ bɛzi sua bɛmaa me na me duma adɛnla ɛkɛ; noko meye Devidi kɛ yemɔ yɛɛ ɔzie me menli ne na ɔnlea bɛ nwo zo a.’ ”

¹⁷ Belemgbunli Sɔlɔmɔn hɔle zolɛ hanle kɛ, “ Ɛnee ɔwɔ Egya Devidi ahonle nu kɛ ɔkɛzi sua ɔkɛmaa Yizilayɛ Ɛdɛnkɛma Nyamenle ne.

¹⁸Na Ɛdɛnkɛma zele ye kɛ, ‘Ɔle debie kɛnlɛma kɛ wɔdwenle nwolɛ kɛ ɛsi sua wɔamaa me a.

¹⁹ Noko tɛ wɔmɔ a ɛbazi a. Ɛ ra, ɛdawɔ ɛ kunlu ralɛ nrenya yɛɛ bazi me Ɛzonlenlɛ Sua ne a.’

²⁰“Ɛdɛnkɛma ɛli ye ɛwɔkɛ ne mɔɔ ɔbɔle la azo. Ɔluakɛ meli Egya Devidi agya, meli ye ebia ne, melɛsie Yizilayɛ maanle ne, yɛɛ mezi Ɛzonlenlɛ Sua memaa Yizilayɛ Ɛdɛnkɛma Nyamenle ne.

²¹Eza meyɛ ɛleka wɔ Ɛzonlenlɛ Sua ne anu meva Ɛdɛnkɛma Ngyekyeleɛ Ɛlɛka ne mɔɔ awolɛ ndɛbandɛba ne mɔ wɔ nu la mezie ɛkɛ. Ɔ nee yɛ nlenya mɔ a yɛle ngyekyeleɛ ne wɔ mekɛ mɔɔ ɔyele bɛ ɔvile Yigyibiti la a.”

²²Akee Belemgbunli Sɔlɔmɔn gyinlanle Ɛdɛnkɛma azukponle ne anyunlu, ɔhakyile ɔ nye wɔ Yizilayɛma amuala anwo na ɔmanle ɔ sa zo

²³ɔzele kɛ, “O Ɛdɛnkɛma, Yizilayɛ Nyamenle, wɔmɔ, nyamenle biala nee wɔ ɛnzɛ wɔ anwuma anzɛɛ azɛlɛ ye azo; wɔmɔ, ɛdi wɔ ɛwɔkɛ zo, na ɛkile ɛhulolɛ kpole ɛmaa wɔ ngɛkɛlɛ mɔɔ fa bɛ ahonle kpokpoti yɛ tieyɛ maa wɔ la.

²⁴Ɛbɔle Egya Devidi ɛwɔkɛ; na ɛnɛ wɔmaa edwɛkɛ biala mɔɔ ɛhanle la ɛyɛ nɔhalɛ.

²⁵ O Ɛdɛnkɛma, Yizilayɛ Nyamenle, eza ɛbɔle Egya Devidi ɛwɔkɛ kɛ, ‘Saa ɛ mra mrenya ne mɔ nea boɛ, na bɛtoa me bo zo nɔhalɛ nu, kɛmɔ wɔdoa me nɔhalɛ nu la a, Yizilayɛ ebialilɛ ne ɛnrɛvi ɛ bo zo amra asa anu ɛlɛ.

²⁶Zɔhane ati, O Yizilayɛ Nyamenle, maa edwɛkɛ biala mɔɔ ɛhanle ɛhilele wɔ akɛlɛ, me ze Devidi la ɛyɛ zɔhane.’

²⁷ “Na Ɛdɛnkɛma, asoo amgba ɛbaradɛnla azɛlɛ ye azo bie? Wɔmɔ, anwuma nehane bɔbɔ le ekyi maa wɔ na sua ekyi ɛhye mɔɔ mezi la yɛɛ akee ɛkɛzo nu a.

²⁸O Ɛdɛnkɛma, me Nyamenle, tie me nzɛlɛlɛ nee me modolɛ na wɔ akɛlɛ a le me. Tie me ɛzunlɛ na yɛ mɔɔ ɛnɛ kenle ye melɛsɛlɛ wɔ la maa me.

²⁹ Sinza Ɛzonlenlɛ Sua ye alehyenlɛ nee aledwolɛ, ɔluakɛ ɛke yɛɛ wɔhile kɛ bɛzonle wɔ a, amaa wɔadie wɔ akɛlɛ nzɛlɛlɛ mɔɔ ɔyɛ wɔ ɛke la.

³⁰Mekɛ biala mɔɔ medame anzɛɛ wɔ menli Yizilayɛma kɛhakyi bɛ nye Ɛzonlenlɛ Sua ɛhye anwo kɛzɛlɛ wɔ la, tie yɛ modolɛ wɔ wɔ sua nu anwuma lɔ na fa yɛ ɛtane ne mɔ kyɛ yɛ.

³¹“Saa bɛ nee awie mɔ ba Ɛzonlenlɛ Sua ye anu azukponle ne anyunlu kɛ bie ɛyɛ ɛtane ɛtia ɔ gɔnwo na ɔbaza ɔ ne a,

³²tie bɛ wɔ anwuma lɔ, twe mɔɔ di fɔlɛ la anzo kɛmɔ ɔfɛta la, na yileyila mɔɔ di benle la.

³³“Saa wɔ menli Yizilayɛma yɛ anzosesebɛ na ɛmaa bɛ kpɔvolɛma di bɛ nwo zo konim, na nzinlii bɛsia bɛtoa ɛ bo zo, na bɛba Ɛzonlenlɛ Sua ye anu bɛbakpa wɔ kyɛlɛ, na bɛsɛlɛ wɔ kɛ ɛva ɛhyɛ bɛ a,

³⁴tie bɛ, fa bɛ ɛtane ne mɔ kyɛ bɛ, na fa bɛ sia bɛla azɛlɛ ne mɔɔ ɛvale ɛmanle bɛ ze mɔ la azo.

³⁵“Saa wɔ menli ne fo wɔ na ɛmaa ezule gyakyi ɛdɔlɛ kɛ ɛfa wɔadea bɛ, na bɛnu bɛ nwo, bɛkakyi bɛ nye Ɛzonlenlɛ Sua ye anwo bɛsɛlɛ wɔ wɔ mekɛ mɔɔ ɛlɛtea bɛ la a,

³⁶tie bɛ wɔ anwuma nehane, fa belemgbunli ne ɛtane kyɛ ye na fa wɔ maanle Yizilayɛma ɛtane ne mɔ kyɛ bɛ. Kilehile bɛ maa bɛli boɛ na tɔ ezule gua azɛlɛ ye mɔɔ wɔva wɔhyɛ bɛ la azo maa bɛ.

³⁷“Saa ɛhɔne anzɛɛ ewule nzane ba azɛlɛ ye azo, anzɛɛ ahumu nee abɛbɛ sɛkye bɛ aleɛ, saa bɛ kpɔvolɛma bɔbɔ fa konle batoa bɛ, anzɛɛ anwonyane bɔ bie mɔ na bɛbasɛlɛ wɔ wɔ ɛke a,

³⁸tie bɛ nzɛlɛlɛ nee bɛ modolɛ. Saa nyane ka wɔ menli Yizilayɛma bie anzɛɛ bɛ muala na bɛkakyi bɛ nye wɔ wɔ Ɛzonlenlɛ Sua ye anwo bɛbakoto bɛtɛlɛ bɛ sa nu bɛsɛlɛ a,

³⁹tie bɛ nzɛlɛlɛ wɔ anwuma lɔ, ɛleka mɔɔ ɛde la, fa bɛ ɛtane ne mɔ kyɛ bɛ na boa bɛ. Ɛ ngomekye yɛɛ ɛze ahonle nu a, yɛ maa awie biala, kɛmɔ bɛ nzɛlɛlɛ ne mɔ se la,

⁴⁰amaa mekɛ biala bɛayɛ tieyɛ bɛamaa wɔ wɔ mekɛ mɔɔ bɛde azɛlɛ ye mɔɔ ɛvale ɛmanle bɛ nlenya mɔ la azo la.

⁴¹“Saa ɛyɛvolɛ mɔɔ ɛnle Yizilayɛnli la te wɔ nganeɛ, nee ninyɛne mgbole mɔɔ wɔyɛ wɔmaa wɔ menli ne mɔ la anwo bie, na ɔba kɛ ɔbazonle wɔ na yeazɛlɛ wɔ Ɛzonlenlɛ Sua ye anu a,

⁴²

⁴³tie ye nzɛlɛlɛ. Tie ye wɔ anwuma nehane, ɛleka mɔɔ ɛde la, na yɛ debie biala mɔɔ ɔkpondɛ la maa ye. Ɛhye bamaa menli kɔsɔɔti mɔɔ wɔ aleɛabo la anwu wɔ na bɛazulo wɔ, kɛmɔ Yizilayɛma ɛnwu wɔ na bɛsulo wɔ la. Eza bɛbanwu kɛ amgba ɔwɔ kɛ bɛsonle wɔ wɔ sua ɛhye mɔɔ mezi memaa wɔ la anu.

⁴⁴“Saa wɔ menli ne kɔ kɛ bɛ nee bɛ kpɔvolɛma kaho na adenle biala mɔɔ ɛkɛva zo ɛkɛzoa bɛ la, saa bɛkakyi bɛ nye wɔ suakpole ɛhye mɔɔ ɛdawɔ wɔkpa nu wɔye la azo nee Ɛzonlenlɛ Sua ye mɔɔ mezi memaa wɔ la anwo, na bɛsɛlɛ wɔ a,

⁴⁵tie bɛ nzɛlɛlɛ nee bɛ modolɛ wɔ anwuma nehane na gyinla bɛ nzi maa bɛli konim.

⁴⁶“Kɛmɔ ɛtane ɛmkpa sonla nwo la, saa wɔ menli ne fo wɔ, maa ɛfa bɛ nwo ɛya na ɛmaa bɛ kpɔvolɛma di bɛ nwo zo konim, fa bɛ donvula kɔ nlɔnu wɔ maanle gyɛne mɔɔ bikye anzɛɛ wɔ moa moa la azo,

⁴⁷na bɛnu bɛ nwo wɔ maanle zɔhane anu bɛse kɛ, ‘Ɛdɛnkɛma, yɛvo wɔ, yɛyɛ ninyɛne mɔɔ ɛnfɛta la yɛtia wɔ’ a, tie bɛ nzɛlɛlɛ.

⁴⁸Saa bɛnu bɛ nwo wɔ azɛlɛ ne mɔɔ bɛ kpɔvolɛma hyele bɛ donvula hɔle zo la azo na bɛyeye bɛ munli nu, bɛkakyi bɛ nye wɔ bɛ ze mɔ azɛlɛ ye, nee suakpole ɛhye mɔɔ wɔkpa nu wɔye, nee Ɛzonlenlɛ Sua ye mɔɔ mezi memaa wɔ la anwo bɛsɛlɛ wɔ a,

⁴⁹tie bɛ nzɛlɛlɛ nee bɛ modolɛ wɔ anwuma lɔ ɛleka mɔɔ ɛde la, na gyinla bɛ nzi di bɛ edwɛkɛ maa bɛ.

⁵⁰Fa wɔ menli ne mɔɔ ɛvo wɔ la ɛtane ne mɔ nee bɛ mɛladonlɛ kyɛ bɛ na maa kpɔvolɛma mɔɔ vale bɛ hɔle maanle gyɛne zɔhane anu la ɛnwu bɛ anwunvɔne.

⁵¹Ɔluakɛ bɛle wɔ menli yɛɛ ɛdawɔ a ɛyele bɛ ɛvile senle tandane ne anu wɔ Yigyibiti a.

⁵²“ O Tumivolɛ Ɛdɛnkɛma, nwu wɔ menli Yizilayɛma nee bɛ belemgbunli ne anwunvɔne na mekɛ biala mɔɔ bɛkɛvɛlɛ wɔ la tie bɛ modolɛ.

⁵³Ɔluakɛ wɔmɔ yɛɛ mekɛ mɔɔ ɛ nee yɛ ze mɔ vi Yigyibiti ba la ɛluale wɔ sonvolɛ Mosisi anwo zo ɛhanle kɛ wɔkpa nu wɔye bɛ wɔvi menli mɔɔ wɔ ewiade la amuala anu a.”

⁵⁴Sɔlɔmɔn hotole Ɛdɛnkɛma azukponle ne anyunlu, ɔmanle ɔ sa zo anwuma, ɔdɛlɛle nuhua na yeazɛlɛ. Ɔwiele la ɔdwazole.

⁵⁵Akee ɔmanle ɔ ne zo ɔzɛlɛle Ɛdɛnkɛma nyilalɛ ɔmanle ɛlɔne ne amuala. Ɔse,

⁵⁶ “Bɛye Ɛdɛnkɛma ayɛlɛ kɛ yemaa ye menli ne anzo nu ɛdwo bɛ a. Mɔɔ ɔhanle la ɛyɛ zɔhane. Edwɛkɛ mɔɔ ɔluale ye akɛlɛ Mosisi anwo zo ɔhanle la ɛyɛ nɔhalɛ mɔɔ ko bɔbɔ anga nu a.

⁵⁷Ɛdɛnkɛma yɛ Nyamenle ne nee yɛ ɛlua, kɛmɔ ɔ nee yɛ ze mɔ luale la; ɔmmagyakyi yɛ yɛɛ ɔmmakpo yɛ.

⁵⁸Ɔboa yɛ ɔmaa yɛyɛ tieyɛ yɛmaa ye, amaa dahuu yɛayɛ ye ɛhulolɛdeɛ na yɛali ye mɛla nee ye ngilehilelɛ mɔɔ ɔvale ɔmanle yɛ ze mɔ la azo.

⁵⁹Ɛdɛnkɛma yɛ Nyamenle ne ɛhakye me nzɛlɛlɛ ye mɔɔ mezɛlɛ la nee debie biala mɔɔ mebiza la. Ɛdɛnkɛma ɛnwu ye menli Yizilayɛma nee bɛ belemgbunli ne anwunvɔne wɔ bɛ ɛhyianlɛ nu dahuu.

⁶⁰Ɛhye bamaa ewiade amra amuala anwu kɛ Ɛdɛnkɛma le Nyamenle, bieko ɛnle ɛkɛ.

⁶¹“Yizilayɛma, bɛva bɛ ahonle muala bɛmaa Ɛdɛnkɛma yɛ Nyamenle ne nɔhalɛ nu na bɛli ye mɛla ne mɔ azo, kɛmɔ bɛyɛ ye ɛnɛ la.”

⁶²Akee Belemgbunli Sɔlɔmɔn nee Yizilayɛma amuala bɔle azu manle Ɛdɛnkɛma.

⁶³Sɔlɔmɔn vale nlankɛ apenle ngoko abulanwiɔ nee nwiɔ yɛɛ mboane apenle ngoko ɛya ko abulanwiɔ bɔle anzonudwolɛ azu manle Ɛdɛnkɛma. Na belemgbunli nee Yizilayɛma kɔsɔɔti dule Ɛzonlenlɛ Sua ne manle Nyamenle.

⁶⁴Kenle ko ne ala eza Sɔlɔmɔn bukele alie wienyi ne mɔɔ la Ɛzonlenlɛ Sua ne anyunlu la. Ɛkɛ ne noko, ɔyelale nane ɛnlome ɔbɔle azu yɛɛ ɔbɔle anzonudwolɛ azu. Ɔboalekɛ kɔbele azukponle ne mɔɔ wɔ Ɛdɛnkɛma Ɛzonlenlɛ Sua ne anu la le ekyi maa ninyɛne ne mɔ.

⁶⁵Yemɔti Sɔlɔmɔn nee Yizilayɛma lile Kpɔda Bo Ɛdɛnlanlɛ Ɛvoyia ne toonwo kenle nsuu. Yizilayɛ maanlema yiale kpole bie. Menli vi ɛbɔ ye Heemate Ademgbole nu dedee mɔɔ bagua Yigyibiti ɛweɛne zo la rale.

⁶⁶Sɔlɔmɔn manle ɛlɔne ne zandele kenle mɔtwɛ ne azo. Awie biala anye liele Sɔlɔmɔn anwo na ɔvale fɛlɛkolilɛ ɔhɔle sua nu kɛ Ɛdɛnkɛma ɛyila ye akɛlɛ Devidi nee ye menli Yizilayɛma a.