Read Nzema 2 Arl 11 Bible Online

2 Arl 11 - Nzema bible

2 Arl 11

¹Dwuda Belemgbunli Raalɛ Atalaya dele kɛ bɛhu ɔ ra Ehazaya la, ɔmanle bɛhunle belemgbunli ne anwo amra kɔsɔɔti.

²Ehazaya ara nrenya ekyi ko ala a vile nu a. Yemɔ a le Dwowahye. Ehazaya adiema raalɛ Gyihɔhyɛba a vale kakula ne veale a. Gyihɔhyɛba ɔ ze a le Belemgbunli Gyɛhɔlam. Ɔvale kakula Dwowahye nee ahenle mɔɔ nea ye la ɔveale Ɛzonlenlɛ sua ne ekpumgbunli ne mɔ ko anu na ɔdaye ɔnleanle bɛ. Yemɔti Atalaya asa anga ye angu ye.

³Gyihɔhyɛba nleanle kakula ne ɛvolɛ nsia wɔ mekɛ mɔɔ ɛnee ɔvea Ɛzonlenlɛ sua ne anu la. Mekɛ ne anu ɛnee Atalaya a ɛlɛdi belemgbunli wɔ Dwuda a.

⁴Ehazaya wule la, ye ɛvolɛ nsuu ne azo, sɛlɛvolɛ Gyɛhɔyada zoanle manle bɛhɔvale belemgbunli sinzavolɛma, nee belemgbunli sua nu sinzavolɛma ne mɔ bɛrale Ɛzonlenlɛ sua ne anu. Ɔ nee bɛ yɛle ngyehyɛlɛ na ɔmanle bɛlile amonle bɛhyele ɔ bo wɔ Ɛzonlenlɛ Sua ne anu, na akee ɔvale Belemgbunli Ehazaya ara nrenya Dwowahye ɔhilele bɛ,

⁵na ɔzele bɛ kɛ, “Mɔɔ mekpondɛ kɛ bɛyɛ la ɛne: Bɛhyɛ bɛ nuhua ekpunli nsa. Ekpunli ko ne mɔɔ bara gyima Ɛnwomenlelielɛ Kenle ne la ɛhyɛ bɛ nwo nsa. Ko ɛzinza belemgbunli sua nu ɛkɛ,

⁶ko ɛhɔzinza Sɛɛ Anlenkɛ Kpole ne, na ko ne mɔɔ kɛha la ɛgyinla sinzavolɛma ne anzi wɔ anuhɔlɛ kpole ne anloa.

⁷Ekpunli nwiɔ ne mɔɔ ɛmba gyima Ɛnwomenlelielɛ kenle ne la bahɔ Ɛzonlenlɛ Sua ne anu ahɔzinza belemgbunli ne.

⁸Bɛzinza Belemgbunli Dwowahye kpalɛ kpalɛ. Bɛhwe bɛ dadeɛ ne mɔ na ɛleka biala mɔɔ ɔkɔ la bɛli ɔ nzi. Awie biala mɔɔ kɛze kɛ ɔba bɛ nwo ɛkɛ ne la, bɛhu ye.”

⁹Safohyenlema ne yɛle tieyɛ manle Sɛlɛvolɛ Gyɛhɔyada na bɛvale bɛ ɛlɔnema ne bɛrale, bɛdabɛ mɔɔ bɛnle gyima nu Ɛnwomenlelielɛ Kenle ne nee bɛdabɛ mɔɔ bɛwɔ gyima nu la amuala.

¹⁰Sɛlɛvolɛ ne vale Belemgbunli Devidi atwɛ ne mɔ nee bɛ sa nu enyinlike ne mɔ manle bɛ. Ninyɛne ɛhye mɔ ɛnee wɔ Ɛzonlenlɛ Sua ne anu.

¹¹Akee ɔmanle sinzavolɛma ne hwenle bɛ dadeɛ ne mɔ na bɛgyinlanle ketee wɔ Ɛzonlenlɛ Sua ne sɔlɔ nee nyiakɛ nee azukponle ne anwo kɛ bɛsinza belemgbunli ne.

¹²Akee Gyɛhɔyada vale Dwowahye vindele, ɔzoale ye belemgbunli kyɛlɛ ne na ɔvale mɛla buluku ne mɔɔ maa ye belemgbunlililɛ ne di munli la ɔmanle ye. Akee bɛguale nwole wɔ Dwowahye ati zo na bɛziele ye belemgbunli. Menli ne bɔle bɛ sa nu na bɛdeanle nuhua kɛ, “Belemgbunli ɛnyi ɛhyɛ!”

¹³Belemgbunli Raalɛ Atalaya dele sinzavolɛma ne nee menli ne alɛra mɔɔ bɛlɛyɛ la, ɔhɔle menli ne mɔ anwo ɛkɛ wɔ Ɛzonlenlɛ Sua ne anu

¹⁴na ɔkamaa ɔ nye zo la, ɔnwunle kɛ belemgbunli fofolɛ gyi sua ne mpila ne mɔ ko anwo, kɛmɔ amaamuo ne se la. Safohyenlema ne nee menli mɔɔ bɔ aweɛne ndendenle ne mɔ la gyigyi ɔ nwo ɛkɛ, na menli ne mɔ kɔsɔɔti anye ɛlie, na bɛlɛbɔ aweɛne zɛhae ala. Ɛkɛ ne ala Atalaya vale ɛya suosuanle ye tɛladeɛ mɔɔ ɔwula la anu na ɔdeanle nu kɛ, “Maamɔlɛ! Maamɔlɛ! Ɛhye le maamɔvo ɛbɛla.”

¹⁵Gyɛhɔyada angulo kɛ bɛkɛhu Atalaya wɔ Ɛzonlenlɛ sua ne anu, yemɔti ɔzele safohyenlema ne mɔ kɛ, “Bɛva ye bɛlua sinzavolɛma ɛhonlone ne mɔ avinli bɛvinde, na awie biala mɔɔ kɛyɛ kɛ ɔbalie ye la, bɛhu ye.”

¹⁶Bɛhyele ye ɛkɛ ne ala bɛvale ye bɛluale Ɛkpɔnwɔ Anlenkɛ Kpole ne anu bɛhɔle suakunlu ɛkɛ ne na bɛhunle ye.

¹⁷Sɛlɛvolɛ Gyɛhɔyada manle Belemgbunli Dwowahye nee menli ne nee Ɛdɛnkɛma yɛle ngyehyɛlɛ na bɛkyekyele ɔ bo kɛ bɛkɛyɛ Ɛdɛnkɛma ɔdaye ye menli. Eza ɔmanle belemgbunli nee menli ne yɛle ngyekyeleɛ.

¹⁸Akee menli ne amuala hɔle Beeyale bozonle sua ne anwo na bɛbubule ye bɛguale. Bɛbubule ye azukponle ne nee ye ananze ne mɔ amuala na bɛhunle Beeyale kɔmenle Matan wɔ azukponle ne mɔ anyunlu. Gyɛhɔyada vale sinzavolɛma manle bɛrazinzale Ɛzonlenlɛ Sua ne.

¹⁹Akee ɔdaye, safohyenlema ne, belemgbunli sinzavolɛma ne, yɛɛ suakunlu ɛkɛ ne sinzavolɛma ne lile belemgbunli ne anyunlu nee ye vi Ɛzonlenlɛ sua ne anu hɔle belemgbunli sua nu. Menli ne amuala doale bɛ. Dwowahye vale Sinzavolɛma Anlenkɛ Kpole ne anu a hɔdɛnlanle ye belemgbunli ebia ne anu a.

²⁰Menli ne amuala anye liele. Bɛhunle Atalaya la, suakpole ne azo guale diinyi. Bɛhunle ye wɔ belemgbunli suakunlu ɛkɛ ne.

²¹Dwowahye kali belemgbunli la ɛnee yeli ɛvolɛ nsuu.