Read Nzema 2 Arl 1 Bible Online

2 Arl 1 - Nzema bible

2 Arl 1

¹Mɔɔ Yizilayɛ Belemgbunli Ehabe wule la, Mowabe maanle ne dele atua wɔ Yizilayɛma anwo zo.

²Yizilayɛ Belemgbunli Ehazaya vi ye sua ne ati zo bane ne azo dɔle aze wɔ ye belemgbunli sua nu ɛkɛ wɔ Samɛlea, na azedɔlɛ ne bɔle ye anwonyane. Yemɔti ɔzoanle kɛ, “Bɛhɔ Filisitia suakpole Ɛkelɔn azo bɛhɔbiza bozonle Beeyalezibɛbe saa menwɔde kpɔkɛ a.”

³Na Ɛdɛnkɛma soanvolɛ zele Yilaegya mɔɔ vi Tehyebe la kɛ, “Dwazo na kɔyia menli mɔɔ Samɛlea belemgbunli ne ɛzoa bɛ la na biza bɛ kɛ, ‘Ɛnee bɛnea a Nyamenle ɛnle Yizilayɛ ati yɛɛ bɛlɛkɔ Ɛkelɔn bozonle Beeyalezibɛbe ɛkɛ bɛahɔbiza anwonyane ne anwo la ɔ?’

⁴Zɔhane ati Ɛdɛnkɛma se, bɛze belemgbunli ne kɛ, ‘Anwonyane ne mɔɔ ɛbɔ wɔ la, ɛnrɛde kpɔkɛ, ɛbawu.’ ” Yilaegya hɔle.

⁵Na soanvolɛma ne noko ziale hɔle belemgbunli ne ɛkɛ. Belemgbunli ne bizale bɛ kɛ, “Duzu ati a bɛzia bɛra a?”

⁶Bɛbuale ye kɛ, “Nrenya bie rayiale yɛ na ɔzele yɛ kɛ, ‘Bɛzia bɛhɔze belemgbunli ne mɔɔ zoanle bɛ la kɛ: Ɛdɛnkɛma se, ɛnee ɛnea a Nyamenle ɛnle Yizilayɛ ati yɛɛ ɛlɛkɔ Ɛkelɔn bozonle Beeyalezibɛbe ɛkɛ wɔahɔbiza ɛ nwo a? Zɔhane ati, anwonyane ne mɔɔ ɛbɔ wɔ la, ɛnrɛde kpɔkɛ, ɛbawu.’ ”

⁷Belemgbunli ne bizale bɛ kɛ, “Kɛ nrenya ne mɔɔ hanle ɛhye mɔ hilele bɛ la si de ɛ?”

⁸Bɛbuale ye kɛ, “Nrenya ne wula enrinli ɛdanlɛ tɛladeɛ[1] na nwoma akyeso hye ye avinli.” Belemgbunli ne zele kɛ, “Yilaegya mɔɔ vi Tehyebe la ɔ.”

⁹Na Belemgbunli zoanle ye safohyenlema ne anu ko manle ɔvale menli abulanlu kɛ bɛhɔva Yilaegya bɛrɛla. Safohyenle ne nee ye ɛlɔnema ne hɔdole Yilaegya wɔ boka bie azo na ɔzele ye kɛ, “Nyamenle sonla, belemgbunli se yɛrava wɔ yɛrɛla.”

¹⁰ Yilaegya buale ye kɛ, “Saa mele Nyamenle sonla a ɛnee senle vi anwuma ɛrayela wɔ nee wɔ ɛlɔnema abulanlu ne.” Ɛkɛ ne ala senle vi anwuma rayelale safohyenle ne nee ye ɛlɔnema abulanlu ne.

¹¹Belemgbunli ne eza zoanle safohyenle fofolɛ nee menli abulanlu bieko. Ɔdaye noko ɔzele Yilaegya kɛ, “Nyamenle sonla, belemgbunli se yɛrava wɔ yɛrɛla kɛkala.”

¹²Na Yilaegya buale kɛ, “Saa mele Nyamenle sonla a ɛnee senle vi anwuma ɛrayela wɔ nee wɔ ɛlɔnema abulanlu ne.” Na ɛkɛ ne ala Nyamenle senle ne vi anwuma rayelale safohyenle ne nee ye ɛlɔnema abulanlu ne.

¹³Fane nsa ne azo eza Belemgbunli ne zoanle safohyenle bieko nee ye ɛlɔnema abulanlu. Safohyenle ɛhye mɔɔ tɔ zo nsa la hɔdule dɔle Yilaegya agyakɛ anu na ɔzɛlɛle ye kɛ, “O Nyamenle sonla, mebodo wɔ, maa menyia me ti na nwu me menli abulanlu ye anwunvɔne.

¹⁴Nea, senle vi anwuma rayelale alumua safohyenlema nwiɔ ne nee bɛ ɛlɔnema abulanlu abulanlu ne. Noko mesɛlɛ wɔ, nwu me anwunvɔne na maa menyia me ti.”

¹⁵Nyamenle soanvolɛ ne zele Yilaegya kɛ, “Mmasulo. Dwazo ɛ nee ye bɛhɔ.” Yemɔti Yilaegya dwazole na ɔ nee ye bɛhɔle belemgbunli ne ɛkɛ, na ɔzele ye kɛ,

¹⁶“Kɛ Ɛdɛnkɛma se la ɛne, ‘Kɛmɔ wɔzoa menli kɛ bɛhɔ Ɛkelɔn bozonle Beeyalezibɛbe ɛkɛ bɛhɔbiza ɛ nwo la, ɛnee ɛnea a Nyamenle ɛnle Yizilayɛ ɔ? Zɔhane ati ɛvi wɔ anwonyane ne anu ɛnrɛdwazo, ɛbawu.’ ”

¹⁷Yemɔti kɛmɔ Ɛdɛnkɛma luale Yilaegya anwo zo hanle la, Belemgbunli Ehazaya wule na ɔ diema Dwɔlam lile ebia ne. Ehazaya ɛnee ɛnlɛ ɔ ra nrenya yɛɛ ɔlile ɛvolɛ nwiɔ wɔ ebia ne azo. Ɔ ze a le Dwuda belemgbunli Gyɛhɔhyafate.

¹⁸Debie biala mɔɔ Belemgbunli Ehazaya yɛle la bɛhɛlɛ bɛ muala wɔ Yizilayɛ Arelemgbunli, Tetedwɛkɛ Mbuluku ne mɔ anu.