Read Nzema 2 Arl 10 Bible Online

2 Arl 10 - Nzema bible

2 Arl 10

¹Ehabe abo zo amra mɔɔ wɔ Samɛlea la le abulasuu. Yemɔti Gyihu hɛlɛle ngɛlata hɔmanle menli mɔɔ nea Samɛlea suakpole ne la mgbanyima nee bɛdabɛ mɔɔ Ehabe abo zo amra ne bie mɔ nee bɛ de la kɛ

²“Saa bɛ sa ka kɛlata ne a ɛnee kɛmɔ bɛmɛ a bɛnea Ehabe abo zo amra ne anwo zo na eza bɛlɛ konle ehwili, mgbɔnwɔ, konle ninyɛne nee aranemgbole la

³bɛbɔ mɔdenle ala bɛnlea bɛye nuhua ko mɔɔ bɛdabɛ bɛkulo ye la bɛzie ye belemgbunli na akee bɛho bɛlie ɔ ti.”

⁴Ɛzulolɛ hanle Samɛlea mgbanyima na bɛhanle kɛ, “Arelemgbunli mgbole nwiɔ bɔbɔ angola Gyihu anyunlu gyinla na yɛmɛ.”

⁵Yemɔti kpanyinli ne mɔɔ nea belemgbunli awuke ne azo, mgbanyima ne mɔ yɛɛ menli mɔɔ nea Ehabe abo zo amra ne la bɔle nu zoanle manle bɛhɔzele Gyihu kɛ, “Yɛwɔ ɛ bo, yemɔti yɛbayɛ debie biala mɔɔ ɛkɛze yɛ la. Yɛnrɛzie awie biala belemgbunli, yɛ mɔɔ ɛdawɔ ɛnea a ɔle kpalɛ la.”

⁶Gyihu eza hɛlɛle bɛ bieko na ɔzele bɛ kɛ, “Saa bɛgyi me nzi na bɛyɛ bɛ adwenle kɛ bɛkɛli mɔɔ menwɔha la azo a, ɛnee ɛhyema bekezɛ ala, bɛva Ehabe abo zo amra ne mɔ adile bɛrɛlɛ me wɔ Gyɛzɛlii ɛke.” Ehabe abo zo amra abulasuu ne wɔ mgbanyima mɔɔ wɔ sua ne azo la asa anu, bɛlɛtete bɛ.

⁷Mɔɔ bɛ sa hanle Gyihu kɛlata ne wɔ Samɛlea la, mgbanyima ne mɔ hunle Ehabe abo zo amra abulasuu ne amuala, bɛvale bɛ adile ne mɔ bɛguale ahɛndɛne nu na bɛvale bɛhɔmanle Gyihu wɔ Gyɛzɛlii.

⁸Mɔɔ bɛhanle bɛhilele Gyihu kɛ bɛva Ehabe abo zo amra ne mɔ adile bɛra la, ɔzele kɛ bɛhuohua bɛ edukue nwiɔ wɔ suakpole ne anlenkɛ kpole ne anloa na bɛgyakyi bɛ ɛkɛ bɛmaa aleɛ ɛhye zo.

⁹Aleɛ hyenle nwonlomɔ la Gyihu hɔle anlenkɛ kpole ne anloa na ɔzele bɛ kɛ, “Mame yɛɛ mengyehyɛle mengunle Belemgbunli Dwɔlam a. Bɛnli nwolɛ ɛzonle; medame a medi nwolɛ ɛzonle a. Na ɛhye mɔ noko nwane a hunle bɛ a?

¹⁰Ɛhye kile kɛ, edwɛkɛ biala mɔɔ Ɛdɛnkɛma hanle wɔ Ehabe nee ɔ bo zo amra anwo la bayɛ nɔhalɛ. Ɛdɛnkɛma ɛyɛ mɔɔ ɔluale ye kpɔmanvolɛ Yilaegya anwo zo ɔhanle la.”

¹¹ Akee Gyihu hunle Ehabe abo zo amra mɔɔ wɔ Gyɛzɛlii la amuala, ye sonvolɛma, ɔ gɔnwo mɔ, yɛɛ ye sɛlɛvolɛma. Ko bɔbɔ, bɛangyakyi ye.

¹²Kenle ko Gyihu vile Gyɛzɛlii kɛ ɔkɔ Samɛlea. Ɔlua adenle zo la ɔradwule ɛleka bie mɔɔ bɛfɛlɛ ye, “Mboaneneavolɛma Azokoɛleɛ” la,

¹³na ɔyiale Dwuda Belemgbunli Ehazaya anwo amra bie mɔ na ɔbizale bɛ kɛ, “Bɛmɛ a le nwane mɔ?” Bɛbuale ye kɛ, “Yɛle Ehazaya anwo amra. Yɛkɔ Gyɛzɛlii yɛahɔyɛ Belemgbunli Raalɛ Gyɛzɛbɛle anwo amra nee ye mbusua ne gyakɔ.”

¹⁴Gyihu zele ye ɛlɔnema mɔɔ ɔ nee bɛ lua la kɛ, “Bɛhye bɛ.” Bɛhyele bɛ na bɛ nee bɛ hɔle kuma bie mɔɔ zua azokoɛleɛ ne la anloa bɛhɔhunle bɛ muala. Bɛlua menli abulanla nee nwiɔ. Bɛangyakyi ko bɔbɔ.

¹⁵Gyihu zile nu bieko kɛ ɔkɔ. Ɔlua adenle zo la Rilikabe ara Dwɔnadabe rayiale ye. Gyihu bizale ye ahye na ɔzele ye kɛ, “Wɔmɔ, yɛ mu nwiɔ yɛ adwenle le ko. Ɛkɛgyinla me nzi ɔ?” Dwɔnadabe buale kɛ, “Ɛhɛe, megyi ɛ nzi.” Gyihu zele ye kɛ, “Saa ɔle zɔ a ɛnee soma me sa nu ɛ!” Bɛzomanle bɛ sa nu na Gyihu manle ɔravole ye ehwili ne anu.

¹⁶Na ɔzele ye kɛ, “Bɛla maa yɛhɔ na nea kɛ mezi meva me nwo amuala memaa Ɛdɛnkɛma la.” Na bɛ mu nwiɔ bɛdɛnlanle ehwili ne anu bɛhɔle Samɛlea.

¹⁷Bɛdwule ɛkɛ ne la, Gyihu hunle Ehabe anwo amra ne mɔɔ hale la amuala; yeangyakyi ko bɔbɔ. Ɛhye yɛɛ Ɛdɛnkɛma hanle hilele Yilaegya kɛ ɔbazi a.

¹⁸Akee Gyihu vɛlɛle Samɛlea ezuavolɛ ne manle bɛyiale na ɔzele bɛ kɛ, “Belemgbunli Ehabe zonlenle bozonle Beeyale ekyii bie, na mame Gyihu, mebazonle ye kpole kpalɛ.

¹⁹Zɔhane ati bɛvɛlɛvɛlɛ Beeyale ahɔmenle ne mɔ, bɛdabɛ mɔɔ bɛsonle ye la kɔsɔɔti nee bɛdabɛ mɔɔ bɛye ngonyia la amuala, bɛmmamaa bie ka amozi, ɔluakɛ melɛ azu kpole bie mebɔ memaa Beeyale. Mɔɔ kɛva ɔ nwo kɛvea la bɛkɛhu ye.” (Gyihu vale nrɛlɛbɛ dole nwolɛ yɛle amaa ɔ sa aha bɛdabɛ mɔɔ bɛsonle bozonle Beeyale la na yeahu bɛ.)

²⁰Akee Gyihu zele kɛ, “Bɛhile kenle bɛmaa yɛzonle Beeyale yɛli ye eni.” Bɛbɔle edwɛkɛ ne nolo.

²¹Gyihu manle bɛvale nrɛlaleɛ ne bɛhɔle Yizilayɛ maanle ne anu amuala na bɛdabɛ mɔɔ bɛsonle Beeyale la amuala anloa yiale. Biala fee anga amozi. Bɛ muala bɛhɔle Beeyale bozonle sua ne anu bɛmanle sua ne yile, ɔvi ɔ ti ɔhɔdwule ɔ bo.

²²Akee ɔzele ahenle mɔɔ nea adɛladeɛ ne mɔ azo la kɛ ɔva adɛladeɛ ne mɔ ɔvinde na ɔhyɛ ɔmaa menli mɔɔ ɛra bazonle bozonle ne la. Yemɔti bɛvale adɛladeɛ ne bɛrɛlɛle menli ne.

²³Akee Gyihu nee Dwɔnadabe wolole sua ne anu. Ɔzele menli mɔɔ ɛra bazonle Beeyale la kɛ, “Bɛnleɛnlea nuhua saa bɛdabɛ mɔɔ bɛsonle Ɛdɛnkɛma la bie wɔ yɛ avinli a. Bɛmaa ɔha yɛdayɛ mɔɔ yɛsonle bozonle Beeyale la angome.”

²⁴Akee Gyihu hɔle kɛ ɔkabɔ azu ne na yeayela nane ne yeamaa Beeyale. Mekɛ ne anu ɛnee yemaa menli abulatwɛ ɛzia na yeze bɛ kɛ, “Ɛdawɔ mɔɔ ɛkɛmaa menli mɔɔ meva bɛ mewula bɛ sa nu la bie kɛvi ɛsalɛ la bɛbahu wɔ.”

²⁵Mɔɔ Gyihu vale nane ne mɔɔ bɛyela ye bɛabɔ azu bɛamaa Beeyale la manle bɛ wiele la, ɔvindele na ɔrazele menli mɔɔ ɛzia la kɛ, “Bɛhɔ nuhua bɛhɔhu awie biala mɔɔ wɔ ɛkɛ ne la. Bɛmmamaa ko bɔbɔ fi ɛsalɛ.” Ɛkɛ ne ala ɛlɔnema ne wolole bozonle sua ne anu na bɛhunle awie biala mɔɔ wɔ ɛkɛ ne la na bɛhwenlenle bɛ avunli aze bɛvindele. Akee bɛwolole bɛhɔle ɛleka mɔɔ bozonle ne ananze ne wɔ la,

²⁶na bɛdule sika ne mɔɔ bɛkpɔnla ye ɛkɛ ne la bɛvindele bɛrayelale ye.

²⁷Yemɔti bɛyelale Beeyale sika ne, bɛyelale ye bozonle sua ne na bɛvale ɛkɛ ne bɛyɛle ɛfo. Ɛnɛ bɔbɔ ala ɔtɛde zɔhane.

²⁸Ɛnee kɛ Gyihu yɛle mɔɔ ɔholale ɔdule Beeyale ɛzonlenlɛ bo wɔ Yizilayɛ maanle nu la ɛne.

²⁹ Noko Gyihu andwe ɔ nwo anvi Gyɛlɔbowam ninyɛndane ne mɔ anwo. Ɔdaye noko ɔmanle Yizilayɛma zonlenle nlankɛ ananze mɔɔ bɛva ezukoa nvutuke bɛyɛ la, kɛmɔ Gyɛlɔbowam yɛle wɔ Bɛtɛle nee Dan la.

³⁰Na Ɛdɛnkɛma zele Gyihu kɛ, “Kɛmɔ wɔyɛ mɔɔ sɔ me nye na wɔyɛ Ehabe sua nu amra, kɛmɔ mekpondɛ la ati, mebɔ wɔ ɛwɔkɛ kɛ ɛ bo zo amra bali Yizilayɛ ebia ne bie toonwo yeahɔdwu awolɛndoazo nna ne azo.”

³¹Noko Gyihu annea ɔ nwo boɛ, yeanli Ɛdɛnkɛma, Yizilayɛ Nyamenle ne mɛla ne azo nɔhalɛ nu, yeangyakyi ɛtane ne mɔ mɔɔ Gyɛlɔbowam yɛle a ɔmanle Yizilayɛma yɛle ɛtane la anzi ɛlilɛ.

³²Mekɛ ne anu Ɛdɛnkɛma bɔle ɔ bo kɛ ɔpɛ Yizilayɛ azɛlɛ ne foa ko yeagua. Selea Belemgbunli Hazeeyɛle honle vale Yizilayɛ maanle ne,

³³ɔbɔle ye Dwɔdan aduduleɛ afoa nu ɔvale Geleade nee Beehyan azɛlɛ ne amuala, ɔdwule Alowɛ wɔ Azule Annɔn ne anloa. Azɛlɛ ɛhye azo a Gade, Wulubɛn nee Manasɛ Aduduleɛ mbusua ekpunli ne mɔ de a.

³⁴Akee gyima mɔɔ hale mɔɔ Gyihu yɛle nee ye nyɛleɛ ne amuala, bɛhɛlɛ bɛ wɔ Yizilayɛ Arelemgbunli Tetedwɛkɛ Mbuluku ne mɔ anu.

³⁵Belemgbunli Gyihu hɔle ayile nu na bɛwulale ye mrɛlatɛlɛ nu wɔ Samɛlea. Ɔ ra Gyɛhowahaze a lile ebia ne a.

³⁶Gyihu lile Yizilayɛ belemgbunli ɛvolɛ abulanwiɔ nee mɔtwɛ. Ɔdɛnlanle Samɛlea a ɔlile ebia ne a.